Lān-hu̍t-á chéng-chéng----i-ha̍k tâi-gí :

Lān-hu̍t-á chéng-chéng----i-ha̍k tâi-gí :           201912   Lahjih

（膦核仔腫ê門診日誌）

12-goe̍h chhe-9 thàu-chá cheng-sîn khì pàng-jiō, kám-kak chiàⁿ-pêng lān-hu̍t-á pí pêng-siâng-sî khah-tōa, phah-kiû tńg--lâi, sé-seng-khu sî, chiah hoat-hiān lān-hu̍t-á hoat-hông koh-iūⁿ koh sió-khóa thiàⁿ-thiàⁿ.

Chiām-sî bô chhap--i, siáⁿ-chai soah jû-lâi jú bô sóng-khoài, liân-sòa ê iu-iu-á thiàⁿ, m̄-nā lān-hu̍t-á chéng-thiàⁿ, koh khan-kàu kái-piⁿ tō͘-bóe mā leh thiàⁿ, sui-bóng iu-iu-á thiàⁿ, m̄-koh liân-sòa bô-thêng-khùn ê thiàⁿ, si̍t-chāi chiâⁿ bô-sóng-khoài.

Chia̍h-pá khùn tiong-tàu, tō sī khùn bē lo̍h-bîn, chē--leh thiàⁿ, khiā--leh mā thiàⁿ, kéng-kak bô hō͘ i-seng khòaⁿ bē-sái-tit, lún kàu e-po͘ nn̄g-tiám-pòaⁿ, chin-só͘ khui-mn̂g. 

Chiā i-seng thiaⁿ góa kóng chèng-chōng, koh khòaⁿ chéng-chéng ê lān-hu̍t-á kóng: "He sī ba̋i-khín kám-jiám, hù-lān-hu̍t hoat-iām, góa khui io̍h-á hō͘ lí chiàu saⁿ-tǹg chia̍h, kúi-kang-á tō ē lī-lâu, io̍h-á ū siau-iām kap chí-thiàⁿ--ê."

Tńg-kàu chù, sûi chia̍h chi̍t-hūn io̍h-á, chi̍t-tiám-cheng āu ū-iáⁿ bô-koh iu-iu-á thiàⁿ, tō kî-thāi pēⁿ-chèng ē-tit khah-kín chhoan-jú.

12-goe̍h chhe-10 thàu-chá cheng-sîn, bong chi̍t-ē lān-pha, chhoah-chi̍t-tiô, chiàⁿ-pêng ê lān-hu̍t-á m̄-nā bô siau-chéng, soah chéng kah chhin-chhiūⁿ ah-nn̄g hiah-nī tōa-lia̍p, in-ūi ū chia̍h siau-iām chí-thiàⁿ-io̍h, pēng-bô kám-kak bô-sóng-khoài.

Siūⁿ kóng che su-iàu lâi-khì tōa-keng pēⁿ-īⁿ kiám-cha khah thò-tòng, tō bāng-lō͘ kòa-hō khì Oân-ki e-po͘ sî pì-jiō-kho mn̂g-chín.

Kā i-seng chū-su̍t pēⁿ-in chèng-chōng liáu-āu, i-seng khui-toaⁿ kiò-góa khì giām-jiō kap chò chhiok-chín [palpation], koh-lâi tō sī thèng-hāu kiám-giām pò-kò.

I-seng khòaⁿ kiám-giām pò-kò kóng: "hù-lān-hu̍t kám-jiám bô-m̄-tio̍h, jiō lāi sió-khóa kâⁿ hoeh, bô-siáⁿ iàu-kín, khui 7-kang hūn siau-iām-che kap chí-thiàⁿ-che, 6-tiám-cheng chia̍h chi̍t-pái, tio̍h chiàu-khí-kang chia̍h-io̍h, pang lí kòa āu-lé-pài hôe-chín. "

" Chhiáⁿ-mn̄g Tân i-seng, he lān-hu̍t-á ná-ē jú lâi jú chéng jú tōa-lia̍p? "

" Jú lâi jú chéng jú tōa-lia̍p sī chèng-siâng, koh-lâi tō-ē jú lâi jú siau-chéng hoe-ho̍k goân-lâi ê chèng-siâng. "

Chiā i-seng khui ê io̍h-á chia̍h bô-liáu, chit-mái ōaⁿ chia̍h Tân i-seng khui ê io̍h-á, chun-chiàu i-seng kau-tāi chia̍h-io̍h.

12-goe̍h 11, Thàu-chá cheng-sîn, kāng-khoán seng bong lān-pha, lān-hu̍t-á iû-goân ah-nn̄g hiah-nī tōa-lia̍p, bô khah-tōa mā bô khah-sè, bē thiàⁿ sió-khóa gāi-gio̍h.

Kin-á-ji̍t bô-khì phah-kiû, kan-nā khiâ tiān-tōng-chhia se̍h-se̍h--leh--niâ, chhù--lì khòaⁿ tiān-sī phah tiān-náu, io̍h-á àn-sî chia̍h, kî-thāi lān-hu̍t-á siau-chéng hoe-ho̍k chèng-siâng, m̄-koh kàu àm-sî iû-goân bô piàn-hòa, chí-hó kî-thāi bîn-á-chài-khí.

12-goe̍h 12, Thàu-chá cheng-sîn, tē-it-chân khang-khòe sī kiám-cha lān-hu̍t-á tōa-sè, kiat-kó, bô khah-tōa mā bô khah-sè, siâng-sè bong khòaⁿ-māi, ū khah nńg-lio̍h bē hiah chéng tiùⁿ.

Tio̍h kè-siok koan-chhat, bô-khì ūn-tōng phah-kiû, kî-tha seng-oa̍h chiàu-siâng, kàu àm-sî sóe-seng-khu, lān-hu̍t-á ū tām-po̍h-á piàn-sè, ah-nn̄g pìⁿ ke-nn̄g tōa.

12-goe̍h 13, Thàu-chá cheng-sîn, kiám-cha lān-hu̍t-á, ū-koh piàn khah-sè, tām-po̍h-á hoaⁿ-hí an-sim, m̄-koh kàu àm-sî sóe-seng-khu, siâng-sè bong khòaⁿ-māi, ná-ē kap chái-khí kāng-khoán, bô chìn-pō͘. chí-hó koh kî-thāi bîn-á-chài. í-keng 5-ji̍t--à---lio͘h!

12-goe̍h 14, Thàu-chá khí-chhn̂g kiám-cha, lān-pha khòaⁿ-khí-lâi chin chèng-siâng, bē thūi-thūi chhiūⁿ tōa-lān-pha, bong khòaⁿ-māi chiah-chai lān-hu̍t-á iû-goân bô khah-sè, hó-ka-chài, chia̍h-io̍h í-āu tō bô-koh iu-iu-á-thiàⁿ, seng-oa̍h sī kài chèng-siâng, iáu-sī bô-khì phah-kiû.

12-goe̍h 15, Chōng-hóng kap cha-hng chha-put-to, lān-hu̍t-á ū sió-khóa piàn-sè. kî-thāi bîn-á-chài ē-tàng hoe-ho̍k goân-chōng.

12-goe̍h 16, Kin-á-ji̍t iû-goân bô siáⁿ-mih piàn-hòa, sī hó-hiān-siōng. Bîn-á-ē-po͘ tio̍h koh hôe-chín.

12-goe̍h 17, Ē-po͘ hôe-chín, kā i-seng kóng: Í-keng hó chin-chē, kō͘ khòaⁿ--ê ná-chhiūⁿ hoe-ho̍k kiān-khong, iōng chhiú bong soah kám-kak sió-khóa khah-tōa koh sió-khóa ē-thiàⁿ, kám-kak gāi-gio̍h gāi-gio̍h.

I-seng kóng: Su-iàu kè-siok chia̍h-io̍h, chia̍h khah lī-lâu--leh, khui chi̍t-lé-pài io̍h-liāng, nā-ū bô-sóng-khoài, chiah koh tńg-lâi ho̍k-chín.

Chi̍t-lé-pài io̍h-liāng chia̍h-liáu, siā thiⁿ siā tē, hoe-ho̍k chèng-siâng bô-koh koh-iūⁿ, kám-siā Chiā i-seng, kám-siā Tân i-seng.

無名急性跤盤疼： Lahjih

無名急性跤盤疼：                Lahjih 201903

正手手股頭 痠痛，超音波掃瞄證實是筋鈣化，醫生建議增生療法注射高濃度葡萄糖水mā有3擺，超過半冬ê痠痛猶原無啥改善，雖罔痠痛並無影響日常生活，總--是暗時痠痛ê無爽快ē hō͘我精神，好佳哉睏癖bē-bái，換一个姿勢tō閣睏ka-chōe。

三工前暗暝睏眠，感覺倒跤跤盤小可痠痛，老人症頭並無懷疑，siáⁿ知愈睏愈無爽快，一直到半暝2點外boeh khit來放尿，chiah感覺跤蹄有問題，需要chhek好勢chiah thang伐步，天光日精神boeh落樓梯，m̄敢一步一步行，需要正跤踏定chiah敢徙倒跤，閣著扞樓梯手扞仔chiah敢一步換一步勻勻仔落樓梯。

今仔日m̄敢去拍phi̋n-phóng，mā無才調行路出門，tiàm厝內chhek--leh chhek--leh徙位，hiâⁿ滾水、泡咖啡、lim茶⋯攏m̄敢徙siuⁿ緊，跤蹄tō是感覺bē chih力小可會痛，到底啥乜原因？真正莫名其妙，ā無oáiⁿ--tio̍h，ā無tang--tio̍h，mā無跋倒，mā無鑿著啥乜尖尖tēng-tēng ê物件，頂日去草山、竹仔湖chhit-thô，mā無行偌遠路，mā無peh偌濟崎，真正有夠怪奇。

今仔日是禮拜，病院掛診有較費氣，無法度只好暫時家己診斷揣原因，疼點tī倒跤內爿跤目核仔下面hit箍圍仔，指頭仔揤看覓，會痛，用手摸感覺溫度比正跤較燒熱（sio-jia̍t），mā感覺小可腫腫。回想--一下！是m̄是骨膜發癀，ē記得幾年前mā bat攑椅頭仔徙位，連樓梯都m̄敢peh，暗時只好睏樓跤膨椅，按怎好去，hō͘ toh一位醫生看，紲bē記得，kan-na ē記得是骨膜炎。

膨椅坐傷久需要起來行行--leh，準備peh起chiah感覺愈食力，有愈來愈嚴重ê範勢，雄雄想起一个土法，phi̋n-phóng桮仔攑--leh，大腿tēⁿ著痛痛ê所在節力拍，拍hō͘紅kì-kì看ē減輕艱苦無爽快--bò͘？拍soah順紲用擦勞滅軟膏抹抹--leh，然後無koh chhap--伊，繼續拍我ê電腦，有工課做，痠痛有較無感覺，m̄-koh一下歇睏，soah感覺痠痛有增無減，忽然想著櫥仔內有 一條根，趕緊鉸一塊貼看覓⋯⋯

痠痛、痠痛，ùi透早疼到欲暗仔猶leh痠猶leh疼，明仔載定著愛去hō͘醫生看，看是啥乜症頭哪會chiah莫名其妙？想著明仔載boeh去診所，雖罔離厝無kài遠，soah煩惱一大堆。boeh按怎行出門？用āiⁿ--ē，用車載，坐輪椅，坐o͘-tó͘-bái，問題是，也m̄是啥物嚴重重症，ná著chiah-nī麻煩，m̄-koh，跤蹄會痛歹行路，kan-na peh上車頂都困難費氣，應該坐輪椅上好勢bē費氣，輪椅，輪椅tī醫生館，m̄著先去kā伊借，然後叫人kā我sak，sak去醫生館hō͘醫生診斷，chit步有合。

牽--e講，ná著hiah麻煩，明仔載叫查某囝kō͘ o͘-tó͘-bái kā你載tō好，好是好，伊敢知影明仔載我tō有法度peh上後載？若是後載peh bē起去，我看猶是坐輪椅較妥當。想著坐輪椅猶閣是一層顧慮，pō͘-pîn m̄-bat坐過輪椅，路--裡熟似人敢bē怪奇好奇一直問⋯。ah！mài想hiah-chē，明仔載ê代誌明仔載chiah拍算。

已經10點外，著上樓歇睏，按怎上樓？早起落樓梯tō感覺食力，chit-mái boeh peh樓梯，倒跤敢chih ē-tiâu，「下昏暗boeh tòa樓跤睏膨椅。」閣換一塊一條根藥布了後，猶是試看有才調peh上二樓--bò͘？雙手la̍k樓梯杆，一步一步勻勻仔chhek看覓，好佳哉順序行入房間上眠床，倒跤閣摸看覓，烘烘hàng-hàng燒熱燒熱，揤看覓，仝款會痛，症頭無減輕，倒落眠床睏bē落眠疼欲規暝⋯

Bē行路，若是bē行路，m̄-tō代誌大條，起床落床，落樓梯peh樓梯，厝內來來去去按怎徙位，便所放屎尿--leh，猶有，敢免出門⋯⋯ŏa！一大堆ê問題做一下出現，boeh按怎解決，kan-na想tō煩惱，驚惶ê心，啥乜時到時擔當ê開闊心胸，啥乜日常放下ê修行，啥乜正常tō是無常，無常tō是正常ê關照，做一下破功，被內nòa來nòa去，nòa到大概到4點外chiah睏--去，無koh臭心想。

睏一久醒，精神已經8點，跤落眠床，試tam看覓，ĕ！ná有較好ê款，摸跤盤mā無hiah-nī燒熱，衫褲穿好勢，行出房間門，跤蹄ná像小可ē chih力，落樓梯，m̄敢siuⁿ靠勢，雙手la̍k牢樓梯杆，勻勻仔chhek，慢慢仔hoa̍h，好佳哉m̄免勞煩厝內人，已經落來人客間仔。

九點外，去牽hit台電動自行車，koh感覺好勢好勢，決定家己騎車去hō͘醫生看。我先家己講情形hō͘醫生聽，醫生無講症頭是啥，開3工藥仔叫我照三頓食，若無改善，著斟酌是m̄是尿酸起作怪。

Chit-mái已經跤bē疼、路ē行。

筋鈣化：醫學台語 Lah-jih_20180710

筋鈣化：醫學台語     Lah-jih_20180710

國民健康操是這幾年早起精神kap暗時睏眠進前ê運動，有一工，做到腰部運動倒爿、正爿彎腰動作，tng做到正手插胳hit个姿勢時，雄雄感覺手股頭疼tiuh-tiuh，soah m̄敢插胳。奇怪？別个動作lóng-bē，獨獨chit个動作ē，拍乒乓ê時，劇烈彎腰khioh球，抑是攑手出力sàm球mā無發現各樣，tō是罕罕--à tn̄g-tio̍h某一種姿勢chiah-ē出現仝款ê tiuh疼。

因為無礙著日常生活，tō無特別要意，有時抹SALOMETHYL[擦勞滅軟膏]，有時貼痠痛藥布，總--是攏無見效，tō去有牌漢醫診所診斷，經過先生按摩掠筋放筋絡，食一禮拜藥仔了後，感覺無較好tō無閣回診。大概經過個外月，朋友紹介，去揣一个師傅掠筋、放筋絡，掠kah疼tiuh-tiuh，推kah烏青激血，貼伊家己焄ê祕方膏藥，有影現掠現爽快，m̄-koh過了點外鐘久，疼猶原leh疼，一點仔效果mā無，懷疑hit个師傅先--e敢真正有掠著位？逐工球照拍，國民健康操照做，hit个插胳姿勢閬--過tō無問題，一禮拜過--去，又閣一擺接受朋友紹介，去hông掠筋、放筋絡，chit擺掠去真工夫真有照患者感覺部位，可惜，仝款現掠現爽快，過了猶原一點仔效果mā無。

想起14年前，倒手攑bē-koân攑bē直，落尾是去彰基掛復健科照電光chiah揣出病因，敢講chit擺手股頭ê疼kap龍船骨神經有牽連？tō就近掛員林基督教病院「復健科」門診。醫生聽我比手勢兼說明了後：「可能是五十肩。」

「Tit-boeh八十--à猶會五十肩？」

「五十肩ê發生kap年紀無一定有關係。猶是照電光看覓chiah來看是啥乜問題。」

電光翕好隨轉來診間聽分析：「骨骼小可老化，其他無koh樣，有可能是筋骨發炎，先開治疼藥仔食看覓，預約三禮拜後回診，若是無閣疼tō m̄免轉來。」

三禮拜後轉來回診：「醫師，無功效--neh！」

「按呢kā你轉診彰基，我用超音波檢查看覓。」

四工後tī彰基做超音波，ná看影像醫生ná解說：「原因tī chia，肩胛頭關節tī chia，骨輪邊--a有細細ê白點，he tō是筋絡鈣化現象，chia有，hia mā有‥‥‥」

「啥乜是鈣化？」

「筋絡老化、受傷，然後‥‥‥」

「來！撐tiàm眠床，kā你注一支類固醇ê射，會痛，小可lún--leh。」醫生勻勻仔kā射針tu̍h幾若位，有影真疼。注好，護士教我寫切結書，順紲預約後禮拜員基回診。

類固醇注射後，手股頭連紲疼三工tō無閣再疼，第四工發現hit个插胳姿勢已經bē疼，恢復原來手股頭轉彎踅角ê扭掠方便。十工後轉來員基回診：「多謝醫師，手股頭已經bē疼，請問，以後敢ē-koh發生？」

「一般來講是bē-koh復發，總--是，老歲仔人骨節漸漸退化，需要儉儉仔用，運動m̄-thang siuⁿ劇烈，祝你健康！」

（Boeh了解較濟，Google筋鈣化、鈣化性肌腱炎）

倒蕊白內障手術----醫學台語 Lah-jih 20180227~3/20

倒蕊白內障手術----醫學台語 Lah-jih 20180227~3/20

出世佇1941年庄跤無電火所在，天光精神食飯tshit-thô學校讀冊，日頭落海番仔油燈pûn-hua去睏，若講有囡仔目睭bái看物sa-bui sa-bui，he除了爸母生成，m̄-bat khuàiⁿ囡仔掛近視目鏡。我是到kah外埠頭讀初中tsiah有「三更燈火五更雞」經驗，認真讀冊ê結果，目睭並無變bái，到kah做兵、娶某生囝，兩蕊目睭猶原保持佇1.5/1.5視力，是到人講ê「tsiūⁿ-siap  bē-liap」40歲hit跤兜，tsiah發現老歲仔目開始掛目鏡。

老歲仔目鏡一支一支換，ùi 100度換到350度，雄雄有一工，發現換目鏡suah無法度改善視力，眼科醫生檢查結果tsiah知啥乜號做白內障，原來目睭頭前親像翕相機鏡頭ê水晶體，霧--去、矇--去，he是水晶體pìⁿ濁pìⁿ tīng，變做霧霧看bē清楚，tō是「白內障」，如何解決？開刀，kā目睭水晶體提掉換人工水晶體tō好勢。hit年將近70歲。

彼擺正蕊「白內障超音波乳化術」，m̄-nā順利圓滿閣有精彩ê經驗，7年後ê tsit擺「白內障摘除併人工水晶體植入」自然無驚惶。

進入開刀房量血壓脈搏，peh上手術台，消毒處理開刀前ê預備空課了後，醫師講「放輕鬆，tit-bueh開刀--a！」紲落去聽醫師ê指示，目睭看懸看低，看正爿看倒爿，不sám時有液體lâm tâm目睭，suah hō͘我看bē著手術過程，本成足期待7年前ê經驗閣欣賞--一擺，看he：「目睭內有he破--去、碎--去、趺--去、散--去ê物件，清清楚楚佇目睭前變化，閣無guā久，hia-ê碎--去、趺--去ê物件ná像hō͘吸管suh清氣，續落來目睭內uì邊--a seh入來一个半圓形親像鏡仁ê物件佇遐徙來徙去，目nih仔半圓形變成圓形。」ê變化，哪會知佇期待中看無影像，mā無感覺注射麻醉ê無爽快，忽然間醫生tō kā我講「開好--à」，一時的感覺憢疑憢疑，敢有開刀提掉白內障佮裝入人工水晶體？實在有夠神奇，規个過程，kan-na看著強烈燈光，佮淋澹液體ê目睭，tsa̍h掉手術家私佮水晶體ê變化。

到底這「白內障超音波乳化術」佮「白內障摘除併人工水晶體植入」有啥乜無仝，boeh了解，著Google一下抑是去YouTube揣答案。

種嘴齒先補骨：

種嘴齒先補骨：

10外年前，頂牙槽倒爿hit齒狗齒lak--去，因為邊--a hit齒第二門齒siuⁿ過細齒，齒科醫生kan-na借用隔壁hit齒第一小臼齒做抱齒(phō-khí)，bē堪得年久月深咬、哺、嚙、磨ê力頭損斷，hit齒抱齒出現搖櫓，愈來愈嚴重，檢查結果，醫生講齒根已經敗壞需要挽掉，有影tō-tio̍h，齒根敗壞kah挽嘴齒bē感覺疼，ngeh-á ngeh--leh，一下手to̍h挽掉，tsiâⁿ簡單。

Koh來kah醫生參詳評估，bueh鑲喙齒抑是bueh種喙齒？想講5冬前種過一齒，感覺bē-bái，真好哺koh真勇，to̍h決定kō͘種--è。

挽--起來hit齒小臼齒牙槽岸，經過3-4 kó͘月復原kap追蹤檢查，約定今仔日bueh種喙齒，一擺種兩齒，第二門齒kap狗齒(犬齒)。

早晡8點半報到，護士詳細磅血壓，磅表顯示147/90，確實有較懸，醫生講我有高血壓，交代tio̍h注意，我講並無感覺，醫生講高血壓有人感覺bē--出來，147算是輕度高血壓，斟酌sè-jī無蝕本。護士繼續磅血壓，量bueh 5-6遍，等到穩定出現145左右，醫生koh問我有糖尿病--bò͘？「無」，護士to̍h開始kā我消毒喙腔(tshùi-khang)kap喙唇喙䫌，了後醫生講bueh kā我牙槽注麻射，需要注2支，ē-tàng維持2-3點鐘，若有需要tsiah-koh追加。射針應該真幼細ná頭毛，按怎tu̍h--落去 並無sáⁿ感覺，紲落去牙槽喙䫌鼻頭開始有麻麻感覺，護士tshuā我peh上二樓「無菌手術房」進行開刀補骨。

撐tiàm手術台，護士閣再一擺kā我磅血壓kap量心臟脈搏(me̍h-phok)，儀器按時自動測量(tshik-niû)，磅表隨時顯示數字，醫生護士一再交代m̄-thang講話振動，進行手術中若有無爽快感覺真疼，to̍h用攑跤做信號，頭、手千萬mài振動，時間1分1分leh行，心思盡量m̄綴時間變換，盡量冷靜、tiām-tiām、放hō͘自然ná靜坐放空tshun呼吸、ná睏眠無眠夢。醫生、護士kap我做伙等，等bueh半點鐘，等到血壓穩定la̍k落來145、脈搏tī 80以下，醫生講tsit-mái開始進行，講bueh用布khàm我面部，避免光線tsha̍k目睭，kan-na留喙腔to̍h好，koh著kā頭殼小可偏向正爿較好處理。

Tsiūⁿ手術台一切聽醫生護士吩咐，做一下乖乖聽話ê好患者，好佳哉921大地動進前bat有10工坐禪(tsē-siân)ê經驗，得著淡薄仔定力，to̍h按呢peh開喙腔出在醫生kho̍k、tsǹg、ui、khat、tu̍h、khau、gia̍p，有時koh-ē吸喙內nuā水，目睭蓋密無khuàiⁿ，規氣kheh-kheh注心喙腔動靜kap醫生護士對話交代，家私頭仔tī喙腔一直lā、一直kueh，有時ná像刮著骨，khia̍t-khia̍t叫，有時ná像kā喙䫌giú-ân-ân感覺tsiâⁿ無爽快，總--是m̄敢出聲，連醫生問講「ē疼未？」仝款tiām-tiām m̄出聲。m̄知經過外久，突然恬靜--落來，幾分鐘後，講bueh hē骨粉kap包再生膜，猶原注心覺知，ná像穿針縛線ê款，應該tit-bueh完成補骨手術，siáⁿ知又閣等足久足久，總算ē-tàng kā蓋布提掉，恢復光明，醫生交代著勻勻仔peh--起來，因為已經倒傷久。

M̄-nā倒傷久，koh保持仝款姿勢無翻身，我問醫生手術外久？「喙peh開開始動家私到完成，足足點半鐘。」8點半到tsit-tsūn11點半已經是3點鐘。

醫生講：pún-tsiâⁿ想bueh kā補骨粉kap種嘴齒一擺完成，因為你ê牙槽過去牙周病siuⁿ嚴重，猶是先補骨粉hō͘牙槽岸較勇--leh tsiah來種嘴齒較妥當，3-4 kó͘月後tio̍h-koh開刀一擺，有較歹勢，明仔載tio̍h-koh來檢查，大約一禮拜後放線。醫生護士特別交代幾若擺，處方藥片著按時食，食飯食物件後著洗喙含消毒藥水，千萬m̄-thang礙著傷喙，喙䫌若腫to̍h用冰角ù⋯

醫生交代tio̍h-ài聽，感謝巫醫師，我是乖乖老歲仔人，一日4擺，食飯後睏眠前一定ē記得食藥。

今仔日天光起來洗蕩，差一點仔bē認得家己，鏡內hit个老人敢是我本尊，一个喙䫌ná-ē像豬頭面。