青竹絲？

赤尾青竹絲是毒蛇，長度大約1m，規身軀青phiàng-phiàng，kài嫷色，頭三角形，目睭仁紅紅，日時bih-tiàm石頭縫，暗時出來活動，攻擊性真強，興食水蛙、杜定、狗母梭、細隻鳥仔及鳥鼠…
相片這尾tsiah-ní細尾的青竹絲，你敢捌看過？2009/9/27蕭平治

感謝大嫂

今仔日2009年9月30日，咱人8月12，阮逐家圍tiàm你的靈前，欲用歡喜佮毋甘的心情，送你行向西方極樂世界，歸依阿彌陀佛的身邊，你會當佇遐過著無憂無愁、歡喜自在的生活，毋免閣受 生、老、病、死的輪迴，清淨無憂。
大嫂！佇妳欲起程的時，Jih--ê 欲共你講幾句感謝的話：
大嫂！Jih--ê叫你大嫂已經64冬，毋過妳佇Jih--ê心內蓋成是我的老母，Ī--ā佇Jih--ê出世才滿4歲的時著來放我離開世間，好佳哉上天派大嫂你這個天使來疼惜我，佇Ī--ā過身進前妳著嫁來咱兜，戇戇毋捌世事的囡仔庀，著按呢有你的照顧疼惜，才會無憂無愁、無所遺憾，一日一日大漢，佮人有比並。
細漢時，是你 大嫂共我揹上揹落，擔水、煮飯、洗衫，Jih--ê規日共你綴tiâu-tiâu，有人同情遮爾幼tsínn的囡仔著無老母，實在可憐，你著目屎流目屎滴，騙我毋通哭，著那親像老母io細囝共款疼入心。
Jih--ê 8歲你才生輝虎，為著大兄的事業，你著去阿里山，Jih--ê嘛入去學校讀冊，款三頓、洗衫褲的責任才換二嫂來照顧，又閣是上天派來的一個天使，實在感恩。
大嫂！你蹛阿里山彼站，雖罔咱無常做夥，毋過Jih--ê真正了解，你猶原掛心。有一擺歇熱，大兄tshuā我去山場tshit-thô，你著歡頭喜面共人紹介，「這是我上細漢、上蓋乖巧的細叔仔，Jih--ê！」講著細漢的故事，你共款目屎tâm目墘，毋甘的心情我已經會當體會。
大嫂！你疼--我的心我講袂了，一直佮我出社會猶原無放suah，佇我做兵無錢的時陣，只要共大嫂講--一聲，著是需要共人借，大嫂一定袂予我失望，佇我娶某生囝以後，妳嘛是hiah-nī-á關心我。
大嫂！感恩、感謝你！這世人有大嫂的疼愛，是Jih--ê上大的福氣，感恩的話講不盡，大嫂住世的時，對我的好，一點一tuh Jih--ê永遠記牢牢，永遠懷念的大嫂，Jih--ê佇遮恭送你行上西方極樂世界的路，你著毋通操煩人間的一切，毋通越頭，愛有正念的信心，行向阿彌陀佛身邊。Oo-mí-tōo-hu̍t！2009/9/26蕭平治

【註解】
圍tiàm：[圍在]/ 佇遐：tī-hia[在那裡]/ 毋免：m̄-bián[不必]/ Jih--ê：蕭平治的名/蓋成：kài-sîng[非常像]/ 好佳哉：hó-ka-tsài[幸虧]/ Ī--ā：阿母，平埔族語(南島語)/ 咱兜：lán-tau[我們家]/ 毋捌：m̄-bat[不懂]/ 囡仔庀：gín-á-phí[小不點]/ 佮人：kaplâng[跟人家]/ 比並：pí-phīng[比較]/ 遮爾：tsiah-ní[這麼]/ 幼tsínn：iù-tsínn[幼嫩]/ 揹上揹落：āinn-tsiūnn-āinn-lo̍h[揹來揹去]/ 綴tiâu-tiâu：tuè-tiâu-tiâu[緊跟著]/ 騙我：phiàn--guá[哄騙著我]/ 毋通：m̄-thang[不要，不可以]/ 蹛：tuà[住]/ 雖罔：sui-bóng[雖然]/ 上蓋：siāng-kài[最最]/ 會當：ē-tàng[才能，可以]/ 無放suah：bô-pàng-suah[沒忘記]/ 袂予我：bē-hōo-guá[不會給我]/ 一點一tuh：[一點一滴]/ 佇遮：tī-tsia[在這裡]/ 越頭：ua̍t-thâu[回頭]

老人囡仔性 閒閒罔話仙

日本時代出世，享受過B29爆擊掃射日子的台灣庄腳囡仔，雖罔讀冊猶算袂頇顢，因為家庭散赤，所以去讀師範。讀冊免錢，食飯免錢，tuà宿舍免錢，穿制服免錢， 出業頭路政府kā你tshuân便便，上合散鄉人的khuì-kháu。18歲入學，經過3年師範教育洗腦，著連續教43冬的國民小學，四年前退休到今，享受18% 利息過生活。
退休後的生活有影真清閒，免受上班下班的制限，生活時間表家己訂，平常時兩老--的做夥散步、行mài siunn崎的山路、拍乒乓、聽音樂、唱台語歌KTV、泡烏龍茶，無 著家己騎鐵馬踅田庄路、hām朋友phò-tāu，當然lah，上合意推sak台語文的事工，並無放袂記，只是有khah懶屍。中山醫學大學台文系每禮拜2節「台語讀寫」是固定空課，彰化縣台語輔導嘛無斷線，三不五時有人邀請著去鬥腳手，另外台語輸入法的詞庫的建立，嘛加減鬥相共。
講著台語詞庫的建立，信望愛台語輸入法http://taigi.fhl.net/FHL_TaigiIME/內面的詞庫佮字詞典共款，毋是語詞就無收入，無像yks輸入法有收入我的/你的/我欲/你欲/無像…這款語句，感覺有khah無方便，毋才用上蓋食力的方法，1詞1筆來建立，目前已經有2000幾筆，後手可能猶有2萬筆以上，總是寬寬來一定有成果，tsiah-ê詞庫共款按照信望愛台語輸入法規則輸入，輸出共款有白話字、台羅thang揀選，若共遮的詞庫加入信望愛台語輸入法的自定詞庫，tō隨時會使拍字，若感覺無方便嘛會使隨時共篩掉。
頂幾日仔想著閣來建立一個blog來罔lāng，想著啥tiō寫啥，mài受束縛，重點猶是以語言為主，寫會通順會當共純美原味的台語抾倒轉來tiō好，啥物文學性、創作性的作品tiō留予少年人去拍拚，總講一句，寫家己會曉--的tō-tio̍h。2009/9/24蕭平治