粽 縛粽：

粽 縛粽：              20200624         Lahjih

粽：是民俗信仰祭品，mā是市場一款點心。民間做五日節、七月普渡，著縛粽孝敬祖先、拜地基主、拜好兄弟á。粽tō是bē使得拜神明。

縛粽：粽箬對拗做khatá形，下米chham生塗豆kap粽餡，chiah koh下米khàm餡，然後kā粽箬包做四个角，chiah用棉紗線粽綰縛活結，重點tī chit个「縛」，siuⁿ 絚siuⁿ冗攏bē使得，siuⁿ絚sa̍h好ê秫米ē chuh--出來，siuⁿ冗sa̍h好ē落粽。「包粽」「落粽」攏m̄是好話。

粽餡：三層肉抑是胛心肉、生塗豆、香菇、tong蝦、油蔥、豆油、胡椒是主要，boeh加栗子、鹹鴨卵仁、滷肉、干貝mā無嫌。

米粽：用尖秫á和粽餡縛ê粽，古早講「米粽」，chit-má講「肉粽」。

粞粽粿粽：用圓秫á挨漿nóa做粿粞（kóe-chhè），chiah來包餡縛粽，號做「粞粽抑是粿粽」，較細粒，較會囥--得，古早無冰箱，較有人縛。

鹼粽：用尖秫á浸鹼水（kiⁿ-chúi），著用現挽鮮chhioh麻竹葉á包。古早燒稻草濾鹼水，chit-má用食用鹼。縛鹼粽比縛米粽較師傅，煠好ê鹼粽ē膨脹，所以米粒bē使得貯到tīⁿ，縛捾著liōng膨脹ê額，sa̍h好chiah-bē chuh--出來。鹼粽一般無包餡，boeh食著搵糖膏抑是蜂蜜，冰涼涼食熱天，心涼脾土開。

粽箬粽葉：Chàng-ha̍h tō是chàng-hio̍h，ē-tàng縛粽ê麻竹葉á、硬桃葉、桂竹、轎篙竹（石笱竹）ê kah-ha̍h-á（甲箬á）[竹籜]lóng是縛粽ê粽箬á/粽葉á。

五日節，縛肉粽，siâⁿ人流喙瀾，肉粽芳味，是通台灣人記智。

竹葉硬桃無仝味，煠粽炊粽功夫oh-tit比。

有人kah意硬桃味，有人鼻著竹葉芳，tō想著老母ê氣味。

有人hèng燒酒，有人hèng塗豆。

肉粽口味萬百款，請問，你kah意toh一項。

我上kah意原味，原味是囡á時代記智。

麻竹葉包生米，縛粽落鼎煠，崁頂庄祖媽ê滋味。

註解：

Chàng-chàng：橐袋á袋磅子[砝碼]，tō是橐袋á無錢，橐袋áchàng-chàng（粽粽）。

Pau-chàng：包領chàng-chàng，無半sián。

Làu-chàng：落粽，穿插無pih-chah，[邋邋遢遢]。

正月十五 上元節：

Chiaⁿ-goe̍h cha̍p-gō͘ Siāng-goân-cheh:

（正月十五 上元節）：

Chiaⁿ-goe̍h cha̍p-gō͘ Goân-siau-cheh

（正月十五 元宵節）

Kó͘-chá kiò-chò Chiaⁿ-goe̍h-pòaⁿ

（古早 叫做正月半）

Chiaⁿ-goe̍h-pòaⁿ sī siang-goân

（正月半 是上元）

Pài thiⁿ-kong tī thàu-chá chú-sî āu

（拜天公 佇透早 子時後）

Pī-pān âng-îⁿ khan-á-liau

（備辦紅圓 牽仔粿）

Nn̄g-chiah í-tiâu tha̍h pat-sian-toh

（兩隻椅條 疊八仙桌）

Âng-kam-chià kat ko-chîⁿ

（紅甘蔗 結高錢）

Kî-kiû ko-seng thàn-tōa-chîⁿ

（祈求 高升趁大錢）

Gia̍h kó͘-á-teng tī àm-mê

（攑鼓仔燈 佇暗暝）

Biō-chêng poaⁿ tōa-hì

（廟前 搬大戲）

Pêⁿ-kha sì-siù-á móa-móa-sī

（棚腳 四秀仔滿滿是）

Gín-á chiok hoaⁿ-hí

（囡仔 足歡喜）

Ná chia̍h ná khòaⁿ-hì

（Ná食 ná看戲 ）

Tōa-lâng khòaⁿ kah chhùi khui-khui

（大人 看到喙開開）

Cha-bó͘-lâng khòaⁿ kah ba̍k-sái sì-lām-sûi

（查某人 看到目屎四濫垂）

跋杯： Lahjih 20191224

跋杯：    Lahjih 20191224

跋桮是一種信仰；跋桮是一種安慰；跋桮是一種問題解決；跋桮是一種好耍；跋桮是一種指點明路。

Piān-nā有攑香拜拜燒金紙燒銀紙ê宮廟，佛仔 頭前拜桌，定著ē囥chi̍t nn̄g對

siūⁿ-poe（象桮），hō͘虔誠弟子祈求婚姻、功名、財子壽達成願望，祈求安心kap信心，信--者 心安，跋桮是信仰。

Boeh出外拍拚，跋桮問吉凶，後生查某囝揣對象，跋桮問吉祥，蓄一間新厝，跋桮問福地。敢好？敢thang？敢ē使得？得siūⁿ-poe（聖筶），加強信心；跋無桮，求心安，得著安慰，神明都無允准，咱ná著逆天意。

宮廟跋頭家、爐主，比賽連紲跋幾个聖桮做決定，這是跋運氣解決代誌，請神明做公親做見證。

現代人好命，ē-tàng四界chhit-thô，宮廟soah ùi信仰聖地pìⁿ-chiâⁿ觀光勝地，來chia chhit-thô遊客，有人虔誠敬禮參拜、抽籤跋桮，有人卻是跋桮ná 耍chhit-thô，m̄知內心敢有敬天畏神？

其實跋桮是一種指點明路。

當跋出siūⁿ-poe、chhiò-poe、khap-poe hit-tia̍p-sî，你ê內心反應已經顯示你ê向望。

「跋有桮」心內歡喜，ē-tàng照桮行事。

「跋有桮」心內淡薄仔躊躇m̄是kài歡喜，按呢m̄-thang照桮行事。

「跋無桮」心內淡薄仔歡喜輕鬆，按呢表示你無kah意chit-chân代誌。

「跋無桮」心內感覺失望，揣理由閣再跋，siàu想跋出siūⁿ-poe，真明顯你ê心思是boeh m̄是m̄，m̄-bián閣跋桮，勇敢去做tō-tio̍h。

設計象桮ê人有夠gâu，tiau-kang取兩kâi竹頭phòa爿做成一對，產生陰陽無仝變化，號做khap-poe（匼桮 陰桮）、chhiò-poe（笑桮 陽桮）、kap siūⁿ-poe（聖桮 陰陽桮），hō͘人誤解siūⁿ-poe機率是三分之一，boeh跋siūⁿ-poe是無hiah容易--ê。

一對象桮跋桮了後，出現四種組合，匼匼、笑笑、匼笑、笑匼，匼匼、笑笑是跋無桮，匼笑、笑匼是siūⁿ-poe，só͘-pái，siūⁿ-poe ê機率是二分之一m̄是三分之一。

跋著khap桮，神明敢有受氣，無人知；跋著笑桮，神明敢會起愛笑，無人知；跋著聖筶，神明敢真正了解你ê祈求，答應你ê所求，mā是無人知。

按呢跋桮ê期待，啥人會知？當然是你弟子本人，心內想啥？真正向望是啥？敢講你家己m̄知？

Tō是你心內無主裁，m̄-chiah m̄敢決定，soah tio̍h-ài問神明，ah神明祀tī hia，自古到此當今，m̄-bat開喙講話。

祈求神明指點明路，你ē按怎問？

請問神明「好，tō聖筶！」抑是「M̄好，tō聖筶！」

當然是「好，tō聖筶！」ê肯定正面祈求，絕對無hit-lō「M̄好，tō聖筶！」否定負面ê訴求。

Taⁿ，桮 跋--落去！

「聖筶」hō͘你笑bún-bún，感謝神明旨意，kap我心思kāng一樣。

若是「匼桮」、「笑桮」--leh，你ê內心感觸是啥貨？「chhiăk」--chi̍t-ē 「ná-ē按呢？」，原來kap我心思無相仝。

完全相信跋桮不如mài跋桮。

Tâng-o chú âng-îⁿ:

Tâng-o chú âng-îⁿ: Lahjih 20191223
（茼蒿煮紅圓）

Tâng-o chú âng-îⁿ    sù-phòe koh kah-bī

（茼蒿煮紅圓        四配閣合味）

Hê-pî-á khiàn-phang       hiuⁿ-ko͘ lām bah-si

（蝦卑仔芡芳        香菇濫肉絲）

Khiū-khiū îⁿ-á-chhè chhùi-khí chiok hoaⁿ-hí

（糗糗圓仔粞        喙齒足歡喜）

Liân-sòa chia̍h saⁿ-óaⁿ    pak-tó͘ chiok pá-tīⁿ  

（連紲食三碗        腹肚足飽滇）

Thng-thâu hó chu-bī       sio-sio lim lo̍h-chhùi

（湯頭好滋味        燒燒啉落喙）

Kôaⁿ-thiⁿ chò-hóe chia̍h  chi̍t-ke khèng thoân-îⁿ    

（寒天做伙食        一家慶團圓）

八月半土地公伯：

八月半土地公伯：

田頭田尾土地公，八月半，成道日，一支菅蓁，三支清香kah少少金錢，kā你表示敬意，感謝你。

菅蓁hō͘你做拐仔攑，三支清香求你保庇，土地公金hō͘你做所費。感恩閣感謝，感恩土地賜阮活命，感謝土地公伯一年辛苦看顧田頭田尾，稻仔快快大，阮ê生活tō快活，收成濟濟thang飼阮一家。

五日節縛粽(gō͘-ji̍t-tseh pa̍k-tsàng)：

五日節縛粽(gō͘-ji̍t-tseh pa̍k-tsàng)：
▲農民曆5月初5 阮庄跤人講五日節，mā有人講五月節，to̍h是m̄-bat講做端午節，五日節tsit工對阮有拜神ê人來講是大節，需要挨粿、縛粽、thâi精牲仔來拜公媽、拜地基主，所以五日節ê前2工，阮兜ê石磨仔to̍h開始無閒挨粿thang縛粞粽，前1工tsiah浸秫米縛米粽。
粞粽(tshè-tsàng)mā講做粿粽，kā圓秫仔浸軟tsiah-koh挨做粿漿(tsiuⁿ)，硩乾nuá成粿粞，包餡了後用麻竹葉仔(ha̍h-á)包好，tsiah-koh用鹹草縛做規捾，煠熟to̍h是好食ê粿粽/粞粽(tshè-tsàng)。
若是縛米粽，to̍h用長秫仔，kap bun米糕仝款ê秫米，秫米著先浸水浸hō͘軟，tsiah kā芡芳過ê油蔥tsham生塗豆仁，tshiau-tshiau hō͘ tsiâu to̍h ē使得準備縛米粽。
粽餡一般有豬肉、蝦pi-á、塗豆、塗豆麩⋯；粽ha̍h仔上好是現挽麻竹葉仔，曝ta--e氣味有較差；粽捾用鹹草，後--來tsiah有用棉紗線。
縛kap包，先kā兩皮麻竹葉仔相疊，拗一个漏斗形，囥米hē餡，然後拗拗包包好勢，tsiah用鹹草、棉紗線tān兩liàn縛一个活結，這「縛」ê技術真重要，縛siuⁿ-ân，sa̍h好ē tsuh--出來，pháiⁿ-khuàⁿ-siùⁿ，縛siuⁿ-līng ē 落粽(làu-tsàng)，總講一句，m̄-nā著縛hō͘牢koh-tio̍h好tháu結，tsiah是師傅。
▲Tsit-mái麻竹葉仔tio̍h-ài用買--è，tsheⁿ-ha̍h-á貴蔘蔘，所以1皮乾葉仔thap 1皮生ha̍h-á；內餡加真有料，tong蝦、卵仁、栗子、香菇、滷肉，閣較享受--ē有鮑魚、干貝。
自早已經食了tiâu味，生麻竹葉仔縛米粽，包三層肉、胛心肉kap塗豆猶是上合味。

▲sa̍h熟ê米粽，pá-tīⁿ飽滇有4-kâi角，看--起來to̍h真好食款，古早有一項khiat-tsiat講，囡仔bē使得食粽角，食粽角ē發角，發角to̍h是臭頭生粒仔，所以囡仔欲食米粽進前，to̍h先hō͘大人kā 4-kâi粽角咬掉。
Tse tī古早古早食缺穿乏(tsia̍h khueh tshīng ha̍t)ê時代，有好料--ē lóng mā儉bueh hō͘序細幼囝，m̄-tsiah設tsit个khiat-chiat例規thang hō͘序大硩喙箍硩癮頭--一下。

▲Ē-hiáu縛米粽是師傅，ē-hiáu縛kiⁿ粽閣較是大師傅，浸kiⁿ ê米ē膨脹(phòng-tiòng)，包ê時，米粒bē使得hē siuⁿ濟，bueh縛tio̍h-ài細膩，親像縛空殼粽按呢，而且鹼水ê濟少ē影響khiū度kap苦澀味。
縛kiⁿ粽一定著用現挽麻竹葉仔，he鹼水古早是燒稻草hu過濾過ê鹼水，tsit-mái較方便，市面有食用鹼thang買來用。
「未食五日節粽，破裘仔m̄甘放」，五日節天氣已經真jua̍h，鹼粽冰hō͘涼涼搵糖膏、蜂蜜，khiū-teh-teh、軟sìm-sìm，甜but-but、透心涼，tháu兩粒食落喉，心涼脾土開(sim liâng pî-thó͘ khui)喙笑目笑。


▲五日節是大節，自早以來，阮kan-na知影縛粽是bueh拜公媽、拜地基主、拜好兄弟仔，tī阮崁頂庄自來m̄-bat聽人講ē使得拜神明--得。khioh午時水囥久bē臭水管ê傳說，是bat看人去鼓井tshiūⁿ水貯tiàm罐仔內，有影無影無了解。講啥乜屈原、插榕、lim雄黃酒，聽mā m̄-bat聽過，阮崁頂庄無leh時盛tsit款風俗，屈原投江mā是讀冊tsiah知影ê故事，「五月五，龍船鼓」是bat聽人講，可惜to̍h是m̄-bat khuàiⁿ。
時代ē變，俗語講「新例無設，舊例無滅。」tsit-mái是「新例在人設，舊例無人khiat-tsiat。」是好是䆀、是著是m̄著，少人leh稽考計較。食穿愈來愈豐富，米粽已經講做肉粽，五日節mā講做肉粽節，tse lóng ē接受，較bē慣勢--è是縛像粽型ê料理竟然ē-tàng tsiūⁿ喜宴桌頂，無人感覺歹吉兆。閣較譀古--è是縛粽變包粽，『包粽』變『包中』，為著選舉，kā拜鬼道ê食物提來做譴損(khiàn-sńg)，實在是笑詼代。
猶有一句話「橐袋仔tsàng-tsàng」，可能真濟人m̄-bat聽--過，kap褲袋仔tē磅子仝意思，政治人物tn̄g-tio̍h選舉時，一直捾一捾肉粽tiàm台頂喝『凍蒜』『凍蒜』，殊不知kan-na看著hit捾「tsàng-tsàng」，敢bē hō͘人感覺無啥siâu-á路用。

2015上元節崁頂庄謎猜題目：蕭平治整理

今仔日上元節，崁頂庄晉天宮廟埕舉辦活動，有攑燈籃仔火踅庄、挲圓仔食紅圓、各種點心食免驚、臆謎猜(ioh-bī-tshai)⋯tsiâⁿ鬧熱，大人、囡仔攏歡喜。
臆謎猜是Lah-jih老師主持，台語謎題，台語ioh謎猜，有人反應siuⁿ-kín講華語，無准算，47題47个獎品攏總ioh了了。

2015上元節崁頂庄謎猜題目：蕭平治整理
1. m̄-bat破病--地名(台南市Íng-khong)
2. 一个囡仔穿鐵甲，問伊欲去tah，講欲去予人刣肉--果子名（ông-lâi）
3. 一間貨賣了了--地名苗栗縣(Thong-siau)
4. 一跤會走，無喙會吼--傳統玩具（kan-lo̍k）
5. 一暝到天光--地名苗栗縣(Thong-siau)
6. 二个人，平kuân平大；一人佇內，一人佇外--日用品（kiàⁿ）
7. 二面、四角，六齒、七面--日用品(bīn-pò͘)
8. 二級上將--地名(宜蘭縣Sam-sing)
9. 二隻船仔行相tuè，欲載人m̄載貨--日用品(ê-á)
10. 十--地名(彰化縣Tshân-tiong)
11. 上校升官--地名(台南市Tsiong-kun)
12. 不良少年--地名(嘉義縣Thài-pó)
13. 六、七，一ê月--食的物件(lūn-piáⁿ-phuê)
14. 六齒、七面--動作(sé-bīn)
15. 日全蝕--地名(台中市O͘-ji̍t)
16. 歹看面--地名(嘉義縣Bîn-hiông)
17. 比田中(Tshân-tiong)較細--地名(Tshân-tiong-ng-á)
18. 主席就位--地名(中部Tâi-tiong)
19. 出門一蕊花，入門一條菜瓜--日用品(hō͘-suàⁿ)
20. 四支跤二kâi耳，meh-meh哮，賣蔭豉--動物(iûⁿ-á)
21. 四支跤四kâi角，有面無頭殼--日用品(toh-á)
22. 四目相相、四跤相向，一个咬牙齒根、一个leh喝暢--行業(bán-bīn)
23. 四季如春--地名(屏東縣Hîng-tshun)
24. 四邊攏是田岸--地名(Tshân-tiong-ng)
25. 永遠和平--地名(新北市Íng-hô)
26. 田中央--臆一字(十)
27. 囝仔放尿--地名(高雄市Sió-káng)
28. 囡仔跋倒--形容詞(馬馬虎虎)
29. 成績優良--地名(台南市Ha̍k-kah)
30. 注射後--地名(基隆市Luán-luán)
31. 阿兄無頭路--地名(新北市Ing-ko)
32. 阿爸ê阿爸--稱號(a-kong)
33. 阿媽ê老母--稱號(a-tsó͘)
34. 青皮白腹，破開空殼--農作物(tik-á)
35. 查某人有身--地名(台中市Tuā-tō͘)
36. 飛龍在田中(Tshân-tiong)--啥乜意思？(做代表主席) 飛龍在天
37. 國姓爺peh山--地名/站名(台中市Sîng-kong-niá/成功)
38. 產前、產後--地名2位(台中市Tuā-tō͘、北部Ke-lâng)
39. 陰陽海--地名(南投縣Ji̍t-gua̍t-thâm/水社海仔)
40. 頂石kap下石、會生根bē發葉--人的器官(tshuì-khí)
41. 猴前、馬後--動物(iûⁿ-á)
42. 飲水思源--地名(台東縣Ti-pún)
43. 電鍋開關phia̍k--起來--官銜、職業名稱(代表主席)
44. 滿面柱仔籽--三種動物(niau、pih、pà)
45. 頭尖尾尖放屎臭hiam-hiam，上桌無人嫌--動物(ke)
46. 頭圓尾直，六枝跤，四枝翅--昆蟲(tshân-eⁿ)
47. 戴安全帽--地名(khàm-tíng)

三兄弟股一條瓊麻索 Lah-jih_2007.07.15

三兄弟股一條瓊麻索

作者 LAHJIH 2007.07.15

瓊麻就是龍舌蘭，俗稱樹絲，因為伊樹葉ê纖維，韌koh m̄驚水浸，提來股索á，堅固耐用，是討海人ê重要工具，南部出產kài chē。

用瓊麻股索á是m̄-bat看過，用黃麻絞索á，m̄但bat khoàiⁿ，囡á時代mā bat kap大人絞過，不過絞--è是兩股ê索á，絞三股--è就無迄款功夫。

過去生活tī庄腳ê作穡人，擔擔ê畚箕、米lôa ài縛索á，載貨、縛柴ài用索á liàu，牽牛、駕kha車、駛田、捆豬、拖車…步步lóng tio̍h用索á，索a2ti7田庄所在是生活必須品。細條索á用雙手撚，抑是tiàm腳頭u搓就會使chit，大條索若無用家私頭á來股，是無可能ê代誌，過去作田人若有閒工，就三五個招--leh，互相tàu相仝，扑幾條á索a2khng3-lehthang用。

股索a2ai3用絞索á機，he是一套用木材做ê工具，前車是四角型ê框架，kah黏tī椅條頂，有三kâi孔，穿三支ㄣ字形ê鉸á，前面會凍結索á，後面用一塊竹phòe鑽三kâi孔，拄好lop-tī三支絞á，thiòng-á三支同齊股tín動；後車kan-nā一支柴柱，半人koân ê所在mā戳一孔，仝款穿一支ㄣ字形ê絞á；另外有一粒羊á頭形ê tēng柴，刻三條溝，beh hō͘三股ê黃麻khòa tī溝內，chiah會凍平平順順、pêⁿ-pêⁿ正正股成一條索á。

股索á tio̍h-ài三個人，一個hōaⁿ前車，顧hit三支絞á ê運轉，絞正絞，一個固定後車，用倒手挽hit支柴柱hō͘固定，kohtioh8用正手股絞á，而且ài倒絞，hōaⁿ羊á頭chiah是師傅，索á絞會súi lóng tio̍h靠iê功夫kap指揮。

Chit-mái開始beh絞索á--lò͘：前車先絞一支絞á，師傅提黃麻皮套tiàm絞á頭，然後一皮一皮紡，紡一條五丈長ê無股ê索á，chiah koh紡一條兩丈半--è,五丈--ē拗做兩koe̍h，套tī後車，尾節套tī前車，chit-má前車三支絞á縛三條索，後車一支絞á mā縛三條索，師傅掠羊á頭ùi前車hit旁套好勢，然後一聲開始，前後車股無停，師傅hōaⁿ羊á頭順索á股一直倒退lu，後車一直股一直hō͘索á khiú晉前，手挽腳kēng，驚做索á傷lēng，索á若傷lēng，絞khit來ê索á一定phàⁿ-phàⁿ，bē堅固耐用。

後車哪會行晉前呢？因為索á愈絞愈ân soah愈絞愈短，本來是兩丈半，絞好可能chhun兩丈兩尺，kiu三尺算真正常。一條絞好即koh絞一條，beh大beh細，由在師傅斟酌soah黃麻，黃麻若soah chē，索á自然大條，黃麻若soah少，索á當然細條，若是絞兩股ê索á就卡簡單，可惜bē勇mā卡pháiⁿ看頭，he是師á工學絞，絞chhit-thô--ē。

「三兄弟股一條瓊麻索」，若有和協會齊，he是真簡單，團結就是力量，看田庄人絞索á就是上好ê證明，早當時阮田庄兄弟leh絞索á，無一定是親兄弟，卻是合作團結ê力量是無teh比，因為庄內ê厝邊隔壁lóng若親兄弟，過去ê庄腳人，m̄免去強調啥物『敦親睦鄰，守望相助』，庄頭ê安全就顧kah好勢好勢，時代leh變，社會一直變遷，古早味，古早ê人情味，使人懷念。

「三兄弟絞一條黃麻索」ê『團結力量』，會凍hō͘無論是國民黨、民進黨抑是新黨ê兄弟做參考，「團結」ê團體，chiah是有向望--ē。
【註解】：1.瓊麻：khêng-môa。2.纖維：chhiam-ûi。3.韌：jūn。4.股：kó͘。絞。5.索á：[繩子]。6.kài chē：真chē。7.擔擔：taⁿ-tàⁿ。8.米lôa：米籮。9.liāu：[纏繞tio̍h綁物]。10.kha車：駕牛ê器具。11.步步：逐項。12.撚：lián。13.腳頭u：[膝蓋]。14.搓：so。15.家私頭á：工具。16.khǹg-leh thang用：[放tio̍h備用]。17.kah黏tī椅條頂：[架在長板凳上]。18.三kâi孔：三個洞。19.竹phòe：[竹片]。20.lop-tī：套進在…]。21.thiòng-á：thèng-hó(聽好），可以。22.戳：chha̍k，鑿。23.tēng柴：[硬木頭]。24.khòa tī：[擱置在…]。25.hōaⁿ前車：操作機器叫hōaⁿ。26.絞正絞：[右旋轉]。27.挽：bán,[用力挽住]。28.正手：[右手]。29.倒絞：[反轉]。30.無股ê索á：親像大條紗á。31.拗做兩koe̍h：[折成兩節]。32.倒退lu：[倒退走]。33.khiú：giú、[拉]。34.手挽腳kēng：[手腳並用、穩住木柱]。35.傷lēng：[太鬆了]。36.phàⁿ-phàⁿ：[鬆鬆的，不夠堅固]。37.ân：[緊]。38.kiu：[縮]。39.soah黃麻：[一片一片加黃麻下去]。40.bē勇：[不堅固耐用]。41.和協會齊：[同心協力]。

20140809_ō͘-hoâiⁿ粿kap ō͘-so-á：

20140809_ō͘-hoâiⁿ粿kap ō͘-so-á：

芋秆粿是在來米lām芋hoâiⁿ落去做--è，kap挨菜頭粿仝款，只是原料無仝。

ō͘-hoâiⁿ to̍h是芋莖，芋仔ê葉柄，柄連葉阮講ō͘-koáiⁿ(芋稈)，若是boeh 絲來煮食、曝ō͘-hoâiⁿ-sng、炊ō͘-hoâiⁿ粿，to̍h講做ō͘-hoâiⁿ，其實ō͘-hoâiⁿ(芋莖)、ō͘-koáiⁿ(芋稈)lóng是芋仔葉ê柄。

ō͘-hoâiⁿ粿罕得人炊，因為厚工，ō͘-hoâiⁿ需要kā外皮si-si--leh chiah ē使得煮食炊粿，chit-mái芋仔tng-leh出，chiah有人炊來賣，較早庄腳人攏家己炊，厝邊頭尾招招--leh同齊炊，較免互相看人食。

ô͘-so-á 有人講芋粿曲(ô͘-kué-khiauô͘-ké-khiau。用芋頭、在來米、紅蔥頭、蝦米等，蒸製而成)，是芋仔礤簽kap糯米粿粞(kué-tshè/ké-tshuè。糯米磨成漿後，裝在布袋裡頭，壓上石頭把水分過濾掉，使米漿變成固體狀，可用來搓湯圓或做年糕的材料。)落去炊，阮崁頂庄時行keⁿ黃麻布做副業，keⁿ布ê hiⁿ-kui有一粒梭仔，ná橄仔籽，雙頭尖梭尖梭，所以阮kā芋梭仔粒chiâⁿ像梭仔型，to̍h號做芋梭仔，若kā小可粒hō͘彎曲一屑仔，to̍h號做芋粿khiau。

chit兩項粿路，我攏真有路，食bē-ùi，chit-mái家己m̄-bat做，著去kā人買，去買he庄腳人做--è chiah有合古早味。

讚

田中社頭蕭姓祭祖歌：

田中社頭蕭姓祭祖歌                    

社頭 陳國典先生 採錄    崁頂 蕭平治 漢羅譯寫.1996.01.01.

---

1. 正--月.上元.拜十五，社頭.蕭--姓.有公祖，
　建設大公.二萬五，私房.小公.無萬數。(¬)
2. 名聲.真好.thàu五路，囝孫.才能.gâu祭祖，
　祖厝.起kah四五所，舊社.崁頂.kap埤堵。(¬)
3. 逐位.起了.真正s¬,(雅氣)囝孫.認真.teh照顧，
　十二.十三.十四五，四位.祭費.數萬箍。(¬)
4. 先祭.斗山.書山祠，後祭.龍山.kap深坵，
　第一鬧熱.深坵祠，仕鼎.公祖.做座主。(u)

5. 豬羊.thâi-kah成百對，山海.菜色.逐項有，
　大公.私公.各有主，Boeh報新丁.做紅龜。(u)
6. 房長.首事.有主張，豬羊.大細.設照量，
　thâi著大隻.有thang賞，若thâi細隻.罰金香。(iu°)
7. 房房.囝孫.來照輪，年年.開祭.無歇睏，
　上元.冬節.有照準，時陣.若到.鬧紛紛。(un)
8. 有人提帖. ,出來分，有人預備.寫祭文，
　房腳.著thâi豬羊份，若著頭功.賞割銀。(un)

9. 雞.魚.青菜.kap冬筍，海鮮.包頭.山東粉，
　貨物.買kah一大敦，總舖.小工.鬧鬧滾。(un)
10. 逐家認真.著來創，備辦禮物.祭祖公，
　值年.首事.teh走chông，外房.叔孫.kek-sông-sông。
11. 八音.鼓吹.ti-ta吼，房房.囝孫.齊chiâu到，
　紳士.坐轎.到門口，落轎.龕前.去磕頭。(au)
12. 大工..小工.真走跳，雜錯工課.照拈鬮，
　有ê.拈著煮茶湯，有ê.拈著巡火光。(ng)

13. 有ê.揀菜.kap擔水，有ê.洗米.兼煮飯，
　大鼎.小鼎.十外口，總舖.煮食.亂操操。(au)
14. 總舖.煮好.就鋪排，就叫小工.出酒來，
　首事.出來請坐位，大大細細.攏總來。(ai)
15. 大細.人客.攏總留，無論親疏.請透透，
　大人.有桌.坐廳頭，囡仔.厝後.落地掃。(au)
16. 人客.囝孫.滿大廳，計共.將近chiü°千名，
　設有chit-lö.大細請，實在.也是好名聲。(ia°)

17. 食飽.有人練閒話，有人看戲.聽鼓吹，
　第一gâu-pûn.乞食坏(a)，pun-kah軟liõh.像甜粿。
18. 二八佳人.kap斬瓜，聽著歡喜.暢入髓，
　總舖.食飽.就拍拚，禮物.排頭.滿大廳。(ia°)
19. 蕭--姓.祭祖.有聲影，囝孫.甘開.誠好名，
　各項.若是排齊備，總舖.就來相通知。(i)
20. 通知首事.著緊去，去叫房長.來巡視，
　欠項.著添.才有體，逐家beh行.三獻禮。(i.e)

21. 燒水.捧--來.面.著洗，穿衫.戴帽.穿靴鞋，
　古今.衣冠.真參差，第一好笑.耆老伯。(e)
22. [褲腳.有懸.也有低，也有帽仔.戴phe-phe,]
23. 有ê.粗俗.無chiü°妝，有ê.長衫.無夠長，
　有ê.看著面.hng-hng,敢是見笑.˜免問。(ng)
24. 先輩.紳士.執古禮，後輩.少年.beh改例，
　現時.古輩.人.上濟，一時.的確難得改(ké)。(e)

25. 老幼.逐家來議論，一人.一句.亂紛紛，
　有ê.想beh卡phah-phún，有ê.beh儉.來chhun存。
26. 先輩.靠勢.˜認輸，少年.豪傑.識時務，
　認真計較.歹意思，讓予老輩.去請龜。(u)
27. 若是聽著大吹聲，人人.排班.去大廳，
　叔祖.姪孫.共弟兄，挨挨.陣陣.相chhöa行。(ia°)
28. 宗廟.排班.論大細，大輩.徛懸.細徛低，
　叔孫.逐家排齊齊，拜祖.無論親.käng疏。(e)

29. 廳堂.燈火.真光明，備辦禮物.真豐盛，
　囝孫.逐家真虔誠，陳籩.列俎.kap吹笙。(eng)
30. 秀才.訓導.老童生，重重.疊疊.排兩旁。(eng)
　31. 主祭.通引.照拈鬮，讀祝.執事.läm-sám-tàu，
拈著做通.徛外口，歡喜明仔載.有羊頭。
　32. 就lim燒茶 潤嚨喉，開聲 喝禮 整聲嗽。 (au)

33. 韻調.喝來.真和暢，聲音.牽長.閣響亮。
　日.吉.時.良.天地長，今夜.致祭.大吉昌。(iong)
34. 擂鼓.三通.鳴金炮，大樂.小樂.先後奏，
　弔讚.陪祭.齊chiâu到，主祭.紅羽.phõah肩頭。(au)
35. 主祭.就來徛中位，引讚.左右.來相隨.，
　少年主祭.極威風，老人.主祭.喘大氣。(ui)
36. 少年.勇健.˜驚跪，老人.跪了.痛腳腿。(ui)

37. 拈著主祭.是真iäng，引讚.伴行.助威風，
　來來.去去.心.茫茫，chiü°-chiü°.落落.拜祖公。
38. 少年主祭.卡有變，老人主祭.khõk-khõk-phiân，
　chham神.上香.行盥洗，盥洗.行了.行初獻。(ian)
39. 主祭.行路.kek-kh±°-kh±°，上有體面.就是我，
　紅羽.又長.羊頭大，明日.搬kah一大拖。(oa)
40. 主祭.跪t„香案前，揚揚.得意.phõah紅綾，
　祭文.若濟.卡延chhiân，就會害著鴉片仙。(ian)

41. 讀祝.聲音.真響亮，祭文.讀煞.行分獻。(ian)
42. 分獻.陪祭.代先拜，陪祭.拜好.外房來，
　外房.拜好.耆老.該，耆老.拜好.紳士派。(ai)
43. 一班.兩人.來輪流，去到案前.著伸手，
　接香.來拜.kap奠酒，雙雙.對對.三叩首。(iu)
44. 拜了.徛起.就行開，兩人.閣再復原位，
　chit對.拜好.換別對，對對.著來拜.kap跪。(ui)

45. 大大細細.拜遍遍，通生.開聲.閣再唱，
　引讚.兩人.無遷延，隨時.閣行亞終獻。(ian)
46. 終獻.了後.行飲福，嘏詞.大輩.來誦讀，
　飲酒.行了.通再唱，叫人放炮.燒金香。(iu°)
47. 祭祖.ê人.著行徙，房長.首事.亂亂喝。(oa)
48. 此時.逐家真歡喜，男女.大細.笑微微，
　望beh祖公.相保庇，囝孫.房房.造化是。(i)

49. 大吹.鑼鼓.kap銅鐘，ti-ti.thong-thong.chh⋯h-töng-chhiangh,
　人客.塞塞.一大宮，言語.插雜.聽bë明。
50. 外人.看見.真o-ló，o-ló囝孫.gâu開科，
　年年.祭祖.開費多，頂代.建置.有功勞。(o)
51. 祝文.祭文.放火燒，炮仔.大炮.磅磅叫，
　大人.歡喜.哈哈笑，囡仔.歡喜雀雀tiô。(io)
52. 火龍.大弄.濫sám鑽，花研.放起.滿天光，
　有ê.腳骨.徛了酸，想beh去睏.無眠床。(ng)

53. 外位.人客.˜知頭，看到祭煞.半暝後，
　想beh倒轉.去In兜，鞋.褪--起來.起步走。(au)
54. 魁星.科甲.送到位，筆.giâ--起來.寫斗鬼，
　主祭.接來.下落去，祖公.祭煞.心肝.開。(i)
55. 祖公.歡喜.來承領，房房.囝孫.大昌盛，
　禮.畢.撤饌.唱得明，大細.囝孫.皆高陞。(eng)
56. 逐家歇睏.來煉仙，有ê.整火.kiat阿片，
　有ê.倒--落.直liân-liân，有ê.去解大小便。(ian)

57. 祖公.祭息.四更時，大鼎.細鼎.滾chhih-chhih,
　總舖.盡力.徛teh煮，Beh煮點心.來止飢。(i)
58. 有ê.總舖.真無理，就將肉糜.khiäm儉肉絲，
　眾人.˜-thang容允伊，逐家受氣.kàn.kap辭。(i)
59. 點心.食飽.就bë-iau,逐位紳士.睏憔憔，
　首事.叫人切肉條，小工.徙桌.排椅條。(iau)
60. 天光.桌額.按拄好，外姓.著坐人客桌，
　若無帖額.會食無，不比.昨暝.好囉嗦。(o)

61. 跳。紳士.桌頂.坐得妙，有人爭位.相kàn-kiäu，
　有人酒醉.起酒siáu，頭人--出來.pöng-pöng (iau)
62. 來chia.冤家.是歹兆，反嘴.相罵.真見笑。(iau)
63. .beh食.各人.愛認派，chit-lö派頭.tiõh去改，
　公丁.照輪.是應該，˜-thang年年.想beh來。(ai)
64. 食飽.大吹.就響聲，逐家beh轉.khöng-khöng癲，
　紳士.坐轎.kek三名，有人無坐.用步行。(ia°)

65. 柑仔.包仔.提轉去，囡仔.若問.提予伊。(i)
66. 祭祖.ê歌.唱了離，蕭--姓.人人.大吉利，
　有ê.聽--著.愛受氣，有ê.聽--著.會歡喜。(i)