2009年12月21日 星期一

母語情 台文緣 寫予陳福當老師



















本成台灣番薯囝,台語講話中人聽,啥知華語做國語,害咱台語講袂正。(iaⁿ)

長久教育講華語,放捒族語無張持,雄雄想起真罪過,暝日掛念苦無比。(i)

在地族語掞壁角,擔心予人摒挕捒,傳教母語著準備,用心學習羅馬字。(i)

現時華語上爽勢,台語囡仔學袂會,若無趕緊來用計,閣等已經無機會。(e)

推搡台語心堅定,台文路頂真無閒,拍拚為欲救族語,台文緣份母語情。(ing)

交陪到今二十年,台語事工無推辭,栽培後進滿滿是,無管失頓抑枵飢。(i)

計畫發落攏是你,爭取權益佮人掙,為著傳承香煙味,無惜面皮佮人諍。(i)

台文聯誼你主持,透風落雨無停止,結合有心眾有志,一月一擺十七年。(i)

堅持是你真本性,台文事工真感情,羅漢台文意堅定,羅馬拼音上本頂。(ing)

音韻教學有計畫,彰縣研習第一濟,帶領老師頂真做,培養人才滿四界。(ue)

記錄台語著文字,羅馬拼音上四是,台語音韻無神祕,經過你教著知機。(i)

做人樸素有個性,袂曉妝娗無重穿,短褲冊包是標誌,一年四季分袂明。(ing)

六十五歲欲退休,研究台語有成就,台文前輩大欉樹,奉獻母語無所求。(iu)

你著認真繼續拚,母語文化著人成,人人會曉講母語,世界才有好名聲。(iaⁿ)

1990年台語文運動進入羅漢合寫的推廣,19917--月創辦的《台文通訊》著是用羅漢合寫編輯的月刊,1992年陳福當老師去清華大學佮鄭良偉教授學教會羅馬字了後,1993年成立「台文通訊讀者聯誼會」,開始推廣台語文,借翁金珠立委的服務處,逐月日聚會一擺,一面讀台文通訊,一面研究羅馬字,17年來罕得停睏,參加的有志真濟,我佮楊振裕校長自頭thīn 到此當今,成做上má-tsih 的台文運動戰友,方向堅定,感情相透。

2001年彰化縣教育局開始台語教材研習,是福當老師的堅持,到今2009年攏是採用教會羅馬字來教台語音韻(這馬採用教育部公佈的台羅),方向正確,才是救活母語的根本。Tsiâⁿ十冬來,研習內容多數是福當老師leh計畫,有你佮教育局官員溝通、說服,才會當予研習工作順序完成任務。逐家攏知影你擔任講師負責用心,考試嚴格是出名的堅持,袂使得做弊偷看,因為老師著做好模範,才會當教人子弟,不過予你雕塑過的老師攏會真心感謝,因為怹佇福當老師你的指導後,攏得著真大的利益。

私底下福當老師做人隨和,好鬥陣,毋過袂綴世俗好bī-sī,若是違背好風俗抑是公平正義,你一定反對,平素時無注重身穿,罕得看著穿新衫,見看攏是短褲節仔揹1 kha冊揹仔,你致重--ê是台語文、社會運動佮做義工,這種犧牲奉獻的精神,值得逐家尊敬。

Taⁿ都已經65--à,欲退休,會當享受一下仔清閒,免閣遐爾勞碌,毋過,福當兄,你著毋通真正退休--neh,咱台語文運動,傳教母語的任務猶未完成,路途猶真遠,需要你我的關心,輕可仔做,罔議量,千萬毋通講欲歇睏。 2009/12/8蕭平治

註解:

本成:pún-tsiâⁿ,本來。

放捒:pàng-sak,「放棄」

無張持:bô-tiuⁿ-tî,「不是故意」

掞壁角:tàn piah-kak,「丟在牆角,不重視」

摒挕捒:piàⁿ hìⁿ-sak,「丟棄」

爽勢:sáng-sè,「佔優勢,洋洋得意」

學袂會:o̍h bē-ē,「學不會」

推搡:thui-sak,「推廣」

失頓枵飢:sit-tǹg iau-ki

佮人掙kap lâng tseⁿ/tsiⁿ「與人競爭爭取」

佮人諍:kap lâng tsèⁿ/tsìⁿ,「與人辯論」

本頂:pún-tíng,「本事,才能」

四是:sù-sī,「適合」

著知機:tio̍h tsai-ki,「就知道其中奧妙機關」

妝娗tsng-thāⁿ「妝扮」

著人成:tio̍h lâng tshiâⁿ,「需要有人栽培完成」

自頭thīn到此當今:「從開始支持挺到現在」

má-tsih:「志同道合」

Tsiâⁿ十冬:「將近十年」

袂綴世俗:bē-tuè sè-sio̍k,不跟世俗。

bī-sī:人人好,「與人為善,鄉愿心態」

議量:gī-niū,消遣。2009-12-21

2009年12月17日 星期四

北台灣tshit-thô四暝五工 第五工:宜蘭


昨暗sńg了傷thiám,早早著睏kah kô͘ⁿ-kô͘ⁿ叫,透早起來才發現這間民宿實在起kah tsiâⁿ四是,kài新嫣,門口埕猶leh施設。阮訂的房間佇三樓,是1間樓中樓,睏的眠床佇頂懸,仝款共biat-to͘h捒捒做伙睏1暝,客廳浴間佇下面,闊閣衛生,造作不止仔高級。早頓佇一樓佮厝主做tīn食,kài有「賓至如歸」的感覺。

今仔日是tshit-thô尾工,Tiat--è驚老歲仔siuⁿ-thiám,嘛考慮怹大姊夫需要轉去台南路程遠,選定五結鄉的傳統藝術中心做上尾一站。

傳藝中心建置了tsiâⁿ有計畫,有曲藝館、戲劇館、民藝街……展示真濟台灣過去的歌仔戲、布袋戲、北管、南管、食--ê、穿--ê的文物,對我這个老--ê,看著tsiah-ê戲服、樂器、器具……kài-sîng看著老朋友hiah-nī親切,不過對hiah-ê少年--ê ná像毋是真趣味,參觀的少年人袂少,可惜攏是lió--一下tiō徙位,罕得看著停腳斟酌看--ê,多數人猶是較合意看鬧熱,有鑼鼓聲的陣頭,帶動整個園區鬧熱的氣氛,是吸引人客來參觀的助力,生理歹做,tiō是國家級的文化推銷嘛是仝款。

踅過民藝街路來到戲台看戲,棚頂tng-teh搬周公鬥法桃花女,這齣戲囡仔時代tiō bat看過,齣戲內竹掃、肉條、米篩的辟邪作用,到今嫁娶的禮俗猶原保持,傳統慣勢的影響力實在有夠大。

欲晝仔佇工藝傳習所看著有欲表演布尪仔戲的海報,tiō tshuā囡仔入去看,安排坐位無濟,閣有冷氣thang享受,演出戲齣kài心適,真合囡仔性,兩个撐布尪仔的師傅拚kah規身軀汗,囡仔大人看kah笑哈哈,因為是近距離表演,互動效果tsiâⁿ-tsán,口白華語台語lām leh講,雖罔娛樂性達成效果,毋過對挽救台語的助力卻是有限。

傳統藝術中心範圍tsiâⁿ闊,2點外鐘踅袂了,猶有真濟值得參觀欣賞,親像黃舉人宅佮圖書館攏無入去看,只好等候有機會tsiah閣來,四暝五工的tshit-thô,佇食飽中晝頓後tiō起程回家。

2009年12月5日 星期六

北台灣tshit-thô四暝五工 第四工:花蓮


七星潭是1个風景區毋是潭,是花蓮市民上合意的一個海灣,佇花蓮市郊外,面對闊莽莽的太平洋,對我來講是較罕得看著的景色,吸引逐家的目睭,予我看kahnih目,海水青藍,天頂嘛青藍,海波浪1湧閣1湧,白白牛奶,小湧來時恬恬看,大湧湧--來趕緊倒退lu,傷慢tiō會予海水tshiâng kah澹糊糊,Lîng-lîng較無膽,看著海湧1湧閣1湧,hua̍h-hua̍h叫,煞共怹母--à mo͘h-tiâu-tiâu,毋肯--落去。

天氣共款佮昨昏pêⁿ好天,日頭半天懸,閣無樹蔭thang遮日,而且今仔日路程百外公里,tiō無閣iân-tshiân。順海墘公路駛,路狹車少,感覺tsiâⁿ輕鬆,來到太魯閣駛過大橋tiō沿台9線蘇花公路向北一直行,路面闊閣平,路草是起起落落、彎彎斡斡,駛傷緊會gông車,不過比1960年來--過的記持,超過幾若倍好--lò͘。「1960年台中師範出業前的18工參觀旅行,7个班級300外个學生分做2批,1批向北,1批落南,阮班落南,沿路參觀沿路tshit-thô,來到花蓮師範隔1暝,才佮向北hit批換車,向北hit批車較細台,司機較gâu駛,彼陣路細條閣無khōng點仔膠,嘛無開磅空,袂當相閃,需要管制,佇太魯閣所在出發,著等對方車隊齊過來,這爿的車隊才會使起行。清水斷崖彼一段上驚險,是崩崁挖一條ㄈ字形的半磅空,1basuh拄拄仔好,kan-nā佇兩輪所在khōngtsuā紅毛土,1爿是山壁,1爿是崩崁,崩崁落去tiō是太平洋Tiat--è ná聽,後壁座3查某囝講:「爸!遐爾恐怖--ò͘!」「著--啊!彼陣逐家攏嘛毋敢看下爿,我共偷看一下,夭壽--ò͘,有看著車無看著路,下面崩崁崎閣深Tiat--è!你看,頭前磅空正爿tiō是舊路

「爸!咱遮歇睏20分鐘,遮tiō是清水斷崖,看佮較早有共款--無?」

「有影真媠真壯觀,較早無看hiah真,已經無啥記持。」

Tsit-mái路加真好駛,無像爸講--ê遐爾驚險,交通建設實在重要,因為開新路,咱才有法得tiàm遮欣賞斷崖山景。」

「講是無毋著,毋過he著破壞偌濟山林土地佮生態--neh。」

「毋是講欲閣開1條高速--ê?」

「這我無贊成。」大囝婿參加意見:「按呢已經真方便,閣開高速--ê,破壞閣較嚴重。」

「著--a,遮爾媠的所在,駛遐爾緊欲按怎欣賞?」二囝婿嘛插嘴講。

「人tiō是按呢,緊欲閣較緊,方便欲閣較方便,一直追求快速方便,敢會較快樂?實在懷疑。時間、速度佮空間的關連真奧妙,共款的距離,速度愈緊,時間愈短;共款的道理,共款時間,速度愈緊,tiō會走較遠。毋過kan-nā顧速度的緊、時間的短,彼个進行的過程,攏無把握欣賞感受--一下,敢袂傷拍損,司機顧駛車,車內的人像看電影,11幕過,囥佇頭殼內的記持,到底tshun偌濟?心靈的感受tshun偌濟?」

「爸!你想傷濟--a-lah。」

Ò͘!」講欲看光景,煞引起一場國是論壇。

來到南方澳,腹肚嘛枵--atiō佇路邊擔仔食魚箍,上鮮的魚箍湯,食飽小lau--一下,討海人實在拍拚,共天討趁的人生,實在毋是做田人子弟所會當了解--ê。離開南方澳,無偌久煞感覺像駛佇高速公路頂,「敢leh gông車?」自離開蘇花公路了後,tiō東西南北分袂清,Tiat--è講,這是「蔣渭水高速公路。」有影佇高速公路頂無毋著,毋過是生分的「蔣渭水高速公路。」毋捌家己駛車駛來到宜蘭,莫怪路草無熟,會東西南北分袂清。落高速公路佇田洋仔34斡才揣著欲蹛的民宿,位置tiō佇冬山河親水公園邊,盈暗欲踅夜景用行--ê tiō會使,蹛--ê安搭好勢,先睏一下仔晝盈暗較有精神體力。

今仔日抵好是宜蘭縣蘭雨節的開幕日,親水公園tsiâⁿ鬧熱,免門票,齣頭濟、人嘛濟,暗頭仔少年--êtshuā囡仔去耍水,兩老--ê佇岸邊顧行李,耍到日頭落海,鬼仔出來放屎的時陣,才開始四界罔踅,人是that-that-tīⁿ,挨來挨去蓋趣味,有的表演跳舞、有的唱歌、表演技藝,看上清楚--ê tiō是弄盤仔花的表演,一个人欲弄14 kâi 的盤仔tiàm篙仔尾尖轉,實在無簡單,看kah逐个無nih目,可惜搬演的藝人多數是外國人,像弄盤仔花--ê tiō中國來--ê。踅欲到2點鐘,跤酸腹肚枵,趕緊揣歇睏所在順紲買食--ê看光iāⁿ-iāⁿ的夜景,親水公園有兩項建築予我真欣賞,1項是水池仔內像粟堆也像瓜笠仔的紅毛土造型,1項是像鼓粟風鼓頂懸的四角形漏仔[漏斗]變形的造型,攏真有台灣農村的意象,毋知創作者是毋是有這个意含?

大會宣佈9點半欲放煙火,參觀的人群tshān-tshān-hiúⁿ徙位到入門喙這爿,選好位欲看放煙火

pőng~一聲,煙火開始--lò͘pőng~五花十色的煙火,光iāⁿ-iāⁿ,有的像火龍lām-sám鑽;有的pòng開像1蕊花,lak--落來像黃金雨,隨時消失,pőng~這爿消失彼爿閣起,siűpòng 彼爿消失這爿閣起,一時仔都無延遲,起起落落、生生滅滅,看kah逐家喝聲連連,大人顧翕相、顧錄影,囡仔看kah笑微微,15分鐘一目nih tiō--去,「煙火好看,無偌久」,人生短短,千萬毋通留戀佇tshia-iā的過去,把握現在,創造未來較要緊。

煙火放煞,結束今仔日的行程,轉來去民宿歇暝要緊。

七星潭:

七星潭 毋是潭,人客揣無煞gāng-gāng,無潭欣賞mài失望,海邊耍水kài迷人。

海湧一湧閣一湧,牛奶色水白茫茫,人聲水聲齊振動,原來遮tiō是七星潭。

冬山:

冬山舊名冬瓜山,親水公園田庄味,宜蘭縣長有擔當,建設宜蘭台灣心。

青天白日高高照,縣長換人煞變調,蘭雨節吹中國風,童玩節目無看了。

2009/12/5蕭平治