2011年3月9日 星期三

種喙齒----醫學台語 Lah-jih 2010/10~2011/3

種喙齒----醫學台語 Lah-jih 2010/10~2011/3

3-4冬久「哺」ê困擾、鬱卒、無奈,今仔日起總算是得著敨放,食物入喙「哺」起來加真輕鬆,「哺」起來加真有滋味,「哺」起來mā加真有元氣。感謝朱醫師ê專業,感謝齒模司傅ê功夫。

倒爿後chan喙齒,頂下kiuⁿ各有1齒,佇3冬外前出現搖櫓痠痛,揣隔壁黃醫師治療,黃醫師好心建議:m̄-thang「挽嘴齒」,會當留--leh著m̄-thang「挽」,鑲假嘴齒m̄-nā開錢,koh會影響邊仔齒ê安定保固。黃醫師koh建議:換用一款齒膏,每擺洗喙抿嘴齒了後,喙內齒膏泡mài suî呸掉,會使得用指頭仔kā齒岸so-so ji̍h-ji̍h--leh,マッサ-ジ(按摩)1--分鐘,按呢會當kā喙齒保tiâu--leh,到時若是保bē-tiâu,chiah來挽。

遵照黃醫師交代,1工早暗2擺照起工按摩so齒岸,喙齒搖櫓ê情形漸漸有得著改善,不過三不五時著去揣黃醫師點喙齒消毒一下,大約經過beh chiâⁿ年,頂kiuⁿ hit齒已經恢復安定,無koh搖櫓;但是下kiuⁿ hit齒suah愈來愈嚴重,雖然bē痛,m̄-koh哺tēng--ê ê食物tiōbē堪得,連食白米飯tō會gāi-gio̍h,姑不而終kā「哺」物件ê習慣強迫改換正爿牙槽。改變習慣實在是艱苦代,何況chit種慣勢已經是年久月深ê「習性」,一時僫得改,見擺食物件,注心用正爿哺,可是注心哺--幾個à tō sûi換對正爿來,無張持倒爿一下哺,「ai oĕ--à!chio̍k chio̍k chio̍k chio̍k…」險險kā喙齒哺la̍k--去,實在鬱卒koh無奈,一日3頓,pīn-nā食飯配菜,m̄是用啉--ê,定著心內ai 「oĕ--à」幾若擺,實在真想欲kā挽掉,但是黃醫師猶是鼓勵tiō堅持保養--落去。

「食」無滋味「哺」bē爽快ê日子,koh經過beh 2年,有一工感覺下kiuⁿ hit齒m̄-nā搖來搖去,koh會頂下振動ná像tàu無tiâu leh,囝婿建議去揣朱醫師看覓,朱醫師是「種嘴齒」專門科,囝婿有經驗--過,感覺真四是真滿意。tiō預約門診時間。

2010年7月19準時報到,先入電光室翕電光(X光),然後朱醫師kí電光片影像:「蕭--先生,chit齒後chan無m̄-tio̍h--ho͘ⁿh!你看,倒爿下kiuⁿ第二齒後chan,已經齒根跤kap牙槽無粘tiâu leh,喙齒已經斷--去,保bē-tiâu ā,需要挽掉,2禮拜後chiah來挽嘴齒。」ka-ia̍h ê醫生館攏著預約看病,tio̍h-koh lún--2禮拜。

8月11下晡3點koh來到診所,坐chiūⁿ治療椅,牙槽岸消毒好勢,醫師kā beh挽hit齒牙槽注1支麻射,經過2、3分鐘tiō開始挽嘴齒,無兩下手,斷--去koh liah做2爿ê喙齒已經khǹg-tiàm盤仔內,有影著挽,留bē-tiâu--ā。嘴齒挽掉,齒岸leh流血,lo̍k喙了後suî 咬1塊棉紗布止血,著等到止血了後chiah-thang提掉。醫生開10日份ê藥á,交代ài按時食,he是消炎劑,3禮拜後chiah來評估beh用「鑲」--ê抑是用「種」--ê。iū-koh是預約看病,tio̍h-koh lún 3禮拜用hebē慣勢ê正爿牙槽。

8月31看診了後,醫生講牙槽岸真kiāⁿ(健),會使得用「種」--ê。

「種喙齒佮鑲喙齒有啥物無仝?」

「種喙齒比鑲喙齒較勇、較綿遠,不過價數較貴,時間著拖較久。簡單講,種嘴齒tiō是kā牙槽釘1支杙á,chiah kā假嘴齒鎖tiàm面頂,哺物較ē-tàng出力,佮真喙齒sio-siāng;若是用鑲--ê,tiō ài動著邊--a hit 2齒。」

「鑲1齒ē傷著2齒,bat鑲過喙齒當然了解,m̄-koh你講種嘴齒tio̍h kā牙槽釘1支杙á,ah he m̄真恐怖、真痛?」

「bē--lah,he是一个比論,新ê醫療技術真進步,機械真精密真人性化,免驚--lah。」

「種1齒著偌儕錢?」

「大約7萬5。」

「Hò͘!」醫生真無閒,m̄敢問siuⁿ濟,根據醫生ê簡單說明,了解種嘴齒比鑲嘴齒較勇、較綿遠,雖罔價數較貴,牙齒根咬--leh,chit條錢實在bē用得儉。

「按呢!蕭--先生beh用鑲--ê抑是beh用種--ê?」

「用種--ê!」

「按呢安排後--日早起10點來開刀,開刀進前請kā喙齒抿hō͘清氣,會使得先食一寡點心,因為開刀後需要一段時間chiah會當食物件。」

9月初2報到了後,進入開刀房,這是一間無菌開刀房,護士吩咐著換患者衫褲,peh上手術台,消毒水lo̍k喙、蓋面、喙內消毒,紲落去tō是等醫生來。

「這是小手術,小可ē痛,真安全,做你放輕鬆免緊張!」

「來!喙peh開,先注麻射!」ná像蠓仔釘--著,tī喙齒腳雙爿注2擺,隨時規个牙槽岸著麻了了,連紲喙唇mā感覺麻麻,喙開開,m̄敢合倚。

「Chit-má beh開刀--a,小可會痛,lún--一下!」輕輕仔kā齒岸切開,有he利刀割--著ê痛,小可niā-niā,紲落去感覺ná像用釘仔leh釘牙槽,無感覺痛,感覺朱醫師有小可chhi̍h力,反作用ê原理,喙下斗mā tuè leh tèⁿ力;無guā久,ná-chhiūⁿ輕輕仔用手leh chūn螺絲釘,koh來是用ドライバ-(doraibaa)leh絞,像he tī柴枋頂leh絞螺絲仝款,愈深愈下力,hit塊柴枋是牙槽,牙槽帶動喙下斗,喙下斗帶動規粒頭殼,做一下激力,激力!kek-la̍t!激一下久,頭殼小可leh流汗,濕濕--a,助理提衛生紙leh濕汗,醫生講會使得小歇睏。喘一khuì大khuì,下斗趕緊合倚,加真爽快。小可痛、小可緊張m̄-sī問題,喙peh開hiah久chiah是艱苦,喙瀾水tī喙內bē當呸,雖然喙內有khoà suh水器,但是流到嚨喉鐘á ê 喙瀾水是汲bē著--ê,hit種gāi-gio̍h tiō是gāi-gio̍h kah 有夠gāi-gio̍h tiō是。

「來!喙koh peh開,beh koh繼續!」

「kn̆g!kn̆g,kn̆g!kn̆g!」幼聲幼聲ê車床聲,tī喙內振動,目睭mi-mi,喙á開開m̄敢合倚,隨在醫師chhiâu-chhi̍k,m̄知影朱醫師leh「種」喙齒,著種偌久?

「kn̆g!kn̆g,kn̆g!kn̆g!」ná像又閣leh絞螺絲釘,醫師愈絞愈下力,我ê喙下斗嘛toè-leh tèⁿ力,牙槽岸感覺淡薄仔sng⋯

「好--à!」謝天謝地,緊張解除,心情淡薄仔放鬆,喙內小可痛痛麻麻。

「Chit-má人工齒根已經釘入去牙槽骨,需要一段時間予牙槽骨做肉生骨,等到已經kap人工齒根結合做伙,成做牙槽骨ê一部分時,chiah ē-tàng咬模做假嘴齒。2禮拜後先轉來拆線。」助理開始手術後ê消毒、整理,順紲交代注意事項,預約後擺門診時間。

9月13拆線,真簡單,一tah久á tō OK。朱醫師講:「牙槽手術後恢復chiâⁿ-kín,牙槽骨厚、勇,真贊,2個月後需要koh小手術--一下,he做肉ê牙槽岸ē kā假齒根包tiâu--leh,需要割開。」原來是按呢--ò͘,有影麻煩tō-tio̍h!

11月29做小手術,直接佇治療椅進行,注麻射、割開、鎖螺絲,完成。醫師講:「恢復正常,免thīⁿ線,咬棉紗布止血tiō好,免食藥,3禮拜後tiō會使咬模。」

12月13咬模,咬模tō ná像做石膏像仝款,需要kā hit齒挽掉ê喙齒形印出來,然後kā咬出來ê套模交予齒模師做假喙齒,咬模有準無準,佮假嘴齒ē合bē合關係真密切,所以咬模著用心,醫師用心,患者mā著用心。

牙槽消毒好勢,喙peh開,開始咬模,先咬頂牙槽,再咬下牙槽,醫師交代著咬予ân,m̄-thang振動,醫師算時間,時間若到tiō剝落來,咬模好勢,預約後禮拜來tàu假嘴齒。

12月20來到診所,喙內消毒好勢,朱醫師提假嘴齒予我看,講做了真媠,然後kā假嘴齒tàu起lih齒岸hit支柱仔,chhiâu好勢,叫我哺看覓:「頂齒下齒有合--無?」

「感覺小可礙謔,假嘴齒傷懸ê款?」

醫師提紙予我咬,然後閣用車床車,車一下仔:「閣咬看覓!」

「有較好勢!」

「轉去哺看覓,若猶感覺無四是,後禮拜chiah閣做調整,chit-má是暫時tàu tiâu leh,chit幾工傷tēng傷黏ê食物mài食。」

暗頓食飯,刁工換倒爿牙槽哺看覓,真正醫術高明,喙齒種了有夠讚,毋但會當哺飯、哺菜、哺土豆,閣會當哺瘦肉,假若真喙齒共款,一點仔tō bē感覺gāi-gio̍h無爽快,毋知會使得嚙肉骨--無?這著等較慢chiah來試看覓。

一禮拜ê試哺,感覺好勢好勢,12月27轉去診所tiō直接固定。將近半年ê治療佮台中、田中ê來去,今仔日總算是結束,3-4冬久「哺」ê困擾、鬱卒、無奈,今仔日起總算是得著敨放。

2010年12月7日 星期二

白內障手術----醫學台語

白內障手術----醫學台語 Lah-jih 2010/4/15~12/8

三年前正蕊目睭視網膜手術後,醫生tiō交代:「正蕊目睭mā有白內障,著繼續複診追蹤。」自按呢每三、五個月tiō轉去病院複診一擺。頂個月醫生講白內障已經sik,會使得開刀--a,tiō tshiâu tī 3禮拜後手術。

醫生問講:「beh入啥物珠仔(人工水晶體)?健保--ê免錢,若beh較好--ê著自費。」

「適合看冊、拍電腦kap駛車tiō好。」

「按呢咱來入tsit種,暗時光線較暗會看較清,平常時kap一般仝款。需要補貼大約3萬箍,敢好?」

「OK!」

3禮拜後ê 4月13下晡3點,照醫生交代,tsah切結書kap身份證、健保卡準時到開刀房報到:

「阿伯!你叫啥物名?」

「蕭平治。」

「出生年月日?」

「1941,8月初8。」

「Beh創啥?」

「白內障開刀。」

「tó一蕊?」

「正蕊。」

「好!阿伯你hia等。」

手續辦好勢,護士交代著換患者衫褲,然後進入手術聽候室,內面護士叫我著量血壓:

「阿伯!你叫啥物名?」

「蕭平治。」

「出生年月日?」

「1941,8月初8。」

「Beh創啥?」

「白內障開刀。」

「tó一蕊?」

「正蕊。」

「好!阿伯你手ńg le̍k--起來,我kā你磅血壓。」

「80,120,好--à!hit-pîng有椅á,阿伯你hia等。」

手術聽候室是無閒--ê,mā是無聊--ê,護士行來行去,患者tiām-tiām椅á坐,心內m̄知想啥貨?無人知影。

「阿伯!kā你點目藥水。」點了,患者猶原tiām-tiām坐。

時間ná像tiām--去,也無時鐘也無手錶,1分1秒kap心臟、喘氣攏無tī-tāi,無聊兼無聊,無快樂mā無無快樂,只是聽候、聽候、聽候、聽候…

M̄知聽候外久,mā m̄知著聽候外久…

「阿伯!kā你點目藥水。」點了,患者猶原tiām-tiām坐。

時間又閣tiām一擺,猶原無聊兼無聊,無快樂mā無無快樂,只是聽候、聽候、聽候、聽候…

「阿伯!你叫啥物名?」

「蕭平治。」

「出生年月日?」

「1941,8月初8。」

「Beh創啥?」

「白內障開刀。」

「tó一蕊?」

「正蕊。」

「阿伯!你頭taⁿ-taⁿ,目睭peh金,beh kā你鉸目睫毛。」鉸好,患者猶原tiām-tiām坐。

「目睫毛1禮拜後tiō會閣發--出來。」

「Hò͘!」

時間又閣tiàm一擺,猶原無聊兼無聊,無快樂mā無無快樂,只是聽候、聽候、聽候、聽候…

「蕭平治先生!」1位護士leh叫:

「Tī tsia!」

「阿伯!你叫啥物名?」

「蕭平治。」

「出生年月日?」

「1941,8月初8。」

「Beh創啥?」

「白內障開刀。」

「tó一蕊?」

「正蕊。」

「阿伯!tuè我行。」

護士牽我ê手股頭向內面通路行,第一開刀房、第二開刀房……斡1斡,第七開刀房、第八開刀房……

「到--à!」

門開,看著開刀房內面,2个護理人員,1台手術台,無看著主治醫師。

「阿伯!peh起去手術台,theⁿ--leh!sè-jī!」1位護士客氣招呼:

「Tshik較落去--leh,koh較lueh,koh較lueh!按呢好!」

「阿伯!你叫啥物名?」

「蕭平治。」

「出生年月日?」

「1941,8月初8。」

「Beh創啥?」

「白內障開刀。」

「tó一蕊?」

「正蕊。」

「阿伯!你倒hō͘好勢,tit-beh kā你目睭消毒,會小可無爽快。」另外hit位護理人員,應該是麻醉師,teh處理開刀前ê預備空課:

「目睭mi-mi!beh kā你khàm目睭,若有無爽快著愛講。」

無guā久聽著熟似聲音:「先注一支麻射!」是陳醫師,「tsit-má beh開刀,心情放輕鬆。」beh刣欲割隨在你,患者只有恬恬聽話。

紲落去是in 3人互動交談ê話語,有專業用語,mā有淡薄á輕鬆phò-tāu,不三時目睭會噴一寡水,無爽快mā無無爽快,正蕊目睭會當看著頂頭照落來ê光影。無guā久,家己有看著目睭內有he破--去、碎--去、趺--去、散--去ê物件,清清楚楚佇目睭前變化,閣無guā久,hia-ê碎--去、趺--去ê物件ná像hō͘吸管suh清氣,續落來目睭內uì邊--a seh入來一个半圓形親像鏡仁ê物件佇遐徙來徙去,目nih仔半圓形變成圓形。時間tiō tī手術過程中經過,ná像15分鐘抑是20分鐘久?陳醫師ê聲音:「恭喜!開刀真順利。」一句多謝嘛無應,手術台頂只有聽話的義務,kan-nā耳孔會使得聽,tshun--ê袂振袂動,kái-sîng植物人(si̍t-bu̍t-jîn)。

紲落去是護士處理開刀後ê空課:「阿伯!會使得落來坐tiàm輪椅。阿伯!目睭已經消毒,用目罩kap紗布khàm-tiâu--leh,m̄-thang tháu開,m̄-thang bak-tâm。我kā你sak去恢復室小歇睏--一下!」

換好家己ê衫á褲,護士繼續交代:「阿伯!tsit幾工刺激性ê物件,像薰、酒、hiam薑攏暫時mài食,油臊mā食較少--leh,青菜食較濟--leh,按呢放屎較nńg-lio̍h bē秘結,總講一句,咳嗽、拍咳啾、tèⁿ力,攏會影響目睭手術後ê復原。阿伯!已經kā你報名掛號明á載轉來複診。」ná聽ná tìm頭,2个查某囝tsit時tsiah幫忙納錢the̍h藥。

隔轉工複診,tháu開目罩kap紗布,「世界哪會tsiah-nì光明」,足久足久m̄-bat看著tsiah-nì光iāⁿ ê景緻,醫生講恢復tsiâⁿ四是,交代會使免khàm紗布,不過暗時beh睏著愛khàm目罩,目藥水照時間點,10工後tsiah koh轉來複診。

聽醫生ê話,10工內m̄敢siuⁿ勞動用力,食mā加真khiūⁿ,目睭m̄敢bak-tâm,暗時掛目罩睏,小可無方便。目睭除了感覺較光以外,mā發現正蕊目睭顛倒比倒蕊較光,正蕊看物,形體放大歪斜ê現象加真明顯,suah hō͘目睭看物加真快疲勞⋯⋯,tsia-ê狀況一定著講hō͘醫生了解,驚做袂記得,特別整理1份資料佇10工後4月23複診時,報告醫生了解:

陳醫師:平安!

3年前正蕊目睭視網膜手術後ê現象:解像力比倒蕊目睭差,尤其近距離變霧霧,看bē清楚。形體變大而且變形,大約電腦字體 倒爿12:正爿粗體14,影響視神經解讀,看冊拍電腦攏真容易疲勞。

4月13日正蕊目睭白內障開刀後:感覺順利,正蕊目睭感光贏過倒蕊,視覺變較光。結果形體變大、變形ê現象suah較明顯,影響視神經解讀,一時仔倒爿,一時仔正爿,真容易疲勞。正蕊目睭邊有tang時á有親像sih-nà閃光出現。新配目鏡可能度數傷懸,掛起去會感覺眩眩gông-gông,而且目睭白仁mā紅紅小可痛痛,試掛幾若工猶是袂四是。

陳醫師看了報告:「了解!新目鏡暫時mài掛,以後tsiah koh做調整。你講ê問題攏是手術後ê正常現象,需要慢慢á適應,5月22日tsiah koh轉來複診。」

4月底有一工,日頭光iāⁿ-iāⁿ,無意中看天頂,雄雄發現正蕊目睭出現大細粒烏點颺颺飛,ná像蠓仔leh飛,詳細看,閣ná像飛真懸ê雞胿仔,嘛sîng魚缸內ê細粒水pho,上網查看覓,確定是「飛蚊症」,日頭光愈強愈明顯。另外正蕊目睭嘛感覺小可無爽快,親像hō͘目油遮著án-ni「有時清,有時霧」,感覺「tiam-tiam,tsiap-tsiⁿ tsiap-tsiⁿ」。最近感光無像tú手術後ê光iāⁿ,正蕊kap倒蕊已經漸漸平衡,不過感光較白感覺較無自然。

5月22日複診,kā最近ê情形詳細講hō͘醫生聽,經過視力檢查,視網膜掃瞄了後,發現視網膜有水腫現象,小可發炎,眼壓mā有較懸,黃斑部檢查無問題,tiō kā目睭注一支射,開2罐目藥水,交代目鏡較慢才配。預約7月30日tsiah閣再回診檢查。

Tsit遍複診患者較少,所以加請教醫生一寡有關白內障開刀ê問題。

醫生講:tsit擺ê手術叫做「白內障超音波乳化術」,kap傳統利用開刀kā白內障提出無仝,傳統開刀孔嘴較大,恢復較慢;「白內障超音波乳化術」是利用超音波ê能量,kā白內障乳化後khip出,tsiah kā人工水晶體囥--入去,孔嘴細,恢復緊,是目前公認上安全有效ê治療方法。原來是按呢--ò͘,莫怪會hiah-nī順序,無啥艱苦--著,朋友攏講白內障手術是用雷射--ê,按呢有較無正確,tiō將tsit遍ê講hō͘ in參考。

手術到今嘛已經4個外月,雖罔正蕊目睭猶原無啥正常,應該是3年前視網膜開刀所致,袂當講是tsit擺ê失誤。總是需要繼續追蹤複診tsiah是道理。

目睭是靈魂之窗,mài講青盲,kan-nā看袂清tiō真費氣食力,特別是愛看冊興拍電腦ê人,目睭視力bái,看字看袂清楚,真正做無空課,所以建議無論看冊、拍電腦,攏m̄-thang tsîn siuⁿ久,半點鐘歇10分鐘,應該會當做參考。