2018年4月29日 星期日

輕輕鬆鬆讀台語 第八單元 第十四課 龜kap兔仔走相jiok

輕輕鬆鬆讀台語 第八單元
第十四課        龜kap兔仔走相jiok 
龜生做真bái，行路sô-sô，m̄-koh腳踏實地，老實古意bē hiau-pai。
兔仔生súi 得人疼，gâu 走跤手liú-lia̍h，可惜驕傲看龜無目地。
有1 工，兔仔強beh kap 龜比賽走相jiok，伊講beh 讓龜先走1 半路。
龜不得已tiō 開始慢慢仔行，1 步1 步向前扑拼，m̄ 管會贏bē 贏，仝款一直拚勢行。
兔仔哈哈大笑笑龜頇慢寬寬仔sô ：「規氣我先睏1 瞌睡，tsiah 來kā 你jiok ，嘛bē siuⁿ慢。」
啥知兔仔1 醒已經日頭beh落海，gia̍h 目1 看tsiah 知代誌大條，趕緊蹤趕緊飆，走kah 歸身重汗，走kah 4 支腳酸軟，猶原無較tsu̍ah。
比賽結果，龜得著第一名，兔仔頭lê-lê，從按呢m̄ 敢閣大聲，m̄ 敢閣看龜無目地。
【註解】：
sô-sô：[慢吞吞]
hiau-pai：[驕傲]
jiok：追趕。
生súi：[長得美]
liú-lia̍h：敏捷。
瞌睡：ka-tsūe。[睡得很熟]
飆：pio。
無較tsu̍ah：無效，無路用。
無目地：bô-ba̍k-tē，不在眼內。
張貼者： 於 沒有留言:
標籤：

2018年4月28日 星期六

輕輕鬆鬆讀台語 第八單元 第十三課 上課

輕輕鬆鬆讀台語 第八單元
第十三課      上課
『Mi tō͘  le  sò͘，sò͘  lē mi tō͘…』
上課鐘仔聲已經響，學生挨挨陣陣入去教室beh 上課，老師猶未來，逐家ki-ki-kā-kā會東會西，m̄ 知影leh 會啥物代。
「徛--起來！」原來是老師踏入門，班長leh 喝號令，
「徛hō͘正！」班長隨時閣喝1 聲，
「行禮！」逐家同齊kā 老師tìm 頭行一個禮：「老師gâu 早！」「小朋友gâu 早！」
「坐--落去！」老師笑笑kā 阮教示：
「坐hō͘好，老師kā 恁o-ló！坐hō͘正，tsiah 會得人疼！坐歪歪，人會講你hiâ-pai ，坐ku-ku，坐久會曲痀。」
老師！感謝！感謝你ê 教示，阮beh taⁿ頭、挺胸、恬恬聽你教冊說道理。
【註解】：
挨挨陣陣：e-e-tīn-tīn，[三五成群，紛紛]
ki-ki-kā-kā 會東會西：[七嘴八舌談論]
徛--起來：[站起來，起立]
徛hō͘正：[立正]
hiâ-pai：驕傲（kiau-ngō͘）
曲痀：khiau-ku。
taⁿ頭：[抬頭]
挺胸：thíng-hing。
恬恬：tiām-tiām。
張貼者： 於 沒有留言:
標籤：

2018年4月24日 星期二

輕輕鬆鬆讀台語 第八單元 第十二課 高速公路頂

輕輕鬆鬆讀台語 第八單元
第十二課      高速公路頂
高速路，高速路，高速路頂tsiânn心適：汽車排歸列，閣會走相jiok。
細pang--ê 是轎車，大pang--ê 是拖車，貨櫃車；
猶有遊覽車，tho͘-lah-khuh，參hit-lō   ō͘ⁿ-iⁿ  ō͘ⁿ-iⁿê 救護車，警察車。
高速路，高速路，高速路頂看光景：
遠遠看著--ê 是山kap 雲，上súi  ê 時陣是日黃昏。
近近有樹仔kap 田園，ùi 頭前來，tùi 後壁去，一陣閣一陣。
高速路，高速路，高速路頂著小心：駛車m̄-thang 睏。
縛好安全帶，m̄-thang 燒酒lim，
祝福逐家歡喜出門，bē塞車，一路平順。
禮拜日，阿爸駛車tshūa 阮兄妹仔去台北tshit-thô。
這是我第一擺坐車上高速公路頂，感覺tsiânn歡喜，出門進前，阿爸tiō交帶我愛斟酌看，記予好，m̄-thang 烏白問，因為阿爸駛車ài專心。
Ùi 交流道peh上高速路頂，我kap 小妹tiō恬恬欣賞車外ê 景緻：
遠遠看著--ê 是青青ê 山脈，山頂閣罩著親像綿仔花ê 白雲，phòng -giâ-giâ，實在有影súi。
車走過濁水溪了後，阮看著一片青sìm-sìm  ê  田園，田園內有一陣白鴒鷥ti-hia飛來飛去，可惜一目nih仔就無看去--à！tsit 時陣阮tsiah感覺高速路邊ê 樹仔、田園、kap厝，攏一直teh倒退lu，實在真心適，真趣味。
阿爸辦好代誌，隨時載阮倒轉，這時已經接近黃昏，看著紅紅ê 日頭，西旁ê 天色，真正是滿天通紅，親像sui姑娘仔抹粉點胭脂hit款，講有偌súi  tiō有偌súi！
轉到厝內，拄好赴食暗頓，阿母問講：「有好tshit-thô--bò？」
小妹講：「足好sńg，足歡喜--ê！人阿爸閣會飆車--neh？」
「m̄-bat，tiō m̄ -thang 烏白講！」我隨時kā小妹講清楚：「高速公路直閣闊，路面平坦坦，逐家攏嘛駛tsiâⁿ緊，無！beh 按怎叫做高速公路？阿爸駛車a̍h 無超速--à！」
Tsit 時阿母笑gī-gī 叫阮食飯，mài 閣搬嘴花--a！
上歡喜ê 一工，tiō按呢過去！
【註解】：
細pang：細台。
轎車：kiō-tshia。
tho͘-lah-khuh：貨車。
hit-lō：[那個]
塞車：that-tshia。
phòng-giâ-giâ ：[鼓鼓的]
sńg：[玩]
張貼者： 於 沒有留言:
標籤：

2018年4月21日 星期六

輕輕鬆鬆讀台語 第八單元 第十一課Káu -hiā [螞蟻]

輕輕鬆鬆讀台語 第八單元
第十一課Káu -hiā  [螞蟻]
 Káu-hiā，Káu-hiā，講tio̍h 食，你tiō爭破額。
行路kho̍k-kho̍k tsông，m̄驚會相pōng？
朋友！朋友！你著聽我講：
m̄是阮愛膨風，抑m̄是阮teh起悾；
天跤下tiō算阮上kut-lat，上愛運動，
為著生活，為著囝孫，tsiah著來走tsông。
春天著想寒來時，北風若吹tsiah-bē失頓iau 饑，
好天粒積雨來糧，囝孫生活tsiah有向。
俗語tī-teh 講：
「一ê和尚擔水食有tshun，兩ê和尚扛水無夠lim，三個和尚sio-the tiō無水止喙乾。」
這是一個分工合作ê 社會，你我相放伴，逐家相照顧，一ê人無夠力，若是有一大陣人合作，tiō會當生出較大ê 力量，來完成較大ê 工課。所以咱著學káu-hia̍h  hit 種kut-lat扑拼，同心協力ê 精神。
Beh合作，tio̍h-ài先分工課，親像咱teh整理教室仝款，班長將工課分予咱每一個人，有人掃土跤，有人拭窗仔門，有人拚糞埽。每一個人m̄-nā  做好家己份額，嘛ài kap 別人互相配合，互相幫忙鬥腳手，按呢tsiah有法度將歸間教室整理kah整齊閣清氣。
已經知影「合作」ê 道理，自tsit-má 起，咱逐家來做一個「歡喜合作做夥扑拼」ê 人。
【註解】：
爭破額：tsing phùa hia̍h，hia̍h [額頭]，瓦（hiā）
kho̍k -kho̍k tsông：[爭先恐後的亂衝]
相pōng：[相撞]
起悾：khí-khong，[瘋了]
失頓iau 饑：[三餐沒得吃，餓肚子]
有tshun：[有剩餘]
lim：飲。
sio-the ：互相推辭。
張貼者： 於 沒有留言:
標籤：

2018年4月18日 星期三

輕輕鬆鬆讀台語 第八單元 第十課 阿伯飼ê 台灣狗仔

輕輕鬆鬆讀台語 第八單元
第十課    阿伯飼ê 台灣狗仔
阿伯怹兜飼一隻烏色ê 狗仔，號做Theh-lih，喙kóng 烏烏、耳仔kiā-kiā，kài有精神；跤lò-lò像羌仔跤；尾仔翹翹，親像一支割稻仔ê liâm-li̍k-á  刀(鐮刀)。真khiáu 、真走跳、閣真顧家，是阿伯怹兜ê  顧門--ê，保鏢--ê。
每一擺去阿伯怹兜tshit-thô，Theh-lih tiō tsông  倚來kap 阮sńg ，一支尾kho̍k- kho̍k 搖，一直kā阮sai-nai，beh kā阮tsim，因為Theh-lih 生做bē細隻，見若sńg  khit 來tiō粗跤重蹄，害我跋一倒，我tiō m̄敢閣kah 伊sńg 。
「阿伯！猶是阮兜ê 博美狗仔較好tshit-thô。」
阿伯講：「博美狗仔較細隻、較古錐，Theh-lih 是正港台灣狗，雖然bē-tàng  mo͘h khit 來惜，m̄-kuh 伊真有責任，真gâu 顧厝--o͘！」
阿伯足愛Theh-lih，若beh 去山裡作穡，si 仔一下呼，Theh-lih隨時peh-tsiūⁿ車頂，tùe 伊去tàu 趕老鼠，tàu 趕野雞；阿伯若ùi 外口轉來，Theh-lih攏會認得o͘-to͘h-bái ê 聲音，趕緊走去門口迎接。莫怪阿伯時常kā人展：「beh 飼狗，一定tio̍h-ài飼正港ê 台灣狗。」
【註解】：
喙kóng ：豬狗ê 嘴。
kiā-kiā：[豎立狀]
跤lò-lò：[腳長長高高]
tsông 倚來：衝過來。
kho̍k-kho̍k 搖：[不停的搖]
sai-nai：[撒嬌]
tsim：[親嘴]
博美狗：phó͘-mé-á 狗。
bē-tàng：[不可以]
mo͘h khit 來：[抱起來]
peh-tsiūⁿ：[爬上]
tùe：綴，跟隨後壁。
tàu：互相。
o͘-to͘h-bái：機車。
張貼者： 於 沒有留言:
標籤：

2018年4月14日 星期六

輕輕鬆鬆讀台語 第八單元 第七課第八課第九課

輕輕鬆鬆讀台語 第八單元
第七課    菜園
菜園仔種青菜      種kah 逐項有
有蕹菜      tsheⁿ-sìm-sìm 
看起來好食樣
紅皮菜      是茄仔色
Sa̍h來搵豆油  好配飯
薟薑仔      薟死死
紅kòng-kòng 會當看súi 
beh食tiō sè-jī
食了目油予你流bē止
【註解】：
tsheⁿ-sìm-sìm : [青翠欲滴] 
好食樣：[很好吃的樣子] 
紅皮菜：[茄子]
茄仔色：紫色，[茄子的顏色]
Sa̍h：用清水煮物。
搵豆油：ùn-tāu-iû，[沾醬油] 
薟薑仔：hiam-kiuⁿ-á，[辣椒] 
薟死死：[辣得不得了] 
看súi：[欣賞] 
目油：[淚水]

第八課    菜瓜
菜瓜，菜瓜，開黃花；
公花bē結子，母花會生瓜。
peh 厝頂，旋籬笆，siâⁿ來蜜蜂蝶仔iāⁿ-iāⁿ飛；
菜瓜，菜瓜，累倒ue，
青炒誠好食，嘛會當煮bê ，豆腐菜瓜上退火。
【註解】：
菜瓜：[絲瓜]  
旋：suan。
siâⁿ：[引誘]
蝶仔：ia̍h-á。
累倒ue ：[結實纍纍。ue :椏]  
bê ：mûai/bûe，[稀飯，粥]

第九課    青紅燈
青紅燈，就是紅綠燈，
十字路頭徛瞪瞪。
伊ê 訊號著分明：
青色--ê  會使得行，
紅--ê tio̍h-ài停；
千萬m̄-thang 青狂狗，
撞著紅燈起相爭，
煞尾著愛去tshūe 醫生。
【註解】：
徛瞪瞪：khiā-thîng -thîng，徛tīhia斟酌注意看。
相爭：sio -tsing，車相撞，人相扑。
張貼者： 於 沒有留言:
標籤：

2018年4月12日 星期四

輕輕鬆鬆讀台語 第八單元 第六課 菜市仔三兄弟

輕輕鬆鬆讀台語 第八單元
第六課    菜市仔三兄弟
菜市仔三兄弟，肉丸、肉丸仔kap肉圓仔，講起來真趣味，大漢--ê 叫肉丸，身軀圓圓扁扁，上愛tiàm 油鼎扑碰泅，油愈燒愈滾伊愈歡喜，人客嘛o-ló kah tak 嘴舌。可惜有一項代誌伊上無合意，明明號做 「bah-ûan」，m̄ 知按怎店頭家ê招牌攏愛kā 寫做『肉圓』，m̄知影ê 人，攏kioh 是伊ê 第三小弟『肉圓仔』--leh，大兄變小弟，實在不可思議，實在tsiâⁿ心酸，為啥物？為啥物？
老二--ê 叫肉丸仔，一粒圓圓ná乒乓，豬肉絞醃瓜，鹹siam 鹹siam 配真會落飯，大人囡仔攏真合意，m̄ 知按怎，逐家攏m̄ 叫伊肉丸，偏偏kā 伊加牽一聲「仔」，叫伊肉丸仔，人若叫伊肉丸仔伊tiō 受氣：「叫我肉丸tiō 好，偏偏kā 我加一字，肉丸仔肉丸仔按呢kā 我看不起。攏嘛是阮大--ê，肉圓m̄ 叫叫肉丸，肉丸、肉圓攏是伊ê 名字，kā 人佔佔去，實在無道理，伊閣leh 心酸啥物？」
老三--ê 叫肉圓仔，細粒細粒，嘛是圓圓扁扁，皮薄包豬肉ê 餡，真有滋味，食了人o-ló，可惜招牌頂無leh做廣告，明明人攏叫伊肉圓仔，哪會刊版頂寫tsiah 大字ê 『肉圓』，人攏講he是阮大--ê 叫肉丸，實在tsiâⁿ 鬱卒，屘仔囝有較輸，因為大--ê 太出名，m̄-tsiah 是非sian 講嘛bē tshun-tshia。
朋友！肉丸、肉丸仔、肉圓、肉圓仔，到底是三兄弟抑是四兄弟，恁敢會曉看字bat 意，菜市仔三兄弟，實在趣味。
【註解】：
扑碰泅：phah-pōng-siû，[游泳]
kioh 是：[以為]
ná：親像。
乒乓：phîn-phông。
醃瓜：am-kue。
鹹siam 鹹siam：[少許鹹味]
配真會落飯：[容易下飯]
餡：āⁿ。
刊版：kha̋n-páng，[看板]
肉丸：bah-ûan。
肉圓：bah-îⁿ，（文音jio̍k-ûan ）。
sian 講：[再怎麼講]

bē tshun-tshia：[分不清，講不通]
張貼者： 於 沒有留言:
標籤：

2018年4月10日 星期二

輕輕鬆鬆讀台語 第八單元 第五課 廟口看布袋戲

輕輕鬆鬆讀台語 第八單元
第五課    廟口看布袋戲
媽祖生hit 一工，媽祖廟前leh 搬布袋戲，阿公愛看布袋戲，食暗飽tiō招我kap 伊鬥陣去棚跤等看戲。
鑼鼓聲tīn-tōng-tshāⁿ ，閣用放送頭音響leh 播聲，鬧熱滾滾，可惜看戲ê人無濟，m̄ 是老歲仔人，tiō是囝仔班，tsiâⁿ 少少年人，親像阿爸kap 大兄tiō 無愛看，阿爸講伊較趣味kap 朋友去唱歌，阿兄講tiàm 厝內扑電腦較心適，看he 金光布袋戲，pìn-piàng 叫，閣有熱門音樂、流行歌，已經無古早ê台灣味，無啥意思。
鑼鼓聲突然停止，正戲tâⁿ-beh 開始， 原來是二八水明世界ê布袋戲，阿公歡喜講真讚，怹有分前後場，戲齣照古本，布袋戲尪仔theⁿ 了tsiâⁿ 有規矩，bē siuⁿ-hàm，kài 有傳統古早味，上特別--ê，tiō 是伊ê 口白，純正台灣話，好聽會牽絲，聽了hō͘ 人暢入脾。猶有，伊ê 後場thiau-kang kā 徙來戲棚前，吹、鼓、弦、曲，按怎pûn ，按怎挨，攏hō͘ 人看現現，現場配音無NG，實在有水準。
「aih！可惜--à 可惜！哪會無人會曉來欣賞？tsiah 好ê 台灣戲劇，tsiah 好ê 台灣味布袋戲，哪會無人會曉來欣賞？」阿公tsim-mi̍h 看，tsim-mi̍h 怨嘆講hō͘ 我聽。
【註解】：
媽祖生：農曆3月23是媽祖生日。
tsiâⁿ 少：[非常少]
正戲：正式ê 戲齣。
tâⁿ-beh：[剛要]
theⁿ ：撐，[撐布袋戲]
siuⁿ -hàm：[過分誇張]
kài 有：[非常具有]
暢入脾：[爽入骨髓]
thiau-kang ：故意。
pûn：pûn 鼓吹。
挨：挨絃仔。
tsiah 好：[這麼好]

tsim-mi̍h 看，tsim-mi̍h 怨嘆：[邊看邊怨嘆]
張貼者： 於 沒有留言:
標籤：
訂閱： 文章 (Atom)