2015年4月30日 星期四

古物仔_走街生理篇_賣枝仔冰賣芋仔冰:陳慶芳收藏/蕭平治翕相

古物仔_走街生理篇_賣枝仔冰賣芋仔冰:陳慶芳收藏/蕭平治翕相
▲食冰人人愛,食冰心涼脾土開,kài趣味。想著囡仔時代suh枝仔冰、tsn̄g芋仔冰,tok枝仔冰、tok芋仔冰ê記智閣較心適懷念。
「pā-pu pā-pu」是40~60歲人ê記智。
「giang giang giang giang」大約是60~80歲老歲仔人ê懷念。
一甲子前囡仔時,賣枝仔冰--ē,騎一台鐵馬,後載載一跤冰桶,giang-giang-á一下「giang giang giang giang」,to̍h-ē圍倚來1-tīn人bueh買枝仔冰,清冰上俗,1支1角銀,soh/suh無幾喙to̍h真正pìⁿ-tsiâⁿ白tsiáⁿ無味ê清冰,紅豆冰、鳳梨冰、四果冰、米糕冰,1支2角銀,有時tshân-tshân買--1支,ē-tàng tsn̄g kah喙瀾冰水ta̍p-ta̍p-tin。
若是載芋冰桶賣芋仔冰--e,芋仔原料上合味,mā有雞卵冰、綠豆冰,1粒1角銀,用秫米甌仔貯,芋仔冰tsn̄g了連芋冰甌仔mā落腹。1粒無夠氣,2粒無hit-lō liōng-siōng錢,規氣kah伊賭運氣,tok芋仔冰。
賣冰--e「輪盤(lián-puâⁿ)」提--出來,phah-hō͘轉,買冰--e「tok鑽仔」tsi̍t-ē tok,「ua̋!1粒--niâ。」這1粒比kō͘買--è有較細粒,莫怪失望,這擺無著,換後擺有錢tsiah-koh來tok「天霸王」--ē。
想起斯當時,學生囡仔去遠足,he賣枝仔冰--e 賣芋仔冰--e lóng mā綴佇後壁做陣遠足,庄腳野外,隔壁鄉鎮,學生kō͘行路,賣冰騎鐵馬,一路行一路歇睏兼tshit-thô,等到目的地,食完飯包,賣冰ê枝仔冰、芋仔冰m̄-nā賣了了,連he seh-tī冰桶鹹鹹薄薄ê冰角,mā hō͘人買去sńg,ù面冷ki-ki,so手涼也涼⋯囡仔時。
△芋冰𣁳仔(ō͘-ping khat-á):サイズ/saizu/尺寸無仝,大細支差真濟,khat--起來 ê芋仔冰大細粒mā差真濟。
△tok芋仔冰若tok-tio̍h天霸王,to̍h是用tsit款上大支khat ê大粒芋仔冰,ē使得tsn̄g規晡久,歡喜幾若工,甚至歡喜幾若kó͘月幾若冬。

△芋冰𣁳仔:半球形內面張機關,𣁳仔柄若tēⁿ-uá[向內壓],半球形內面hit个半圓箍仔to̍h-ē徙振動,kā芋仔冰kueh--落來[刮下來]。







△tok芋仔冰tok枝仔冰ê轉盤(lián-puâⁿ),賣冰--e家己設計,柴輪仔,畫巡分大細縫,若是tok芋仔冰,有1粒2粒3粒4粒5粒kap天霸王無仝ê著獎,天霸王hit縫上細縫,tok--tio̍h機會上蓋少,m̄-koh若無張持去hō͘ tok--tio̍h,m̄-nā ē tsn̄g規晡久,koh ē-tàng歡喜幾若工。
△tok枝仔冰有無共款ê設計,tok--落去ê趣味mā是仝款。
△枝仔冰捾箱:貯bē濟,方便扭掠,需要快速賣完,tsiah-koh tiàm枝仔冰桶補充。囡仔人to̍h有才調捾leh賣。

△發出「pā-pu pā-pu 」ê鼓吹[喇叭]。


△冰瓶(ping-pân):內膽是雙重玻璃鍍銀處理,保溫效果tsiâⁿ強,ē使得貯芋仔冰,mā ē使得貯枝仔冰,捾leh四界tshng四界賣,kài有機動性。

△giang-giang-á[搖鐘]:芋仔冰枝仔冰叫賣家私。
△kō͘揹--ē ê枝仔冰桶,有縛帶,ē使得揹tiàm肩頭,比較較重,需要大人揹leh賣。
△枝仔冰桶有內層(lāi-tsân),中間ē使得seh冰角(加鹽ê冰角),保持較久ê冷度。
△若bueh外埠頭賣枝仔冰,to̍h需要kō͘鐵馬載。













2015年4月27日 星期一

古物仔_走街生理篇_賣冰賣礤冰:陳慶芳收藏/蕭平治翕相

古物仔_走街生理篇_賣冰賣礤冰:陳慶芳收藏/蕭平治翕相
▲俗語講「第一賣冰,第二做醫生。」做醫生好趁逐家知,賣冰賣冰水好趁mā事實,he冰角鑿鑿絞絞--leh,tsham tsē糖水to̍h是2-3倍3-4倍ê利純,若是tsham糖丹,he利純koh-khah驚人。
食冰人人kah意,he落喉涼涼冰冰ê感覺to̍h舒爽規身軀,若閣有lām he甜甜酸酸ê滋味,閣較暢入脾(pî-thó͘),熱--人若到,相信百分之九十九點九(99點9)lóng是hìng tsit味,莫怪冰店、冰擔仔ē hiah-nī ka-ia̍h(交易ka-ia̍h。指生意興隆的樣子)。

△古早kō͘擔ê賣冰擔頭仔,1頭是冰桶,內面貯已經tshuah好ê礤冰;1頭是囥碗囥湯匙kap糖膏、四果、李仔鹹⋯,人客bueh食四果冰,我to̍h kā lām西瓜、芎蕉、楊桃kap王梨,人客若bueh食酸lam甜,我to̍h kā 摻李仔鹹、鹹酸甜,人客若m̄甘開錢,只有lām糖膏lām hō͘甜甜,to̍h是清冰無別種氣味。
△Tse大跤冰桶無鍍銀內膽,to̍h開錢tshiàⁿ黏錫仔--è用鉛鉼[鐵皮]黏雙tîng[層]中央空殼ê方法來保溫,保持冷度。

△玻璃ê冰碗,貯涼水較無適合,貯礤冰ē使得貯尖尖,真好看頭。
△冰鑿仔(tsha̍k-á),1手huāⁿ冰角,1手kō͘冰鑿仔tsha̍k冰,比較較粗粒(角)mā khah-bē溶化。
△手絞礤冰機:冰角是四角立方體,愈絞愈薄,需要調整螺絲轉心[轉軸]ê長短。
 △冰角是四角立方體,愈絞愈薄,所以手絞礤冰機ê設計是按呢:手絞圓輪利用斜面狗齒仔(káu-khí-á/絞齒仔kà-khí-á)帶動中央螺絲形轉心[轉軸],轉心ē使得調懸低,轉心(tńg-sim)有尖釘固定冰角,下面圓盤有刀片剾刀,轉心若轉,冰雪toh落,冰碗tiàm下跤sîn,sîn hō͘-tīⁿ sîn hō͘尖,尖kah親像山,tsiah來lâm糖膏摻配料,1碗礤冰to̍h按呢phâng到人客面頭前。


△冰𣁳仔(khat-á)kap冰碗。

△冰鋸:製冰廠激--出來ê冰角真大塊,需要用冰鋸鋸做適合礤冰機ê寸尺。
△激冰冰廠ê冰角大塊koh重,kō͘雙手mo͘h ku̍t-liuh-siuh閣冷ki-ki,實在bē堪得,to̍h用tsit款冰鋏仔來giap較方便,ē使得拖leh行。

2015年4月22日 星期三

古物仔_走街生理篇_賣火油:陳慶芳收藏/蕭平治翕相

古物仔_走街生理篇_賣火油:陳慶芳收藏/蕭平治翕相
▲古早人三頓煮食,有魚有肉算是腥臊,若是無油無sian 確實苦憐(khó͘-liân/khó-liân),灶頭油筒仔(iû-tâng-á)若無油,真正考倒煮食師傅。記得細漢時,阿爸若去街路買物,豬肉m̄買買油鉼,目的是bueh tsuàⁿ-iû[炸油]thìng-hó三頓煮菜芡芳,油筒仔若tīⁿ-tīⁿ,阿嫂煮菜to̍h免煩惱。tī田中國民學校補習hit冬,阿爸時常提10箍叫我去Ám--è ê𥴊仔店搭火油,這是我上kah意ê福利,搭一罐(15兩)9箍8,我ē-tàng趁2角,有夠好空。
無油無sian ê羹頓豬油火油土豆油麻油菜籽油鉛鉼籠仔油漏仔
△1台雙台鐵馬,後載kah 1支棍仔抑是pùn擔,雙爿掛2跤鉛鉼做ê油桶,koh 紮幾項家私,「賣油--ē來--ā-ō͘!火油--ō͘!bueh tah火油趕緊來--ō͘!」
△賣火油kō͘鐵馬載,算是方便輕鬆,不過騎鐵馬技術需要láu-tâu,油桶內面ê油ē tsuat來tsuat去,he鐵馬角仔若扞無在是ē píng擔。無鐵馬抑是bē-hiáu騎鐵馬,只好kō͘擔--e,擔出門1擔tāng-khuâiⁿ-khuâiⁿ,擔入門to̍h真輕鬆,擔 輕 銀兩濟,一家大細生活to̍h無問題,走街生理,賣火油--ē雙手油lop-lop有,講bueh油sé-sé免siàu想。

△貯油ê油桶,抽油ê油抽仔(iû-thiu-á),khat油ê油𣁳仔,油漏仔(iû-lāu-á),lóng是鉛鉼做--è,黏錫仔(liâm-siah-á)[銲工]liâm--ē,hit-tsūn無塑膠抑是ステンレス/不鏽鋼。
△油抽:iû-thiû[用來提取油的管狀器具]long入油桶,kā sui套入水晶罐仔,抽動內面hit支鉛線,因為空氣壓力ê作用,to̍h-ē kā油流入罐仔內。
△油𣁳仔:tsit種khat-á專門khat桶仔內ê酒、番仔油、土豆油,麻油⋯,配合漏斗bueh kā𣁳仔內ê液體倒入罐仔內需要真功夫。
△大支𣁳仔是大桶盤細桶用--ā,細腳鉛鉼油桶,ē使得貯麻油兼leh賣。

※kap卓彥亨先生開講:
卓彥亨是Chhân-tiong-ng再源油行卓再枝先生大後生,蕭平治國校仔同窗。
伊講囡仔時,看人捾各種無仝款ê水晶罐仔(玻璃矸仔)來搭油(tah-iû),有15兩--è,有斤二--ē、斤九--è,mā有he 兩斤十三、三斤二--ē,阿爸攏用磅仔磅重,kap he擔擔賣油--ē無仝,出門賣火油是kō͘秤仔秤重較方便。
水晶罐仔用tshó-that-á(草塞仔)that,草塞仔有時ē lak落罐仔內面,阿爸to̍h用一條細條黃麻絲拗做一个ná υ字形,long入去罐仔內,kā罐仔倒頭栽,注心一直tshiâu,tshiâu hō͘套住草塞仔,然後勻勻仔giú慢慢仔tshuah,真神奇--ō͘,he草塞仔to̍h hō͘伊liù--出來。
阿爸做生理kài有量,he人ê新婦抑是囡仔,受in序大交代來搭油,有時ē無細膩摃破罐仔,tsit聲害--ā,轉--去bē交代得,人阿爸按呢講,「若是tī店裏看ē著ê所在摃破,無要緊,提罐仔來,koh tah一罐補--你!免煩惱!」

2015年4月20日 星期一

古物仔_走街生理篇_孤輪車閹豬:陳慶芳收藏/蕭平治翕相

古物仔_走街生理篇_獨輪車閹豬:陳慶芳收藏/蕭平治翕相
▲獨輪車(to̍k-lián-tshia):技術團表演家私,騎獨輪車算是tsiâⁿ普遍ê表演方式,展現平衡ê功夫。無馬角仔,無跤擋手擋,完全靠雙腳雙手kap尻川䫌ê ngiú-tōng(扭動)保持平衡平棒做進前退後動作。
虎骨是活動--ē,ē-tàng thùi-uāⁿ(替換)、接長做無共款懸度表演。


▲閹豬(iam-ti):
對人來講,閹 tī古早時代是kā查埔人ê膦核仔(lān-hu̍t-á)提掉,甚至kā膦鳥仔(lān-tsiáu-á)割掉,hō͘伊bē作怪。現代ê閹,是為著節育無愛koh生囝,to̍h kā查埔人ê輸精管(su-tsing-kńg)抑是查某人ê輸卵管(su-nn̄g-kńg)縛--起來,簡單講「縛掉」。
若是對動物來講,閹 是kā公--e ê膦核抑是母--è ê生腸(生腸seⁿ/siⁿ-tn̂g。指動物的子宮及卵巢。)割掉,目的是為著好飼、gâu大隻,因為閹--過ê動物bē發情,公--e bē-tshio(𪁎),母--è bē-siáu,所以無「性」問題,戇戇仔食戇戇仔肥,符合飼豬ê經濟效益。
阮團圍公派下ê清豹兄是閹豬--e,囡仔時代bat看過伊leh閹豬,記智上深是hit支短短ê竹仔徛品[直笛],kan-nā有3孔,孤手tshi̍h孔歕出323 212 132 212高音響亮ê品仔聲;猶有hit支tsiâⁿ利ê閹豬刀仔,有ê大人ē tshun 2支指頭仔比鉸刀形 嚇(háⁿ)囡仔講「若無乖to̍h⋯khah-tshah⋯」,he褪褲膦ê查埔囝仔sûi-ê走了了;猶有hit甌烏tsap-tsap小可油油ê m̄知啥乜碗糕ê物件,到今mā 猶記牢牢。
 △Tsit口銅鼎仔m̄知啥乜路用?ná像用來洗手洗豬腹肚?
△ 三孔徛品(khiā-phín),一手to̍h ē使得歕323 212 132 212簡單旋律,聲音幼字、懸音閣大聲,聽著聲to̍h知影閹豬--e來--ā。
△閹豬刀利劍劍,尖尾,ē-sái ui(揻)、ē-sái liô(𠞭)、ē-sái割,公--e 膦核仔tī外面,閹--起來較簡單,若是母--è to̍h需要ùi生腸位置外皮割開,tsiah-kā腹肚內ê生腸jîm出來割掉,然後用細條棉索縛絚,空喙kō͘ tshiau麻油 烏tsap-tsap ê火塵lo͘糊糊--leh to̍h算完成閹豬手術。
△閹豬刀真利,有掛皮質刀鞘(to-siò),刀鞘有蓋,he是賺食碗仔(趁食家私),無容允hō͘人烏白sńg,koh-khah bē使得拍交落phah缺角去。













林振福 阮聽--著的,閹豬--的,所噴phin2的曲調:[123-,321-,23-23-1-(尻穿tsinn破布)]。


林振福 阮所看著的是閹豬母。[用剃頭刀共腹肚邊的毛剾剾咧,了後用刀仔剹一孔正掠長,續落用手伸落去共生腸撏--出來,用幼索仔縛起來,_然後koh共入倒轉--去,外口孔喙用針線紩起來,最後佇傷喙用烏煙黗/藥膏糊糊咧準煞。

※閹豬--e 當做掠龍--ē:早期寫ê笑詼。
一个好額人查某少奶奶,好命欠運動,時常愛掠龍,骨頭才會輕鬆。
有一工欲暗仔,聽見掠龍ê phín仔聲,就叫人去叫掠龍--ê 入來到客廳,伊就大大範範覆tiàm pang 椅(長條椅仔),吩咐掠龍--ê
taⁿ 你會使chit 開始掠。
「安人!你敢無棄嫌,我taⁿ tih-beh開始!」Chit 位太太,chit 位夫人,閣食kah chih-chih ,是˜ 是無愛生--à ,哪會叫我chit-ê 閹豬--ê
Mài 囉嗦,做你kä liô(lia̍h)--落去。
「安人!麻煩你,敢會使chit衫仔褲liù--起來?」
哪會chiah-ni̍h不死鬼,掠龍哪有leh褪衫褲,若chiah 無規矩,叫人你戽戽--出去。
「誤會--ò͘,冤枉!我是閹豬--êchit-mái beh kā你閹,ah你衫褲穿好好,叫我beh按怎手術?」
啥?你是閹豬--ê,哪會tsiah-nī無sè-jīkan-nā聽著ti-ta-ti,to̍h kioh是掠龍--ē 來到chit,「歹勢啦!」少奶奶chi̍t-ê 面仔紅kì-kì
「閹豬--e 當做掠龍--ē。」有夠笑詼,有夠古錐,平平phín 仔聲,一個dolemi,一個miledo,無仝館(款)一定無仝師傅,敢是?


2015年4月17日 星期五

古物仔_走街生理篇_喝玲瑯賣雜細:陳慶芳收藏/蕭平治翕相

古物仔_走街生理篇_喝玲瑯賣雜細:陳慶芳收藏/蕭平治翕相
喝玲瑯賣雜細:
早當時交通不便ê時代,婦人人(hū-jîn-lâng)bueh買tsē胭脂、水粉妝娗(tsng-thāⁿ),抑是買tsē針、線、鈕補紩(thīⁿ),著愛央三託四(iang-saⁿ-thok-sì)拜托安童哥--a去街路買,m̄ to̍h等hit-lō賣雜細--è來tsiah來買。
聽著「long 、longlong、 long 」ê搖鼓聲,查某人上歡喜,圍圍kha̍p-kha̍p,tse揀he試,節家己ê銀兩買物,金金熾熾,花粉芳味,tse mā kah意,he mā bueh-ti̍h,私奇無夠,只好目睭tsho̍p-tsho̍p-nih。
賣雜細--è實在好性地,人客bueh-ti̍h針,伊to̍h tháu開包裝攑1支hō͘你試,人客若bueh買鈕仔,大粒細粒隨在你揀到歡喜為止,無買無關係,絕對笑微微。
賣雜細,擔頭有kō͘擔--e,mā有用鐵馬載,he擔頭造作真幼路,通光玻璃內面物件看現現,to̍h ná像見本櫥,bueh-ti̍h啥乜kō͘手指,隨時提hō͘--你。
△khǹg tī鐵馬後載ê雜細櫥仔,有5層,內面排疊整齊,因為lóng是挑花刺繡(thio-hue tshiah-siù)、補紩針黹(pó͘-thīⁿ tsiam-tsí)、花粉胭脂、手鏡蝨篦⋯幼粒物,ē使得講查某人kah意應有盡有。

△玲瓏鼓(lin-long-kó͘):
△手鏡:kap桌頂鏡台配合,方便看後斗殼仔ê頭毛梳妝。
△中央這支玲瓏鼓是銅質。
△手鏡kap細kâi圓鏡。


手鏡kap細kâi圓鏡ê背面有真súi花紋。

2015年4月15日 星期三

古物仔_走街生理篇_糋粿擔:陳慶芳收藏/蕭平治翕相

古物仔_走街生理篇_糋粿擔:陳慶芳收藏/蕭平治翕相
▲「觳仔炱、糋粿--ō͘!觳仔炱、糋粿--ō͘!mā有菜條--lah!bueh買趕緊來--ō͘!
Tse是賣觳仔炱、糋粿、菜條ê喝賣聲,一擔擔頭仔不止仔重,一頭是烰觳仔炱ê油鼎kap火爐,一頭是囥已經洗清氣ê蚵仔、韭菜,米漿、粿,猶有豆油、盤仔、箸⋯。因為擔leh賣,貨色bē-tàng備辦siuⁿ濟。
▲糋(tsìⁿ)kap烰(phû):華語『油炸』台語講「tsìⁿ(糋)」,kā作料(食材)囥落油鼎糋熟糋酥to̍h是糋料。韭菜、蒜仔ē-sái糋,蕃薯、芋仔、花仔菜mā ē-sái糋,豆腐、米糕、花枝仝款ē-sái糋。
若是先kō米漿tsiah落油鼎糋,咱ē特別講做烰,因為作料(食材)落鼎有ê ē沉底,等若浮上油面,to̍h是已經糋熟,若是落鼎to̍h浮面ê作料(食材),有熟無熟,需要用𣁳仔khat--起來看。m̄-tsiah有人講烰觳仔炱、烰糋粿,糋菜條、糋豆乾糋。浮肉圓(bah-uân)、糋肉圓(bah-uân)mā是仝款意思。
▲烰觳仔炱、菜條;糋粿、糋米糕:
觳仔炱(khok-á-te)糋粿(tsìⁿ-kué)lóng是油鼎熱油糋料,簡單搵豆油膏to̍h真好食,thang食點心mā ē-tàng做正頓,食飽koh食khá。除了khok-á-te、tsìⁿ-kué,韭菜、蒜仔、蕃薯、芋仔、豆腐、米糕、花仔菜⋯lóng ē使得tsìⁿ來家己食tsìⁿ來賣。
食糋料著趁燒食,酥、冇(phàⁿ)好滋味,搵豆油膏上合味。若是冷--去tsiah-koh糋燒,to̍h-ē反𠕆(tīng)無好食。Tsit-má bueh食觳仔炱、菜條、糋粿、糋米糕,著去店頭、路邊擔仔買。
糋粿擔:賣khok-á-te(觳仔炱)糋粿(tsìⁿ-kué)ê擔頭仔,當然mā ē-tàng烰菜條,糋蕃薯鉼、芋仔鉼,烰豆干糋,糋蒜仔⋯。
khok-á-te、tsìⁿ-kué、tshài-tiâu、bí-ko-tsìⁿ、tāu-kuaⁿ-tsìⁿ、han-tsî-phiáⁿ、ō͘-á-phiáⁿ。khok-á-te內餡(lāi-āⁿ)有蚵仔,講做蚵te,tsit-má有人用瘦肉代替蚵仔,叫做肉te。
△教育部:蚵炱ô-te一種油炸小吃,先將豆芽菜、韭菜舖在鮮蠔上,再摻上一層米漿,下鍋炸成圓扁形。
△教育部:khat觳仔炱khok-á-te。一種油炸小吃,先將豆芽菜、韭菜舖在鮮蠔上,再摻上一層米漿,下鍋炸成圓扁形。
△烰:油炸,特別指食材會浮在油鍋上。
△擔頭下面是櫥仔,囥作料、家私、烘爐火,架仔頂平平做桌頂。

 △烰khok-á-te油鼎,鼎邊有鐵線網,囥烰熟ê糋料,hō͘油汁滴落鼎內。



2015年4月14日 星期二

古物仔_走街生理篇_賣麵線糊:陳慶芳收藏/蕭平治翕相

古物仔_走街生理篇_賣麵線糊:陳慶芳收藏/蕭平治翕相
▲Tsit擔擔頭仔本身是木材,閣掛玻璃,堅固防塵防胡蠅⋯實在衛生。若bueh擔出門做生理,應該不止仔重,著用曲擔來擔tsiah接載ē-tiâu。
Tse 擔頭一頭大,一頭細,大--ē是櫥仔,內面囥碗、囥湯匙,猶有ám-tshiâ-á(泔杓仔)、豆油矸仔、胡椒罐仔⋯,頂面是闊闊ná桌頂,方便囥人客bueh-ài ê麵線糊;另外一頭看是較細,面頂囥鉎鍋,下面是烘爐火,鉎鍋內面to̍h是燒燙燙ê麵線糊。
△造型不止仔súi,四角形ê木工算真幼路,配六角形擔仔面,有門有窗。
△鉎鍋不止仔大,鉎鍋蓋因為需要掀起、khàm落,所以比較較薄,用5塊柴枋敆做夥。
△鉎鍋下面有烘爐,火炭火需要隨時加添,麵線糊有燒tsiah-ē好食。
























△鹿港 麵線糊,料濟氣味讚,掛鎖櫃屜是囥錢所在。
△大跤鐵烘爐,火炭ē-tàng一直加添,擋較久。