2015年3月31日 星期二

古物仔_走街生理篇_phah黃麻索:陳慶芳收藏/蕭平治翕相

古物仔_走街生理篇_phah黃麻索:陳慶芳收藏/蕭平治翕相
三兄弟股一條瓊麻索  Lah-jih_ 2007.07.15/2015.03.30修改
瓊麻就是龍舌蘭,俗稱樹絲,因為伊樹葉ê纖維,韌koh m̄驚水浸,提來股索仔,堅固耐用,是討海人ê重要工具,南部出產kài濟。用瓊麻股索仔是m̄-bat看--過,若用黃麻絞索仔,m̄但bat khuàiⁿ,囡仔時代mā bat kap大人絞過,不過絞--è是兩股--è,絞三股--è就無hit个才調。
過去生活tī庄腳ê作穡人,擔擔ê畚箕、米lûa ài縛索仔,載貨、縛柴ài用索仔 liāu,牽牛、駛田kha車、捆豬、拖車…步步lóng tio̍h用索仔,索仔tī田庄所在是生活必須品。細條索仔用雙手撚,抑是tiàm腳頭u搓就ē使得,大條索若無用家私頭仔來股,是無可能ê代誌。過去作田人若有閒工,就三五個招--leh,互相tàu-saⁿ-kāng,phah幾條仔索仔囥leh thang用。
股索仔ài用絞索仔機,he是一套用木材做ê工具,前車是四角型ê框架,kah-tiàm椅條頂,有三kâi孔,穿三支ㄣ字形ê鉸仔,前面ē-tàng結索仔,後面用一塊竹phòe鑽三kâi孔,拄好lop-tī三支絞仔,thiòng-á三支同齊股tín動;後車kan-nā一支柴柱,半人koân ê所在mā戳一孔,仝款穿一支ㄣ字形ê絞仔;另外有一粒羊仔頭形ê tēng柴,刻三條溝,beh hō͘三股ê黃麻khùa tī溝內,tsiah ē-tàng平平順順、pêⁿ-pêⁿ正正股成一條索仔。
股索仔 tio̍h-ài三个人,一个hūaⁿ前車,顧hit三支絞仔 ê運轉,絞正絞,一个hūaⁿ後車,用倒手挽hit支柴柱hō͘固定,用正手股絞仔,mā是絞正絞,hūaⁿ羊仔頭tsiah是師傅,索仔絞會súi lóng tio̍h靠伊ê功夫kap指揮。
Tsit-mái開始bueh絞索仔--lò͘:代先先股3條黃麻紗仔,1條兩丈半,1條五丈長kā拗做2條。1人huāⁿ前車絞1支絞仔(ká-á),勻勻仔絞,1人送黃麻皮hō͘師傅,師傅tsiah-kā黃麻皮suah做黃麻紗仔,黃麻皮需要頭kah尾插,前後相tshím撚hō͘相食,師傅著斟酌大細皮,1皮1皮suah,suah hō͘ kui條紗仔pêⁿ-pāng平大箍。
3股黃麻紗仔股好,1股1股縛tiàm前車三支絞仔,用1支戮3-kâi孔ê竹爿套入3支絞仔柄,thióng-á 3支同齊絞振動。
3股黃麻紗仔另外hit頭,做伙縛tī後車ê絞仔,huāⁿ後車需要力頭飽足,馬勢koh徛ē在ê人來huāⁿ,伊倒手手曲kā後車khi̍t hō͘在,倒跤仝款kā後車配合倒手khi̍t hō͘在定,正手準備絞絞仔。huāⁿ羊仔頭ê師傅,kā羊仔頭套入 3股黃麻紗仔中間,正手攑羊仔頭柄,倒手需要斟酌索仔股ê變化做修正。
前車後車羊仔頭攏準備好勢,師傅1聲「開始」,前車後車4支絞仔tsiâu振動,絞真緊,羊仔頭ná徙振動,he徙過所在已經是三股黃麻索,hūaⁿ羊仔頭ê師傅順索仔股一直倒退lu,後車一直股一直hō͘索仔 khiú晉前,手挽腳kīng,驚做索仔傷līng,索仔若傷līng,絞--起來ê索仔一定phàⁿ-phàⁿ,bē堅固耐用。後車ná-ē行進前--neh?因為索仔愈絞愈ân suah愈絞愈短,本來是兩丈半,絞好可能剩(sīn)兩丈兩尺,kiu三尺算真正常。一條絞好tsiah-koh絞一條,beh大beh細,由在師傅斟酌suah黃麻,黃麻若suah濟,索仔自然大條,黃麻若suah少,索仔當然細條。
若是絞兩股ê索仔就較簡單,可惜bē勇mā較pháiⁿ看頭,he是師仔工學絞,絞tshit-thô--ē。「三兄弟股一條瓊麻索」,兄弟若有和協會齊,he是真簡單,團結就是力量,看田庄人絞索仔就是上好ê證明,早當時阮田庄兄弟leh絞索仔,無一定是親兄弟,卻是合作團結力量無teh比,因為庄內ê厝邊隔壁lóng若親堂兄弟,過去ê庄腳人,m̄免去強調啥乜『敦親睦鄰,守望相助』,庄頭ê安全就顧kah好勢好勢,時代leh變,社會一直變遷,古早味,古早ê人情味,使人懷念。
△固定tī椅條頂ê前車,kan-nā 2孔2支絞仔,可能是phah草索用,抑是phah兩股黃麻索仔。
△ㄣ形ê絞仔,一爿是絞仔柄,一爿ē-tàng liù黃麻紗仔頭。
柴柱形ê後車,中央有2孔,適合人ê身材躼矮。
△後車、絞仔、羊仔頭。
羊仔頭有三條深溝,分別套3條黃麻紗仔,phah三股索仔,若kan-nā套2條黃麻紗仔,to̍h phah兩股索仔。
△蕭平治老師示範絞後車。

2015年3月29日 星期日

古物仔_走街生理篇_補鼎:陳慶芳收藏/蕭平治翕相

古物仔_走街生理篇_補鼎:陳慶芳收藏/蕭平治翕相
▲食飯皇帝大,鼎是煮食ê家私,有大鼎、細鼎、銅鼎仔、鉎鍋,其中大鼎上重要。古早家庭頭喙濟,而且差不多逐口灶攏有飼豬,若bueh煮飯,煠豬菜,lòng tio̍h大鼎來煮來煠。古早大鼎是鉎仔翻砂鑄造,因為驚鹹驚溼,tsiâⁿ-gâu tsiù-tshng(蛀穿)tsiù-khang(蛀孔)。
大鼎tī大灶煮食,用火柴草絪hiâⁿ火,hiâⁿ久to̍h-ē kha̍h tsi̍t-tîng火塵lo͘,需要用煎匙剾清氣,而且鼎底mā時常用煎匙thuh鼎疕、thuh油sian,tn̄g-tio̍h剾破鼎thuh破鼎,m̄甘hìⁿ-sak、無錢買新鼎ê時陣,to̍h等待補鼎補雨傘--è來補。補鼎tī 1960年代進前是庄跤所在真捷看著ê行業。
△補鼎ê家私頭仔:風櫃,鐵板碻仔(thih-pán khia̍uh-á),火鋏,鉎仔杮(seⁿ-á-phuè),火匙,鐵撼仔(hám-á),特製烘爐,塗炭、火炭。
風櫃正面,有風櫃柄,用手搝(giú)--一下 捒--一下to̍h-ē 抽風捒風,kā烘爐火煽炎,溫度真懸,ē-tàng kā鉎仔熔化(iûⁿ-huà)做液體。
風櫃ê坦邊(thán-piⁿ)出風孔倚tī烘爐喙。
風櫃ê後面有入風喙,內面有活塞(ua̍h-sat),抽ê時風ùi入風喙進入,sak ê時,活塞窒(that)牢,風對出風孔tuā-káng歕風。
鐵板碻仔(thih-pán khia̍uh-á):
4-5塊鐵枋穿做伙,用手hàiⁿ振動發出「lia̍k lia̍k lia̍k lia̍k 」鐵相摃ê聲音,表示「補鼎--è」來--ā,順紲通知補鼎所在。
△火鋏(hué-ngeh):夾塗炭、火炭,撓塗炭火、火炭火。
△火匙(hué-sî):貯熔化ê鉎仔液體,準備補鼎。
△鐵撼仔(thih-hám-á):鼎tsiù-tshng(蛀穿)看起來無大,蛀害範圍可能較大,需要用撼仔kho̍k-kho̍k hám-hám--leh,kā蛀害部份敲掉tsiah來補,按呢補--起來ē較勇。鼎補好,ē留一寡鐵庀仔,mā需要用撼仔輕輕仔kā摃掉摃平。




補鼎過程:
囡仔時代bat看過,ē記得是按呢:
特製火爐一爿有耳,一爿是sui,蛀孔所在處理好勢,to̍h用火匙sîn火爐內已經熔化ê鉎仔液體,用一塊ná布條所tān ê物件,kā適量ê鉎仔液體ùi鼎外面捒入,然後tsiah ùi鼎內用布條所tān ê物件kā tshi̍h-uá tshi̍h-ân,等溫度冷去,to̍h ná像lúi釘lúi-ân-ân,了後tsiah-koh用撼仔kòng-kòng 敲敲--leh,用鋸鑢修修--leh to̍h算完成。
※補鼎師傅到庄頭,ē用鐵板碻仔(thih-pán khia̍uh-á)通知逐家來補鼎,喝聲「補鼎續火--eh!補鼎續火--eh!」,mā有he兼leh補雨傘--è,to̍h喝講「補鼎補雨傘--ō͘!
※俗語:「愈補愈大孔。」to̍h是ùi補鼎ê方法來--ē。

「補鼎續火」有意思,我bat聽著--è是「補鼎、補雨傘--o͘!」

2015年3月27日 星期五

古物仔_走街生理篇_印塗墼:陳慶芳收藏/蕭平治翕相

古物仔_走街生理篇_印塗墼:陳慶芳收藏/蕭平治翕相
▲古早庄跤人起厝有磚仔厝、竹管厝、塗墼厝,磚仔厝較勇較堅固,m̄-koh磚仔tio̍h-ài開錢買,散兇人to̍h剉家己厝後刺竹來起竹管厝,竹管厝lāng風,壁路全縫(phāng),寒--人寒死人,有人ē挖塗印塗墼來起塗墼厝,tsa̍h風koh-ē防niau鼠蟲豸侵入,寒天燒絡,熱天比磚仔厝較涼。
塗墼(thô͘-kat)原料是塗+稻稿(切短)+粗糠攪水,lām-lām 做伙拌拌(puān-puān)hō͘ tsiâu,囥入去塗墼模揤hō͘實(tshi̍h hō͘ tsa̍t),軟日曝焦to̍h是一塊塗,比磚仔加真大塊,m̄免磚仔窯燒--過。稻稿、粗糠、水免本免料,kan-nā需要人工kap印塗墼ê家私(工具)。
塗墼驚澹驚濕,所以塗墼厝外壁水裙所在需要加一重紅毛土,風頭壁閣較需要規個壁堵抹一重紅毛土。
印塗墼(ìn thô͘-kat)ê家私(工具):
1、塗墼模:分四角形ê柴框kap底座,kap座有陰陽溝槽bā-bā sio-kap。底座囥塗跤,柴框khǹg-tiàm底座面頂,然後hē塗墼塗,用一支柴撼仔(tshâ-hám-á)撼hō͘沉實(tiâm-tsa̍t),tsiah-koh用鋼線刀ùi面頂liô--過,捧去平坦門埕,因為底座有柄,一手攑柄,一手tháⁿ柴框,用力píng過來khap-tiàm塗跤,輕輕仔kā模框提起,軟日曝焦to̍h是一塊塗墼。
2、柴撼仔(tshâ-hám-á):塗墼塗khǹg tī塗墼模內面,需要摃hō͘沉實(tiâm-tsa̍t)。
3、鋼線刀:一支ná牛擔ê柴弓仔,雙頭縛一條鋼線,需要king ân-ân(絚絚),ùi塗墼模頂面kueh--過[刮過],塗墼ê頂面to̍h-ē平坦(pêⁿ-tháⁿ),塗墼塗猶未焦,tsit條鋼線to̍h ná像刀kā liô--過(liô--過)。
4、鐵質鍬棓(tshiau-pue):塗墼(thô͘-kat)原料是塗+稻稿(切短)+粗糠攪水,bueh lām-lām 做伙拌拌(puān-puān)hō͘ tsiâu,需要力頭,著雙手攑鍬棓較好做工。



△塗墼有大細塊,塗墼模mā有大細kâi。


△一種造型ê家私著講「撼仔(hám-á)」,m̄是摃槌仔。


鋼線刀、柴撼仔、鍬棓、塗墼模底座。(蕭平治號名)


2015年3月22日 星期日

古物仔_走街生理篇_磅米芳:陳慶芳收藏/蕭平治翕相

古物仔_走街生理篇_磅米芳:陳慶芳收藏/蕭平治翕相
--è炒米 (流傳唸)

--è 炒米香,--ē 韭菜,--e chhiāng -chhiāng --è抄米粉。五--ē 五將軍, --è 六囝孫,--èkûn --è bueh 分一半 --è九嬸婆--è kòng
拍你千拍你萬,拍你一千khòng萬,
tshiu tshiu tshiu,b
ē ioh 輸m̄願,ī 輸起he-ku, m̄願,起he-ku,bueh來去投 師。

▲炒米芳(tshá-bí-phang)、米芳(bí-phang)kap磅米芳(pōng-bí-phang)
古早作田人ê囡仔平常時罕得有四秀仔啖糝,大人to̍h-ē kā粟仔抑是白米tiàm大鼎炒hō͘熟炒hō͘煏開,體積增加無濟,按呢叫做炒米芳、炒米仔,sám一寡鹽花仔to̍h鹹芳仔鹹芳,食--起來tīng-tīng酥酥芳芳(tīng-tīng so͘-so͘ phang-phang),囡仔人iau-sâi「無魚,蝦mā好。」雖罔tio̍h揀粟殼,mā是食kah歡喜tang-tang。
生理人kā炒米芳做專業ê生產,摻糖切塊包裝to̍h是商品,叫做「米芳」。
磅米芳是經過密封ê壓力鐵爐加熱加壓,然後敨放產生體積膨脹加真大粒,食--起來軟軟鬆鬆。生理人kā磅米芳做專業ê生產,摻糖切塊包裝to̍h是商品,叫做「磅米芳」。
所以「炒米芳」「米芳」「磅米芳」有無共款ê意思。
△磅米芳ê家私:壓力鐵爐,火爐,鼎,網仔袋,菜刀,範仔(pān-á)。
壓力鐵爐ê絞仔(ká-á)kap磅表:用絞仔絞絞hō͘轉踅,加熱tsiah-ē平均齊勻(tsiâu-ûn);磅表ē-tàng了解爐內熱度、壓力。
△前面是壓力鐵爐爐喙,phah開囥入白米,然後鎖絚(ân),tsiah開始加溫。


△鉛線網仔是收集磅開ê米芳。當鐵爐壓力達到ē-tàng開磅ê時陣,磅米芳ê司傅to̍h-ē大聲喝「bueh磅--ā-ō͘!」徛tī邊--a ê囡仔隨時個個耳孔ng--leh「póng」一聲,白泡泡ê磅米芳已經貯滿鉛線網仔。
△大跤面桶用來tshiau米芳kap糖膏。mā ē-tàng摻熟塗豆、痲仔、瓜子無仝口味。 
△菜刀用來切磅米芳,需要柴範仔(pān-á)切hō͘平大塊。

2015年3月18日 星期三

古物仔_走街生理篇_捾箱仔掠水蛙:陳慶芳收藏/蕭平治翕相

古物仔_走街生理篇_捾箱仔掠水蛙:陳慶芳收藏/蕭平治翕相
【2015/5/5 刊載臺江臺語文學季刊第十四期】
捾箱仔(kuāⁿ-siuⁿ-á):
捾箱仔(kuāⁿ-siuⁿ-á)是一種送料理食物ê柴箱仔,有蓋thang khàm bē 坱埃(ing-ia),有捾耳(kuāⁿ-hīⁿ)thang 捾方便外送。
較早麵店抑是菜店公共食堂,人客來食料理,若是店內食桌,走桌--è ē用桶盤送菜較有衛生氣質,若是tn̄g-tio̍h外送,to̍h需要用tsit-lō捾箱送菜,m̄-nā衛生閣ē淡薄仔保溫。
捾箱1跤ē-tàng囥2-3碗公料理,燒燙燙ê燒湯有人ē-tàng一手捾1跤,距離遠--ē有人kō͘騎鐵馬送較緊,he走桌--è一手扞馬角仔,一手捾捾箱仔,一路彎彎斡斡送到人厝兜,實在有夠khiàng。ē記得細漢時,bat tī 田中(Tshân-tiong)街仔看著一个走桌--è,騎鐵馬,一手捾1跤,兩手捾2跤捾箱,無扞馬角仔ē-tàng送貨,閣較厲害。
 ▲掠水蛙(lia̍h-tsúi-ke/lia̍h-súi-kue):
【2015/5/5 刊載臺江臺語文學季刊第十四期】
古早田園罕得tsuāⁿ農藥ê時代,早冬稻仔挲第三遍草了後,田--裡、水溝、水窟仔一四界,水蛙to̍h滿滿是,有水蛙仔囝,有新仔,有老水蛙,「ia̍p ia̍p ia̍p ia̍p」「o̍p o̍p o̍p o̍p」「ō͘p ō͘p ō͘p ō͘ptī boeh暗仔時歌聲唱bē離。
庄腳所在,四邊lóng是田,放學後,歇睏日,是阮庄腳囡仔流浪放蕩好時機,tsit个時期上蓋好sńg ê齣頭to̍h是掠水蛙,空手hop,用水蛙釣仔釣,mā有用竹爿仔tiàm溝仔水邊sut。溝仔水邊草ōm-ōm,水蛙上愛覕,竹仔枝攑leh烏白sut,to̍h有he注死ê水蛙跋落水底giān-giān-bē-siau-kiān,趕緊抾入水蛙袋仔內。

講著掠水蛙、釣水蛙,to̍h-ài分年紀來講起,5-6歲7-8歲ê細漢囡仔khah-hìng用hop--è,hop he細隻水蛙仔囝,tiàm he焦水ê稻仔園抑是無水ê菜園,水蛙仔跳,囡仔to̍h tuè-leh跳,伸手hop,hop--tio̍h to̍h掠來耍tshit-thô,無愛耍to̍h放伊去。
大約3-4年ê學生囡仔ē開始學人釣水蛙,厝內便便ê黃麻骨仔攑--一支,尾仔縛1條黃麻絲,黃麻絲另外彼頭縛1尾杜蚓仔(tō͘-ún-á/tō͘-kín-á)to̍h ē使得釣。揀tī下晡時仔日頭較軟ê時,囡仔伴招--leh,水蛙釣仔攑--leh,水蛙袋仔提--leh,做伙厝邊田園釣水蛙tshit-thô,真正是釣tshit-thô,因為bē-hiáu釣,水蛙釣仔hàiⁿ--出去,m̄是hàiⁿ m̄著所在,to̍h是水蛙m̄來咬,抑是釣著水蛙suah hàiⁿ bē落去水蛙袋仔,罕罕釣著一隻大隻--è,逐家to̍h暢kah雀雀趒,好sńg第一,釣有釣無『沒關係』。
5-6年ê學生囡仔,開始有巧氣,ē去想著「bueh按怎樣仔tsiah-ē釣著真濟水蛙」tsit-ê問題,水蛙釣仔ē-hiáu取he 扭掠好攑ē-sìm ê桂竹仔枝,水蛙袋仔ē用肥料袋仔thīⁿ--ē 較kah手好提,袋仔喙無愛siuⁿ闊,布袋仔m̄-thang siuⁿ淺愛深,特別hit條釣線一定用nńg-lio̍h ê棉紗線,長度著愛tú好。雖罔Lah-jih mā是5-6年ê學生,tse釣水蛙是有較頇顢,看人水蛙釣仔線一hàiⁿ出--去,to̍h聽著「咬--leh--ā!咬--leh--ā!」he水蛙釣仔sìm--leh sìm--leh sìm 4-5下,隨時正手攑懸tioh一下,倒手水蛙袋仔伸--出去,彼隻水蛙已經跋落水蛙袋,實在神奇。原來hit隻水蛙kā水蛙仔囝釣餌咬ân-ân,後腿一直liòng,死m̄放,siáⁿ知「tshőp~」一聲,已經跋落水蛙袋,釣水蛙--e kā袋仔搖--2下,知影水蛙喙已經放掉釣餌,水蛙釣仔to̍h隨閣hàiⁿ出--去 繼續釣。

水蛙是食動物,甚至ē食同類水蛙仔囝,大隻食細隻,所以釣餌著用水蛙仔囝,tsiah ē-tàng釣著新仔ê大隻水蛙,水蛙腹肚若iau to̍h親像大食壁虎,咬著釣餌to̍h m̄知影thang放,釣水蛙ê高手to̍h是有才調kā著吊ê水蛙,kā水蛙釣仔hàiⁿ--一下to̍h-ē準準準lok入水蛙袋仔,罕得落勾ka-lauh--去。日頭落海前ê一點鐘,有人已經釣bueh 1-2斤,in-tau明仔載ê羹頓to̍h加真phang-phài,水蛙仔肉tok醃瓜仔,鹹芳鹹芳,加真配ē落飯。釣無夠一盤水蛙仔肉tok醃瓜仔,to̍h明仔載繼續釣,boeh暗仔釣--è kā關tiàm醃缸內抑是大跤水桶,有水thang泅to̍h bē死,總--是著khàm hō͘密,若無明仔載天光to̍h-ē走了了跳kah無半隻。
Tī hit个散赤欠油臊ê年代,庄腳散凶人掠水蛙釣水蛙來做羹頓,tsiâⁿ做一項tshit-thô、技術、煮食ê生活文化。因為kō͘釣ê水蛙多數是新仔m̄是kài大食,所以刣水蛙kap煮食to̍h真簡單,厝後是刺竹模,竹錦仔全全刺,削一支有尖刺ê竹錦仔,ùi水蛙腹肚鉤開,liû出腸肚,然後閣lām醃瓜仔做伙tok-tok--leh,囥落鼎內猛火炒熟to̍h是一盤山珍海味。

猶有一種專門掠水蛙leh賣ê水蛙司傅[達人],in專門掠he大隻ê老仔水蛙kó͘,賣hō͘麵店飯店做料理。he掠水蛙司傅真正是老水蛙kó͘ ê剋星,頂年無hō͘人釣--著ê新仔水蛙,已經pìⁿ-tsiâⁿ老經驗ê老水蛙,日--時無隨便出門,lóng是bih-tiàm暗毿涵空內,掠水蛙--e既然是司傅,當然了解水蛙習性,in利用暗時出門,tsah 1葩有安反射凹鏡(lap-kiàⁿ)掠水蛙用ê電塗火,1-kâi竹篾仔pīⁿ ê水蛙tsho̍p仔,腰身揹一跤水蛙籗仔(khah-á),田園四界潦,耳孔聽,電塗火tshiō,目睭看,he電塗火光iāⁿ-iāⁿ,光線閣集中,田裡ê水蛙,便若去hō͘ tshiō--tio̍h,to̍h gāng-gāng m̄敢振動,水蛙tsho̍p仔一个tsho̍p,伸手掠to̍h是一隻老水蛙kó͘。

另外一種掠水蛙,方法有較夭壽骨,無用釣mā無用tsho̍p,是用tng--e,削一支竹爿仔做杙仔,插tiàm老水蛙kó͘出入ê所在,縛一條細條索仔,索仔另外彼頭,縛釣魚ê魚鉤仔,魚鉤仔鉤釣餌,一擺插幾若支,等待水蛙來著吊,今仔日放釣仔,明仔載來收成,乖乖,mā真hiau-hīng,著吊水蛙去hō͘魚鉤仔倒鉤齒仔(tò-kau-gí-á)鉤牢--leh,sian跳mā pak bē-lut。

Tsiâⁿ久m̄-bat閣看著人leh釣水蛙,因為農地ê污染,bueh釣mā無hit-lō水蛙thang釣,kan-taⁿ tshun懷念。
△掠水蛙ê家私:電塗火kap水蛙tng-á。
掠水蛙ê電塗火:電塗tiān-thô͘。[電石。不純的鈣化物,可以和水作用產生乙炔氣,成為高溫火焰的燃料,用來銲接或切割。]

△水蛙tng-á:
△ 水蛙tng-á ê索仔一爿縛tī竹爿仔,一爿縛魚鉤仔:

2015年3月15日 星期日

古物仔_走街生理篇_報馬仔:陳慶芳收藏/蕭平治翕相

古物仔_走街生理篇_報馬仔:陳慶芳收藏/蕭平治翕相
▲報馬仔(pò͘-bé-á):
報馬仔是媽祖出巡繞境踅街陣頭之一,擔任通報信徒預備接駕參香拜拜ê特殊人物,打扮特別笑詼。
頭戴清朝官帽,掛無仁烏框目鏡,留兩撇喙鬚,身穿鋪棉裘,倒跤穿草鞋pih褲跤貼膏藥,正跤褪赤跤,腰結薰袋kap薰吹,擔一个擔,頭前是銅鑼,後壁掛豬腳韭菜酒壺,閣紮一支紙雨傘,行tī陣頭上頭前,媽祖婆--ā猶未到,報馬仔銅鑼聲已經khuaihⁿ khuaihⁿ khuaihⁿ khuaihⁿ 、khuaihⁿ khuaihⁿ khuaihⁿ khuaihⁿ 報hō͘善男信女眾人知。
△鋪棉裘(pho͘-mî-hiû):3月23日(saⁿ-gue̍h jī-saⁿ)媽祖生,天氣猶真涼冷,需要穿較燒--leh。
△ 鋪棉䘥仔(kah-á),需要內裡,雙層寒天衫內面鋪棉仔。
△銅鑼、目鏡、喙鬚:目鏡、喙鬚是打扮用--ē。目鏡免鏡仁,喙鬚kap鼻仔黏做伙。
















※細漢讀冊時代,若有同學走去kā老師偷講he無愛hō͘老師知影ê 消息、tāi-tsì,m̄管是好代誌抑是歹代誌,阮lóng-ē講hit个同學是「pò-pé-á」。hìng做「pò-pé-á」ê同學,逐家攏真無愛kap伊鬥陣,驚做祕密hō͘伊漏洩。「pò-pé-á」to̍h是華語『打小報告』ê意思,mā有人講做「jiàu-pê-á」。台語jiàu-pê-á原來是jiàu-tsiūⁿ[抓癢]ê家私,竹仔ut--è,華語講做『如意』『不求人』。「pò-pé-á」「pò͘-bé-á」互相有關連,m̄-ku含意無啥仝款。




2015年3月13日 星期五

古物仔_走街生理篇_寄藥包仔:陳慶芳收藏/蕭平治翕相

古物仔_走街生理篇_寄藥包仔:陳慶芳收藏/蕭平治翕相
▲「阿爸,我leh頭殼痛!」→去壁堵頂「日本婆仔標」藥橐仔tháu 1包感冒藥來食。
「阿爸,我leh腹肚痛!」→去壁堵頂「日本婆仔標」藥橐仔tháu 1包胃散來食。
「阿爸,我leh流鼻血!」→去壁堵頂「日本婆仔標」藥橐仔tháu 1包感冒藥來食。
1950年代,壁堵時常吊4-5橐藥橐仔,lóng是寄藥包仔--è寄--è(寄賣)便藥包仔,有用tsiah納錢。寄藥包仔--è一個月來一逝(tsi̍t-tsuā),點算數量收錢,順紲增補。感冒藥、咳嗽藥、胃散、止痛散、五分珠、軍露丸、萬金油、臭藥丸仔⋯應有盡有,一味3包5包寄,捷用寄較濟,無用寄較少。細漢時常流鼻血,「日本婆仔標」感冒藥食上濟,做衛生兵tī藥房合藥仔,tsiah知hit味酸酸澀澀ê滋味,原來to̍h是アスピリン/asupirin/阿斯匹林。
△寄藥包仔ê紙橐仔kap便藥包仔:
 △寄藥包仔ê紙橐仔(正面):tshng一條耳仔thang吊tiàm壁頂ê釘仔。
強身報國 生產報國
仁光:專用商標
台灣省政府衛生處許可
賣藥元祖 長安堂配置部
藥包仔ê紙橐仔(正面):
安住製藥廠
台灣省政府衛生處許可
高級藥方功效確實

△便藥包仔:消炎寧(片)、止痛散、愛治風(12片)、痢安(膠囊)、小兒咳熱散、萬仁油。
 △藥包仔ê紙橐仔(倒面):
預藥個數記:主治功效、方名、日期,單價、數量。
食物相剋圖表。

藥包仔--è出門放藥仔揹ê帆布揹仔
寄藥包仔--è來到客戶厝內,來--者是客,斟茶款待,點一支薰,phò-tāu--幾句--à,壁頂藥橐仔提--落來,tiàm桌頂tiàm眠床頂,1項1項點,1包1包算,感冒藥銷較濟,加添10包,這胃散已經寄2-kó͘月,kā你換新--e,tsit個月hō͘你開15箍to̍h好,平安是福,恭喜。帳記好,錢銀mā清楚,「taⁿ我來走,多謝!」
Tse藥包仔ê先生,斯當時bē-su是庄腳人ê醫藥顧問。
藥包仔ê藥櫥仔:可能是銷量較濟ê用戶,藥廠特別送--è。

2015年3月11日 星期三

古物仔_走街生理篇_往診抾囡仔喙齒痛:陳慶芳收藏/蕭平治翕相

古物仔_走街生理篇_往診抾囡仔喙齒痛:陳慶芳收藏/蕭平治翕相
▲生老病死人生過程,紅嬰仔出世ê生,老耄(lāu-mo͘h)時ê衰荏(sue-lám),寒--著抑是食歹腹肚ê病痛,死亡前ê急救,攏足需要醫師診斷kap藥物治療。
古早步步雙腳行路ê時代,醫藥koh無發達,破病boeh hō͘醫生看,查某人bueh抾囡仔(khioh-gín-á),蛀齒bueh挽喙齒,ē-lún-tit to̍h忍,厝內便藥仔食食--leh,bē-lún-tit  to̍h趕緊去醫館叫醫生來厝--裡看症頭。tn̄g-tio̍h婦人人bueh抾囡仔生囝,to̍h直接派人去街路請產婆來厝--裡接生。m̄-tsiah古早彰化和仔先賴和醫生家己自稱「走街仔仙」,醫生產婆為著醫療,真正服務到厝,有時三更暝半mā著行,實在辛苦實在hō͘人敬佩。
醫生產婆是hō͘人感恩敬重ê行業,bueh倩醫生產婆,當然倩轎伺候,倩人力車來拖,有ê醫生產婆家己ē騎鐵馬往診,koh-khah方便快速。往診家私無方便tsah齊全(tsê-tsn̂g),總--是來到厝--裡,已經是hō͘患者減少真濟麻煩。
△這是醫生往診,產婆抾囡仔ê儀器、家私、器具。
▲腰桶(io-tháng):生囝用ê柴桶仔,古早查某人生囝是坐--leh生;mā用來kā紅嬰仔洗身軀。
▲彎盤(uan-puâⁿ):腰子形,tī外科醫療過程中暫時貯細項家私、液體抑是廢物

▲往診捾--ē 皮箱,內面囥醫療家私。
▲注射筒盒仔:囥射針、射筒、注射藥。

▲診療捾桶:消毒、診斷醫療儀器kap外用、內服藥物⋯攏tī-tsia,bē輸一間細間醫館設備,服務到位,家私拴齊備。


▲聽筒(thiaⁿ-tâng)/聽診器(thiaⁿ-tsín-khì):
△雞腸仔型是聽心跳脈搏用,一般醫生攏用會著。
△鼓吹型ê聽筒,號做 胎心音器,是婦人人(hū-jîn-lâng)有身,子宮內胎兒心跳用--ē,大頭hit爿貼佇腹肚,細頭tsit-pîng貼佇產婆耳孔。

▲頭鏡(thâu-kiàⁿ):耳鼻喉科醫生專用,套tī頭殼頂,hit个塌鏡(lap-kiàⁿ)[凹鏡]ē-tàng收集光線tshiō入耳孔、鼻孔、嚨喉詳細看清楚。tsit-kâi圓鏡是塌鏡(lap-kiàⁿ),有聚光(tsū-kng)作用,m̄是『凹透鏡』,中央有1-kâi圓孔,ē使得hō͘目睭透過tsit-kâi圓孔看過--去,另外一个真重要ê作用是,無boeh hō͘光線ê焦點集中,tsiah-bē傷著皮肉。因為有中央tsit孔,塌鏡(lap-kiàⁿ)[凹鏡]ê反射光線tsiah無焦點。

往診捾--ē 皮箱,內面囥醫療家私。

▲茶鈷:hiâⁿ燒水、滾水,產婆家己準備,較有衛生。若用煮食鼎鍋燃水,恐驚有油鉎無清氣。

▲彎盤(uan-puâⁿ):腰子形,tī外科醫療過程中暫時貯細項家私、液體抑是廢物
▲聽筒:胎心音器。

喙齒疼:喙齒疼m̄是病,疼--起來ē叫a-niâ。蛀齒蛀著齒根,喙齒搖櫓,齒根發炎,lóng是嘴齒痛ê原因,小可疼食便藥止痛,止痛無效,有時喙齒著挽掉。古早古早馬偕醫生siōng-gâu kā人挽嘴齒,挽嘴齒、治療喙齒,講著去hō͘齒科醫生看,靈魂to̍h去一半,m̄-nā囡仔驚,大人大種仝款驚kah無性命。
▲跤踏式齒科車台:tsit-mái講是「牙科治療儀」,下面ê輪仔帶動頂面ê鑽頭、磨輪。
△齒科醫生bueh kā患者車喙齒抑是喙齒戮空(lak-khang)[鑽孔]時,需要一跤踏踏枋,親像踏ミシン(裁縫車、縫紉機)按呢帶動鑽牙機(磨牙機)轉踅,跤踏愈緊,鑽牙機to̍h轉愈緊,喙齒感覺to̍h愈bē疼。