國家語言發展法之研究與規劃公聽會
建言
蕭平治 田中國小退休 資深台語推sak老師
主持人、各位關心母語ê鄉親朋友，逐家平安！我是蕭平治，田中國小退休教師，資深台語推sak老師，台語文字化工作者。
反對推sak家己母語是無知，是背祖；阻礙別人復振母語是惡毒，是罪惡。
語言是溝通ê工具，母語是族群互動上貼心ê語言，台語人講台語chiah有法度原汁原味kā心內所想用喙講出，借用別人語言to̍h無才調百分百表達心意，因為族群母語是父公祖媽傳承ê文化語言，任何其他語言絕對無法度代替。
母語流失hō͘人心神táⁿ-hiáⁿ不安，驚做無外久ê未來會ùi各樣pìⁿ-chiâⁿ死亡，母語若死，請問咱是啥物人？
復振母語，需要教育，喙講耳聽ê口耳相傳已經拍折，需要文字教材有系統ê教學挽救，文字教材需要台語漢字kap台語lô-má-jī。雖罔國小母語教育已經進行10外年，總--是效果如何？「癮痀--e落崎----知知--leh。」原因真濟，20外冬推sak台語、教台語、教羅馬字ê經驗，深深了解無考試ê教學，效果實在無大，老師無重視，家長無重視之下，學生囡仔自然bē用心。所以tī chia我boeh強調「母語教學，一定愛考試，比照華語、數學。」「有考試有行氣，無考試一定ē行--去。」母語教學，重點tī生活語言m̄是死背越唸、吟唱表演，生活語言to̍h是咱日常生活ê溝通話語，m̄是研究古文吟詩做對。
「母語愛考試」除了是復振母語必要ê手段以外，特別ē-tàng解決老大人ê鬱卒心態，厝內阿公阿媽真緊khioh回尊嚴，即時pìⁿ-chiâⁿ母語家庭老師，受囝孫尊敬尊重，chiah-bē為著kap孫講話，不得已講he不答不七ê華語溝通，你若敲電話kap孫--e講母語(台語)，chit爿台語燒燒講出喙，hit爿soah 冷冷無聲無說kan-na「ôe ôe ôe」一直應，敢講「鞋(ôe)tī眠床跤伊攏m̄-bat？」
所以我強烈建議，母語m̄-nā需要課程愛排愛教，閣較需要「考試」，lô-má-jī著考，母語漢字著考，按呢囡仔才會認真學，老師家長才會重視。
講著學母語著考試，有寡人ē掠狂，講啥乜學生負擔siuⁿ過重，講啥乜he
lô-má-jī 羅馬拼音真pháiⁿ學，學生囡仔學bē-hiáu。敢正實是按呢生，千萬m̄-thang看輕囡仔ê學習能力，大人m̄重視，推推hō͘囡仔去，驚是驚大人bē-hiáu教，老師m̄-bat台語漢字，m̄-bat台語羅馬字，無狀元老師都ē教出狀元學生，何況老師若精通台語讀寫，了解台語音韻，boeh教hō͘學生講出端的ê台語，甚至寫出通順扭掠ê台語文，he真正是「桌頂ni柑」簡單無比。
Koh-chài一擺強調：「母語教學，一定愛考試，比照華語、數學。」「有考試有行氣，無考試一定ē行--去。」 蕭平治20170323佇田中厝--裡
