043.Kut-tsiam-á、Kut-tsam-á（骨簪仔）＞彩鷸＞Painted Snipe.

043.Kut-tsiam-á、Kut-tsam-á（骨簪仔）＞彩鷸＞Painted Snipe.

Kut-tsiam-á（Kut-tsam-á）（骨簪仔），伊ê喙pe長閣尖，ká-ná古早時代查某人梳妝打扮時，kā頭毛捲起來夾tī頭殼頂ê珠仔針（金鳳釵）。

骨簪仔是生湠tī台灣ê水尖仔涉禽中，唯一一妻多夫ê鳥類。生卵了後，孵卵ê工課完全由公鳥負責。做岫覕tī水田內、荷花池、lòm窟池邊ê草埔內，以昆蟲、水生小動物，抑是植物ê種子為食物。

042. Tsúi-tsiam-á（水尖仔）＞鷸、鴴＞Snipes, Sandpipers, Plovers.

042. Tsúi-tsiam-á（水尖仔）＞鷸、鴴＞Snipes, Sandpipers, Plovers.

Tsúi-tsiam-á（水尖仔），是講一般ê鷸、鴴科涉禽，in-ê喙pe長閣尖ê緣故號ê名。閣叫做海滑liu-á，可能是根據伊ê動作來號名。

水尖仔，大部分規陣活動，歇tī海邊、溪口、lòm地ê水濱，抑是曠闊ê草埔，各種水尖仔lām做伙生活。伊kap雁、鴨等攏是典型ê候鳥，tī台灣有一部份是留鳥，但是大部分攏tī 10月ùi北方飛來，過境抑是停留到隔轉年三--月tsiah飛轉去北方。昆蟲、軟體動物、甲殼蟲，抑是魚蝦是主食。

鷸科鳥類，喙細細長長，基部柔軟。濱鷸、穉鷸ê喙pe，雖然尾溜tīng-khok-khok，m̄-koh伊ê內面有tsiânn幼ê神經線；田鑽仔（田鷸）、骨簪仔（彩鷸）等、伊ê喙pe嘛有神經，這是kap其他鳥類無仝ê所在。

040.Oo-ke-á（烏雞仔）＞鳧翁（hû-ang）、白冠雞（pe̍h-kuè-ke）＞Coot.

040.Oo-ke-á（烏雞仔）＞鳧翁（hû-ang）、白冠雞（pe̍h-kuè-ke）＞Coot.

Oo-ke-á（烏雞仔），除了頭殼頂kuân ê白額板kap喙pe是白色--ê以外，kui身軀攏是烏色羽毛。

Oo-ke-á（烏雞仔），tī台灣是普遍ê冬候鳥，歇tī曠闊ê水面，抑是有水草、蘆竹抱ê水池，gâu tshàng-tsúi-bī（藏水沬）食水底食物。為了適應水內、岸頂ê生活環境，伊ê胸、腹sîng水鴨，喙pe sîng雞仔，跤趾無sîng雞爪，嘛無sîng鴨蹄，tsiânn特別，主要食物是水生動物植物。

041.Lîng-kak- tsiáu（菱角鳥）＞水雉＞Pheasant-tailed Jacana.

041.Lîng-kak- tsiáu（菱角鳥）＞水雉＞Pheasant-tailed Jacana.

Lîng-kak-tsiáu（菱角鳥），tshuē食、歇睏、生湠攏tiàm-tī菱角池。Tī台灣一寡仔是留鳥，多數是夏候鳥，每年4月中旬出現，配對生湠，做siū、生卵、飼囝，非常無閒，9月中旬就漸漸消失蹤影。

菱角鳥ê警覺性真強，做岫tī浮草真旺，視野真闊，歹發現ê所在；伊ê跤柱kap跤爪攏真長，適合tī水蓮、菱角葉頂奔走。

039. Tshân-ke-á（田雞仔）＞紅冠水雞＞Moorhen.

039. Tshân-ke-á（田雞仔）＞紅冠水雞＞Moorhen.

 Tshân-ke-á（田雞仔）就是歇tī水田裡ê水雞，淺黃綠色ê雙跤tsiânn明顯，有「tshenn跤仔」ê稱號，tī台灣是真普遍ê留鳥，tiàm-tī lòm地、水邊、溪仔邊、水田，tī透早抑是欲暗仔出來活動，食細隻蟲仔，植物幼芽。

037.Khóo-ke-bó（苦雞母）＞白腹秧雞＞White-breasted Waterhen.：

037.Khóo-ke-bó（苦雞母）＞白腹秧雞＞White-breasted Waterhen.：

Khóo-ke-bó（苦雞母）生湠期間，暝也吼，日也吼，一直吼bē煞，一直吼「khóo--à！khóo--à！」m̄-tsiah hōo庄跤人號做「苦雞母」。Tī台灣是tsiânn普遍ê留鳥，覕tiàm水田、lòm地、溪岸邊有蘆竹、雜草內，罕得飛，嘛飛bē懸。

另外嘛有人kā叫做「白面仔」，「紅kha-tshng仔」，是因為伊ê尾脽毛紅紅。

俗語：苦雞母，生苦雞仔囝。

苦雞母ê故事：（俗語：hit-lō蛇，生hit-lō卵，hit-lō囝，生bē斷。Gîm-tsînn水，滴原位。）

古早有一个做田人，生兩ê囝，大漢--ê是前某生--ê，細漢--ê是後siū（受）生--ê。後母苦毒前人囝是古早人ê歹風俗，tsit-ê做人後母ê人，自然無an好心，想空想縫beh害tsit-ê前人囝。

伊命令兩ê囝各人tsah青皮仔豆ê種子，去後山荒郊野外tiām種植，吩咐若無生豆仔thang收成，bē使轉--來，伊偷偷仔將sā過ê種子交hōo大囝，將有性命力ê好種子交hōo家己ê親生囝，兩兄弟仔聽著阿母ê話就出發行向後山beh種豆仔。

阿兄是有孝閣古意，老母ê旨意m̄敢違逆，種子kuānn--leh，ná行ná想beh按怎種作，才bē hōo阿母失望；小弟就無仝款，人講「hit-lō蛇，生hit-lō卵，hit-lō囝，生bē斷」，有影歹種tō是歹種，伊沿路行沿路sńg無停，m̄是beh掠鳥仔，就是beh kā阿兄創治，無張持看著阿兄ê種子大粒閣飽滇，想講阿母哪會大細心，疼大兄無聽我小弟？e~，按呢m̄著，在來阿母tio̍h疼我無疼阿兄，ah，大概阿母無小心kiat m̄著去，煞將大粒--ê hōo阿兄，細粒--ê交hōo我，這beh汰會使tsit，tō趕緊利用歇睏ê時陣kā阿兄ê種子偷換倒轉來。

時間過了也不止仔緊tō-tio̍h，春去秋來，收成ê節氣到--à，阿兄肩頭擔一大擔ê青皮仔豆轉來，猶閣賰一大堆beh hōo小弟tàu相添，m̄-koh小弟種ê種子攏bē puh芽，一屑仔收成嘛無，煞m̄敢轉來，tsit-ê後母總是知影「gîm-tsînn水，滴原位。」家己造惡家己受，m̄敢講出因由，雖然大漢--ê hit-ê前人囝非常有孝閣kā安慰，免煩惱，小弟一定會倒轉來，m̄-koh母囝連心，親生囝是老母ê一塊肉，bē堪得暝日思，一直等無伊ê囝轉來，因為過度悲傷惹出重病，煞來一命來嗚呼哀哉，死了化做1隻苦雞母，暝也吼，日也吼，一直吼bē煞，一直吼「khóo--à！khóo--à！」teh思念伊ê親生囝。

036.Bí-ke-á（米雞仔）＞緋秧雞（hui-iong-ke）＞Ruddy Crake.：

036.Bí-ke-á（米雞仔）＞緋秧雞（hui-iong-ke）＞Ruddy Crake.：

bí-ke-á（米雞仔），愛歇tī田裡食粟仔，所以叫做米雞仔，活動時，紅絳色ê雙跤特別影目，庄跤人號做紅跤仔（âng-kha-á），緋秧雞（hui-iong-ke）是日本名。

bí-ke-á tī台灣是tsiânn普遍ê留鳥，活動tī水邊蘆竹phō、水田、溼地、圳溝邊。

用羅馬字學習台語的祕訣：

用羅馬字學習台語的祕訣：

學習華語漢字需要ㄅㄆㄇㄈ注音符號拼音，利用字典查生字『蕭』，可以看注音ㄒㄧㄠ就知道發音；查生字『平』的注音是ㄆㄧㄥ；查生字『治』的注音是ㄓ；所以蕭平治的呼音是ㄒㄧㄠㄆㄧㄥㄓ。

學習台語需要p ph m b羅馬字（拼音），如果你會「蕭平治」的台語發音，你將很容易拼出「siau pîng-tī」，反過來說，你可以看羅馬字「siau pîng-tī」讀出「蕭平治」的台語發音。

當然，你必需學會羅馬字：

聲母(子音)：pㄅ/ phㄆ/ mㄇ/ b/ tㄉ/ thㄊ/ nㄋ/ lㄌ/ kㄍ/ khㄎ/ ng/ g/ tsㄗ/ tshㄘ/ sㄙ/ j/ hㄏ

韻母(母音)：aㄚ/ eㄝ/ iㄧ/ oo o͘ㄛ/ uㄨ/ oㄜ/ aiㄞ/ auㄠ/ iaㄧㄚ/ iauㄧㄠ/ ioㄧㄜ/ iuㄧㄨ/ uaㄨㄚ/ ueㄨㄝ/ uaiㄨㄞ/ uiㄨㄧ/ m合嘴閉塞韻尾/ n舌齒閉塞韻尾/ ng軟顎閉塞韻尾/ nn=ⁿ鼻化音符號/h喉塞韻尾

聲調(八聲)：kun1君/ kun2滾/ kun3棍/ kut4骨/ kun5拳/ kun2滾/ kun7郡/ kut8滑（kun kún kùn kut kûn kún kūn ku̍t）

035.Ho̍h（鶴）＞丹頂鶴＞Japanese Crane.：

035.Ho̍h（鶴）＞丹頂鶴＞Japanese Crane.：
（感謝鄭光熙先生薛光雄先生提供相片）

丹頂鶴是日本名，歇tī tâm溼ê臺地性草埔，日--時討食，暗時歇睏。鶴ê跤爪，三前一後，後爪較懸閣較短，所以無法度khip tiàm樹枝，水墨畫愛畫鶴歇松枝，可能是對鶴ê一種誤解。

031.tek-ke（竹雞）＞竹雞＞Bamboo Partridge.：

031.tek-ke（竹雞）＞竹雞＞Bamboo Partridge.：

（感謝薛光雄先生鄭光熙先生相片）

愛歇tī海拔1200公尺附近ê山坪，活動tī竹林、草埔內，所以號做竹雞，透早kap黃昏時，定定kiuh-kiuh吼，庄跤人愛掠伊來食，所以滾笑講伊ê叫聲親像：「四隻一盤、四隻一盤…」抑是「食會死，食會死…」。

20120205_竹雞仔悲歌(kih-ko̍k-kŏai chia̍h beh sí)Lah-jih(蕭平治)

[20130108投稿彰化市公所《半線文化》季刊第11期]

改投【《台文戰線》第31號2013.7】

創作想法：

「竹雞仔」就是竹雞，雖然不是保育類動物，基於愛護野生動物的關懷，作者把它擬人化，描述其被人類誘殺的悽慘命運，借以提醒人們不要再濫殺野生動物。描寫在地文化必需使用在地語言，才能真實直接感動而不必經過思考轉化(自我翻譯)。漢字重在表意，可以適確表達台語語意、聲韻者，則寫漢字；容易產生爭論的字、詞，則以羅馬字書寫，羅馬字是表音文字，可以直接表達台語活生生的生活語言。只要你懂得台語漢字、學會台語羅馬字，保証可以了解作者幾乎100%的意涵。「kih-ko̍k-koăi   kih-ko̍k-koăi」vs「雞狗乖、雞狗乖」及「破格」vs「phòa-keh」的書寫，一個擬聲，一個是台語才有的語彙，一個人動不動就會有失態大聲嚷嚷的舉動叫「phòa-keh」，今以「破格」書寫，是否會誤會為破格錄取的「破格」？請直接以台語思考，台語發聲唸讀。

本文：

kih-ko̍k-koăi    kih-ko̍k-koăi    響kah kui 山坪

有聽見聲                                無看著影

to̍h是chiah 破格                  chiah-ē惹人kā你掠

掠--去ê 結果                                1盤4隻2盤8隻piak鳥仔巴

「Kih-ko̍k-koăi！Kih-ko̍k-koăi！食boeh死！食boeh死！」

「Kih-ko̍k-koăi！Kih-ko̍k-koăi！食boeh死！食boeh死！」

自從阿竹仔in兄妹仔去hō͘「人」掠去piak 鳥仔巴了後，竹模--ē in翁某to̍h起痟--à，暝日「kih-ko̍k-koăi，kih-ko̍k-koăi⋯」吼無停，「食boeh死，食boeh死⋯」罵bē-soah，一直詈一直罵，無論啥物叔孫弟兄kā苦勸kā安慰，in攏kài-sêng無聽見，猶是bih-tiàm暗毿ê kē樹叢草菢內「kih-ko̍k-koăi，kih-ko̍k-koăi⋯食boeh死，食boeh死⋯ 」一直吼一直哭，吼kah sau聲，哭kah giōng boeh 斷氣，hit種失去囝兒ê悲傷哀啼，hō͘ in竹雞仔族心碎嚨喉管tīⁿ，忽然間ê恬靜無聲，是竹模--ē in翁某已經thiám kah勼tī siū內chhngh--leh chhngh--leh 。

講--起來！實在是無捨世可憐代，自in搬來chit粒山頭徛起，to̍h注心boeh tiàm-chia tòa一世人，翁某認真phah拚ê結果，真無簡單chiah開墾1-phiàn有竹菢有草埔ê山坪，koh-iā生湠一tīn古錐ê囝兒，日日chhōa出chhōa入，揣食chhit-thô，日子過了不止仔快樂滿意。

Siáⁿ知hit日一tīn peh山朋友來到chit-phiàn山埔了後，in ê hit-tīn囡仔to̍h phah-m̄-kìⁿ--lò͘，代先in kioh是囡仔káu-koài gia̍t-siâu四界走四界滾，sńg kah m̄知影揣路倒轉--來，in to̍h走去隔壁山坑仔揣，仝款無看影跡，連一个囡仔影mā無，是路裡tn̄g-tio̍h Ka-ka-á kā in講：「免koh 揣--ā--lah，已經去hō͘兩个歹人掠--去--à，taⁿ m̄ hō͘ in piak成鳥仔巴吞食落腹--à。」

竹模--ē in翁某聽一下差一點仔to̍h暈--去，「Ka-ka-á姊，你敢有親目看--著？」

「有--lah！無,我ná-ē敢烏白講？最近常看peh山朋友中間，有2个m̄-chiâⁿ囡仔，peh山無sêng peh山，散步無sêng散步，鬼鬼祟祟，1个手裡捾1領網仔，1个攑1支hop網，ná行ná kí，2蕊賊仔目不sám時都siòng對草埔內面，kài-sêng leh揣啥物物件ê款，在我經驗看--來，一定對咱野生動物無好空--e，lín-ê寶貝囝一定是去hō͘-in網去piak-pa--a，絕對無m̄著--ē--lah！」

竹模--ē 翁某聽Ka-ka-á講了後，隨時mà-mà吼：「我ê寶貝後生我ê寶貝查某囝--lah，ná-ē chiah歹命，chiah tăⁿ轉大人--niâ，to̍h hō͘ he夭壽仔--è害--死--à，天公伯--à！你ná-ē chiah-ní無公平，阮敢有做啥物失德ê代誌--hio͘h，ná-ē得著chit款ê報應，我歹命--ā~我歹命⋯  」竹模--ē in翁某ná唸ná哭，hō͘人愈聽心愈酸，徛tiàm樹頂Kuh-kuh無講話ê斑鴿兄哥，mā開嘴安慰竹模仔嫂：「Taⁿ mài-koh吼--à，囝koh生to̍h有，保重身體要緊，後擺著教恁囝，m̄-thang振動著to̍h chiah大聲kih-ko̍k-koăi,kih-ko̍k-koăi 吼bē-soah，m̄-nā噪人耳，koh-ē惹來逐家ê麻煩。你敢知影，hit 2个m̄-chiâⁿ囡仔mā tī山頂牽1領chiah 大kâi ê天羅地網boeh kā咱掠，你敢知影⋯  」斑鴿ná講ná比，青笛仔聽了感覺siuⁿ離譜，to̍h chhap嘴講：「斑鴿兄，ah你是leh kā人安慰抑是leh kā人教示？竹模仔嫂已經哭kah chiah-nī悲慘，你iáu-koh講he五四三--e，按呢敢著？」

「歹勢--lah，竹模仔嫂，是我一時siuⁿ氣惱，氣hit 2个夭壽仔chiah無天良，soah講了siuⁿ超過，請mài見怪，無歹意--lah。」

「Taⁿ竹模仔兄、竹模仔嫂，mài-koh傷心--a，死都死去--à，lín猶少年，閣生to̍h有，chit種ê淒慘代，只要有親像chit 2个夭壽囡仔tī--leh，不管時lóng-ē發生，以後逐家tio̍h較sè-jī--leh chiah-tio̍h。」

平靜日子過了chiâⁿ個月，「阿竹仔in pâ，我閣有--ā--neh！」竹模--ē in某tī 竹模ê耳孔邊kā伊sai-nai。

「真--e？我又閣boeh做lāu-pē--ā，你趕緊去歇睏，m̄-thang siuⁿ勞動，討食ê khang-khòe我來做to̍h好。」竹模--ē歡喜kah 「kih-ko̍k-koăi,kih-ko̍k-koăi」chiah大聲喝--出來，假若驚人m̄知伊boeh做老爸--leh。

「Taⁿ mā好--à，較細聲--leh--lah，你是boeh-koh惹麻煩--hio͘h？歡喜tī心內to̍h好，m̄-thang按呢lōng-iâng，以後to̍h hō͘你較無閒--lò͘！」

無外久，竹模--ē in翁某又閣chhōa 1-tīn 細隻竹雞仔出來chhit-thô，過去ê傷痕漸漸放bē記得，山坪每日仝款hiah-nī鬧熱，peh山散步ê朋友仝款hiah-nī濟，in mā仝款tòe人行出行入，一屑仔to-bē感覺驚惶，仝款歡喜ê時陣to̍h大聲「kih-ko̍k-koăi,kih-ko̍k-koăi」吼無停，引起peh山朋友指指chí-chí：「chiâⁿ-súi ê鳥仔，緊來看！」

「He 叫做竹雞仔--lah！」

「Ná像bē-hiáu飛ê款？」

「聽in leh吼kih-ko̍k-koăi,kih-ko̍k-koăi，koh真心適！」

竹模--ē in一家伙仔soah愈來愈得意，愈hō͘人o-ló愈感覺hiau-pai，一下歡喜soah kui-ē做1群「kih-ko̍k-koăi,kih-ko̍k-koăi」吼--起來，響kah kui 山坪。

天氣有測bē準ê時陣，鳥仔有想bē到ê災厄，chit一工peh山ê朋友當中，koh出現2个chah家私--e，1个提hop仔，1个捾網仔，chim-mi行chim-mi笑，ná行ná講話，「盈暗穩sut--è，4隻1盤8隻2盤，燒酒已經chhoân好勢⋯⋯ 」

Hit boeh暗仔，竹模--ē in翁某又閣四界leh揣囡仔，揣kah心狂火to̍h(𤏸)，揣kah目屎流目屎滴，揣kah無望起痟狂「Kih-ko̍k-koăi！食boeh死！」「Kih-ko̍k-koăi！食boeh死！」「Kih-ko̍k-koăi！食boeh死！」⋯⋯⋯⋯

20120205用pe̍h-ōe-jī寫，20121020 chiah koh用漢羅文改寫_Lah-jih