2016年6月26日 星期日

看相片回想人生_1969/2→1969/6_婚後四kó͘月(三):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1969/2→1969/6_婚後四kó͘月(三):
▲台北基隆tshit-thô,算是新婚旅行:
做兵交陪好朋友高金生,意愛著查某孫仔蕭素珍,專工請假參加我ê婚禮,koh邀請阮翁某去in雞籠(Ke-lâng/Kue-lâng)(基隆)tshit-thô,「ke人加福氣」Ke-lâng tshit-thô有意義。
按怎坐車去台北,去木柵(ba̍k-sa),去Ke-lâng(基隆),已經bē記得了了,kan-na ē記得有去台灣大學se̍h-se̍h--leh,koh去木柵仙公廟hui-hui--leh,了後tsiah去基隆tuà暝,天光日高金生kap伊阿爸tshuā阮去野柳看光景。
△Tsia是台灣大學,懸koh大箍大王椰子樹比中師校園閣較濟,看著1大摸1大摸ê杜鵑花,開到紅花柳綠十花五色,有夠súi,頭一擺看--著,hō͘人足欣羡大學生ê幸福。


























△仝所在仝位置,ná m̄雙人翕做伙?都已經講bueh「誠懇做伙」敢猶原hiah-nī pì-sù?m̄是--lah,揣無人幫阮翕相,ná有法度。


























△來到仙公廟,翁kā某翕相。

來到仙公廟,某kā翁翕相。

△Tsit軀女裝真正獨一無二,特別hit領外套,是西裝師傅本尊家己裁剪家己車thīⁿ,一手包辦完成,

△仙公廟前。

△總算拜托有人kā阮翕做伙。

▲野柳tshit-thô:
做兵時to̍h bat kap高金生到野柳tshit-thô,tsit-pái算是第二擺,高金生伊阿爸手捾1台カメラ翕相機,一直kā阮翕相。
△海風透透,落淡薄仔雨,仝款好耍好tshit-thô。


△義士林添禎先生徛像前。

























△海湧kap美女。


△奇岩怪石。

























△sio-mua--o͘!有khuàiⁿ--bò͘?

欣賞女王頭。




△你翕我,我mā-bueh翕你。我ê翕相機是kā翕像館稅--è。ē使得裝1蜷翕36張相片,底片安裝技術有撇步,ē使得加翕1張。

△牽手牽手,ná行ná牽手,糖甘蜜甜,he新郎ná行ná pok薰,tī tsín時代是無及格歹模範。

△bô-tshái背景tsiah-nī súi,ná-ē tshap 兩个tsiah大身ê遊客,mā是無及格ê作品。


△翕thán-khi身,影像khah-ē講話,若閣有手勢,更加Romantic浪漫。


△牽--e歡喜kah,你suah顧leh suh(薰)。

△翕相師傅現身,おじさん高--先生。

△Tsit張有標準,手牽手tàu-tīn行。倒手gia̍p絲仔薰,làu-khùi。


△海波浪1湧1湧ê奇景,是阮內地人罕得看著--è,有夠內山sông。

2016年6月24日 星期五

種嘴齒先補骨:

種嘴齒先補骨:
10外年前,頂牙槽倒爿hit齒狗齒lak--去,因為邊--a hit齒第二門齒siu過細齒,齒科醫生kan-na借用隔壁hit齒第一小臼齒做抱齒(phō-khí)堪得年久月深咬、哺、嚙、磨ê力頭損斷,hit齒抱齒出現搖櫓,愈來愈嚴重,檢查結果,醫生講齒根已經敗壞需要挽掉,有影tō-tio̍h,齒根敗壞kah挽嘴齒感覺疼,ngeh-á ngeh--leh,一下手to̍h挽掉,tsiâ簡單。
Kohkah醫生參詳評估,bueh鑲喙齒抑是bueh種喙齒?想講5冬前種過一齒,感覺bē-bái,真好哺koh真勇,to̍h決定kō͘--è
--起來hit齒小臼齒牙槽岸,經過3-4 kó͘月復原kap追蹤檢查,約定今仔日bueh種喙齒,一擺種兩齒,第二門齒kap狗齒(犬齒)
早晡8點半報到,護士詳細磅血壓,磅表顯示147/90,確實有較懸,醫生講我有高血壓,交代tio̍h注意,我講並無感覺,醫生講高血壓有人感覺bē--出來,147算是輕度高血壓,斟酌sè-jī無蝕本。護士繼續磅血壓,量bueh 5-6遍,等到穩定出現145左右,醫生koh問我有糖尿病--bò͘?「無」,護士to̍h開始我消毒喙腔(tshùi-khang)kap喙唇喙䫌,了後醫生講bueh kā我牙槽注麻射,需要注2支,ē-tàng維持2-3點鐘,若有需要tsiah-koh追加。射針應該真幼細頭毛,按怎tu̍h--落去 並無感覺,紲落去牙槽喙䫌鼻頭開始有麻麻感覺,護士tshuāpeh上二樓「無菌手術房」進行開刀補骨。
tiàm手術台,護士閣再一擺我磅血壓kap量心臟脈搏(me̍h-phok),儀器按時自動測量(tshik-niû),磅表隨時顯示數字,醫生護士一再交代m̄-thang講話振動,進行手術中若有無爽快感覺真疼,to̍h用攑跤做信號,頭、手千萬mài振動,時間11leh行,心思盡量綴時間變換,盡量冷靜、tiām-tiām、放hō͘自然靜坐放空tshun呼吸、睏眠無眠夢。醫生、護士kap我做伙等,等bueh半點鐘,等到血壓穩定la̍k落來145、脈搏tī 80以下,醫生講tsit-mái開始進行,講bueh用布khàm我面部,避免光線tsha̍k目睭,kan-na留喙腔to̍h好,koh頭殼小可偏向正爿較好處理。
Tsiū手術台一切聽醫生護士吩咐,做一下乖乖聽話ê好患者,好佳哉921大地動進前bat10工坐禪(tsē-siân)ê經驗,得著淡薄仔定力,to̍h按呢peh開喙腔出在醫生kho̍ktsǹguikhattu̍hkhaugia̍p,有時koh-ē吸喙內nuā水,目睭蓋密無khuài,規氣kheh-kheh注心喙腔動靜kap醫生護士對話交代,家私頭仔喙腔一直、一直kueh,有時像刮著骨,khia̍t-khia̍t叫,有時喙䫌giú-ân-ân感覺tsiâ無爽快,總--敢出聲,連醫生問講「ē疼未?」仝款tiām-tiām m̄出聲。知經過外久,突然恬靜--落來,幾分鐘後,講bueh hē骨粉kap包再生膜,猶原注心覺知,像穿針縛線ê款,應該tit-bueh完成補骨手術,siá知又閣等足久足久,總算ē-tàng kā蓋布提掉,恢復光明,醫生交代著勻勻仔peh--起來,因為已經倒傷久。
M̄-nā倒傷久,koh保持仝款姿勢無翻身,我問醫生手術外久?「喙peh開開始動家私到完成,足足點半鐘。」8點半到tsit-tsūn11點半已經是3點鐘。
醫生講:pún-tsiâbueh kā補骨粉kap種嘴齒一擺完成,因為你ê牙槽過去牙周病siu嚴重,猶是先補骨粉hō͘牙槽岸較勇--leh tsiah來種嘴齒較妥當,3-4 kó͘月後tio̍h-koh開刀一擺,有較歹勢,明仔載tio̍h-koh來檢查,大約一禮拜後放線。醫生護士特別交代幾若擺,處方藥片著按時食,食飯食物件後著洗喙含消毒藥水,千萬m̄-thang礙著傷喙,喙䫌若腫to̍h用冰角ù
醫生交代tio̍h-ài聽,感謝巫醫師,我是乖乖老歲仔人,一日4擺,食飯後睏眠前一定ē記得食藥。

今仔日天光起來洗蕩,差一點仔認得家己,鏡內hit个老人敢是我本尊,一个喙䫌ná-ē像豬頭面。

2016年6月17日 星期五

慎終追遠 家己編家譜:

慎終追遠 家譜家己編:
▲60幾歲醫界知識份子,竟然m̄知家己阿祖名字,實在gông-ngia̍h[錯愕]。
Gông-ngia̍h原因是伊阿爸、阿公、阿祖閣是地方名望世家。
講--起來「莫怪」,無一定是這位宗親疏忽,是口耳相傳ê tōng-tu̍t,古早人有「名」閣有「字」,名是按字輩號名,寫tī族譜寫tī公媽牌,字是戶口名,記載tī官方資料,有人 名、字相仝,有人 名、字分開,族譜記載是字輩名,平常時稱呼ê字to̍h是戶口名,父公囝孫若是口耳無閣相傳,恐驚to̍h-ē像我這个宗親按呢,kā阿祖ê正名(字)放bē記。
這个宗親ê阿公阿祖tsiâⁿ出名,做過保正做過街長,是日本時代ê仕紳,阿公蕭敦仁是田中鎮農會創辦人,伊ê名、字相仝,阿祖字輩名號做蕭昌薰,《書山蕭氏族譜》有記載,官方資料記載是蕭紹賡,bat問崁頂庄老一沿族親,已經無人bat,是阮tau留落來一份〈1899年蕭朝宰公復興大租均分䦰書〉,內面記載有族長人 蕭紹賡名字,koh-tī網路揣著蕭敦仁資料有記載老爸名是蕭紹賡,原來蕭敦仁ê老爸蕭昌薰to̍h是蕭紹賡,原來斯當時kā阮祖先〈1899年蕭朝宰公復興大租均分䦰書〉做證ê族長人 蕭紹賡to̍h是蕭敦仁ê老爸蕭昌薰。
▲敬神如神在,拜公媽mā著知影祖先號做啥乜名,阮tau慣勢tī祖先做忌kap清明掛紙時,長輩ē簡單講家世歷史,總--是khah講mā是含含糊糊講bē ka-nn̂g。2010年開始思考編寫家譜ê重要性,若kā 1906年到此當今ê戶籍謄本資料記錄落來,閣補添家族共同記智,按呢上少ē-tàng記錄100冬5、6代ê真實家族歷史,文字為憑to̍h-bē造成誤tâⁿ。
紲落去交代各房家族,tsah身份證私印去戶政單位申請1906年到此當今ê戶籍謄本,講明bueh編寫家譜路用,需要手寫本大簿資料。
原來阿祖正養公ê戶口名叫蕭文生,我kap姪仔輩ná像發現新大陸hiah-nī歡喜,原來戶口謄本kā祖先出生結婚往生年月日,徛起住所,祖媽後頭厝⋯資料記載足詳細正確。
好佳哉早有學電腦,開4年時間校對編輯,總--是kā《崁頂蕭姓肇基祖朝宰公世系大房廷光公派下家譜》印--出來,編kah一本tőng大本208頁,一口灶送1本,hō͘逐家ē-tàng時常閱覽看詳細,阿公教孫,老爸教囝,1代1代傳承--落去,這tsiah是慎終追遠,數念祖先上有路用ê功德。
▲〈1899年蕭朝宰公復興大租均分䦰書〉代筆人蕭典章是我叔伯伯公,蕭慶麟是我阿公 大趾公ê戶口名,族長人蕭紹賡是蕭敦仁老爸 昌薰公ê戶口名。
























▲《崁頂蕭姓肇基祖朝宰公世系大房廷光公派下家譜》封面。

























《崁頂蕭姓肇基祖朝宰公世系大房廷光公派下家譜》封底。
























▲第五代祖(正)蕭正養公、字文生/媽許氏不:(標楷粗體)標示者為直系血親
《崁頂蕭姓肇基祖朝宰公世系大房廷光公派下家譜》以公媽廳公媽牌肇基祖蕭朝宰公為第一代,第五代祖 正養公是「正」字輩,戶口名蕭文生/媽許氏不。
因為年代遙遠,戶籍謄本kan-na記載:1878年(光緒4年/明治11年)9月23日往生。
阮尊稱阿祖正養公為「老祖」,老祖忌日按照戶籍謄本記載9月23日當做農民曆9月23 hit工祭拜做忌。
查Google:公元1878年9月23日是春分星期一,太陰曆是八月二十七日。






2016年6月15日 星期三

看相片回想人生_1969/2→1969/6_婚後四kó͘月(二):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1969/2→1969/6_婚後四kó͘月(二):
▲阿里山tshit-thô:
初五隔開,阿兄阿嫂tio̍h-koh轉去阿里山做穡,招阮翁某做伙去tshit-thô渡假,mā會用得講是渡蜜月。
阮坐阿里山鐵路上山,阿里山線鐵路、阿里山對我來講並無生份,ùi嘉義(Ka-gī);北門(pak-mn̂g);彎橋(oan-kiô);鹿麻產(Lo̍k-moâ-sán/竹崎鄉鹿滿);竹崎(Tek-kiā/竹頭崎Tek-thâu-kiā);木屐寮(Ba̍k-kia̍h-liâu);樟腦寮(Chiuⁿ-nó͘-liâu/Chiuⁿ-ló-liâu);獨立山(To̍k-li̍p-soaⁿ);梨園寮(Lê-hn̂g-liâu);交力坪(Ka-le̍k-pêⁿ/Kau-le̍k-pêⁿ);水社寮(Chuí-siā-liâu/水車寮Chuí-chhia-liâu);畚箕湖(Pùn-ki-ô);多林(To-lô-ian/To-lîm/To-nâ);十字路(Si̍p-jī-lō͘);屏遮那(Hē-sian-á/Hè-sen-ná);第一分道(Tē-it-pun-tō);第二分道(Tē-jī-pun-tō);二萬坪(Jī-bān-pêⁿ);神木(第三分道);第四分道(Tē-sì-pun-tō/新站);到阿里山站。
車內ná看光景ná kā牽--e做紹介,牽--e問講「你對阿里山ná-ē tsiah-nī熟?」
因為1956萬達風颱hit年頭擺kah大兄去楠仔仙溪tshit-thô 3禮拜,1959八七水災hit年閣來tuà bueh半冬,tshit-thô兼做集材機器工仔,師範畢業旅行mā來阿里山隔1暝,後--來做兵mā bat tī水車寮、To-lô-ian tshit-thô--過,lóng是阿兄疼惜tshuā來tshit-thô--ē,這阿里山線竹崎鹿麻產到阿里山、東埔、楠仔仙溪lóng bat綴阿兄行踏⋯
「うめこ!你斟酌看山跤,liâm-mi to̍h-ē看著thâu-tú-á hit站樟腦寮tī下爿⋯」大兄tsiâⁿ歡喜kā阮說明,講火車khong圓箍仔peh上獨立山ê故事。
來到畚箕湖食便當べんとう閣起行,來到To-lô-ian站,我指路邊hit間枋仔厝「做兵時tī tsia tuà 3暝」。
Tsit-pái來阿里山是tuà-tī火車機關庫koh入--去眠月線二號橋附近ê工寮,大兄in ê集材工地tī閣較入--去ê所在。木材柴枋起ê工寮,雖罔m̄是kài四是,總--是灶跤、ふろ間(浴室)攏有,只是暝時點蠟燭有較暗,過年ta̋ⁿ過,暗時有較涼冷,12斤棉績被有夠厚,閣加一个伴依倚有影加真燒絡。
攏總tuà 4-5工,阿兄阿嫂陪伴阮四界tshit-thô四界踅,拜訪熟似親情朋友,阿里山車頭kap阿里山人ê徛家,起起落落ê巷路仔、枋仔厝、杉仔瓦、日本宿舍式ê客廳、ふろ浴桶、鐵桶火爐,行2-3樓深鐵路柴橋,姊妹池、樹靈塔、賓館、郵局、3000年神木,mā透早行路去祝山看出日,博物館欣賞野生動物鳥類標本、香林國校、帝爺公廟,koh去集材現場看人鉤柴,行kah跤酸踅kah真透,我是復習記智,牽--e是一切lóng是稀奇頭一擺ê經驗。
 △進前來ê阿里山站是木造,tsit擺來已經西洋造型,猶是懷念柴造記智。車頭對面是生理店面,供給在地人日常用品食物。





















△Tsia是賓館,提供遊客tuà暝。hit-tsūn猶無阿里山公路,上山著坐火車,遊客無濟。



△28歲少年家,海結仔頭、破爿、毛跤剃kuân-kuân、tsáⁿ鬢蓑,ワイシャツ[白襯衫]結ネクタイ[領帶],穿風衣,算是phiau-phiat流行穿插。


△落雺煙雨仔著攑雨傘,大嫂āiⁿ小專陪阮四界踅,順紲講一寡Lah-jih細漢ê故事。
△雺霧中ê姊妹潭,古早號做姊妹池,有大細兩窟,國校運動埕hiah大,水tīⁿ ê時陣,涼亭、樹木、乾柴箍ê水影真súi ná仙境。

△雺霧中ê美女。
△乏水(ha̍t-tsúi)期,水無濟,人影水影仝款美麗。
△香林國校、受鎮宮帝爺公廟到神木ê吊橋,後壁戴笠仔mua雨幔是大兄、四兄。

△徛tī 3000年神木邊,人tsiâⁿ卑微。

△Tsia是神木站:嘉義北門出發時,火車母tī頭前拖,來到竹崎開始peh崎,火車母(機關車)換來後壁sak,一直到第一分道(Tē-it-pun-tō)火車開始倒吞,換用拖--e,到第二分道閣倒吞,經由二萬坪來到神木(第三分道)閣倒吞,然後到第四分道到阿里山站。to̍h是有名「Z」字型ê鐵路,連帶看著「阿里山火車碰壁」ê奇景。火車母有時tī頭前拖,有時tī後壁sak,車內ê人看kah gín-gōng gín-gōng,m̄知發生啥乜代誌。


△火車peh崎phe̍ⁿh-phe̍ⁿh喘,食水真siong,路邊四角型紅毛土水桶,提供添水路用。對面to̍h是分道,ùi山跤來ê火車經過分道切換,tsiah-koh倒吞,to̍h-ē peh上山頂。
△斯當時ê神木,需要18个大人手牽手tsiah圍ē倚。

△雺霧中ê神木已經無尾溜,he是1956年雷公脆雷ê遺憾。

△三代木。

△參觀高山ph博物館。

△在地野生動物標本。
△暗時火爐邊烘火,蠟燭光線烏白底片。彼陣猶無彩色底片。

△眠月線鐵枝路二號橋,木材疊搭,約有2-3樓深,彎一个月眉弧度,斬木頂有舖枋仔,看落塗跤烏lang-lang,無膽ê人m̄敢行。

△Tsia是姊妹池到帝爺廟山路,4-5歲內山囡仔扭掠tuè-leh行。

△姊妹池頂山樹頭孔,ē-tàng覕雨。

△姪仔蕭瑞恭,家己行無喝跤酸。

△Tsia to̍h是鉤柴現場,無天然はしら集材柱,kō͘幾若支木材縛做伙做はしら,tsiah-koh用uai-á索固定。

△兩个古錐ê囡仔,內山tuà慣勢,粉紅喙䫌ná像抹紅仔粉,阿里山ê姑娘阿里山ê少年m̄是in,in是綴平地人爸母來tsia做工趁食ê細囝。