2015年2月28日 星期六

古物仔_走街生理篇_拍棉績被:陳慶芳收藏/蕭平治翕相

古物仔_走街生理篇_拍棉績被:陳慶芳收藏/蕭平治翕相
【古物仔是老人ê記智,少年人ê歷史。有記智ê人生,活teh to̍h有意義;有古物ê歷史,少年人to̍h-ē感恩siàu念。】
▲棉績被(mî-tsioh-phuē/phē):
教育部:棉襀mî-tsioh。[用棉花纖維製成的被胎。]
萌典:棉襀被[棉被,被褥的總稱。]
●棉花(樹)開ê花是棉仔花,結ê果實內面有棉仔籽kap纖維,白白蓬鬆蓬鬆ê纖維號做棉仔(mî-á)。[華語猶原講做棉花]
●棉襀+被單=棉襀被。
●拍棉績慣勢講拍棉績被。
拍棉績被是一項真厚工ê行業,拍一領棉績被,代起先ài揀籽開棉、鋪棉,kā 1-bong 1-bong ê棉仔展開鋪tiàm拍被工作床面頂,然後師傅利用拍被家私,用棉被弓彈棉、用竹篩硩棉,tsiah-koh牽紗、碖紗,然後tio̍h-koh píng-pîng閣再一擺彈棉、硩棉、牽紗、碖紗手續tsiah算完成。
彈棉仔hō͘蓬鬆hō͘牽黏做伙ê家私叫做棉被弓,一支弓箭形ê柴弓絞一條牛筋揹tiàm肩胛頭,一手huāⁿ棉被弓,一手攑柴槌摃牛筋,「tiang tiang tiang tiang」to̍h kā展開ê棉仔tuāⁿ kah幼幼phōng-song phōng-song ê棉海,tsiâⁿ-tsò一坵ê棉襀。因為phōng-song giâ-giâ,tio̍h用篾仔做ê篩仔un-un-á 硩hō͘沉實(tiâm-si̍t),tsiah-koh利用牽紗ê竹篙仔kā紗仔輪頂ê紗仔線ngiáu 過--來,雙人同齊kā紗仔固定棉襀頂,等紗仔牽好,tio̍h-koh用碖仔碖hō͘沉實(tiâm-tsa̍t),然後tio̍h-koh píng-pîng閣再一擺彈棉、硩棉、牽紗、碖紗手續tsiah算完成。Tsiah-nī費氣麻煩ê khang-khuè,需要一對手,tsiah有法度進行。
俗語:棉被弓nā-leh霆(tân),吵著三代人無法度安眠(biân)。
△拍棉績被ê家私:

△[梭座紗線組]:配合細支竹篙仔kā紗仔線ngiáu過--來,2人一對手tsiah ē-tàng進行工作。

△碖斗(lún-táu):kā已經牽紗牽好勢ê棉襀lùn-lùn hō͘沉實(tiâm-tsa̍t)。

△棉被弓(mî-phuē-king):需要像弓箭按呢絞一條牛筋(有ê用ナイロン/nairon/尼龍、耐龍線)。
△ngiáu紗仔線ê細支竹篙仔。

△牛筋ē使得調節絚(ân)抑是冗(līng)。


[梭座紗線組]/纏梭仔組:買--來ê紗仔是像麵線1-ut 1-ut,需要用纏梭仔組kā伊纏tiàm 1-kâi尖尾梭ê柴箍頂,方便牽紗,纏紗需要技術tsiah-bē liù紗。

牽紗需要一對手,1个liû紗,1个牽紗,liû紗tsit-pîng,倒手用大垺翁、kí-cháiⁿ輕輕kā紗線tēⁿ-tī手心,正手用大垺翁、kí-cháiⁿ tioh紗仔hō͘對方ngiáu;牽紗--e tsit-pîng攑一支細支竹篙仔,伸手kā對方ê紗仔ngiáu倚來正手虎口,然後倒手指頭仔kā紗線tēⁿ-ân,正手順手勢bueh-koh kā竹篙仔伸出時,sìm--一下to̍h ē使得kā紗線掣斷順紲tshi̍h-tiàm 棉襀面頂,同時對方mā kā紗線tshia̍h-tiàm棉襀面頂,按呢ngiáu 一下ē-tàng牽2條紗。這个動作一直重複到完成,tsiah-koh反爿繼續完成另外彼面。
感謝林老師 May Lin ê經驗分享。

2015年2月25日 星期三

古物仔_走街生理篇_拳頭館:陳慶芳收藏/蕭平治翕相

古物仔_走街生理篇_拳頭館:陳慶芳收藏/蕭平治翕相
【古物仔是老人ê記智,少年人ê歷史。有記智ê人生,活teh to̍h有意義;有古物ê歷史,少年人to̍h-ē感恩siàu念。】  
▲拳頭館:1甲子前囡仔時代,阮崁頂庄有金龍先教子弟(團)北管,A-Jiông師開館教拳頭,另外mā有獅陣。每擺若有鬧熱攤,崁頂庄ê陣頭總--是比人較奢颺tshia-iāⁿ。
A-Jiông師教ê拳頭是ngē拳,除了進、退、跳、踢、走、閃以外,閣有教刀鎗棍棒,對打比武,行功硩石碖(tsio̍h-lún),學有起ê少年家仔真濟。
Ē記得早期每年攏有舉辦鎮運動會,除了學校機關,猶有各庄頭mā-ē組隊參加。運動會suah,崁頂庄ê獅陣配合拳頭館師兄弟,沿路行沿路停,tn̄g-tio̍h店頭有人放炮仔to̍h開始弄獅表演趁紅包。弄獅是tú起鼓,紲落去是拍拳頭ê真功夫ngē-tú-ngē,弄槌仔是展手尾力,行拳步免家私,行功ē使得硩石碖,mā ē使得kō͘桂竹仔頭hám到pit做爿;猶有鉤鐮對藤牌,he倒手藤牌正手刀ê kioh-siàu,看m̄-sī-sè to̍h-ē塗跤捙畚斗。硬拳特技盡展,噗仔聲、炮仔聲響連天(hiáng-liân-thian),紅包1大包1大包一直來,轉到崁頂庄已經8-9點。
△拳頭館ê各種家私武器,雖罔是表演用,卻是真實武器。

△藤牌kap雙gán:
 △tsit-kâi藤牌材料是竹仔編,m̄是藤,尖尖像笠仔形,bē-tàng表演捙畚斗(tshia-pùn-táu)。
 △關刀(kuan-to)kap大刀:重量級武器,需要手尾力kap技術。
△ 鉤鐮(kau-liâm):ē-tàng像鎗(tshiuⁿ)用lak--è,mā ē使得用鉤--e。
 △刀:1爿刀銎(to-khing)1爿刀肉。m̄是劍,拳頭館無用劍。
 △鐵鍘(thih-tsa̍h):三叉、尖尾、柴柄,有掛圓箍仔形鐵箍,弄--起來ē lia̍k-lia̍k叫,增加鬧熱驚險氣氛[氛圍]。



2015年2月24日 星期二

作田人ê鬱卒:

作田人ê鬱卒:   Lah-jih_ 20150224_咱人正月初六
正月初一taⁿ-á過,初二落田做工課,勤快農夫怯性命,為著三頓kut-la̍t做。
播田已經機器化,穡頭有影較輕鬆,秧仔總--是愛食水,圳溝無水猴免弄。
昨暝有聽雷公聲,天光開門suah無影,雨sap-á干焦兩三滴,心情鬱卒欲按怎。
天清雲白是真好,作田兄哥真煩惱,無水淹田欲啥步,祈求天公緊落。

 △崁頂庄天頂雲:
△ 八卦山脈西爿田庄水田:

△食頭路--ē、學生囡仔今仔日開始上班上課,有人哀哀cha̍p-cha̍p 講sńg無夠khùi。田庄作田人已經落田4-5工,早冬稻仔已經播好勢。
△在欉黃ê木瓜tī半空中:

2015年2月22日 星期日

古物仔_走街生理篇_捏雞母猴仔送報紙送批:陳慶芳收藏/蕭平治翕相

古物仔_走街生理篇_捏雞母猴仔送報紙送批:陳慶芳收藏/蕭平治翕相
【古物仔是老人ê記智,少年人ê歷史。有記智ê人生,活teh to̍h有意義;有古物ê歷史,少年人to̍h-ē感恩siàu念。】
捏雞母猴仔(lia̍p-ke-bó-kâu-á):
捏雞母猴仔to̍h是「捏麵人(lia̍p-mī-lâng)」,mā有講「捏秫米尪仔(lia̍p-tsut-bí-ang-á)」,是一項傳統民俗囡仔tshit-thô物。
材料是秫米粉lām麵粉加色料,jio̍k-jio̍k nuá-nuá做ná粿粞khiū-khiū ê麵丸,黃紅烏白逐色有。
師傅先捻一塊白色麵丸,kō͘手so-so lia̍p-lia̍p lia̍p一个身軀身,黏tiàm竹攕頂,tsiah-koh用無仝色ê麵丸,so-so lia̍p-lia̍p做成跤手、頷頸頭殼,喙目鼻、衫仔褲⋯,lia̍p啥sîng啥,無一tah久仔,一隻猴山仔、一隻雞仔、一隻鳥鼠仔、一隻牛,抑是一仙秀才、一仙關老爺攑大刀⋯to̍h馬上插tiàm架仔頂,siâⁿ來一寡囡仔兄囡仔姊,金kho̍k-kho̍k ê眼神,金金看勻勻仔等。
He捏雞母猴仔ê師傅真正是藝術家,免畫圖免寸尺,簡單雙手一支細支鉸刀kap小家私,to̍h有法度創造出古冊內ê人物,十二生相鼠、牛、虎、兔、龍、蛇、馬、羊、猴、雞、狗、豬kap果子菜蔬各種無仝造型。
捏雞母猴仔m̄-nā是囡仔tshit-thô-mi̍h,mā是囡仔喙食物,買來sńg-sńg lāng-lāng--leh,趁猶未臭酸進前to̍h kā食掉,有夠bô-tshái,m̄食iū-koh感覺拍損人ê物。
捏雞母猴仔是擔仔生理,設計一个ē-tàng工作ē-tàng插成品ê工作台,kah-tiàm鐵馬後載,tah-ūi有鬧熱to̍h來去佗位趁食。

△捏好ê捏雞母猴仔,色水鮮tshioh,造型活潑古錐,囡仔看著to̍h真kah意,家己無錢著纏有錢ê序大買1仙來耍。
 △擔頭仔kah-tiàm鐵馬後載,流動性kài便利,早期鐵馬塗tshāi-á𥩴正正,真在,tiàm頂面捏雞母猴仔無問題
▲1970年代進前,鐵馬是非常方便ê交通工具、載貨家私,送報紙--è透早騎去火車頭等報紙到位,趕緊1份1份疊好勢,khǹg-tiàm鐵馬角仔頂ê報紙揹仔(phāiⁿ-á),趕時間1戶1戶送,店面1間1間tàn,快速扭掠,除了趁錢,mā趁一寡時間thang做其他空課。
 ▲匏桸帽(pû-hia-bō):因為伊ê形體sîng匏桸,暫時貯水mā無問題,所以hō͘人講做匏桸帽抑是匏桸khok,其實伊是一頂紳士帽。
△Tsit頂匏桸帽面頂有郵局標記,是送批--e(郵差iû-tshe)leh戴--è。早當時郵差送批(phe/phue)mā是騎鐵馬,是郵局專用漆綠色ê鐵馬。

2015年2月16日 星期一

古物仔_走街生理篇_走唱:陳慶芳收藏/蕭平治翕相

古物仔_走街生理篇_走唱:陳慶芳收藏/蕭平治翕相
▲「有緣 無緣,逐家來做伙,燒酒lim--一杯,hō͘ ta--lah!hō͘ ta--lah!」聽著金門王--ē kap李炳輝一个彈ギタ,一个tshi̍h手風琴,唱「流浪到淡水」,咱ē講hit種tī飯店、夜總會娛樂場所唱歌趁食ê方式,號做ながし走唱。
「走唱」藝人除了一支真gâu唱歌ê喙以外,攏會揹一支kah手方便ê樂器。tsit-má tī街頭表演--è叫做「街頭藝人」,古早有走江湖賣藥王祿仙唱七字仔、乞食唱歌講好話沿路kâng-pun。
囡仔時bat看過挽嘴齒--è挨バイオリン/小提琴siâⁿ人客;2个查某乞食,1个目金--e用竹棍仔牽1个青盲--ē四界kā人分,青盲--ē ná彈月琴ná唱歌仔ná講好話,無輸tsit-má ê藝人。
△三絃(sam-hiân):有3條絃仔線,ē-tàng獨奏mā ē使得合奏,tī走唱界多數做伴奏用,家己ná彈ná唸ná唱。
△月琴(gue̍h-khîm/ge̍h-khîm):ē-tàng獨奏ē-tàng合奏,歌仔先唱歌仔(七字仔)較捷是月琴主奏,配一支大管絃挨反管做伴奏。
古早乞食,有ê會用彈月琴唸歌hō͘人聽、講好話kā人分(錢、食物),m̄-tsiah月琴mā號做乞食琴。
 △手風琴(tshiú-hong-khîm):算是西洋樂器,是比較現代化ê樂器,ē-tàng奏出流行音樂,主奏主唱伴奏ē使得1人包辦,演奏變化多端,to̍h親像kā 1台風琴揹tiàm身軀仝款,非常方便。
 △手風琴,一爿是鍵盤,彈主旋律,另外一爿是有規則排列ê鈕仔,ē-tàng揤和音,蛇腹形ê風櫃箱靠雙手khiú ha̍p tshun kiu ê變化產生節奏長短緊慢ê旋律,非常好聽。


2015年2月15日 星期日

古物仔_走街生理篇_杏仁茶麵茶擔:陳慶芳收藏/蕭平治翕相

古物仔_走街生理篇_杏仁茶麵茶擔:陳慶芳收藏/蕭平治翕相
▲茶kap茶米茶無仝:茶是ē-lim-tit ê飲料,ē使得止渴(tsí-tshùi-ta),ē使得食飽tī-iau。kan-nā講lim茶,有可能是lim白滾水,mā有可能是lim茶米茶,所以用滾水泡茶米to̍h是茶米茶,泡炒過ê大麥to̍h是麥仔茶,猶有梅仔茶、米仔茶、杏仁茶、麵茶、仙草茶、青草仔茶、冬瓜茶⋯lóng是用水hiâⁿ抑是用滾水泡。

△這是賣杏仁茶抑是麵茶ê擔頭仔(tàⁿ-thâu-á),1頭囥hiâⁿ杏仁茶、麵茶ê家私頭仔,1頭排碗頭仔、湯匙,kō͘扁擔擔--leh ná行ná喝聲「杏仁茶--ō͘!燒--e杏仁茶--ō͘!」若是賣麵茶to̍h喝「麵茶--lah,bueh買麵茶較緊來,燒--è-ō͘!」若有人bueh買,to̍h停leh路邊,除了杏仁茶抑是麵茶,mā-ē kah賣油食粿(iû-tsia̍h-kué)kap糕仔餅饅頭(bān-thâu)麵包。
阮庄裏hit个福仔兄to̍h簡單喝「茶--ò͘!」伊ê擔仔有賣杏仁茶、麵茶、米奶,油食粿、麵包、饅頭,閣有生雞卵hō͘人泡tiàm杏仁茶內面。
△hiâⁿ杏仁茶、麵茶ê火爐桶仔,下面燃火炭火,保持燒滾滾ê溫度,有水道頭ê漏仔,真方便。
△詳細看,內面分2層,ē-pîng層貯杏仁茶,面頂層炊包仔、饅頭ê款。

 △這支特製茶鈷是用鉛鉼黏--ē[銲錫],khàm蓋黏死死,頂面有漏斗,大概是kā料kap水做伙落去hiâⁿ滾燃熟,然後tsiah ùi罐sui thîn落碗內,是講想袂出bueh按怎洗?敢講tshi̍k-tshi̍k--leh to̍h算洗--過?
△這支是白鐵仔(不銹鋼)銲接(hàn-tsiap),作用kap頂面hit支kāng一樣。



2015年2月14日 星期六

古物仔_走街生理篇_水螺火石仔台:陳慶芳收藏/蕭平治翕相

古物仔_走街生理篇_水螺火石仔台:陳慶芳收藏/蕭平治翕相
▲hő͘ⁿ~~~hő͘ⁿ~~~hő͘ⁿ~~~hő͘ⁿ~~~空襲警報!空襲警報!B 29--è來--ā!較緊覕防空壕--o͘h!
這已經是緊急警報,逐家tsiⁿ-tsiⁿ kheh-kheh 佇厝後防空壕內面。
1945前半冬,米國B-29(B jī-káu)轟炸機時常來掃射,Lah-jih tsiah 3歲外,m̄-bat半項,lóng是Lô͘-á兄學hō͘我聽--e:「lóng mā我偝你覕防空壕,你若腹肚iau 我to̍h趨去灶跤用竹管仔貯泔hō͘你lim。」記得猶未翻新厝進前,掃射著ê玻璃窗kap砛簷銃子痕跡是老一輩phò-tāu往事
ê記智,siáⁿ知70冬經過咱mā已經tsiâⁿ-tsò老一輩--à。
He ho͘ⁿ-ho͘ⁿ-kió ê聲音to̍h是水螺聲,空襲警報警報器ê聲音,雖罔無hit-lō記智,總--是bat聽過B 29 掃射tìm炸彈(tsà-tân)ê故事,tsit-mái聽著防空演習ê水螺聲,猶原ē tshuah。
△手絞防空警報器:

Tsit種手絞ê水螺(防空警報器),細kâi輕省,安裝快速方便,民防、部隊、看守所、監獄、機場、倉庫場所,發生事故tsiâⁿ理想ê報警設備。
△正面看,頭前是響輪(hiáng-lûn)[鳴輪],to̍h是發聲所在。

△坦邊看,L型手絞仔柄,手絞仔絞動箱內ê狗齒仔[
DOG GEAR齒輪組],帶動響輪快速轉踅,to̍h-ē發出大聲ho͘ⁿ-ho͘ⁿ叫 ê水螺聲,絞愈緊聲愈懸愈大聲。

手絞火石仔台:
固定kah-tī椅頭仔頂,方便做工課,圓形觳仔內面有狗齒仔組合,ㄣ字型手絞仔絞振動大kâi狗齒仔,大狗齒仔帶動細狗齒仔,細狗齒仔軸心連火石仔輪,速度tsiâⁿ-kín,to̍h ē-tàng磨金屬類工具用具,主要是磨一个粗坯。火石仔kap金屬刀肉磨擦to̍h-ē噴出火星。火石,是一種人造合金打火石。

△圓椅頭仔鋸掉1缺,方便kah-ân火石仔台。

2015年2月6日 星期五

古物仔_走街生理篇_抾小影:陳慶芳收藏/蕭平治翕相

古物仔_走街生理篇_抾小影:陳慶芳收藏/蕭平治翕相
走街生理:
傳統生理有徛店生理,等人來買;kap taⁿ擔四界喝賣,揣有人ê所在,方便人來買;抑是直接服務到厝內收賬、寄藥、生囝、看病ê助產醫療。
古早,人o-ló賴和醫生是彰化媽祖,伊每擺往診,街頭巷尾四界走傱,醫人病疼救人性命,人伊suah家己顧謙是「走街仔仙」,伊ê意思是kap走街生理仝款是服務到位。
走街生理需要taⁿ擔、排擔仔徙位,有ê擔leh行,有ê用鐵馬載用車仔sak,若是醫生、產婆可能ē倩轎扛,倩人力車坐。
▲抾小影(khioh-siáu-íng):簡單講to̍h是畫人像,是一種應用儀器kā細張人像放大用筆寫真ê藝術。
較早相機裝底片翕烏白相片ê品質m̄是hiah好ê時代,底片lòng tio̍h koh用鉛筆做修整,tsit種攑筆修整ê功夫叫做「抾像」,所以tsit-ê「khioh」有修整、畫ê意思。
請教翕相師ê說明:烏白底片ê修整叫做修面、抾面、收底片,用4B鉛筆tī照光(tshiō-kng)ê毛玻璃頂1筆1筆1點1點khioh,目的是boeh kā 烏斑、柱仔子、粒仔khî 、皺痕am-khám掉,thang-hō͘面容閣較súi-tang-tang。
古早人翕一張相無簡單,bueh放大一張相片koh-khah無簡單,錢銀、技術lóng是問題。厝內老大人過身,想bueh有一張寫真排tiàm相亭體面--一下,mā-thang留hō͘序細數念,to̍h-ē揣出細張相片「抾小影」畫一張大張相,mā有人進前to̍h拴好勢--è。
「抾小影」主要是做遺像用,mā叫做「抾大壽」。
△完成抾小影ê作品:面容真實,假若翕相,本島衫布鈕、衫身攝襉(liap-kíng)陰影有較強調,kap翕相猶是有差別。
△繪圖放大尺:繪圖放大尺是抾小影上重要家私,完全按比例放大,減少失真,「畫了有sîng」tī大部份人來講是真重要。


 △墨盤kap毛筆鉛筆:因為是到位服務,所以家私頭仔需要裝箱搬徙。
 △箱仔ná皮箱,有捾耳(kuāⁿ-hīⁿ)。
 △畫架:
 

2015年2月4日 星期三

古物仔_嫁娶篇_箱仔盒仔鞋拔仔:陳慶芳收藏/蕭平治翕相

古物仔_嫁娶篇_箱仔盒仔鞋拔仔:陳慶芳收藏/蕭平治翕相
▲柴皮箱kap皮箱:柴tìng ê箱仔一般講做柴箱仔;若是敆作師傅用木工技藝,經過鋸、剾、鑿、敆、畫、漆koh掛鎖,ē-tàng囥衫褲、貴重幼粒物,to̍h叫做柴皮箱;皮箱是用皮革抑是化學皮所做ê旅行箱,是出外tsah行李有捾耳(kuāⁿ-hīⁿ)ê箱仔。
掛鎖柴皮箱:漆紅漆,畫花草、蝙蝠,銅質鎖頭分頂下槽,鎖匙孔tī下槽。tsit種鎖頭拍算是柴箱特有ê鎖。
△皮箱(phuê/phê-siuⁿ):皮質頂面浮雕花紋tsiâⁿ複雜,圓形囍字、蝙蝠、花草,看bē出是皮雕抑是貼黏--起去。捾牽仔(khian-á)tī兩旁,拍算m̄是出外旅行捾ê皮箱。銅質皮箱鎖圈(só-khian)分頂下槽,需要一粒鎖頭。
△皮箱鎖圈(só-khian):鎖圈(só-khian)m̄是鎖匙圈仔(só-sî khian-á),鎖圈(só-khian)kap門圈仝款,分公母為一組,khian好勢需要用鎖鎖。
鎖匙圈仔(só-sî khian-á)是『鑰匙』。

△墨盤盒仔:囥墨盤、烏墨、毛筆ê柴盒仔,因為是嫁粧,特別漆紅色koh畫雙鶴,牡丹紅。
註:烏墨是墨條,白墨是粉筆。



▲高級ワイシャツ[襯衫]鉛鉼盒仔:硩定(teh-tiāⁿ)時,女方teh-siāⁿ回送囝婿ê禮物之一,白色siat-tsuh是穿西裝必要ê[襯衫],頷領ē-tàng結ネクタイ/nekutai/領帶。
註:ワイシャツ/Shirt/襯衫是外來語,tsit種衫身ê款式kap對襟仔tuì-khim-á[一種舊式衣服的款式。兩襟相對,而且胸前有一排鈕扣。]相像,領無仝。


▲糖仔盒糖仔盤:鉛鉼圓盒仔貯糖仔餅是禮盒,圓形糖仔盤囥糖仔餅請人客,紅色做底,金色龍鳳、雙囍、壽紋,喜氣羊羊(hí-khì-iâng-iâng),鬧熱滾滾。

▲綢仔布盒:綢仔是高級布料,因為原料是娘仔絲(抑是化學纖維、ナイロン耐龍絲),所以柔軟koh ē閃光,特別是查某人上kah意ê洋裝布料。
硩定時男方送女方做新娘衫,抑是新娘家己拴嫁粧,親成朋友添粧攏kài高級貴重ê禮物。


▲鞋拔仔:硩定(teh-tiāⁿ)時,女方teh-siāⁿ回送囝婿ê禮物之一。嫁娶禮俗致重雙雙對對,硩定盛底(siāⁿ-té)kap女方回禮硩盛底(teh siāⁿ-té)ê物件通常拴12項是上捷用ê數字,好額人備辦12項貴重體面禮物無問題,但是一般庄腳人bueh開tsiah-ní濟錢,實在tsiâⁿ重負擔,所以必要金器以外,ē-tàng省to̍h省,tàu項拴有12項to̍h好,所以鞋拔仔(ê-pue̍h-á)mā算一項。