古物仔_嫁娶篇_箱仔盒仔鞋拔仔：陳慶芳收藏/蕭平治翕相

古物仔_嫁娶篇_箱仔盒仔鞋拔仔：陳慶芳收藏/蕭平治翕相
▲柴皮箱kap皮箱：柴tìng ê箱仔一般講做柴箱仔；若是敆作師傅用木工技藝，經過鋸、剾、鑿、敆、畫、漆koh掛鎖，ē-tàng囥衫褲、貴重幼粒物，to̍h叫做柴皮箱；皮箱是用皮革抑是化學皮所做ê旅行箱，是出外tsah行李有捾耳(kuāⁿ-hīⁿ)ê箱仔。
△掛鎖柴皮箱：漆紅漆，畫花草、蝙蝠，銅質鎖頭分頂下槽，鎖匙孔tī下槽。tsit種鎖頭拍算是柴箱特有ê鎖。

△皮箱(phuê/phê-siuⁿ)：皮質頂面浮雕花紋tsiâⁿ複雜，圓形囍字、蝙蝠、花草，看bē出是皮雕抑是貼黏--起去。捾牽仔(khian-á)tī兩旁，拍算m̄是出外旅行捾ê皮箱。銅質皮箱鎖圈(só-khian)分頂下槽，需要一粒鎖頭。

△皮箱鎖圈(só-khian)：鎖圈(só-khian)m̄是鎖匙圈仔(só-sî khian-á)，鎖圈(só-khian)kap門圈仝款，分公母為一組，khian好勢需要用鎖鎖。

鎖匙圈仔(só-sî khian-á)是『鑰匙圈』。

△墨盤盒仔：囥墨盤、烏墨、毛筆ê柴盒仔，因為是嫁粧，特別漆紅色koh畫雙鶴，牡丹紅。
註：烏墨是墨條，白墨是粉筆。

▲高級ワイシャツ[襯衫]鉛鉼盒仔：硩定(teh-tiāⁿ)時，女方teh-siāⁿ回送囝婿ê禮物之一，白色siat-tsuh是穿西裝必要ê[襯衫]，頷領ē-tàng結ネクタイ/nekutai/領帶。
註：ワイシャツ/Shirt/襯衫是外來語，tsit種衫身ê款式kap對襟仔tuì-khim-á[一種舊式衣服的款式。兩襟相對，而且胸前有一排鈕扣。]相像，領無仝。

▲糖仔盒糖仔盤：鉛鉼圓盒仔貯糖仔餅是禮盒，圓形糖仔盤囥糖仔餅請人客，紅色做底，金色龍鳳、雙囍、壽紋，喜氣羊羊(hí-khì-iâng-iâng)，鬧熱滾滾。

▲綢仔布盒：綢仔是高級布料，因為原料是娘仔絲(抑是化學纖維、ナイロン耐龍絲)，所以柔軟koh ē閃光，特別是查某人上kah意ê洋裝布料。

硩定時男方送女方做新娘衫，抑是新娘家己拴嫁粧，親成朋友添粧攏kài高級貴重ê禮物。

▲鞋拔仔：硩定(teh-tiāⁿ)時，女方teh-siāⁿ回送囝婿ê禮物之一。嫁娶禮俗致重雙雙對對，硩定盛底(siāⁿ-té)kap女方回禮硩盛底(teh siāⁿ-té)ê物件通常拴12項是上捷用ê數字，好額人備辦12項貴重體面禮物無問題，但是一般庄腳人bueh開tsiah-ní濟錢，實在tsiâⁿ重負擔，所以必要金器以外，ē-tàng省to̍h省，tàu項拴有12項to̍h好，所以鞋拔仔(ê-pue̍h-á)mā算一項。

古物仔_嫁娶篇_禮盒：陳慶芳收藏/蕭平治翕相

古物仔_嫁娶篇_禮盒：陳慶芳收藏/蕭平治翕相
▲籃仔？盒仔？：
慣勢講法，用竹篾仔、籐篾仔pīⁿ--ē(編織)，有捾耳(kuāⁿ-hīⁿ)--ē 號做籃仔，無捾耳(kuāⁿ-hīⁿ)--ē叫做籠仔。有孔有縫bē-tàng貯油水液體kap微細幼粒粉劑。
若是用木材箍成製造，thang貯糖餅，有蓋是盒仔，無蓋叫觳仔(khok-á)，多數無捾耳(kuāⁿ-hīⁿ)。
△漆器捾盒仔：柴造有捾耳，m̄是siāⁿ籃仔，貯糖仔餅抑是檳榔，嫁娶新tshin-tsiâⁿ禮盒。

▲糖仔餅禮盒：鉛鉼盒仔，貯糖仔餅密封bē-lùn(潤)，雙層圓形，漆紅色、牡丹紅、『宜爾室家』。一看to̍h知是嫁娶禮餅盒。

▲糖仔餅禮盒：竹篾仔編織漆器，pīⁿ kah真幼真密，漆生漆了後bē過風，貯檳榔餅仔好看頭，誠意十足。

▲三層禮餅盒：薄柴皮箍成，比箍籠床猶較幼路ê漆器。

▲糖仔餅禮盒：長株圓(tn̂g-ti-îⁿ)[橢圓形]，紅色漆器。

古物仔_嫁娶篇_食物容器：陳慶芳收藏/蕭平治翕相

古物仔_嫁娶篇_食物容器：陳慶芳收藏/蕭平治翕相
▲印雙喜囍--字ê味丹味素粉，鉛鉼盒仔，盒仔蓋密tsiuh-tsiuh，需要用ドライバ－/doraibaa/螺絲起子開。
味素粉古早叫做骨仔粉，因為有肉骨味ê甘甜，tī hit个散赤年代，除了生理人煮食ē摻，增加好食滋味，一般庄腳人mā tsiok愛用，無魚無肉ê羹頓，tsham 1湯匙ê骨仔粉，m̄-nā好食好滋味，koh kioh是是真正雞骨肉骨去提煉ê營養品。

▲糖餅觳仔(khok-á)：真súi ê漆器。生漆是一種ùi漆樹ê奶汁所製造ê天然漆料，漆tī木材、竹藝器具表面，增加美觀kap保護功能。

▲糖餅觳仔(khok-á)：生漆漆好ê色水是紅磚仔色，囥久ē pìⁿ烏色，需要lām色料tsiah-bē變色。

▲餅盒仔(piáⁿ-a̍p-á)：訂婚禮餅。遠東月餅，花好月圓，紅底kng-iāⁿ月色，koh-ū牡丹富貴。

▲糖餅盤仔(thn̂g-piáⁿ-puâⁿ-á)：竹篾仔(tik-bi̍h-á)編織，tsiâⁿ幼路，漆紅漆。

▲糖餅盒仔(thn̂g-piáⁿ-a̍p-á)：八角形，立體浮雕木刻，歷史久遠。

▲糖餅盤仔(thn̂g-piáⁿ-puâⁿ-á)：tshiⁿ色龍鳳圓盤，雙喜囍，富貴牡丹花，閣有長壽字樣。

▲糖餅盤仔(thn̂g-piáⁿ-puâⁿ-á)：木材漆器，圓盤，淺底，ē-tàng貯糖仔餅，mā ē使得貯檳榔(pin-nn̂g/pun-nn̂g)。

▲酒甕(tsiú-àng)：內面貯米酒、紅露酒、紹興酒，新娘月內子麻油酒。
莫怪古早人重男輕女，嫁查某囝嫁妝一大堆，m̄-nā新娘新郎用--ē，厝內日常用品，連生囝、月內、囡仔滿月、度晬⋯真正「人掠厝拆，雞仔鳥仔掠kah無半隻。」

古物仔_嫁娶篇_炮城燭台痰壺碗盤花瓶：陳慶芳收藏/蕭平治翕相

古物仔_嫁娶篇_炮城燭台痰壺碗盤花瓶：陳慶芳收藏/蕭平治翕相
▲金炮燭(kim phàu tsik)tī嫁娶禮俗是真重要禮品，除了家己公媽廳拜神明拜公媽需要，娶新娘時男方著送女方兩副金炮燭thang hō͘ in拜神拜公媽，禮貌上女方著回男方一副。
▲炮城(phàu-siâⁿ)：炮城kap八卦米篩仝款有辟邪(phik-siâ)ê路用，頂頭有印二姓合婚，百子千孫，乾坤配合，琴瑟和鳴，鴛鴦戲水，永浴愛河。娶新娘時，需要備辦2粒炮城去娶親，女方收1粒，1粒回男方。女方收著炮城to̍h kā掛tiàm大廳門斗頂，等候拜公媽了後，kā內面彼粒大砲放了後，新娘to̍h ē使得hō͘人娶出門。男方tsit-pîng ê炮城，mā是仝款。

▲蠟燭台(la̍h-tsik-tâi)kap蠟燭：木材造作壽字紅色燭台，插紅色囍字蠟條，喜氣光明(功名)。

▲痰壺(thâm-ô͘)：痰壺是phùi痰呸喙瀾(phùi-tshùi-nuā)ê桶仔。嫁妝kah痰壺是bueh hō͘嬰仔噓尿si屎用--ē。古早衛生紙無tsit-má tsiah量siōng，痰瀾烏白phùi，衛生真䆀，有錢人to̍h-ē準備痰壺備用。

▲碗盤(uáⁿ-puâⁿ)豆油碟仔(tāu-iû-ti̍h-á)：
△碗是貯飯ê瓷仔，比碗較大to̍h是碗公，用來貯菜貯湯。
△盤是貯魚肉乾料ê瓷仔，大kâi叫盤，細kâi叫𥐵仔phiat-á。小盤子。
△若是比𥐵仔phiat-á閣較細，ē-tàng貯搵料，to̍h號做豆油碟仔。
有印雙喜囍--字，當然是嫁妝。

▲花瓶(hue-pân)：mā有講做花矸仔(hue-kan-á)，玻璃製品，紅白色水，金頭影目，插花加添喜氣。

▲花盆仔(hue-phûn-á)：這是嫁查某囝特別ê嫁妝，ē-tàng種龍眼栽、蓮蕉栽，龍眼to̍h是桂圓，「富貴團圓」；蓮蕉(liân-tsiau)膦鳥(lān-tsiáu)倚音(uá-im)，蓮蕉結籽koh-tsē，「生查埔，多子多孫」。

古物仔_嫁娶篇_時鐘滾水罐枕頭箸籠：陳慶芳收藏/蕭平治翕相

古物仔_嫁娶篇_時鐘滾水罐枕頭箸籠：陳慶芳收藏/蕭平治翕相
▲時鐘：這是用發條做動力ê徛鐘(khiā-tsing)，是khǹg tī桌頂ê時鐘，柴造外殼，有駿馬美女雕像，圓形鐘面有Nihon字樣，有時針分針無秒針，4、8位置兩个圓孔是絞發條所在，前面有鐘面下橛(ē-kue̍h)畫花蕊，玻璃頂ê雙囍m̄是臨時鉸紙貼--è。

▲時鼓仔(sî-kó͘-á)：mā講做鬧鐘仔，倒爿tsit-kâi開關是掠橫kō͘ peⁿ--e，正爿tsit-kâi有鈕仔用ji̍h--è，是較早早起叫精神ê工具，m̄是逐口灶有--ē，寶ni-ni。

▲滾水罐(kún-tsúi-kuàn)：古早一般家庭ê日常生活，若bueh泡藥粉、吞藥丸仔，抑是泡米麩、牛奶粉，寒天時bueh lim燒滾水，厝內若有這支滾水罐to̍h加真利便。
Tsit種ē-tàng保溫ê滾水罐，除了外殼猶有內膽，內膽是雙層玻璃ê玻璃罐，夾層內面是真空koh鍍水銀，蓋ê內面mā有草塞仔，保溫效果真好，ē-tàng保溫幾若點鐘。
內膽koh叫做水銀膽，tse電鍍ê金屬敢是用水銀(汞hóng)？水銀敢ē-tàng用來電鍍？實在懷疑，kám-ē 是銀？
△滾水罐ê外觀。

△滾水罐內膽：叫做水銀膽，因為鍍銀，看--起來ē閃光，因為是玻璃內面koh真空，bē堪得摔(siak)。

△色水真súi ê滾水罐：紅底白鶴，兩隻白鶴(pe̍h-ho̍h)是雙雙對對，koh-ū松樹，是松鶴延年，長命百歲。

▲枕頭：敢是人ê枝骨seⁿ-tsiâⁿ，龍船骨tī頷頸所在是àⁿ前--ē，所以tī睏坦笑時，需要kā頭殼thiap-kuân tsiah-ē khah爽快。tsit-mái ê枕頭較有注重人體工學，睏--起來加真爽快。

古早ê枕頭，有布thīⁿ--ē 內面貯茶米粕、綠豆殼、棉仔、廢棉仔、斑芝樹棉，mā有揀he扁siân扁siân ê竹管抑是柴thâi--ē⋯上特別--è bat看過用報紙包磚仔角做枕頭--ē。

△瓷仔枕頭：燒hûi-á做枕頭有夠特別，kap報紙包磚仔差不多，m̄知欲按怎睏tsiah睏ē落眠。

▲箸籠：謎猜「三頓伊服務，一暝徛天光。」to̍h是tī-lāng，囥箸ê筒仔、觳仔，有竹管--è，有柴tìng--è，有金屬--è，mā有瓷仔--è。
△瓷仔箸籠：tsit款hûi-á 箸籠真古樸，頂面花紋應該有意思tī--leh。

古物仔_嫁娶篇_綉鞋縖包蠓罩鉤門籬仔頭：陳慶芳收藏/蕭平治翕相

古物仔_嫁娶篇_綉鞋縖包蠓罩鉤門籬仔頭：陳慶芳收藏/蕭平治翕相
▲綉鞋(siù-ê/uê)：挑花刺繡(thio-hue tshiah-siù)ê綉鞋，大概是富戶人家好額人tsiah有leh穿ê查某鞋，一般人家若有烏色包仔鞋thang穿to̍h-ài偷笑，庄腳人出門m̄是褪赤跤to̍h是穿木屐。
△細雙--e是囡仔鞋；大雙--e是大人鞋，無後蹬(āu-teⁿ)，鞋尖翹翹。紅絳絳(âng-kòng-kòng)ê鞋面真有喜氣。

▲縖包(hâ-pau)：to̍h是錢包，古早好額人kā囥錢ê錢包仔hâ-tiàm褲頭，叫做縖包。

▲蠓罩鉤仔(báng-tà-kau-á)：古早眠床一定ài有蠓罩，預防睏眠是蠓蟲飛入，好額人繡房紅眠床ê蠓罩當然講究，連吊蠓罩ê蠓罩鉤仔tō-tio̍h妝kah媠噹噹(súi-tang-tang)。若是阮tau ê蠓罩，是用黃麻布thīⁿ--ē，縛蠓罩篙仔前後徙來徙去kài方便，蠓罩篙仔縛綹束仔(liù-sok-á)，壁頂tìng釘仔鉤to̍h好。蠓仔仝款鑽bē入--來。

▲針包(tsiam-pau)：用布thīⁿ tsiâⁿ一个像包仔形，內面seh棉仔seh hō͘飽滇飽滇(pá-tīⁿ)，掛tiàm壁堵抑是khǹg-tiàm布床頂，用來插補紩用ê針，方便工作koh-bē造成危險。

△針插(chiam-tshah)：tsit款插針用平面造型，叫針插，好額人家庭掛tiàm壁堵，ē-tàngtsng-thāⁿ[裝飾]欣賞，mā ē-tàng方便插針。

△八瓣花形針插：綉牡丹紅，tshíⁿ(靘)色底，綉淺綠色枝葉、紅花kap花莓。

△八瓣八卦形針插：中央綉陰陽，周圍綉八卦花紋。

▲門籬仔頭：正身護龍厝，厝內過間門，除了有門扇，為著有內外禮數，睏房需要掛門籬仔，門籬仔頂半橛(kue̍h)叫門籬仔頭。紅絳絳ê布底綉花koh綉字「花好月圓」，掀開門籬仔，內面to̍h是新娘房。充滿鬧熱喜氣kap Romantica浪漫氣氛。

▲捲花(kńg-hue)：這是tsit種用紙捲做各種花樣ê技巧藝術。
△khǹg tī有通光玻璃篋仔(kheh-á)內ê捲花，m̄知啥乜材質捲--è？是排tiàm桌頂做tsng-thāⁿ看媠--è，有可能是人添粧--e。

古物仔_嫁娶篇_捋仔茶箍盒仔齒觳仔：陳慶芳收藏/蕭平治翕相

古物仔_嫁娶篇_捋仔茶箍盒仔齒觳仔：陳慶芳收藏/蕭平治翕相
▲捋仔(lua̍h-á)kap蝨篦(sat-pìn)：查某人捋頭毛用。
△蝨篦(sat-pìn)：tsit種齒梳密tsiuh-tsiuh ê捋仔叫做蝨篦，古早醫藥較無發達，生活環境衛生koh bái，身軀頂時常有木蝨(ba̍t-sat/ba̍k-sat)、虼蚤(ka-tsáu)、 蝨母(sat-bó/sat-bú)tsit款寄生蟲，留長頭毛ê查某人特別gâu生蝨母，用手掠歹掠掠bē了，to̍h用tsit款蝨篦kā頭毛pìn-pìn--leh，kā蝨母捋掉。

▲芳茶箍盒仔、洗頭毛粉：
囡仔時代，洗身軀、洗頭毛kap洗衫褲lóng是仝一塊茶箍(m̄是bâ-bui[無患子])。tsit款有芳味ê芳茶箍kap洗頭毛粉，一般家庭買bē落--去，為著查某囝ê嫁妝體面(thé-biān)只好tshân-tshân kā hak--落去。tsiah-nī貴重ê嫁妝，新娘一直m̄甘用，有人ē留kah嬰仔出世，tsiah提出來kā嬰仔洗身軀。

△tsit種茶箍盒仔ê材質親像塑膠製品，叫做ló͘-tsí (賽璐珞celluloid)，殼薄koh tīng-pak，表面kng-iāⁿ色地真雅。

▲茶箍籃仔：柴tìng--è，囥洗衫粗茶箍。較早查某人洗衫lóng-tī鼓井邊抑是溝仔邊洗，tsit種有捾耳(kuāⁿ-hīⁿ)ê茶箍籃仔，ē-tàng捾來捾去，真方便。

▲齒觳仔(khí-khok-á)：洗喙用，頂面有牡丹紅(富貴)kap雙囍，一看to̍h知是新娘ê嫁妝。