2010年12月7日 星期二

白內障手術----醫學台語

白內障手術----醫學台語 Lah-jih 2010/4/15~12/8

三年前正蕊目睭視網膜手術後,醫生tiō交代:「正蕊目睭有白內障,著繼續複診追蹤。」自按呢每三、五個月tiō轉去病院複診一擺。頂個月醫生講白內障已經sik,會使得開刀--atiō tshiâu tī 3禮拜後手術。

醫生問講:「beh入啥物珠仔(人工水晶體)?健保--ê免錢,若beh較好--ê著自費。」

「適合看冊、拍電腦kap駛車tiō好。」

「按呢咱來入tsit種,暗時光線較暗會看較清,平常時kap一般仝款。需要補貼大約3萬箍,敢好?」

OK!」

3禮拜後ê 413下晡3,照醫生交代,tsah切結書kap身份證、健保卡準時到開刀房報到:

「阿伯!你叫啥物名?」

「蕭平治。」

「出生年月日?」

19418月初8。」

Beh創啥?」

「白內障開刀。」

一蕊?」

「正蕊。」

「好!阿伯你hia等。」

手續辦好勢,護士交代著換患者衫褲,然後進入手術聽候室,內面護士叫我著量血壓:

「阿伯!你叫啥物名?」

「蕭平治。」

「出生年月日?」

19418月初8。」

Beh創啥?」

「白內障開刀。」

一蕊?」

「正蕊。」

「好!阿伯你手ńg le̍k--起來,我你磅血壓。」

80120,好--àhit-pîng有椅á,阿伯你hia等。」

手術聽候室是無閒--ê是無聊--ê,護士行來行去,患者tiām-tiāmá坐,心內知想啥貨?無人知影。

「阿伯!你點目藥水。」點了,患者猶原tiām-tiām坐。

時間tiām--去,也無時鐘也無手錶,11kap心臟、喘氣攏無tī-tāi,無聊兼無聊,無快樂無無快樂,只是聽候、聽候、聽候、聽候

知聽候外久,mā m̄知著聽候外久

「阿伯!你點目藥水。」點了,患者猶原tiām-tiām坐。

時間又閣tiām一擺,猶原無聊兼無聊,無快樂無無快樂,只是聽候、聽候、聽候、聽候

「阿伯!你叫啥物名?」

「蕭平治。」

「出生年月日?」

19418月初8。」

Beh創啥?」

「白內障開刀。」

一蕊?」

「正蕊。」

「阿伯!你頭taⁿ-taⁿ,目睭peh金,beh kā你鉸目睫毛。」鉸好,患者猶原tiām-tiām坐。

「目睫毛1禮拜後tiō會閣發--出來。」

Hò͘!」

時間又閣tiàm一擺,猶原無聊兼無聊,無快樂無無快樂,只是聽候、聽候、聽候、聽候

「蕭平治先生!」1位護士leh叫:

Tī tsia!」

「阿伯!你叫啥物名?」

「蕭平治。」

「出生年月日?」

19418月初8。」

Beh創啥?」

「白內障開刀。」

一蕊?」

「正蕊。」

「阿伯!tuè我行。」

護士牽我ê手股頭向內面通路行,第一開刀房、第二開刀房……1斡,第七開刀房、第八開刀房……

「到--à!」

門開,看著開刀房內面,2个護理人員,1台手術台,無看著主治醫師。

「阿伯!peh起去手術台,theⁿ--lehsè-jī!」1位護士客氣招呼:

Tshik落去--lehkohluehkohlueh!按呢好!」

「阿伯你叫啥物名

「蕭平治。」

「出生年月日?」

19418月初8。」

Beh創啥?」

「白內障開刀。」

一蕊?」

「正蕊。」

「阿伯!你倒hō͘好勢,tit-beh kā你目睭消毒,會小可無爽快。」另外hit位護理人員,應該是麻醉師,teh處理開刀前ê預備空課:

「目睭mi-mibeh kākhàm目睭,若有無爽快著愛講。」

guā久聽著熟似聲音:「先注一支麻射!」是陳醫師,「tsit-má beh開刀,心情放輕鬆。」beh刣欲割隨在你,患者只有恬恬聽話。

紲落去是in 3人互動交談ê話語,有專業用語,有淡薄á輕鬆phò-tāu,不三時目睭會噴一寡水,無爽快無無爽快,正蕊目睭會當看著頂頭照落來ê光影。無guā久,家己有看著目睭內有he--去、--、趺--去、散--ê物件,清清楚楚佇目睭前變化,閣無guā久,hia-ê--去、趺--ê物件hō͘吸管suh清氣,續落來目睭內--a seh入來一个半圓形親像鏡仁ê物件佇遐徙來徙去,nih半圓形變成圓形。時間tiō tī手術過程中經過,15分鐘抑是20分鐘久?陳醫師ê聲音:「恭喜!開刀真順利。」一句多謝嘛無應,手術台頂只有聽話的義務,kan-nā耳孔會使得聽,tshun--ê袂振袂動,kái-sîng植物人(si̍t-bu̍t-jîn)

紲落去是護士處理開刀後ê空課:「阿伯!會使得落來坐tiàm輪椅。阿伯!目睭已經消毒,用目罩kap紗布khàm-tiâu--lehm̄-thang tháu開,m̄-thang bak-tâm。我sak去恢復室小歇睏--一下!」

換好家己êá褲,護士繼續交代:「阿伯!tsit幾工刺激性ê物件,像薰、酒、hiam薑攏暫時mài食,油臊食較少--leh,青菜食較濟--leh,按呢放屎較nńg-lio̍h bē秘結,總講一句,咳嗽、拍咳啾、tèⁿ力,攏會影響目睭手術後ê復原。阿伯!已經你報名掛號明á載轉來複診。」ná tìm頭,2个查某囝tsittsiah幫忙納錢the̍h藥。

隔轉工複診,tháu開目罩kap紗布,「世界哪會tsiah-nì光明」,足久足久m̄-bat看著tsiah-nìiāⁿ ê景緻,醫生講恢復tsiâⁿ四是,交代會使免khàm紗布,不過暗時beh睏著愛khàm目罩,目藥水照時間點,10工後tsiah koh轉來複診。

聽醫生ê話,10工內siuⁿ勞動用力,食加真khiūⁿ,目睭bak-tâm,暗時掛目罩睏,小可無方便。目睭除了感覺較光以外,發現正蕊目睭顛倒比倒蕊較光,正蕊看物,形體放大歪斜ê現象加真明顯,suah hō͘目睭看物加真快疲勞⋯⋯tsia-ê狀況一定著講hō͘醫生了解,驚做袂記得,特別整理1份資料佇10工後423複診時,報告醫生了解:

陳醫師:平安!

3年前正蕊目睭視網膜手術後ê現象:解像力比倒蕊目睭差,尤其近距離變霧霧,看清楚。形體變大而且變形,大約電腦字體 倒爿12:正爿粗體14,影響視神經解讀,看冊拍電腦攏真容易疲勞。

413日正蕊目睭白內障開刀後:感覺順利,正蕊目睭感光贏過倒蕊,視覺變較光。結果形體變大、變形ê現象suah較明顯,影響視神經解讀,一時仔倒爿,一時仔正爿,真容易疲勞。正蕊目睭邊有tangá有親像sih-nà閃光出現。新配目鏡可能度數傷懸,掛起去會感覺眩眩gông-gông,而且目睭白仁紅紅小可痛痛,試掛幾若工猶是袂四是。

陳醫師看了報告:「了解!新目鏡暫時mài掛,以後tsiah koh做調整。你講ê問題攏是手術後ê正常現象,需要慢慢á適應,522tsiah koh轉來複診。」

4月底有一工,日頭光iāⁿ-iāⁿ,無意中看天頂,雄雄發現正蕊目睭出現大細粒烏點颺颺飛,像蠓仔leh飛,詳細看,閣像飛真懸ê雞胿仔,嘛sîng魚缸內ê細粒水pho,上網查看覓,確定是「飛蚊症」,日頭光愈強愈明顯。另外正蕊目睭嘛感覺小可無爽快,親像hō͘目油遮著án-ni「有時清,有時霧」,感覺「tiam-tiamtsiap-tsiⁿ tsiap-tsiⁿ」。最近感光無像手術後êiāⁿ,正蕊kap倒蕊已經漸漸平衡,不過感光較白感覺較無自然。

522複診,最近ê情形詳細講hō͘醫生聽,經過視力檢,視網膜掃瞄了後,發現視網膜有水腫現象,小可發炎,眼壓有較懸,黃斑部檢查無問題,tiō kā目睭注一支射,開2罐目藥水,交代目鏡較慢才配。預約730tsiah閣再回診檢查。

Tsit遍複診患者較少,所以加請教醫生一寡有關白內障開刀ê問題。

醫生講:tsitê手術叫做「白內障超音波乳化術」,kap傳統利用開刀白內障提出無仝,傳統開刀孔嘴較大,恢復較慢;「白內障超音波乳化術」是利用超音波ê能量,白內障乳化後khip出,tsiah kā人工水晶體囥--入去,孔嘴細,恢復緊,是目前公認上安全有效ê治療方法。原來是按呢--ò͘,莫怪會hiah-nī順序,無啥艱苦--著,朋友攏講白內障手術是用雷射--ê,按呢有較無正確,tiōtsitêhō͘ in參考。

手術到今嘛已經4個外月,雖罔正蕊目睭猶原無啥正常,應該是3年前視網膜開刀所致,袂當講是tsitê失誤。總是需要繼續追蹤複診tsiah是道理。

目睭是靈魂之窗,mài講青盲,kan-nā看袂清tiō真費氣食力,特別是愛看冊興拍電腦ê人,目睭視力bái,看字看袂清楚,真正做無空課,所以建議無論看冊、拍電腦,攏m̄-thang tsîn siuⁿ久,半點鐘歇10分鐘,應該會當做參考。

Ah-á siû-tsuí