2015年10月29日 星期四

看相片回想人生_1959/8→1962/7中師 蕭平治(十一):

看相片回想人生_1959/8→1962/7中師 蕭平治(十一):
▲趣味音樂,無行音樂路,趣味畫圖,mā 無做畫家,敢是家己無phah拚,抑是運途天註定?讀中師tn̄g-tio̍h 2位教畫圖ê好老師,一位教西畫ê林之助老師,一位教毛筆畫ê呂佛庭老師,學著bē少畫圖ê知識技巧,總--是無繼續學習,仝款是半lâm-hâ半途而廢。
林之助老師教西畫,東洋畫是伊專長。上伊ê課kài趣味輕鬆閣有內涵,得著真濟畫圖知識、理論。老師攏是ná講ná畫ná畫ná講,講煞畫完,hō͘阮即時了解老師leh講啥。
伊講人ê標準體格是八頭身,to̍h提白墨tī烏枋畫一條直線閣平分八份,先畫一粒頭殼佔1份,看起來ná竹篙ná lò跤鬼,八頭身ná有可能是phiau-phiat體格?心內當leh憢疑,老師繼續ná講ná畫,講煞畫完,全班忽然一聲「ua̋!」讚嘆老師厲害,莫怪西洋人體格tsiah-nī phiau-phiat英俊!
有一工,拜一tī大禮堂聽完教授演講,下晡第一節課,老師入門,白墨攑--leh,畫1粒頭殼,簡單喙目鼻,閣再喙下斗點幾若點,無夠10秒間,學生同齊喝聲「侯潘,侯潘教授!」驚奇佩服寫tī面,原來是下早演講hit位侯潘教授
有1節老師kā阮講,伊bueh參加比賽,叫先生娘做Model[模特兒]hō͘伊畫〈妝〉,kan-nā為著bueh畫全裸抑是半裸,to̍h畫了閣再畫,hú掉重畫,hú掉閣重畫,最後為著尊重女性,tsiah褪光三分之一,講kah足笑詼。
老師講bat去台中市ê一間美國學校教幼稚園囡仔畫圖,tsit聲慘--à,美國話bē-hiáu講,囡仔閣tsiah-nī幼茈,bueh按怎教?結果hit工伊準備一盒蠟筆kap畫圖紙,to̍h-tī烏枋頂畫hō͘囡仔看,家己tsho̍p-tsho̍p唸,畫直線、畫橫線、koh畫斜線,用紅色用烏色,閣tshap青色、黃色、綠色逐項色,畫了當然tsiâⁿ媠,囡仔看kah目睭大大蕊,紲--落來 烏枋頂ê圖紙收--起來,叫囡仔開始畫,自按呢完成1節畫kah真趣味ê美術課。
有一工,老師tsah 1本伊ê畫冊,內頁是kā紅、橙、黃、綠、藍、靛、紫七色分做足濟無仝ê色緻,閣kā內頁剪做頂下kue̍h,按呢面頂kue̍h ē-tàng kap 下跤kueh配色,變化做足濟足濟無仝ê配合,另外ná像有一塊鉸孔ê頂衫下褲ê範仔(pān-á),tha̍p落內頁hō͘你感覺按呢ê搭配是m̄是kah 你ê意。老師koh kā阮講,將來娶某,ē-tàng用tsit步搭配衫仔褲衫仔裙,省錢閣有變化。
講著蠟筆畫圖,老師紹介阮有一牌「色美兒」ê粉蠟筆真tsán,買來tiàm白布畫圖設計kah意ê圖案,做衫做ネクタイ/領帶。出業後,我有照老師ê交代,kā「色美兒」畫tiàm白布,tsiah-koh kā白紙khàm-tiàm白布頂,用熨斗熨,熨到bē褪色,提來做領帶,有影真siâⁿ人目。
呂佛庭老師kā阮水墨畫,1學期教畫花鳥,1學期教畫山水,我攏學kah真趣味,提著「甲」ê成績。老師是偉大畫家,修養足讚,後--來選修課無修伊ê山水畫實在真無彩。老師單身蹛學校宿舍,bat去伊ê房間,聽伊講伊ê畫開始進入抽象階段,kā宣紙坦橫舖tiàm桌頂,墨、筆準備好勢,開始靜坐(坐禪),心中無意無念,等到一个時間點,目睭小可peh金,大毛筆搵淡墨tiàm紙面隨意畫隨意撇,然後宣紙掠坦直,直覺山水、花鳥抑是人物,決意了後,攑小毛筆搵烏墨,隨意點隨意撇,隨時一幅抽象國畫完成。
老師早期為著畫圖,長江、長城四界行透透,為著「長江萬里圖」,伊隱遁4-kó͘月(觀音山?學校宿舍?)完成作品,「長江萬里圖」後--來tī台北展覽,有去參觀,非常壯觀。
△tsi̍t幅山水畫是看老師ê圖抄--e(臨摹),辛丑1961年ê習作,已經保存足足54年,是歷史,m̄是畫寶。










△tsi̍t粒ひのき/檜木柴瘤是四兄ùi阿里山楠仔仙溪提--轉來--è,翕一張相片kap hô一張白紙,拜托呂老師題字,已經保存54冬,是傳家至寶。




△呂佛庭老師題ê詩句:
Siū-tsheⁿ peh-pah huè, 
lîng-ku kúi-tshing-nî, 
hiông-tshiūⁿ lîng tì-uán, 
tsua̍t-gē khiáu-tua̍t-thian.




△工藝課,雕刻刀刻ê字「孝當竭力忠則盡命」:
讀師範學校,逐項lòng tio̍h--二步七à tsiah ē使得出業。先kā刺竹爿用砂布磨金滑,tsiah-koh用塗糊kah意ê花樣,然後kō͘火烘hō͘變色,然後單純刻字,陽刻,用雕刻刀刻佇刺竹爿,然後閣拭金油。已經保存55冬,是傳家至寶。




2015年10月27日 星期二

看相片回想人生_1959/8→1962/7中師 蕭平治(十):

看相片回想人生_1959/8→1962/7中師 蕭平治(十):
▲中師3年個人影像記智:
人生路途,ná行ná tshit-thô,雖罔bóng-tóng,乖囝心性,iáu-koh知影認真讀冊,卻是m̄知啥乜是前途,bē-hiáu拍算未來。
讀冊時代較趣味畫圖美術、唱歌音樂,而且有小可天份,上頇慢--ē是地理歷史,sian記都記bē牢。
△歡喜讀師範學校,頭1冬穿標準高中(師範)制服去寫真館翕tsit張相,因為經過師傅khioh--過,比較較緣投,m̄-koh siuⁿ過囡仔面。




△吳森田tuà日南(Ji̍t-lâm),潘溫茹tuà苑裡(Uán-lí),屬海線。蕭平治田中人,廖福祥西螺人,利用歇熱相招去海線日南苑裡tshit-thô,遊鐵砧山時翕tsit張tsiâⁿ有紀念性相片。




△師範3年校慶hit工,有人tsah一台雙眼相機,12張正四方形底片,何義清賴清吉(樂隊結ネクタイ/領帶)蕭平治吳森田tī校門翕tsit張相片。我穿彼領ジャンパ-/夾克是利用退回歇熱伙食費ê錢買--è,貴蔘蔘,價數ná像210箍,薄li-si--a,是 lóng質單重布料。為著愛媠虛華綴時行,雖罔無kā厝--裡提錢,猶是感覺siuⁿ討債,bē-hiáu想。

















△吳森田kap我較有緣,兩人結拜,我較佔大,森田khah gâu讀冊,較骨力求進步,繼續升學繼續深造,留學轉--來做教授做大學校長,我一直tī國校服務到退休。
△吳良德有leh學ギタ,kā伊借來裝一个款,翕tsit張相,假phiau-phiat。正爿hit棟是女生宿舍。




△讀彰化中學初中部時,bat聽人挨小提琴,to̍h真kah意hit个聲音,來到師範學校koh看人leh挨leh學,to̍h足欣羡。一直lún到3年級時,tshân-tshân提出勇氣寫批kā tī阿里山做工ê四兄討錢,買一支450箍ê バイオリン/小提琴,無錢拜師學藝,家己練習並請教同學,學兩kó͘外月,無疑悟hō͘教琴ê蘇中敏老師借去參加伊ê師生發表會。出業後,bat kap蘇老師學一擺,因為bē堪得學費負擔,m̄敢繼續,to̍h 按呢半lâm-hâ無koh學。
天生音感真tsán,耳孔真利,是絕對音感,學琴學無成半途而廢,實在bô-tshái,tse著愛怪家己欠缺刻苦耐勞耐性,驚食苦,bē堪得練了閣再練習ê寂寞時段,好玄無定著,注定失敗,無師自通欠缺苦學精神,to̍h算講有天賜才能,是無可能ē有啥乜成就--ē。架勢有範,可惜無內才。




△當時廖福祥學ピアノ/鋼琴學kah真勤真有成績,出業前兩人約束將來bueh開演奏會,tsit-mái想起來感覺真笑詼,bóng-tóng 戇tuh ê年代。
△Tsia是學校後尾門,入--去to̍h是灶跤,圓形hit支to̍h是大煙筒。tsit張相片是王之儀老師翕--è,古錐ê查某囡仔是老師ê查某囝,tī附小讀二年仔。附小試教to̍h是教in 彼班,kap我特別有緣,我mā時常去中海新村眷區老師兜tshit-thô,kap『小七』耍,真懷念ê記智。




△附小試教,沈有學、蕭平治、楊照男、陳靖雄,三个同學繼續phah拚真有成就,kan-nā蕭平治猶原是烏枋杙á固守本位。

△m̄知啥人計畫,招查某班學生鬥陣去日月潭tshit-thô交陪,有人交著女朋友,kan-nā我戇戇m̄知半項。李高章、吳良德、陳旺根、沈有學、蕭平治。tī毛王爺in-tau門跤口。
△太平國校試教2禮拜,kap楊照男tshuā五年級女生,行路『齊步走』行進。

2015年10月25日 星期日

看相片回想人生_1959/8→1962/7中師51紀念冊(九):

看相片回想人生_1959/8→1962/7中師51紀念冊(九):
▲普三乙班:
導師劉志孝老師,對阮是「無為而治」,有關心真少說教,教阮「國語」正音ê課,採用點名方式教學,ùi第一號開始,家己唸家己姓名,勻勻仔唸,一遍兩遍三遍,唸了閣再唸,唸到老師喝擋tsiah停止。tn̄g-tio̍h he捲舌ê ㄓㄔㄕㄖkap
ㄈㄩ,heh to̍h真hiau-hīng,咱台語無tsit款捲舌音kap含唇音kap雞母尻川型ê ,台灣囡仔講著捲舌音m̄是講bē-liàn-tńg to̍h是講著kâm-lān kâm-lān,he名姓發音有ㄓㄔㄕㄖkapㄈㄩ ê同學,講著是活bueh緊張--死,陳春男唸做tshn̂g tshun lân(床/春/蘭)、周照雄講做tso͘ tsáu siông(租/走/松),真正三講四m̄著,愈講愈咬舌,愈講愈ka-láu-lué,笑詼一大堆,笑聲規厝間,講到尾猶m̄是bē-liàn-tńg to̍h是bē-liàn-tńg。
老師行路小可uaiⁿh--leh uaiⁿh--leh,可能跤有問題,m̄-koh看伊kap王夏民老師拍乒乓,有夠厲害,王老師一直sàm一直殺,劉老師uaiⁿh--leh uaiⁿh--leh to̍h是有才調khioh倒轉去。
因為老師ê「無為而治」,阮班是仝學年siāng-kài活kioh有變竅ê一班,朱校長bat按呢kā阮o-ló。


普三乙班攏總47人,三年鬥陣,除了歇寒歇熱,攏是做伙讀冊,同睏同眠,同齊食飯,同齊洗身軀,16个睏仝間2頂總舖,nê仝領蠓罩,歇睏日相招tshit-thô se̍h街,畢業前koh坐仝台車環島1-liàn⋯真正是「褲帶、結相連」,親兄弟mā無阮tsiah-nī相好。
三年同窗,ná像m̄-bat發生無爽快ê代誌,總--是有ê較活跳,有ê較pì-sù,有ê較認真讀冊,有ê淡薄仔放放愛tshit-thô,年紀算Old man吳政雄上濟歲(1940),閣來周照雄kap蕭平治(1941),其他1942、1943、1944,雖罔年歲有精差,因為是同窗suah bē記得大細,叫名叫外號,姚政吉叫第一號,吳政雄是Old man,親切自然bē-khe-khó,阮是來自苗栗、台中、南投、彰化kap雲林,有Hō-ló、有Hakka(客家)、有外省kap僑生,誠懇做伙攏是一家伙。
△平平教室平平教材平平老師,1年2年3年經過,各人收成已經無仝,各有特色,出業前ê惜別再會,有人講10年後ē變化真濟,果然,10年後,有人做校長,有人猶原教師教冊,有人升學轉業做教授、做判官、做生理⋯真正變化真濟,只是同窗情猶原無變。10冬過了又閣10冬,到今已經超過50年,世事本成to̍h生住異滅多變化,如今同窗做仙已經7-8个,身體欠安mā是有,ē-tàng享受退休休閒過日ê同窗,著把握tshun--e ê青春,mài koh為著名利無閒sńg身體。

△出業前tī噴水池前kap校長主任導師合照。18-9歲當青春,看--起來tsiah-nī幼茈ê老師,敢真正擔當ē起?事實to̍h是事實,表現to̍h是hiah-nī優秀,無人hō͘學校看破跤手。



△宿舍寢室2頂總舖,1頂睏8人,公家1領蠓罩,棉績被一律8斤重,套白被單,眠床跤囥面桶齒觳仔、鞋、拖仔,pún-tsiâⁿ攏排kah真整齊,tit-bueh出業有較lám-nuā tshin-tshâi。



△倒爿是普三丙班導師章子鈞老師。
△正爿有阮班tī龍井國校服務時跳土風舞ê記智,看何義清、賴清吉kap媠老師牽手ê鏡頭,實在欣羡。
△學校暗會,kā女同學借衫打扮社會男女演出舞劇。
△吳良德彈ギタ-/gitaa/吉他表情。吳良德自出業到今m̄-bat參加同窗會,m̄-bat見面,非常思念。

2015年10月22日 星期四

看相片回想人生_1959/8→1962/7中師51紀念冊(八):

看相片回想人生_1959/8→1962/7中師51紀念冊(八):
▲圖書館落成:
台中師範學校校舍攏是日本時代建築,朱校長到任第三冬,起一間現代化圖書館kap噴水池,利用校慶時陣落成,閣舉辦運動會、展覽、班際唱歌比賽⋯,邀請真濟教育官員、國內外學者參觀,鬧熱滾滾。


 ▲校慶:閱兵分列式周至柔省主席閱兵訓話。
表演節目:
軍樂隊演奏閱兵分列式軍樂,分列式kap阿兵哥仝一樣,揹步銃『向右~看』,操兵練武真正有--兩步七á,女學生ê『踢正步』、弄銃花仝款得著真濟噗仔聲,閣有儀隊表演kap附小小朋友ê表演,增加真濟笑聲。
▲畢業典禮:
驪歌tsi̍t-ē唱,逐个目箍紅,3年鬥陣,完成學業,tit-bueh分發中部各縣市國民小學教冊,做烏枋杙á。


△齊唱「良師興國」,蕭平治kap丁班章同學擔當獨唱部份,閣再一擺展現 男高音ê功力。


▲惜別活動:
*老師kap阮圍桌,祝阮畢業做老師,「為人師表,邦國之光。」
*舉辦書畫、工藝展覽,展現成果。
*各班家己mā有惜別會,請教過阮ê老師參加,hō͘阮感謝表達敬意,同學互相pua̍h感情講再會。我ê感觸上深,因為TB休學tsiah kap逐家做堆,感謝逐家無棄嫌照顧真濟,hō͘我ē-tit平平順順無受歧視,歡歡喜喜行出校門,kap逐家仝款bueh做老師。

2015年10月20日 星期二

看相片回想人生_1959/8→1962/7中師51紀念冊(七):

看相片回想人生_1959/8→1962/7中師51紀念冊(七):
▲實習、觀摩、試教:

師者,所以傳道、授業、解惑也。所以老師m̄是演講者,老師m̄是王祿仔仙,老師m̄是主持,老師mā m̄是表演者。老師徛tī烏枋前教冊,愛ē-hiáu「引起動機」引起學生讀冊趣味,需要tī限定時間內教學生學習「主學習」「附學習」「副學習」。
老師vs學生是老師、學生互動關係,m̄是單行線ê說教,是有目標ê教kap學,m̄是老師→傳道、授業、解惑→學生
Bueh按怎kā三年來學著ê知識教hō͘學生瞭解,達著目標?進入教室徛tiàm講台,面對4-50,甚至5-60个 ê學生囡仔,無驚惶bē緊張,1步1步kā既定課程教hō͘學生理解,除了經驗無啥乜撇步,m̄-tsiah實習、觀摩、試教pìⁿ-tsiâⁿ非常重要。
△輔導老師葛道明to̍h是輔導阮實習、觀摩、試教ê老師:
1、Tshuā阮去有特色學校參觀教學、設備。
2、指導家己製作教具掛圖,mā幫忙學校製作教具掛圖
3、先佇家己班級輪流上台試教,互相評分改進。
4、語文,數理,史地室內教學,體育唱遊室外上課,lòng tio̍h經驗。
5、囡仔頭王m̄是tshìn-tshài封--e,囡仔緣若好,互動輕鬆,教學輕可,siuⁿ過嚴肅siuⁿ過好性地lóng m̄好,ē-tàng輕鬆教冊學生閣有規矩,tsiah是ài學ê功夫。
6、正式試教tī附小進行4禮拜,4个同學負責1班,著寫教案著寫報告,1人上台教冊,3人觀摩,級任老師輔導並評分,mā-tio̍h參加朝會、體操、隊伍行進,下課需要kap囡仔互動,放學後改簿仔改作業,無閒閣緊張。語文、算術、地理、歷史,音樂、畫圖、體育、勞作,算盤、毛筆、掃地、拭窗仔門⋯包班制需要萬能ê老師。
7、閣來外校(阮班tī太平國校)試教2禮拜,進前教低年級,tsit-mái換中年級抑是高年級,低年級學生古錐幼茈,高年級bat代誌有個性,老師ê角色需要轉換tsiah ē-tit順序完成任務。
8、文武雙全,徛台頂是老師,下課後是朋友。


▲環島旅行、教育參觀:
讀3年冊,中外史地lóng讀過,偏偏台灣在地歷史地理m̄知影,為乜緣故教科書內to̍h是真少真少紹介,為啥乜?斯當時ná像無人懷疑無人提起,台灣省只不過是中華民國1省,35分之1份量而已。原來台灣歷史是禁忌,雖罔李地怪有教寡在地自然地理,總--是感覺無tap無sap,好佳哉學校有安排18工ê環島旅行、教育參觀,tsiah ē-tàng補充台灣在地瞭解。
Tsit-tsuā旅行tī三年下學期進行,是阮siāng-kài歡喜ê大代誌,分做2批起程,1批tsiūⁿ北,1批落南,1班1台遊覽車,tuà、食tiàm各地頭ê師範學校,伙食費hō͘ in代辦,有ê學校佈置禮堂hō͘阮歇暗,有ê學校宿舍niū阮睏,總--是互相互動,in來中師阮mā仝款案內あんない,方便閣節省銀兩。環島18工旅行轉--來,個個金光tshiâng-tshiâng-kún,充滿信心,ē-tàng應付學生「任問不倒」。
18工環島1-liàn,算bē了ê第一擺,看--著è、食--著è、聽--著è,真正是大開眼界,ùi甕底跳出甕外ê世界,tsiah-nī闊tsiah-nī心適,阿里山進前去過1擺,算是重遊ē使得做導遊,閣過台南、高雄、屏東,頭擺看著闊莽莽大海ê歡喜,大聲huah-hiu驚著隨車遊覽小姐,暗中笑阮是內山sông;鵝鑾鼻、燈塔、海螺仔殼,南迴公路彎彎斡斡搖--leh 搖--leh帶動歌聲笑聲歸路無停睏;後山景色原來是tsiah-nī-á súi閣靜,kap聽講過後山ê悲情差真濟;蘇花公路ê驚險,hō͘人跤尾起畏寒,探頭看出窗我,夭壽--ò͘,有看著海無看著塗跤,規身軀真正起雞母皮;轉來到台北都市,tuà台北師範,暗時綴人出來se̍h街,kan-nā看著十花五色夜都市,霓紅燈(gê-âng-ting)gia̍p-gia̍p-si̍h,驚行m̄著路m̄敢行傷遠,tshun--e suah一點仔記智都無⋯⋯。

▲教育參觀:

▲教育參觀:


2015年10月7日 星期三

看相片回想人生_1959/8→1962/7中師51紀念冊(六):

看相片回想人生_1959/8→1962/7中師51紀念冊(六):
▲學習:較早國校老師是包班制,逐科lòng tio̍h家己教,m̄-nā課本有--ē愛ē-hiáu,課本無--è mā著學,學生囡仔若問tsiah-bē làu-khùi,師範三年訓練hō͘你逐項攏有--兩步七à,tsiah ē-tàng為人師表『傳道、授業、解惑』。
*芭蕾舞:查某學生較趣味學,若是查埔學生kan-nā學土風舞。
*耍水:耍水是leh耍tshit-thô,總--是有經驗m̄-tsiah 會知耍水是有偌心適。
*圖書館閱覽室:圖書館借冊,增加課外知識,充實家己。
*感情世界:17-8歲當青春,雖罔猶未想著「bueh嫁」,總--是互相答嘴鼓phò-tāu心內話也是tsiâⁿ趣味。
*寫生:有人hìng畫圖,歇睏日歇睏時間,圖紙畫筆色料拴好勢,面向「西畫」,邊a同學讚嘆欣賞。
網球隊:有人趣味球類運動,籃球、跤球、排球較有人參加,網球需要家己準備球桮,斯當時網球隊是拍軟式網球,猶m̄-bat啥乜是tīng式網球(硬式)。

*行棋:圍棋、象棋、軍棋,需要kik頭腦。
*散步比較較休閒。
*閒閒m̄是leh掠蝨母,是leh tshuah白頭毛。
*頭毛傷長,學校有理髮廳,學校規定剃光頭,連3分5分頭都bē使得,3年下學期tsiah ē使得留頭毛。
▲升旗典禮:1禮拜上課5工半,逐早起食飯後(?)著集合運動埕舉辦升旗典禮,唱國歌、升國旗,每班有班長,每學年有區隊長,全校有大隊長,班長著kā區隊長報告出席人數,區隊長著kā大隊長報告人數,然後大隊長tsiah kā教官報告總人數,完畢了後tsiah開始升旗典禮。
▲體操:升旗典禮做體操,若是拜一直接入去禮堂聽演講。
園藝教學:工藝老師tshuā學生花園看花教園藝。
▲家己剃頭:淡薄仔作孽,桌巾圍--leh縛tiàm柱仔,攑鉸刀kā同學鉸頭毛,用掃帚筅頭毛幼仔。
店仔撐:學校有福利社,賣一寡生活用品,有一寡學生tiāⁿ-tiāⁿ去做店仔撐(tiàm-á-thèⁿ)kap內面girl查某囝仔開講phò-tāu。
▲寢室phò-tāu:有時仝寢室室友ē tiàm眠床頂hap-sian、話仙。