太白薯 粉薯 藕薯： Lahjih

 太白薯 粉薯 藕薯：    Lahjih（蕭平治）20220118

Sa̍h thài-pe̍h-chî hún-chî lâi chia̍h, khiū-khiū ná chut-bí hoan-be̍h, thâu kàu tiong koe̍h ū si, ē kiap chhùi-khí phāng, bóe chat siāng hó-chia̍h.

太白粉ê原料，原來是用太白薯ê澱粉製造，太白薯有人講粉薯有人講藕薯。因為太白薯價數貴，算bē-hô，所以現此時市場ê太白粉是potato馬鈴薯、樹薯澱粉製造。

囡仔時代，阿伯田岸種一模，每擺收成lóng-ē提幾若條hō͘我pû來食thit-thô，阮lóng講做片藥粉，原來是kā片栗粉講走音去，google了後chiah知是日語，而且日語片栗kah台語太白薯是無kāng款植物，太白薯to̍h是華語葛鬱金。

煮料理牽羹用ê粉，to̍h是太白粉。

註：thài-pe̍h-chî （太白薯）hún-chî（ 粉薯）ngāu-chî（ 藕薯）tiān-hún（ 澱粉）thài-pe̍h-hún（太白粉）má-lêng-chî（馬鈴薯）chhiū-chî（樹薯）phiàn-lek-hún（片栗粉）

數學比賽第一名：

 數學比賽第一名：        20220113        Lahjih（蕭平治）

Sutongsî bēhiáu tián，食老chiah chhiau出來展寶，無tián ·chi̍t·ē實在lún bētiâu。

想起國民學校時代，厝nih散赤無boeh升學hông編入牛仔班放牛食草，致使六年級出業成績6科無夠300分，hókachài hō͘人招去讀補習班（學校特設無學籍），惡補10 kó͘月，chiah ētàng考tiâu彰化中學初中部，第一學期學校kā阮數學測驗比賽，竟然得著初一第一名。

Kā阮惡補鄭老師無暝無日thui 10 kó͘月，伊ê圖解算術教學實在gâu教，m̄koh為著升學率，伊ē 用灌鴨仔式叫阮ngē記ngē背撇步祕訣。10 kó͘月ê無暝無日，Lahjih m̄bat歇睏，無論透風落雨、北風冷ki-ki、暗路àmbînbong，to̍hsī認真戇戇仔讀。Tú開始，算術lóng bēhiáu，同學借我chhau騙老師，不得不做開天地m̄bat做ê見笑tāi，大約一月日chiah katī piàⁿ katī，piàⁿ到第二學期已經是全班第一名。

彰化中學數學測驗比賽，得著初一第一名，katī了解he是惡補ê致蔭，升初二初三了後，致蔭pìⁿchiâⁿ灌鴨式負面效果，成績親像chhū liu梯，hókachài iáu考tiâu師範學校。

師範出業做老師，學校交仗教升學班，為著升學率ko͘putjîchiong kāngkhoán著kā學生惡補，雖然Lahjih有hō͘惡補致蔭，mā有感覺惡補帶來負面效果ê經驗，摸良心想看māi，ná敢koh用hit種灌鴨式khongkhám步數，來sńgtn̄g囡仔栽·leh。

學校交仗教升學班hit兩年，kiànpái月考、聯合模擬考，無一pái贏隔壁班，總·是 猶原堅持原則。結局，到上落尾hitpái升學考試，奇蹟出現，成績贏隔壁班，chūán'ne堅定信心，老實教冊。

豬ê that-heng-bah踢胸肉：

 豬ê that-heng-bah踢胸肉：        20220115 Lahjih（蕭平治）

雞鳥有khim-heng肉，豬肉講有『豬胸肉』，今仔日去買豬肉，請教賣豬肉生理人，伊提一塊豬肉kā我講，chit塊to̍h是ti-heng-bah，咱講that-heng-bah踢胸肉，tī豬前腳後壁所在，豬行路踢--leh踢--leh ê胸坎肉。

Lâng-sn̂g boeh chhoe-kóe（籠床炊粿）：

 Lâng-sn̂g boeh chhoe-kóe（籠床炊粿）：             20220107 Lahjih（蕭平治）

Chhoe-kóe tio̍h iōng lâng-sn̂g

Lâng-sn̂g ū lâng-sn̂g-kòa kah lâng-sn̂g-chân-á（籠床蓋籠床層仔）

Siāng ē-kha chân lâng-sn̂g-chân-á hō-chò láng-pho͘（籠舖）

Siāng bīn-téng chân hō-chò pìn-á（箄仔平面架）

Lâng-sn̂g chhoe-kóe ū nō chióng（兩種）

Chit-chióng chhoe tiⁿ-kóe chhài-thâu-ké ō͘-hoâiⁿ-kóe ō͘-kóe

Kan-nā iōng láng-pho͘ chhoe（籠舖）

Láng-pho͘ su-iàu chhu kóe-kin kah khǹg kóe-khùi（粿巾粿氣）

Chhoe chi̍t-pái hō-chò chhoe chi̍t-pho͘（一舖）

Chit-chióng chhoe âng-ku-ké pau-á-kóe hoat-kóe óaⁿ-kóe ō͘-so-á/ō͘-kóe-khiau⋯（紅龜粿包仔粿發粿碗粿芋梭仔/芋粿曲）

Láng-pho͘ chân-á pín-á khǹg kah tĭⁿ-tīⁿ-tīⁿ hō-chò chhoe chi̍t-sn̂g（一床）

Lâng-sn̂g láng pho͘ hō-miâ chin sim-sek（心適）

Lâng-sn̂g ná bîn-chhn̂g（眠床）

Láng-pho͘ chhiūⁿ chhn̂g-pho͘（床舖）

Tiⁿ-kóe teh-nî hoat-kóe hoat-chîⁿ（teh年發錢）

Pau-á-kóe pau-kim chhài-thâu-ké kiat tiám-sim（包金食點心）

Lán-lâng kòe-nî tit-boeh kàu（咱人得欲）

Ta̍k-ke kám-ē chiâⁿ kî-thāi（逐家敢會chiâⁿ期待）