Kng-thiⁿ pe̍h-ji̍t（光天白日）：

Kng-thiⁿ pe̍h-ji̍t（光天白日）：

Ū chhiū tō ū ńg

有樹tō有蔭

Ū chúi tō ū iáⁿ

有水tō有影

Chhân-chng pháng chhâm im-chúi kî

田庄pháng田im水期

Chúi-iáⁿ sì-kè gia̍p-gia̍p-si̍h

水影四界gia̍p-gia̍p-si̍h

Súi tō sī súi

媠tō是媠

Kiaⁿ-hiâⁿ koh ò͘-sim: 20200711 Lahjih

Kiaⁿ-hiâⁿ koh ò͘-sim:        20200711        Lahjih

Lāu-hòe-á-lâng kāu-jiō, tú-chiah khì pàng-jiō, pàng-jiō liáu-āu, hoat-hiān bé-tháng lāi-bīn ná-chhiūⁿ ū sè-bóe thâng-á, phû-tī chúi-bīn, sí-giān-giān bô-leh tín-tāng, kám-kak hò͘ⁿ-kî koh kiaⁿ-hiaⁿh, àⁿ-thâu khòaⁿ lān-chiáu-á, hoat-hiān lān-chiáu-á-thâu naih-kau só͘-chai, mā kiap 3-4-bóe, khióng-hông ê sim, ti̍t-chiap hoán-siā tōng-chok sûi kā póe-póe lo̍h-khì bé-tháng. Ná-ē án-ne? che-sī siáⁿ-mih óaⁿ-ko? ná-ē chhut-hiān tī chia? tùi tó-ūi lâi--ê? kám-ē-sī ùi jiō-tō cháu--chhut-lâi--ê? sio-liân-sòa ê hiau-gî hō͘ góa sim-chêng khióng-hông koh bô-nāi.

Siūⁿ-kóng ka-kī sǹg-sī ài chheng-khì ê lâng, kò-jîn ōe-seng ū chiàu-khí-kang, ná-ē tu̍t-jiân ū chit-khoán ò͘-sim boeh-thò͘-boeh-thò͘ ê tāi-chì hoat-seng, si̍t-chāi siūⁿ-bōe-chhun. Pún-chiâⁿ siūⁿ-boeh chhéng-kàu i-seng pêng-iú, siūⁿ-kóng iáu-sī seng Google--chi̍t-ē khah-kín: "ū-khó-lêng sī giô-thâng[蟯蟲], khah-lím 1cm tn̂g, sī gín-á-lâng khah-ē òe--tio̍h ê kià-seng-thâng, it-poaⁿ chhut-hiān tī pùn-kháu, koàn-sì kóng pùn-kháu-thâng, mā-ē chhut-hiān tī phōng-kong". Chhut-hiān tī phōng-kong? án-ne m̄-tio̍h-sī ùi jiō-tō pàng--chhut-lâi--ê? kiaⁿ-sí-lâng, ū-kàu thái-ko ò͘-sim, hō͘-góa kám-kak boeh-thò͘-boeh-thò͘.

Taⁿ boeh án-chóaⁿ chiah-hó, sui-bóng giô-thâng m̄-sī kài oh-tī ê chìn-thâu, siūⁿ-tio̍h chia̍h kàu chi̍t-ê nî-hòe, kóng ū giô-thâng ùi jiō-tō pàng--chhut-lâi, m̄-nā ò͘-sim, koh-khah kám-kak kiàn-siàu-tāi, jú siūⁿ jú ak-chak⋯⋯Kóaⁿ-kín kā lān-chiáu-á sé hō͘ chheng-khì chheng-khì, tán-thāi koh pàng-jiō chiah koh koan-chhat, chiah chò phah-sǹg.

Nn̄g tiám-cheng āu, koh ji̍p-khì piān-só͘ pàng-jiō, chim-chiok khòaⁿ, ná-chhiūⁿ bô koh-iūⁿ, jiō pàng-liáu, the̍h chi̍t-tiûⁿ ōe-seng-chóa boeh chhit lān-chiáu-á, che-sī kúi-nā-nî lâi ê koàn-sì, lāu-lâng m̄-nā kāu-jiō, múi-pái pàng-jiō lóng-ē lâu chi̍t-sut-á jiō-bóe, n̂g-n̂g sió-khóa liâm-liâm, nā-bô chhit chheng-khì, tiāⁿ-tio̍h ē tò͘-tio̍h lāi-khò͘, nā keh-kang koh bô ōaⁿ khò͘, it-tēng sī chhàu-hiam-hiam, chiâⁿ-chò lāu-lâng-hiàn.

The̍h ōe-seng-chóa chhit chheng-khì, boeh kā khò͘-kha pàng--lo̍h-khì, kî-koài ê hiān-siōng koh hoat-seng, lān-chiáu-á-thâu chhut-hiān pe̍h-pe̍h ê mi̍h, thián-khui hóe-gán kim-cheng chi̍t-ē khòaⁿ, goân-lâi sī ōe-seng-chóa ê chóa-iù-á, chèng-kì tī chia, chèng-kì lia̍h--tio̍h--à, siā thiⁿ siā tē, kám-siā ī--ā kap lāu-pē, eng-àm ē-tàng an-ún lo̍h-bîn--ā!

Ūi-siáⁿ-mi̍h chìn-chêng ē ba̍k-hoe khòaⁿ tâⁿ--khì? khó-lêng mî-iù-á kauh liáu siuⁿ-kú ka-kī kńg-lian, khòaⁿ--khí-lâi kài-sêng sè-bóe giô-thâng; nn̄g-lúi ba̍k-chiu khui-to 3-pái m̄-sī goân-in, sī-bāng-mo̍͘h, pe̍h-lāi-chiàng chhiú-su̍t āu ê hiō-ûi-chèng,  khòaⁿ, iû-goân khòaⁿ chin-hng, khó-sioh kái-sek-le̍k bô hiah-nī chheng-chhó, khòaⁿ sī ū khoàiⁿ, hêng-thé chóng-sī kám-kak bông-bông, chia̍h-lāu ū-iáⁿ chin-chē bái, che-sī chèng-siông, án-chóaⁿ kai-koat bái-châi chò-chiâⁿ ê put-piān sū-si̍t, su-iàu lí-tì tùi-thāi, m̄-thang kín-tiuⁿ, m̄-thang bê-sìn, ū-tāi-chì chhōe i-seng chín-toàn tī-liâu sī siāng iàu-kín, siang-sìn kho-ha̍k, siang-sìn i-ha̍k sī góa chia̍h-lāu lāu-po͘-tiāⁿ ê hoat-pó.

牽手 牽手 牽手一世人： Lahjih 20200528

牽手 牽手 牽手一世人： Lahjih 20200528

Khan-chhiú khan-chhiú khan chhiú chi̍t-sì-lâng:
牽手 牽手 牽手一世人：
Thiⁿ sù in-iân ǹg-chêng kiâⁿ kiâm sng khó͘ chiáⁿ bô kiaⁿ-hiâⁿ
hoaⁿ-hí saⁿ-kēng lâi kòe-ji̍t sim kam chêng goān kut-la̍t piàⁿ
天賜因緣向前行 鹹酸苦汫無驚惶 歡喜相楗來過日 心甘情願骨力拚
ng mî-phōe
相楗相疼平安過 身苦病痛總嘛會 冤家勞債罕得有 同眠同枕仝一被
Pin-koán eng-hoe chò kiàn-chèng pòaⁿ-sè-kí chêng ì kian-tēng
kiōng-tông kiàn-li̍p chit-ê ke ǹg-bāng kiáⁿ-sun tit kong-bêng
賓館櫻花做見證 半世紀情意堅定 共同建立這个家 向望囝孫得光明
Jîn-seng chek-jīm kàu-chia chí ū khó͘ ū tiⁿ lóng hoaⁿ-hí
khan-chhiú tong-hā tio̍h khan chhiú him-siúⁿ àm-hê siāng chhù-bī
人生責任到遮止 有苦有甜攏歡喜 牽手當下著牽手 欣賞暗霞上趣味

Khiàng-kha--ê pā-kang: 20200509 Lahjih

Khiàng-kha--ê pā-kang:         20200509   Lahjih

Khiàng-kha--ê m̄ chò-sit, kui-ji̍t tiàm chhù-lāi phòng-í theⁿ, hāi goán bē-tàng chhut-mn̂g khòaⁿ-lāu-jia̍t sì-kè se̍h.

" Khiàng-kha--ê! lí m̄ chhōa-goán chhut-mn̂g hui-hui seh-seh--leh, 5-kang bô khòaⁿ hit-châng hoe, bô khòaⁿ hit-phiàn chhân-hn̂g, bô kā Pat-kòa-soaⁿ chhéng-an kóng gâu-chá, chiok ut-chut--ê lí kám-chai?"

" Hèⁿ--à! hèⁿ--à! góa mā 5-kang bô thiaⁿ-tio̍h chiáu-á siaⁿ--neh! "

" Góa mā chhùi-kho͘ it-ti̍t chhoah, su-liām hit-tàⁿ tōa-tn̂g mī-sòaⁿ-kô͘! "

" Khiàng-kha--ê, chhōa goán chhut-khì seh-seh--leh, hó--bò͘? " ba̍k-chiu, hīⁿ-khang, chhùi tâng-chê hó-chhùi ko͘-chiâⁿ.

Ah lín sī bô-khòaⁿ "kha" koh-iūⁿ--hio͘h? í-keng ū 5-ji̍t, ta̍k-ji̍t khí-lo̍h lâu-thui ná ku leh sô, tò-kha kha-pôaⁿ kha-thiāu koan-chat ná tàu-bô-tiâu, kiâⁿ-lō͘ oaiⁿh--leh oaiⁿh--leh sè-hoa̍h sóa, ū-sî koh-ē tiuh-tiuh-thiàⁿ, lín mā sió lún--leh, bîn-á-chá-khí chiah khòaⁿ-māi--leh.

M̄-chai sī chí-thiàⁿ-io̍h èng-hāu, a̍h-sī thiàⁿ-kàu kam-goān--ā, kin-á-ji̍t thàu-chá cheng-sîn ē kiâⁿ-lō͘--ā. 

Kóaⁿ-kín--ò͘, thiⁿ-sek kng-iāⁿ-iāⁿ, chhōa lín lâi-khì chhit-thô, chioh âng-sek tiān-tōng-chhia, chài ta̍k-ke chhut-mn̂g se̍h--chi̍t-liàn!

Ji̍t-thâu-kng tī hia kng-iāⁿ-iāⁿ, ū khoàiⁿ A-lí-san, To̍k-li̍p-soaⁿ. Hông-bûn-chùn-piⁿ hit-châng âng-sek hoan-á-hoe, mā khui kah âng-phāⁿ-phāⁿ, lak kah kui-thô͘-kha, ū-kàu sóng ê hoaⁿ-hí⋯

Góa mā-ū thiaⁿ-tio̍h chiáu-á-siaⁿ, pe̍h-thâu-khok-á ku-lú-ko̍k-lo̍k, bāng-tang-tiú-á leh kho͘-si-á, chhiⁿ-tî-á ti-ti-háu, ū-kàu hó-thiaⁿ⋯

" To-siā Khiàng-kha--ê! to-siā Khiàng-kha--ê! "

Án-ni lán hó lâi-khì tńg, bô, tán--leh Khiàng-kha piàn bah-kha tio̍h chia̍h-lat.

ちょっと待ってtán--chi̍t-ē, Khiàng-kha--ê, ē-kì-tit chhōa góa lâi-khì bé tōa-tn̂g mī-sòaⁿ-kô͘, hah kúi-nā-kang--a!

跤底筋膜炎又閣發作，倒跤疼kah歹伐步，oaiⁿh--leh oaiⁿh--leh細伐行，無張持koāiⁿ--tio̍h tiuh-tiuh疼，想起一年前疼kah bē tam塗跤，kioh是尿酸疼風症，醫館骨科、復健科診斷無結論，kan-nā止痛藥備用，膏藥mā加減糊，按怎bē疼ē行路，無結論mō͘-chai-iang（m̄知影）。

後--來bat koh疼，仝款止痛、膏藥su-hāu，三工了後仝款旅遊行路，並無各樣。Chit擺雖罔m̄免扞椅頭仔chhek徙位，mā-ē peh樓梯，koh-ū食止痛藥，siáⁿ知soah疼5工chiah-ē騎車，m̄知明仔載iáu-ē(猶會)koh疼--bò͘？

Chiâⁿ禮拜無出門，趁早起ē行路ē騎車，出去踅chi̍t-liàn。

阿里山眠月下線1974：

阿里山眠月下線1974：       20200415        Lahjih

1974前後幾冬，大兄tī阿里山眠月下線45、46林班hit-tah做集材鉤柴作業，大兄是ku-lí-thâu（工頭），chhōa一陣工人tī chia做機器工仔，kā伐木工人剉斷ê木材，用機器、人工集集做伙，thia̍p-chiūⁿ阿里山火車載出去嘉義。

眠月下線是眠月線落崎大約千外公尺遠ê運柴支線，懸低落差倚近1000米，非常崎，ùi眠月下線上山到石猴站chit段有peh山友挑戰ê好漢坡，50外冬前是青年大學生『溪阿縱走』上ngē-táu路站。眠月下線tī日本時代有鐵枝路，用pōng-pōng-á車載柴，日本人轉--去了後，撬（kiāu）掉鐵枝路改換卡車路，用トラック/truck載柴，大兄tī chia鉤柴時，已經無pōng-pōng-á車mā無卡車，是用汽油集材機（えんじん），母機chhāi-tiàm眠月線石猴站鐵枝路邊，làu鋼索落去下線鉤柴，剉柴林班範圍闊莽莽，需要分做幾若站集材，上尾chiah鉤柴到石猴站鐵枝路邊，等待運柴火車來載。

聽大兄後生輝虎講，林班伐木工人剉ê樹木，主要是柳杉kap khêng一寡松蘿原木樹頭。日人時代已經kā chia ê ひのき/檜木剉了了，留落來chiâⁿ米懸ê樹頭kap無夠格柴頭柴尾，lóng是高級木材，無提無彩，啥乜水土保持，無人重視。原木剉了日本人有種柳杉，chia-ê柳杉林已經大欉有經濟利益，長度有夠長--ê ē使得做電火柱仔，若是樹頭有夠大，剉較貼底--leh，he樹頭hiàn-hiàn真適合做棺木棺柴蓋，聽講外銷香港真搶市。

輝虎講，Hit-tang-chūn做機器工仔，逐日眠月頂線下線來來去去，若tī鐵枝路邊做穡，中晝時時常peh-chiūⁿ石猴肩胛歇睏，若是落去下線做工，有時ē去眠月神木行行看看--leh，原來hit欉神木mā是lok-chhóe-á（橐髓仔），kap阿里山第三分道神木站hit欉仝款，是紅檜（Chamaecyparis formosensis 松蘿、薄皮仔、水古杉、Benihi、ベニヒ），樹箍是空殼--ê。斯當時一寡登山客來到chia，kan-nā顧peh山，lóng m̄知影危險，chia有鉤柴家私kap木材起落，有ê koh thian-thian phiâⁿ-phiâⁿ喝bē聽，好佳哉山神有保庇，無出代誌。

輝虎揣幾張相片出來hō͘我看，一爿回想一爿紹介，hit-chūn ā無較讚ê翕相機，kan-nā用he雙眼普通相機翕，底片、洗相片貴蔘蔘，m̄敢翕siuⁿ濟，kan-nā chit幾張仔，猶算留一寡記智：

Chit張是石猴，日本人講達摩石，有夠sêng台灣獼猴，hit粒石頭有夠大粒，無彩tī 921大地動kā頭殼震落鐵枝路邊。

Chit張是眠月神木，實在太大欉--leh，無法度翕規欉，只好分做兩節翕，然後kā接做伙，有夠媠ê神木。樹頭有一支牌仔按呢紹介，「眠月神木安南狄娘，樹齡4100年，紅檜，直徑668.8cm，高58m，材積242.84M³。」

Chit張是伐木工人leh剉柴，一欉一欉直lak-sak ê柳杉林，是較早電火柱仔ê材料。

Ē記得猶有一張車囝載杉仔箍ê相片，杉仔siuⁿ過長，需要用兩隻細隻車囝載，裝車ài技術mā-ài工夫，載柴司機除了經驗koh-khah需要小心sè-jī，等我揣--著 chiah送你看。

眠月線經過1999年921大地動kap 2009年8月莫拉克風災（八八水災）大損蕩，boeh-koh恢復原貌實在困難，看chit幾張相片，引起無限思念。

番薯開花：

番薯開花：            20200412        Lahjih

Han-chî khui-hoe súi-tang-tang      kiô-á-sek-chúi chiâⁿ bê-lâng

han-chî kiáⁿ-sun ū ǹg-bāng     kian-kiâng ì-chì hiáng gōa-pang

番薯開花媠噹噹    茄仔色水誠迷人    番薯囝孫有向望    堅強意志響外邦

Han-chî khui-hoe sêng kó͘-chhoe    tōa-siaⁿ hòng-sàng khong-tiong poe

Bú-hàn hì-iām chi̍t-sì-kè         hông-e̍k kang-hu lán siāng-chē       

番薯開花成鼓吹    大聲放送空中飛    武漢肺炎一四界    防疫功夫咱上濟

Han-chî khui-hoe ū-iáⁿ súi      Tâi-oân liâng-sim chin-tì-hūi

chhùi-om pang-chān sàng gōa-ūi   jîn-chû sim-hēng kài khó-kùi

番薯開花有影媠    台灣良心真智慧    喙掩幫贊送外位    仁慈心行蓋可貴

Han-chî khui-hoe chin ióng-kiāⁿ     ka-tī ūn-miā ka-tī piàⁿ

tāi-tāi seⁿ-thòaⁿ han-chî-kiáⁿ          tèng-kin ōng-châng hó-miâ-siaⁿ

番薯開花真勇健    家己運命家己拚    代代生湠番薯囝    釘根旺欉好名聲

月娘圓圓照西窗：

月娘圓圓照西窗：        20200411        Lahjih

人群chhān-chhān-hiúⁿ，2-3个3-5人一直來，我mā綴人行入禮堂，人koh bē少，頭前猶有位，老歲仔人坐頭前聽較有，tō揀第一排倚中央坐--落來。

小可hī-hōa ê講話聲，逐家leh聽候演講者chiūⁿ台頂，hit个司儀顧leh póe手機仔，頭lê-lê，ná像無伊ê代誌，坐佇講台邊--a hit个引話人，歲數kap我差不多ê老仙角，mā親像bē記得伊ê任務，ná像坐禪入定⋯

時間一分一秒過，雄雄手機仔「tiang」一聲，提醒明仔載有一場演講仝款tī chia，是我主講。時間仝款一分一秒過，頭lê-lê照常頭lê-lê，坐禪入定--ê照常坐禪入定，小可hī-hōa ê講話聲猶原小可hī-hōa⋯

越頭四界看四界lió，ĕ！頭前hit支提示牌仔kám-m̄-sī寫 主講人：蕭平治。M̄是明仔載，是今仔日chit-chūn，taⁿ 害ā，也無準備也無chah演講大綱，liam-mi上台boeh講saⁿh？趕緊想看覓。

平常時常kap朋友開講 講「食老tio̍h認老；食老m̄好認老。」mā時常講「人生追求--ê是歡喜快樂！」ná-ē食老tio̍h認老；食老m̄好認老？m̄是足矛盾？人生ê快樂是啥乜？好，tō按呢決定來講「人生ê快樂是啥乜？」

食老póe無塗豆是目睭bái，食老哺無塗豆是喙齒bái，猶有記智bái、跤頭bái、腰脊骨酸⋯，hó-ka-chài，有leh求進步，早tō學ē-hiáu電腦，MacBook、iPad、iPhone拴chiâu-chn̂g，行事曆幫忙記智，解決足濟代誌，siaⁿh知chit擺soah落氣，chia lóng是好內容⋯

時間一分一秒過，m̄知過偌久，有熟似ê朋友掠外一直看，敢是leh催我趕緊上台？自按呢「阿財、阿財，無人請，家己來。」Tng-boeh行上台頂ê時陣，雄雄手股頭痠痛無爽快，翻一下身soah精神，原來是半睏半清醒leh眠夢，已經透早五點，落床行到窗仔門邊看外口，已經phah-phú光，tú好看著月娘圓圓照西窗。

枵鬼無勇氣：

枵鬼無勇氣：

野生とまと紅kì-kì
岸邊happy耍溝仔水
iau-sâi囡仔流喙nōa
siàu想boeh食欠勇氣

面對武漢肺炎 免驚惶： Lahjih

面對武漢肺炎 免驚惶：      Lahjih      20200404

E̍k-chêng chiâⁿ lī-hāi, kiaⁿ-hiâⁿ sim kòa-gāi, 

thiaⁿ chèng-hú an-pâi, an-sim Koan-chū-chāi.

疫情誠厲害，驚惶心罣礙，聽政府安排，安心觀自在。

Iâu-giân m̄-thang sìn, i-ha̍k siāng si̍t-chāi, 

chèng-sìn chin-iàu-kín, kî-tó tiàm sim-lāi.

謠言毋通信，醫學上實在，正信真要緊，祈禱踮心內。

Lâng-sim ū nn̄g-khoán, pháiⁿ-sim siūⁿ hoat-châi, 

sim-thài chhian-put-kai, liâng-sim bē chheng-chhái.

人心有兩款，歹心想發財，心態千不該，良心袂清彩。

Chèng-hú kà lán chò, chiàu ōe chò tō-hó, 

iâu-giân o͘-pe̍h LINE, hoān-hoat liáu chîⁿ-châi.

政府教咱做，照話做就好，謠言烏白賴，犯法了錢財。

書山祠蕭--姓字輩：

彰化縣田中崁頂庄書山祠蕭--姓字輩：
1奮(hùn)2永(éng)3伯(phek)4團(toân)
5文(bûn)6仕(sū)7元道(goân tō)8德世(tek sè)
9祿朝(lo̍k tiâu)10廷(têng)11輝(hui)12志(chì)
13正(chèng)14大(tāi)15光(kong)16昌(chhiang)
17興(hin)18家(ke)19輔(hū)20國(kok)
21奕(ek)22世(sì)23聯(liân)24芳(hong)
正音：
彰化縣(Chiang-hòa-koān)
田中(Chhân-tiong/Chhân-tiong-ng)
崁頂庄(Khàm-téng-chng)書山祠(Si-san-sû)
蕭--姓(Siau--sèⁿ)4團(toân)16昌(chhiang)17興(hin)22世(sì)