無定數ê人生:siàu-liām 廖瑞銘教授_Lah-jih 20160221
無定數ê人生:
瑞銘兄:
Bē記得啥乜時陣kap你熟似,《台文Bóng罔報》成立佇1996年,你佇1997年結婚,猶ē記得有包紅包kā恁祝賀恭囍,閣較深交是佇2001年台灣羅馬字協會成立了後,為著推sak台語文、復振台語ê活命,咱逐年至少有兩擺ê約會,舉辦世界台語文學營kap台灣羅馬字協會大會,koh-ē三不五時佇台語文聚會場合見面開講,為著台語復活,探討台語音韻、台語文書寫kap推sak事工,咱攏是講kah笑吻吻充滿向望。你是學者,認bat較濟,開路hō͘阮行,阮to̍h跟綴你ê跤步,喙講台語,手寫台語文,若是避開lô-má-jī書寫,恐驚咱ê台語to̍h-bē純正,《舌尖與筆尖》是上好ê指針。
將近20冬ê交陪,咱to̍h是tsiah-nī靠俗,無分你gâu我han-bān,無分我老你少年,to̍h是無大無細,to̍h是tsiah-nī心適自由自在,記得200?年台羅會年會佇台南,咱做伙去遊四草綠色隧道坐船,暗時咱仝頂眠床kheh燒,你感冒真重,睏眠kô͘ⁿ-kô͘ⁿ叫,因為誠懇交心,並無礙著做夢,2012年你kap明仁兄振裕兄來厝--裡phò-tāu唱歌,歌聲猶原佇耳孔邊,siáⁿ知ta̋ⁿ行入2016年to̍h聽著一聲脆雷,網路傳來瑞銘兄已經離開阮。
人生有常,人生無常,有常無常攏是正常,你ê phah拚你ê付出,上帝o-ló你穡頭已經做了有夠額,決定bueh hō͘你歇睏,m̄-tsiah hiông-hiông徵召轉去祂ê身邊,害阮一時suah m̄知beh án-tsuáⁿ kap你相辭。
瑞銘兄,請你m̄免kā天父抗議投訴,hiah-ê不公不義ê代誌,終其尾in ē反悔in ê作為,語言是平等ê道理tī天父ê面前,lóng是真理。
永遠ē記得你ê笑聲kap你ê kô͘ⁿ眠,永遠ē跟綴《舌尖與筆尖》指針做咱ê方針。台文路途,綴你跤步,展出笑容,輕鬆歡喜繼續行。
沒有留言:
張貼留言