Hoâi-liām hang tiⁿ-kóe懷念烘甜粿:

Hoâi-liām hang tiⁿ-kóe懷念烘甜粿:                      20200221        Lahjih

" Tiⁿ-koe teh-nî, hoat-kóe hoat-chîⁿ, pau-á-kóe pau-kim, chhài-thâu-kóe kiat tiám-sim. " Che-sī kó͘-chá kòe-nî sî chin-ū ì-sù siá-si̍t ê liām-iâu.

Chhài-thâu-kóe sī chāi-lâi-bí hām chhài-thâu chhoah-chhiam chhoe ê chia̍h-mi̍h, chian hō͘ chhiah-chhiah ùn soàn-chheⁿ tāu-iû, si̍t-chāi hó-chia̍h koh chia̍h bē-ùi, m̄-nā chia̍h-tiám-sim, saⁿ-tǹg chian lâi chia̍h mā-sī chia̍h bē-siān.

Pau-á-kóe sī chut-bí-chhè nóa chhí-khak-á pau āⁿ kóe-lō͘, in-ūi pau chò sì-kak-hêng chhiūⁿ hâ-pau, hâ-pau khǹg-chîⁿ lâng-lâng kah-ì, mā kóng chhí-khak-á-kóe. Hèng chia̍h pau-á-kóe sī kah-ì i tīⁿ-tīⁿ khiū-khiū koh-ū kin-chio-hio̍h kap chhí-khak-á phang-bī. Ū-tang-sî-á chat bô-tú-hó, āⁿ bô-kàu, tō-ē kā bô pau-āⁿ ê pau-á-kóe chò kì-hō, góa lóng-ē tāi-seng kéng bô pau-āⁿ ê pau-á-kóe lâi chia̍h.

Hoat, sī hoat-tián koh hoat-châi, kā kóe-chhè chham hoat-hún, chhoe--khí-lâi ê kóe tō-ē chhiūⁿ hóe-soaⁿ po̍k-hoat án-ne hoat-hoat-hoat, hoat-châi chîⁿ-gûn móa tōa-thiaⁿ, tong-jiân hû-ha̍p ta̍k-ke kî-thāi. Hoat-kóe chú-iàu sī khǹg-tī Kong-má-thiaⁿ kí-toh téng kap chàu-thâu pài-pài, khǹg kàu chhe-gō͘-keh-khui, í-keng sió-khóa piàn-chit, m̄-nā bô pau-āⁿ mā bô chut-bí ê khiū-khiū, góa khah bô kah-ì.

Tiⁿ-koe teh-nî, teh-nî ê ì-sù tō sī " ài ū chhun-āu ", só͘-í kòe-nî khǹg-tī âng-kí-toh téng ê tiⁿ-kóe, hoat-kóe, chheng-bí-pn̄g, lóng tio̍h chhah pn̄g-chhun(hoe), kî-kiû chia̍h-ū-chhun.

Kóng-tio̍h tiⁿ-kóe, chhut-thâu chin-chē.

Chhoe tiⁿ-kóe tio̍h iōng îⁿ-chut-bí ê kóe-chiuⁿ, teh-ta si̍h-chúi liáu-āu, seng liô kúi-tè kóe-chhè lo̍h tiáⁿ sa̍h chò kóe-pô͘. Chún-pī chhiah-soa a̍h-sī o͘-thn̂g iûⁿ chò thn̂g-ko, lām lo̍h-khì kóe-chhè, kóe-pô͘ chò-hóe nóa-nóa chhiau-chhiau hō͘ chiâu-ûn, chiah hē lo̍h-khì láng-pho͘ chhoe. Lâng-sn̂g siāng ē-pêng chân hō-chò láng-pho͘, láng-pho͘ tio̍h ī-sian iōng pe̍h-pò͘ kóe-kin chū hō͘ hō͘-sè, chhiau hó ê kóe-chhè hē--lo̍h-khì chiah-bē sia̍p chhut láng-pho͘ gōa.

Tiⁿ-kóe chhoe-se̍k tio̍h kā i poaⁿ-sóa khì lēng-gōa chi̍t-ê lâng-sn̂g-chan-á, chit-ê lâng-sn̂g-chan-á tio̍h ī-sian iōng po-lê-chóa chhū hō͘ hó-sè, chhoe-se̍k ê tiⁿ-kóe hē-lo̍h lāi-bīn chiah-bē chuh-chhut gōa-kháu, chhú-lí hó-sè, tio̍h tán tiⁿ-kóe piàn léng piàn tēng, thèng-hāu kòe-nî chêng-chi̍t-ji̍t khui-phòa chò chi̍t-liau chi̍t-liau, kòe-nî pài-sîn pài kong-má iōng.

Phīⁿ-tio̍h tiⁿ-kóe bī, ē siâⁿ-lâng iau-sâi siūⁿ-boeh chhì chu-bī, só͘-í ē seng khat chi̍t óaⁿ-kong khí-lâi teh chhùi-kho͘, kō͘ tī kô, chi̍t-lâng kô chi̍t-oân chia̍h tiⁿ-tiⁿ, chún-pī thang kòe-nî. Ná-sī chia̍h-liáu bô-kàu-khùi, kóe-kin iáu-ū liâm chi̍t-kóa-á, ē-sái-tit kō͘ chhùi kā, goán kóng kā kóe-kin.

Sin-chiaⁿ-sî-á, chhōa chhin-chiâⁿ pêng-iú kiâⁿ-chhun tek-pia̍t nāu-jia̍t, chhiáⁿ lâng-kheh tio̍h chian tiⁿ-kóe, ū-lâng kō͘ iû chìⁿ, kang-hu--ê kō nn̄g kauh soàn-á-chheⁿ, góa chiok kah-ì ùn tāu-iû, kài-chán ê pòaⁿ-kiâm-tiⁿ chu-bī.Bô lâng-kheh, iau-sâi siūⁿ-boeh chia̍h tiⁿ-kóe, tō chhài-to gia̍h--leh, chhiat chi̍t-tè léng-léng tēng-tēng tiⁿ-kóe-pang, mā-sī chia̍h-kàu chhùi ē tín-tāng.

Siāng-kài hoâi-liām ê chu-bī, tō-sī hang tiⁿ-kóe, thàn chàu-khang iáu-ū hóe-iām, chhiat chi̍t-tè tiⁿ-kóe-pang, khòe tiàm hóe-ngeh, long ji̍p-khì chàu-khang hang, hang hō͘ tiⁿ-kóe nńg-khiū puh phok-á ná chhoán-khùi, tō ē-sái-tit the̍h-lâi chia̍h, tio̍h sè-jī, m̄-thang thǹg-tio̍h chhùi-chi̍h, hit-chióng chu-bī chhù-bī kàu-taⁿ iáu-koh ē-kì-tit.

Tiⁿ-kóe teh-nî, chi̍t-pho͘ tiⁿ-kóe chia̍h-kàu chhe-gō͘-keh-khui, jî-chhiáⁿ kàu chiaⁿ-goe̍h cha̍p-gō͘ siāng-goân iáu-ū thang pài-pài, in-ūi bô pau-āⁿ koh-ū chhiau-thn̂g ē-tàng hông-hú, sam-put-gō͘-sî liū-liū--leh, ē-tàng khǹg chin-kú, kì-tit ū chi̍t-nî chheng-bêng, a-só chian chi̍t-pôaⁿ tiⁿ-kóe chiūⁿ-toh, chin-chiàⁿ hi-hán ê kháu-hok.

蕭陳敬 十二生相歌： Lah-jih_1999.1.12收集

蕭陳敬 十二生相歌： Lah-jih_1999.1.12收集 （外附錄一首） （1999.04.18上網） 蕭平治 .漢羅譯寫 
講述者：蕭陳敬女士，七十八歲，無讀冊。 
采錄者：蕭國照、蕭國鏞、蕭鏞立兄弟，蕭陳敬女士ê 後生。
時間：1999.1.12 地點：彰化縣田中鎮崁頂社區厝內。 
蕭平治漢羅台語記音。 HOTSYS® 電腦扑字。（ ）內是蕭平治補寫。
 niáu 鼠出世.tī 壁孔，仙丹開花.朱朱紅， 阿娘生做.真四pāng，目睭重巡.sut倒人。
牛囝出世.beh 拖犁，阿君坐kôan .娘坐低，（目睭sio -siòng.手sio 挨，）卡好水晶.做玻璃。
虎囝出世.人人驚，梧桐開花tī 京城， 阿君講話.若無影，鐵板鋪橋.鬼也驚； 阿君講話.若有影，燈心鋪路.娘.敢行。
兔囝出世.目.紅紅，菅蘭開花.青.變紅，（阿娘若想beh 嫁翁，千萬m̄-thang 嫁別人。）
龍囝出世.tī 半雲，黃kiⁿ 開花.滾lún chūn，阿君kah 娘.無緣份，無彩戇腳.行hiah 勻。
蛇囝出世. sim-hiông-tn̂g，菅蘭開花.青變黃， 阿娘生做.真好sńg，嘴phóe唚著.卡甜糖。
馬囝出世.親像驢，玉蘭開花.清芳味，阿君先hiau.做你去，（liân-hôe 娘仔心傷悲。）
羊囝出世.會發鬚，娶著歹某.愛解救，（規日心情扑結虯，）親像死蛇.活尾溜。
猴囝出世.tī 深山，樹莓開花.無人khòaiⁿ，阿娘無君.beh 按怎，一陣燒來.一陣寒。
雞仔出世.親像鳳，阿娘愛君.m̄ 敢講，（心內鬱卒bē 清爽，）假仙食酒.感著風。
狗仔出世.目未開，夜合開花.結含蕾， 阿娘生做.真正súi ，姻緣無配.大剋虧。
豬仔出世.親像象，韭菜開花.一支hiuⁿ，阿娘生súi .別人兜，透風落雨.bē-tit到；
楊桃生成.五liàm 溝，親像生番.pé 路頭。日本過--來.戴白帽，夭壽日本.掠阮哥，日頭落山.就煩惱，捧著飯碗.想我哥，捧著飯碗.食bē 落。
註解：
 1. 真四pāng ：四正、平pāng 、端的（toan-tiah)，[長得端端正正的] 
2. sut ：甩，使目尾，[送秋波] 
3. kôan ：懸，高。
4. 黃kiⁿ ：黃梔，[梔子花] 
5. 滾lún chūn ：滾lún chūn 滾，[捲來捲去]
 6. 行hiah 勻：勻，ûn ，chiâu 勻，均勻，[走得勤又周到]
 7. sim-hiông-tn̂g ：心、雄、腸？雄心腸：心肝真雄。
8. 真好sńg ：真有意思好做夥，[真好玩]。
9. 嘴phóe 唚著：[臉頰親到，親到臉頰]
10. hiau ：僥，反僥，[背叛]
11. khòaiⁿ：khòaⁿ-kìⁿ ，看見。
12. hiuⁿ：香，拜神ê 線香。
13. bē-tit 到：bē 凍到位，[不能到達]
14. 五liàm 溝：楊桃生做5-liàm 5溝。
15. pé 路頭：[把守路中央]，當路搶劫。
16. 戴白帽：指日本海軍ê 軍帽。
 附錄： 四個查某囡仔一組 ________________________________________ 
講述者：蕭陳敬女士，七十八歲，無讀冊。 
采錄者：蕭國照、蕭國鏞、蕭鏞立兄弟，蕭陳敬女士ê 後生。
時間：1999.1.12 地點：彰化縣田中鎮崁頂社區厝內。
蕭平治漢羅台語記音。 HOTSYS® 電腦扑字。
（日據時代，社頭水源地水廠做工時，有查甫人kā In khoe-sian ê 唸謠）
阿蘇大厲害，阿藝癮痀好目眉，阿藕好詼諧，阿金--a 上實在。
 註解：
1. khoe-sian ：查甫人對查某囡仔khoe-sian ，是[吃豆腐]ê 意思。
2. 阿金：蕭陳敬女士ê 本名。
 後記：
蕭陳敬女士，1921年生，19歲kap 彰化縣田中鎮崁頂庄ê 蕭朝木先生結婚，生有三男四女，1999 年2月4日過身，享年79歲。Tī 1999年1月12日晉前病重轉來厝內靜養彌留狀態之下，囝孫圍tiàm 身邊安慰phò-tāu 之時，一時歡喜迴光返照ê 狀態下，唸出chit 首「十二生相歌」，雖然無真完整，實在嘛真無簡單。根據蕭陳敬女士ê 大後生蕭國照先生ê 說明，自伊出世到 taⁿ 58 歲，攏m̄-bat 聽過In 老母唸過啥麼歌謠，thài 會雄雄一時唸出chiah-ni̍h lò-lò 長ê 四句連，而且tâⁿ 誤無濟，伊是一個無讀過冊ê 庄腳查某人，大概是做查某囡仔時代學--ê ，這ùi 伊另外hit 首「四個查某囡仔一組」ê 背景就會凍瞭解。 　　註解部分是由漢羅台語記音者蕭平治kap 蕭國照兄弟，斟酌參考了後才注解，其中「日本過- - 來.戴白帽」chit 句，是講In 翁婿蕭朝木bat hō͘ 日本仔徵召去做日本海軍。唸出chit 二首唸謠了後，就無閣再唸，病體嘛無閣再好khit 來，拖到2月4日就來別世，留hō͘ In ê 序細無限ê 懷念kap 不可思議ê 驚嘆！

1948-1960_崁頂庄ê記智 Lah-jih_20140210

1948-1960_崁頂庄ê記智 Lah-jih_20140210

1960年代崁頂庄蕭姓角頭名kap世系族親住宅分配圖：

 土地公廟仔kap將爺廟仔：

 已經焦--去ê大欉榕仔：

 役會：

 翻修前ê祖厝：

 古早ê祖厝：

 現在ê祖厝：

崁頂庄自古早到chit-mái，和諧團結真出名，庄眾多數姓蕭，奮公祖厝to̍h起tī庄內，外姓 黃、江、張、謝、陳、紀、邱，攏kap蕭姓結緣真深，有ê是姓蕭ê招婿，有ê是蕭--姓ê姻親，逐家互相兄弟叔孫稱呼，論輩無論歲，伯公姆婆、叔公嬸婆、姑丈丈公、阿姑姑丈、丈公姨婆、叔公祖舅公祖，有大有細，無leh烏白稱呼。因為庄內厝宅集中，人口真濟，婚喪喜慶陪綴有leh分角頭，若是庄內公眾代誌，to̍h按古例規矩做伙來，出公工、納丁錢，poa̍h頭家、爐主神明代，寒天巡更、做冬尾戲、割香迎神明，只要頭人發落喝聲，煮食、搭棚，弄獅、叁筆鑼仔、子弟陣，隨時就位chhoân-piān-piān，無人會推辭，chit款團結合作ê好風俗，到今猶原維持。公眾代全庄來，陪綴to̍h照親成關係kap族親親疏來分，族親親疏大約按奮公派下「團」--字世系，團欽、團圍、團環、團武kap團貴做區分，抑是照角頭來。

下面to̍h來紹介早期崁頂庄角頭名kap團--字世系住宅位置：

※按角頭名來紹介：

▲公埕：廟埕兼大路to̍h是公埕，拜神、做戲、觀童乩、弄獅、澎湖先A-Jiông師教拳頭、子弟陣排場攏tī chia，王祿仔、賣藥仔、扑拳頭賣膏藥、落地掃、歌仔戲mā選tī chia，是庄頭集會好所在，大人、囡仔攏意愛。公埕有兩間廟仔，坐北向南，西爿土地公廟仔，服祀土地公土地婆，磚仔起khàm日本瓦，內面拜桌是紅毛土桌，無拜拜時有囡仔tī chia sńg，大人tī chia跋筊。東爿將爺廟仔，木造khàm安全瓦，有拜亭，3仙元帥爺無裝金身，kan-nā用稻草tān做人形，用紙枋畫五官貼人面，有較陰，囡仔m̄敢入去sńg，冬尾時做巡更寮仔。公埕埕尾倚姓邱--e厝宅溝仔邊有1-kâi「公井」，水泉飽足水質真清，是歸庄人ê食水，有井盤閣有搭棚khàm厝頂，井chhiān 半人koân，較安全，m̄-koh猶是有人無細膩跋落鼓井底，好佳哉救有轉--來。

▲役會：日本時代建築，木造瓦厝，前後壁堵攏開窗仔門，thang光通風，厝後有空地，厝前門埕有花園、旗台，大門邊有磚仔疊ê牆圍，是室內集會所，暗學仔，幼稚園，庄民大會，「集雲軒」曲館金龍師教絃管、唱曲攏總tī chia進行，落雨天排場、搬戲、做王祿仔⋯ 好所在。

▲祖厝：書山祠是蕭--姓奮公派下祖祠，慣勢講做祖厝，每年正月十三祭祖chiâⁿ鬧熱，m̄-nā厝埕闊，厝後厝邊閣有水田，四箍輾轉用紅磚仔khōng牆圍。

▲竹圍仔(團欽/團貴)：傳統竹圍厝宅，刺竹模圍tiâu--leh，tī荖宅仔東北爿，有兩內底。西爿chit內底向北起，團欽囝孫金火、金水、來春、文溪、文福、家修、家明、家炎、家角⋯ê厝宅；東爿chit內底向東起，大門開tī南爿，有牌樓戶碇，團貴囝孫厝宅，貴川、明鏡、明利、清標、清林、江榜、水溝、家舜、家再厝宅。

▲荖宅仔(團欽)：崁頂庄上大內底，除了正身護龍起kah cha̍t-thóng-thóng向西起ê本內底，猶有包含鴻--ē、仁貴--è、文典--è、百枝--e、坤河--ē各別門戶5內底。聽講古早是種荖葉、荖藤、荖花ê宅仔，攏是團欽派下囝孫，添登、添志、朝木、章哲、赤牛、諒、永賢、文典、水榮、鴻、連益、仁貴、再傳、振德、深池、茂桂、乞、再為、百枝⋯ê厝宅。

▲榕仔跤(團圍)：聽講chia古早有一欉榕仔，除了姓蕭--e，mā有陳姓囝孫。蕭姓攏是團圍派下囝孫，新科、新環、銘發、銘郁、元讚、元甲、金閣、金殿、江彬、金印、邦訓、金郎、明堂、明國、明魁、烏棕、榮林、榮杉ê厝宅。

▲頭前庄(團欽)：分做4-kâi門口埕，3-kâi向南，1-kâi向西，攏是團欽派下囝孫，蕭梓、清苗、新科、蕭益、如圭、如東、東鄰、愛哮、水藤ê厝宅。

▲後壁厝(團武)：分做3-kâi門口埕，攏是團武派下囝孫，昌蔭、昌添、光達、源盛、源潔、坤修、光沙、福傳、清四、清歪、成ê厝宅。

▲瓦厝底(團圍)：大門是門樓仔，三進三落，mā講做「門樓仔內底」，周圍真濟刺竹模，前後埕，正身後壁有鼓井，有臭水管味，kan-nā ē-tàng洗蕩用，團圍派下朝宰公囝孫，光貴、光寬、紹振、蕭添福、蕭添福、蕭添壽、蕭添猷、添露、有朋、炳模、順恒、順孝、顏淵、順來、順意、順強ê厝宅。

▲大欉榕仔(chhêng-á)：佇東爿庄外水田溝仔邊，足大欉，分椏真濟，cha̍h日頭光線真闊，熱--人閃涼ê好所在，peh上樹頂有真濟樹椏ē-tang hàiⁿ-tong-chhiu，ē-tàng theⁿ-leh睏，可惜tī 199?年著病枯焦死--去。

▲四跤涼亭；Ún-jī(允藝)ê店仔；Chàn-sêng-á(清在)ê店仔；Làu-tó͘-se--a(邱平福)ê店仔。※按「團」--字世系住宅來紹介：▲大房團周：缺

▲二房團欽：範圍上闊。竹圍仔西爿內底；荖宅仔；頭前庄；順良(木泉)兜；接生/羅漢/壬辰兜；慶樑維欽/純清如泉兜；日性/清俊/清雲/連坤/連魁兜；清課/耀輝兜。

▲四房團環：宗標/進成/輔港/山河/家丁兜；東波/家定/福財/火聖/萬松兜。

▲五房團清：缺

▲六房團武：後壁厝。

▲七房團亨：缺

▲團貴：竹圍仔東爿內底，貴川、明鏡、明利、清標、清林、江榜、水溝、家舜、家再。

▲庄北員集路邊kap社頭隔界：蕭紹賡(昌薰)/蕭敦仁兜。

▲庄南東爿圳溝邊：蕭曰亨/倫振/倫恭兜；蕭興科/樹木兜；蕭昌甲兜。

▲外姓：黃文/國彥兜；黃溝/黃輝兜；紀清水兜；謝--姓兜；張--姓兜；邱--姓兜。

※心適ê唸謠：鬥句好唸，記人名好步數，無歹意。

▲唸謠一：東波--e生家定，萬松--ē生石鐘，石鐘真chiâⁿ khong，火性--è生阿宗，阿宗臭耳聾，日性--è生汝南，汝南--ē真chiâⁿ 媠，阿魁--e生木水(春行)，木水--è真chiâⁿ khong，坤--e生茂聰，茂聰--e皮真韌，清寅 (清雲) --ē生萬順，萬順--ē真無閒，俊--è生嘉明(吉明)，嘉明--ē愛食肉，賣豆油--ē叫阿甲。----記12鄰人名。

▲唸謠二：Chhó(草)、Chài(再)、Toān(緞)、Iām(炎)、Thiam(添)；かつ(和四)、まつ(五郎)、Tiong-kài(忠介)、Hiân(阿賢)、Ban(阿屘)。----記choân--ē(蕭如泉)11个囝名。

▲唸謠三：Hoe(花)、Toān(緞)、Ko(興明)、Eh--è(嘉惠)、Gián(研)、Chhó(草)；Hoe、Toān、Bêng、Eh--è hoán-hêng。----記蕭添福ê囝名。※仝名區分：庄內仝名bē少，需要無仝ê稱呼。竹圍仔Súi vs大頭仔Súi；牛車福vs碗粿福vs矮仔福；豆油膏甲vs榕仔跤甲vs大舌甲；竹圍仔明vs後壁厝明vs khong明/火明--ē；牛車輝vs黃仔輝vs紅猴輝；竹圍仔溝(水溝) vs黃仔溝vs缺嘴溝；紀丁ûi vs黃仔ûi；竹圍仔標vs宗標--e；長腰科vs 榕仔跤科--e vs紅毛仔科。

※崁頂庄名人：

▲蕭紹賡(昌薰)：蕭敦仁ê老爸。日本時代做過卓乃潭區區長、書記、街庄長，崁頂蕭姓族長。

▲蕭敦仁：1907年總督府國語學校畢，做過彰化縣農會理事、臺中州員林郡田中庄長、臺中田中信用組合長、卓乃潭區長、田中庄長、臺灣省臨時省議會第一屆議員。田中鎮農會創辦人。1917年授紳章。

▲蕭鴻：做過田中鎮第二、三屆鎮長。

▲蕭金印：做過田中鎮代表、代表副主席。

▲蕭振瓊：做過田中鎮代表。

▲蕭貴川：煤礦業董事長。

▲蕭輔港：田中代表會秘書。

▲蕭令：電信局局長。

▲蕭文典：田中鎮公所。

64年前ê舊相片

1950年田中第三國民學校2年2班，學年結束翕相記念，學校長陳成章先生，級任盧淑琬老師，班長蕭平治，副班長陳碧雲，學生kan-nā陳碧雲有穿鞋，chhun—e 攏褪赤跤。hit-chūn男女受受不親，有一擺上課圍圓箍仔手牽手，班長好運牽著副班長，感覺足gāi-gio̍h足歹勢。時間過了真緊，已經來到2014年，猶真懷念hit-pái ê 手牽手。

讚

19560900_蒜仔炒煙腸 Lah-jih_20140217

 19560900_蒜仔炒煙腸    Lah-jih_20140217

Eng-àm食飯桌頂拴出1盤「蒜仔炒煙腸」，看著歡喜kah，飯未貯先gia̍h箸ngeh一塊蒜片窒入喙孔，蒜薟lām煙腸味，足熟似ê滋味浮出記智，感恩ê心思透濫幸福ê享受，koh-chài 一擺kā牽--e講起hit-tang-chūn散赤人chah飯包讀冊ê日子。

1956年坐火車去彰化讀冊hit 三冬，大嫂二嫂常常為著Lah-jih飯包菜leh激破頭殼，米甕有米無米是查埔人代誌，三頓配鹹作料來路mā是查埔人負責，tī hit个三頓菜脯醃瓜仔hām菜園四時青菜年代，向望boeh有啥物魚臊肉類thang食，to̍h-ài期待年節抑是精牲仔tio̍h-che。俗語講「作料夠，m̄是新婦gâu」，阿爸han-bān，作kah 4分厝跤水田，人工、肥料、納租chhun--落來è kan-nā是米母仔--niā-niā，boeh買豬肉魚臊，to̍h-ài儉腸neh-tō͘ chiah ē-tàng趁年節拜拜上街去買，平常時仔khah買mā是肥chut-chut ê肥豬肉，用來chòaⁿ油，有油煮食chiah-ē芳，無油無sian ê羹頓食khah bē-lo̍h飯，m̄-chiah阿嫂煮食足致重hit-kâi豬油筒仔，豬油筒仔若有油，to̍h m̄驚Lah-jih chah飯包無配鹹，鹹tôa-á甕壁邊排規列，鹹瓜仔、爛瓜仔、chhè瓜仔，久年老菜脯、新曝菜脯、菜脯米仔，醬筍仔，菜頭long-á，猶有高麗菜、花仔菜菜乾，匏仔乾，鹹菜總仔，應有盡有，chhin-chhâi提來炒，有油to̍h-ē芳，有鹹koh有芳自然配ē lo̍h飯，che是較捷chah ê飯包菜。

平常時nā有好空ê配鹹，to̍h是阿嫂hō͘ Lah-jih ê疼心，he雞卵鴨卵鵝卵孵了無形--ē，提來煎菜脯卵上kah味，做飯包菜足kah意，雖罔菜脯hē真濟，煎bē規塊，有卵芳to̍h食kah suh-suh叫，記得hō͘阿嫂上無變步ê時，只有chah 1粒sīⁿ kah鹹tok-tok ê芋仔囝，死鹹死鹹鹹kah像leh攪鹽，油筒仔無油，青菜koh bē chah--tit，新婦khah-gâu mā無才調。上特別食了上爽快，to̍h是cheng-seⁿ-á tio̍h-che bē活--à，tio̍h thâi來炒豆醬仔，鹹koh芳，食落喙免算塊，算是siōng-kài-chán ê飯包菜， 每擺看著tok-ku雞仔tī壁角gìm--leh gìm--leh，Lah-jih to̍h歡喜tī心內，chit-chūn想起來實在hiau-hēng tāi。若是年節有thâi cheng-seⁿ-á、買魚肉，阿嫂lóng-ē儉一寡起來囥，等候開學kā Lah-jih加菜，有油臊hit粒飯包，免等到中晝12點，tī 10點外hit个歇睏時間已經sut了了。

記智上深to̍h是「蒜仔炒煙腸」ê飯包菜，大兄過年轉--來，特別tī嘉義買1斤煙腸thang圍爐，che是貴蔘蔘稀罕物，有魚有肉有煙腸ê過年暝，免講mā知影phang-phài無teh比，he煙腸是1片1片kah蒜仔青，蒜仔青是生蒜，囡仔人bē-ài食，kan-nā食煙腸to̍h thiòng-kah跤鬆手弄。過年了後liâm-mī to̍h-koh chah飯包趕6點5分火車讀冊ê日子，開學第一工透早tī灶腳phīⁿ-tio̍h煙腸芳味，阿嫂講「ngeh 1片配飯to̍h好，chhun--e thang做飯包菜！」原來是蒜仔炒煙腸，半條煙腸炒1大盤蒜仔片，hit工未到12點to̍h kā飯包kiat kah清氣liu-liu，因為飯包內有蒜仔片lām 4-5片薄薄煙腸。原來hit斤煙腸阿嫂thiau-kang儉2-3條hō͘ Lah-jih做4-5工ê飯包菜。

半世紀前ê往事，蒜薟味lām煙腸芳，熟似ê滋味，sio-lo̍h ê記智，大嫂、二嫂，Jih--è下昏暗真思念你！