062Tōo-kuan（杜鵑）＞小杜鵑＞Little Cuckoo.

062Tōo-kuan（杜鵑）＞小杜鵑＞Little Cuckoo.

Tōo-kuan（杜鵑）tī中國文學上，是文人寫作ê題材，m̄-koh tī台灣並無啥物特別ê所在，主要原因是tōo-kuan（杜鵑）鳥tī台灣只不過是罕得有ê冬候鳥而已。Tī杜鵑屬當中，體型較細，是有名ê『託卵性』鳥類，特別愛食tshì-lò-á蟲毛毛蟲。

投影燈overhead Projection lamp：

投影燈overhead Projection lamp：

1989年頭搬來chit-mái 這間店面厝，間隔有較闊，三樓闊闊無隔間，利用來kā學生囡仔補習趁錢，補貼利不及費ê艱難日子，因為四个囡仔高中、國中學費siong-tiōng。為著補習方便有效率，chhân-chhân買chit台投影燈overhead Projection lamp，直接tiàm頂面用白枋筆寫字，光度有夠閣m̄免粉筆、拭烏枋，因為補習無夠幼路，並無受家長肯定chiâⁿ做明星老師。
1991年潦落去研究pe̍h-ōe-jī教台語文讀寫，tō慢慢推掉補習工課，mā無閣擔任五六年級任。

1996年10月2日~12月18日，彰化縣政府國民中小學教師台語研習由田中國小承辦，連紲12禮拜拜三下晡上課3節，參加老師預定80人，增加到120人，講師是蕭平治。chit台投影燈拄好ē-tàng利用。

斯當時學校時行用投影燈kap透明片教學，hit套教台語羅馬字(pe̍h-oē-jī)ê PowerPoint教材，tú好提來使用，1張換過1張ê投影片投影tī銀幕，大字清楚，效果實在足讚。斯當時大多數ê老師m̄-bat台語聲韻，mā m̄-bat接觸白話字，認為he是外國字，所以講師我先踏話頭講：台語聲韻kap華語仝款，有聲母、韻母、聲調，有人用十五音切音，有人用ㄅㄆㄇㄈ，有人用pe̍h-oē-jī，因為我認為pe̍h-oē-jī好用koh方便，所以用羅馬字教學，效果仝款。教學中間，陳明仁kap張聰敏mā有來參觀kā我鼓勵，陳明仁要求boeh講話，我允准伊10分鐘，而且要求伊ē使得講鼓勵ê話，bē使得講ē引起反彈ê話。

Chit場台語羅馬字教學真有效果，改變真濟老師ê觀念，Email「台語網taigu@googlegroups.com」，轟動到美國、加拿大去。

國民中小學教師台語研習，直接用pe̍h-oē-jī教學，m̄知有比tsit場閣較早ê記錄--bò͘？
57歲1998 hit年，轉去崁頂教一寡失學老大人bat字寫字唱歌，m̄-nā教漢字，mā教 pe̍h-ōe-jī，tō kā chit台投影燈mo͘h轉去崁頂役會（活動中心），soah留tī崁頂20冬，頂日仔chiah雄雄想--著，kā 討轉來做記念。

065Tsháu-kok（草嘓）＞番鵑＞Lesser Coucal .

065Tsháu-kok（草嘓）＞番鵑＞Lesser Coucal .

Tsháu-kok（草嘓）覕tiàm草phō內，「kok！kok！kok！…」吼bē煞，生湠期間ê熱天羽衣，是金sih-sihê烏藍色，配著淺茶紅ê雙翼歇tī綠色ê草phō頂，猛日一下照，實在有影súi，活跳閣ián目，伊ê雙翼ká-ná甘蔗ê kah-ha̍h，tī雲林嘉義一帶有「紅kah-ha̍h-á」ê外號。

Tsháu-kok（草嘓）「紅kah-ha̍h-á」，台灣本島kap蘭嶼ê平洋、丘陵、低山區攏有伊ê跤跡，低樹林、甘蔗園、蘆竹phō、茅仔草真旺ê塚仔埔，是伊出現ê所在，常歇tī竹仔、樹椏、甘蔗葉仔ê尾溜。

Tsháu-kok（草嘓），tī東海岸定定tī塚仔埔活動，致使hōo原住民誤會tsit種鳥仔會挖墓壙，偷食屍體ê傳說，kā看做不祥ê鳥類。

Tsháu-kok（草嘓），是台灣杜鵑科，唯一家己做岫，家己孵卵ê鳥類，做岫tī較密ê草phō內、甘蔗園內，利用拗曲蔗葉仔做空心球型ê岫，食大型ê蟲豸、蛙類、tōo-tīng、母舅蛇、塗龍仔tsit款蜥類。

049.lò-kha-á（躼跤仔）＞高蹺鴴＞Black-winged Stilt.

049.lò-kha-á（躼跤仔）＞高蹺鴴＞Black-winged Stilt.

     

lò-kha-á（躼跤仔）ê跤特別長，lò-lò ê兩支跤骨是真súi ê桃紅色，尻脊骿kap雙翼是藍烏色，金sih-sih，其他部份是白色，看in ûn-ûn-á飛行ê姿勢非常súi。

偷食ê龜： Lahjih笑詼20180915

偷食ê龜：    Lahjih笑詼20180915

一隻龜少年kap一隻龜少女，七少年八少年tō leh戀愛，閣驚爸母知，tō bih-bih-chhih-chhih約會tī水潭中央hit粒大粒石頭頂，時間若到in tō相拄頭，時間若到in tō趕緊走。

不知不覺已經半年外，感情愈poa̍h愈深愈mî-nōa，好佳哉無搪著「父母知影煞無來」ê遺憾，in ná來ná恩愛，ná來ná有感覺。有一擺，實在tòng-bē-tiâu，in soah偷試禁果，ná試ná新奇ná趣味，試出上帝禁止ê美妙滋味，一時腦神經soah失去計算時間ê靈敏⋯⋯

忽然間，龜少女雄雄大喝一聲「害--ā！bē-hù--à！」chit時快、hit時緊，龜少年腦神經tō 猶未回魂--leh，龜少女已經走kah無看龜影。

經過一禮拜久，ná想ná懷念甜蜜ê hit時刻，是按怎心愛--è攏無來相招約會？lún-bē-tiâu 慾望ê chhui-pek，tō按進前約定時間來到水潭中央hit粒大粒石頭，taⁿ頭一看，原來心愛--è已經leh等候，也受氣也歡喜ê龜少女，用神祕幼軟ê司奶聲「心愛--è！我來--ā！」

龜少年pì-sù輕聲「你來--ā，趕緊khit來！」

「較大聲--leh！你leh講siaⁿh？」

「你較緊khit來--lah！」猶原輕聲細說。

「原來你ē見笑--ò͘！」

「較緊khit來--lah！」

「驚見笑閣hiah急性？」龜少女peh足久chiah peh-chiūⁿ石頭頂。

「我來--ā！」仝款hit-lō神祕幼軟ê司奶聲。

「Khah緊kâ péng--過來。」

「恁龜少年真正厚nôa-thâu！」

「Khah緊kâ péng--過來，已經倒leh看日頭、天星有6-7工。」龜少年無啥氣絲。

「@#$%&？」

「Ah tō自彼擺雄雄ùi龜頂跋落龜跤，soah四跤khiàu chiūⁿ天，ka-lián-phak變睏坦笑，倦tauh-tauh，sian péng péng bē péng-pêng，一擺閣一擺，ná來ná無力，自按呢日--時日頭煎，暝時看天星看到chit-mái！」

八月半土地公伯：

八月半土地公伯：

田頭田尾土地公，八月半，成道日，一支菅蓁，三支清香kah少少金錢，kā你表示敬意，感謝你。

菅蓁hō͘你做拐仔攑，三支清香求你保庇，土地公金hō͘你做所費。感恩閣感謝，感恩土地賜阮活命，感謝土地公伯一年辛苦看顧田頭田尾，稻仔快快大，阮ê生活tō快活，收成濟濟thang飼阮一家。

060Nâ-kha-tsiáu（林骹鳥）＞翠翼鳩＞Emerald Dove.

060Nâ-kha-tsiáu（林骹鳥）＞翠翼鳩＞Emerald Dove.

Nâ-kha-tsiáu（林骹鳥）大多數tī樹林下跤活動；tī林道抑是登山山路所看著ê林骹鳥，差不多攏tī路面tshuē食，看著人就隨時飛走，m̄-koh無偌久就閣飛轉來原位，是「地生性」鳥類。

Nâ-kha-tsiáu（林骹鳥），紅喙pe、tshenn-kha-phiann綠背、tshenn翼股、紅跤爪，歇tī低山區ê雜木仔林、果子林抑是山坡農耕地，時常tī塗跤tshuē食，草木ê幼穎（ínn）、種子、漿果kap蟲豸為食物。

不理異象

8、不理異象：

透早落來樓跤膨椅桌仔拍電腦，突然間冊櫥hit爿有「phia̍k」一个怪聲，行倚看覓斟酌聽，無動靜，電腦繼續拍，無外久又閣「phia̍k」一聲，詳細閣巡一擺，無koh樣，tō按呢無插--伊。

Eng-àm問查某囝，冊櫥仔敢有覕niau鼠？「無！」平常時敢有發現其他怪聲？

「Ah！我知--a，是蟺蟲仔leh變怪！」有道理。

『見怪不怪，其怪自敗。』tō是教咱「不理異象。」

親身ê經驗：1999.9.22上午寫921集集大地動

【親身ê經驗】(1999.9.22上午寫921集集大地動)（白話字校對版廖淑鳳）

「啊！？啊！？哪會按呢？」睏夢中感覺眠床那leh gô，聽見牽手雄雄mo͘h倚--來喝出驚嚇ê聲音，警覺著...「啊！地動！地動！」ê恐怖。

「bôa-á緊，bôa-á緊！免緊張，免緊張！」緊張中家己心內嘛已經清醒--過來，m̄-nā是地動--niā-tiāⁿ，是大、非常大ê地動、從來都m̄-bat拄著--ê，思想kap目睭仝一時精神peh金，「tio̍h鎮靜，m̄-thang驚惶」，心內提醒家己，tī微微ê燈光中，影著眠床邊ê電腦桌仔，chhū來chhū去，越頭看眠床頭ê鬧鐘仔，時間是午夜1點50分。(1999.9.21零晨)

thèng-hāu牽手清醒知影是啥物代，隨時kah伊同齊離開眠床，一時間電火突然失去了光明，進入完全是烏烏暗暗ê世界，好佳哉，「張持無蝕本」，眠床頭不管時都有準備手電仔，無khà穿外衫褲，隨時sa起手電，嘛趕緊喝咻三樓頂ê如芳(第三查某囝)趕緊落樓跤，chit時才聽見有phi-phi-phia̍t-phia̍t ê窗仔門聲kap khin-khin khong-khong相pōng ê雜錯聲，警覺著確實是非常大非常大ê大地動，m̄是滾笑--ê，客廳ê中心點上安全，三人手牽手，chim-mi̍h交待一定m̄-thang驚，一定著鎮靜，家己心神嘛著掠hō͘在，等tiàm厝內，抑是疏開外口？無電，頭前門是電動門，用手giú是無hiah-ni̍h緊開，著ùi後壁門，隨時吩咐行到灶跤，又閣一chūn搖搖hiáⁿ-hiáⁿ，bē使衝碰（chhong-pōng），按呢，離開一定危險，小sìm--一下，幾秒間後，拍開後門，一爿斟酌地動ê狀況，一爿注意頭前ê路，死--à！kap厝邊石先生ê隔間鐵門煞拍bē開，後紐kit-tiâu--leh，緊張萬分，若閣搖--khit來beh按怎？趕緊閣入來厝內，攑摃槌仔，用敲--ê，吩咐in tiàm 內面，摃槌仔攑--leh，趕緊到門邊，輕輕仔兩三下，好佳哉有效，「khah緊--出來」，死--à，石先生in ê後尾門出口，仝款kit-tiâu--leh，閣敲兩三下，有效，感謝神佛保佑，家己ê鎮靜，離開可能有危險ê厝內，來到厝邊ê hit片空地，緊張氣氛小可放落，注神一看，空地已經集聚一大陣ê厝邊隔壁，逐家ê驚惶攏寫tī喙裡kap 無話無句ê恬靜中，驚惶、驚嚇、刺激、恐怖、無奈、無助...遮ê恐怖電影才有ê災難鏡頭，已經深深印tī一生ê記持內，永遠bē消失。

長ló-ló ê暗暝！

離開厝內，來到外面，緊張恐怖ê心，已經tiâu-chāi記持，kek-tī胸坎，無悲傷無笑容，『凝聚』『停住』，時間忽然變慢，攑頭看天，滿天星，gia̍p-gia̍p爍，m̄知影外久m̄-bat看見，怨嘆哪會chit時出現，阮都無心情欣賞，阮chit-chūn上蓋tì重--ê是土地ê受氣，m̄知tī時天公伯--à才會心平氣和mài受氣，歡歡喜喜。

地牛猶leh繼續翻身，地leh搖，人ê心就tòa-leh chhoah，三不五時就hō͘你心肝íⁿ-á tiuh三下，一分鐘！五分鐘！十分鐘，giōng-beh無時間ê記持，想動就動，beh chhoah就chhoah ，chhoah kah人ê心bē自在，chhoah kah hō͘人bē記得喘氣。

「又閣leh搖--ā！」

「ó͘？he啥物聲？li̍h-lia̍t叫？」

「khah緊雙手合十，趕緊唸阿彌陀佛，拜託佛祖著保庇！」tòa對面ê高先生看in hit棟四層樓tī地動中搖咧搖咧，緊張中khah緊交待伊ê後生新婦孫仔tàu求佛祖保佑。

「哪會按呢？哪會按呢？食chiah大漢就m̄-bat拄著，有夠恐怖to-tio̍h！」林先生家己ngāu-ngāu唸，是leh講hō͘逐家聽。

「o͘-bah-sáng ！你bat tn̄g著--無？」

「m̄-bat--à，會記得細漢阮老爸bat kā我講--過，唉！bē記得啥物所在--ā，hit擺可能真大ē...」

阿婆--ā已經八十幾歲。

「啊！恁看，東北爿遐哪有火光？」

「m̄知佗位leh火燒？」

「敢會是hit間加油站？」

「m̄是，無可能，he離咱遮真遠--leh，上無嘛tī八卦山脈hit爿？」

雖然有人ê聲說，不過肅靜稀微，無半點燈光，kan-nā有天頂ê星光，tī恬靜、時間停睏中，鼓吹家己提出勇氣，第一遍進入充滿危機ê厝內，天氣涼冷，無hiahⁿ幾領衫褲禦寒bē使--chit，猶有止渴ê茶水...心意掠定，小心衝入，sa衫褲，kōaⁿ水，順紲巡Gas，趕緊提一粒收音機，馬上離開...

拍開收音機，「tú-chiah ê大地動，發生tī日月潭東爿11 Km集集ê所在，7.3級...」

笑詼兩扦

笑詼兩扦：

1、檸檬冰水：
一陣囡仔耍kah汗流sám滴足喙乾，看著一間冰店，tō講咱來去食檸檬冰水，一个囡仔橐袋仔袋磅子無錢thang開，tō講：「boeh食恁去食，he檸檬sng-giuh-giuh，冰水冷ki-ki，有啥乜好食！」
無才調m̄講，怪東怪西，烏白牽拖。
2、貓仔kah白鴒鷥：
一隻貓仔hèng chhńg魚仔骨，無細膩去hō͘魚刺哽tī嚨喉，疼kah boeh死，趕緊去揣白鴒鷥：「拜托kā我嚨喉ê魚刺ngiáu--出來，我掠10尾魚kā你會多謝！」
白鴒鷥叫貓仔喙peh開，輕輕鬆鬆tō kā魚刺咬--出來。貓仔輕鬆kah，趕緊kā白鴒鷥說多謝，斡--leh tō-boeh離開。
白鴒鷥：你m̄是講boeh掠10尾魚仔hō͘我？
貓仔講：我驚水，ná有hit-lō才調掠魚仔？
幫贊人是好代。看清事實，chiah-bē hō͘人piah-sòng-phàn，hō͘人笑你戇大呆。

Mài chhâ： Lahjih笑詼

Mài chhâ：      Lahjih笑詼

遊覽車來到雪山磅空口，去hō͘戴帽仔閘--落來，導遊姑娘反應閣真緊，緊sa一罐涼--è tu-hō͘戴帽仔。

戴帽仔：siáⁿ-mih ì-sù？

姑娘仔：mái chhâ--lah！

戴帽仔：mài chhâ？

姑娘仔：hèⁿ--lah hèⁿ--lah！chhiáⁿlí mái chhâ--lah！

戴帽仔：mài chhâ？lí kóng mái chhâ góa tō mài chhâ--hio͘h？

姑娘仔：hèⁿ--lah hèⁿ--lah！

戴帽仔：chhâ！chi̍t-ê chi̍t-ê chhâ⋯⋯⋯⋯lóng-chóng ū hâ an-choân-tòa，thong-kòe！

姑娘仔：kám-siā！sin-khó͘，chhiáⁿlimchi̍t-koàn liâng--ê『mái# chhâ』。

麥茶：    Lahjih笑詼

遊覽車來到雪山磅空口，去hō͘戴帽仔閘--落來，導遊姑娘反應閣真緊，緊sa一罐涼--è tu-hō͘戴帽仔。

戴帽仔：啥乜意思？

姑娘仔：mái chhâ--lah！

戴帽仔：mài chhâ？

姑娘仔：hèⁿ--lah hèⁿ--lah！請你mái chhâ--lah！

戴帽仔：mài chhâ？你講mái chhâ我tō mài chhâ？

姑娘仔：hèⁿ--lah hèⁿ--lah！

戴帽仔：chhâ！一个一个查⋯⋯⋯⋯攏總有縖安全帶，通過！

姑娘仔：感謝辛苦，請lim一罐涼ê『麥茶』。