2014年12月31日 星期三

古物仔_敆作篇[七]_特殊剾刀[二]:蕭國隆收藏/蕭平治翕相

古物仔_敆作篇[七]_特殊剾刀[二]:蕭國隆收藏/蕭平治翕相
特殊剾刀形體真濟,功能無仝,需要師傅人tsiah有才調紹介用法,tī tsia ê相片lóng是蕭國隆阿隆師用過ê家私。




古物仔_敆作篇[六]_特殊剾刀[一]:蕭國隆收藏/蕭平治翕相

古物仔_敆作篇[六]_特殊剾刀[一]:蕭國隆收藏/蕭平治翕相
▲木材造作,長方形平面用平面剾刀,ē-tàng剾kah有鋩有角。若是撞著窗仔門道thuah橋,抑是半圓形 lap-tsô[凹槽],pho̍k龜形ê橫樑、椅kuaiⁿ⋯hiah-ê為著美觀需要,phòng[凸tu̍t]--一下 naih[凹thap]--一下展現曲線美感,to̍h需要特別形體ê剾刀,tsiah有法度完成。
△這支叫做剾仔(khau-á),ē-tàng輕輕仔剾,薄薄仔修,是しあげ(shiage/修飾、潤飾)專用。


△這支刀喙斜斜,閣有一支柴liau ē-tàng定位無仝所在,大概是tn̄g-tio̍h有lap-lo̍h-khì ê溝槽使用--ē?



△tse tio̍h問師傅tsiah-ē了解!


△這支是剾半圓形 lap-tsô[凹槽]用--ē。


tse tio̍h問師傅tsiah-ē了解!




2014年12月30日 星期二

古物仔_敆作篇[五]_剾刀:蕭國隆收藏/蕭平治翕相

古物仔_敆作篇[五]_剾刀:蕭國隆收藏/蕭平治翕相
◎多謝逐家回應,Lah-jih寫古物仔紹介,用「相片」為主題,紹介內容以我所bat書寫,bat濟寫濟,bat少寫少,總--是Lah-jih研究無深,錯誤難免,像按呢有人提出探討,實在有夠讚。感謝!
▲剾(khau)kap剾刀:
khau是動詞是動作,khau-á是名詞是家私,瓜剾仔剾瓜仔(kue/ke-khau-á khau kue/ke-á),瓜剾仔是『刨刀』;剾刀剾柴(khau-to khau tshâ),剾刀是『鉋刀』,剾是『』。
剾刀種類非常多樣,大細支無仝,粗剾幼剾無仝,剾平剾深剾phòng剾lap無仝,boeh有好作品,需要好工夫,koh-khah需要好家私,『工欲善其事,必先利其器』,敆作師傅「剾」ê功夫m̄是kan-nā 3年4-kó͘月to̍h ē-tàng hō͘人尊稱「sai--e」。
調整剾刀刀肉ê方法:bueh tshiâu刀肉食深食淺,抑是bueh kuân-kē-pîng,剾刀雙頭6个點 ē-tàng 敲出隨人 ê 結果。一頭入(深), 一頭退(淺);中點,平均;雙邊,調tshua̍h(斜)角。 

△這支是常用長剾剾刀,主要是kā長ê角材剾hō͘平,是粗剾,需要tàu剾刀柄用雙手下力直sak,需要用力,剾掉ê剾刀蔫仔(lian-á)較粗phuè,剾刀柄是活動--ē。應用「斜面原理」ê省力工具。tse是剾刀ê下面,柴面金滑,刀肉thóng出,ē-tàng調整長短,ē使得深剾,ē使得薄剾。


△Tse是剾刀頂面,au槽所在有兩塊鐵仔,thóng出半圓形ê是刀肉,另外hit塊是剾刀櫼仔(tsiⁿ-á),刀肉ē-tàng調整thóng出長短,櫼仔是固定刀肉kap敲出刀肉,剾刀bueh利需要刀石磨。


△看較清楚--leh,剾刀肉kap剾刀櫼仔。櫼,tsiⁿ hō͘ ân-ân,hō͘ 刀肉bē振bē動。櫼若敲冗(līng),刀肉to̍h ē-tàng tshiâu振動抑是pak起來磨利。


△平剾ê剾刀大細支有精差,作用有相仝mā有無相仝,大支tàu柄雙手用力剾,ē-tàng粗剾mā ē-tàng薄剾。大支剾大面,細支剾細面,細支剾刀、短tauh剾刀ē-tàng幼剾、しあげ(shiage/修飾、潤飾。)用孤枝手方便處理。




2014年12月28日 星期日

古物仔_敆作篇[三]_鑿仔:蕭國隆收藏/蕭平治翕相

各位朋友請來參觀指教:
有人講紹介siuⁿ簡單,有人講寫了siuⁿ lo-so,講了攏總「著」,siuⁿ簡單是因為個人bat--è無濟,重點tī「古物仔」影像收集紹介;siuⁿ lo-so是為著bueh表達「生活語言」ê話句,講話語法,盡量tshiau-tshuē端的台語,所以盡量口語化。歡迎指教、掠包、更正,並提供資料。

古物仔_敆作篇[三]_鑿仔:蕭國隆收藏/蕭平治翕相
▲鑿(tsha̍k)kap鑿仔:鑿是動詞,是動作;鑿仔是名詞,是家私。鑿仔是應用「斜面(tshiâ-bīn)省力(séⁿ-la̍t)ê物理作用」ê鑿柴家私,有平鑿有圓鑿,種類濟用途濟,ē-tàng鑿孔mā ē-tàng修整。平鑿鑿四角孔做榫孔(榫孔),圓鑿是半圓形,鑿圓形榫孔。
△平鑿仔:有大細支,鑿柄有khong鐵箍,用摃槌仔敲(khà),mā ē-tàng用手thuh。是木工真重要捷用ê家私。
△thuh-á(黜仔):修整溝槽細孔所在,用thuh--è較捷,mā ē-tàng用摃槌仔輕輕仔敲。

2014年12月27日 星期六

十全十美相唚講好話 示範: 20141227_蕭平治

輔慶子怡喜宴「十全十美相唚講好話」『示範秀』:     20141227_蕭平治
神廣ê親家親姆kaptsiâⁿ,彰化ê顏登甲謝琼秋翁某kaptsiâⁿ好朋友,逐家暗安,逐家歡喜來lim燒酒、lim喜酒。
今仔日是好日子,兩姓合婚真歡喜,囝婿新婦攏佮意,親家親姆笑bi-bi
結婚日子tsin-tsiâⁿ súi,顏尤兩家結做堆,盈暗準備做sàn-khùi,天光夫妻行相隨。
男才緣投輔慶君,女貌子怡súi姑娘,歡歡喜喜手牽手,建立家庭美鴛鴦。
親家笑bi-bi,親姆足歡喜,囝婿緣投仔sàng,看著tsiâⁿ滿意。
登甲微微笑,琼秋雀雀趒,歡喜娶新婦,實在有夠gió
輔慶真將才,子怡真賢慧,成家閣立業,幸福通人知。
兩姓來合婚,錢銀年年春,新人有拍算,明年生雙孫。

逐家斟酌看,親家親姆徛四正,手捀酒杯來祝福,翁生某旦真美滿。
小弟是新郎ê丈公,受男方主人家交代講好話,咱就以現此時上時行ê相唚做話題,來叫新郎新娘做má-to͘h示範予逐家看,順紲講鬥句ê好話,我號做「十全十美相唚講好話」。新娘新郎請注意,我若講一項,恁兩人to̍h愛示範標準姿勢,經過翕相tsiah算通過,咱tsit-mái to̍h來進行:

第一唚 唚手盤,相敬如賓相瞞,早早去睏早早起,千萬m̄-thang睏相晏。
第二唚 唚手蹄,雙方爸母公家ê,兩家序大攏孝敬,有孝老母和老爸。
第三唚 唚頭額,家庭美滿會好gia̍h,翁某phah拚相倚傍,幸福人生久久長長。
第四唚 唚頷頸,凡事互相著吞忍,輕聲細說用參詳,糖甘蜜甜感情穩。
第五唚 唚喙䫌,喙䫌甜甜幼koh白,祝你新郎快做爸,祝新娘快做娘嬭。
第六唚 喙抵喙,目睭sio相大富貴,新娘無唚大心氣,新郎免lim心就醉。
第七唚 唚喙唇,新娘實在tsiâⁿ溫純,大家看著笑吻吻,大官看著交懍恂。
第八唚 唚喙齒,欲唚喙齒著撓舌,兩人戀愛相kah意,盡量唚無要緊;
恁是兩人相意愛,欲唚外久攏會使。(tsit-má上流行,上少1分鐘。)
第九唚 唚下頦,下頦飽滇會發財,跤踏實地kut-la̍t拚,美金台票日日來。
十全十美第十唚,感情若深to̍h mo͘h-leh唚,感情若厚to̍h m̄免等候,唚--落去!唚--落去!免sè-jī
多謝逐家,祝福逐家。
請來參觀指教:

Lah-jih Siau(蕭平治)老人囡仔性閒閒罔話仙http://chhantionglang.blogspot.com/

2014年12月26日 星期五

古物仔_敆作篇[四]_墨斗摃槌仔範仔:蕭國隆收藏/蕭平治翕相

古物仔_敆作篇[四]_墨斗摃槌仔範仔:蕭國隆收藏/蕭平治翕相
▲墨斗(ba̍k-táu):木工畫直巡(ti̍t-sûn)ê家私。
墨斗ê形體是按呢,一爿是ē-tńg ê輪仔,纏1條棉紗線,線頭固定tī輪心,另外彼頭穿過貯棉花浸烏墨ê槽hit爿,thàng出墨斗外,縛tī一支尖鑽。
使用時,師傅提墨斗,師仔工提hit支尖鑽拖到師傅指定ê所在,雙方按tiàm木材柴枋ê兩个定點,師傅ùi線中央所在用大垺翁(tuā-pû-ong)kap kí-cháiⁿ[食指]輕輕liàm-khí,然後「phia̍k」一下,kō烏墨汁ê棉紗線to̍h-ē tiàm木材頂留一條烏巡。


▲摃槌仔(kòng-thûi-á):
tìng釘仔,摃榫頭入榫孔,需要大細無仝ê摃槌仔。
△tsit種摃槌仔,一爿ē-tàng tìng釘仔,釘仔鼻若tìng了無夠平,koh 驚伊傷著木材表面,to̍h用另外hit爿kā釘仔鼻輕輕仔敲hō͘較深入。
△這支摃槌仔較重較tìm-táu,摃--起來較有力,摃大支鐵釘抑是摃鋼釘入磚仔壁、紅毛土壁較輕力好用。mā ē-tàng kā做了無理想ê部份敲掉抑是破害。
▲範仔(pān-á):
寫毛筆字看字帖「範本」學寫名家字體,裁剪衫褲先用白紙鉸「紙樣」,做石膏像需要有「模仔」,若是木工bueh鋸一个直角抑是bueh掠一个直角,ē使得使用角尺,若是無tú好是直角,親像相框sio-kap所在是45度,按呢木工師傅to̍h-ē事先用一塊枋仔量好角度做一个「範仔(pān-á)」,需要to̍h提來畫巡,然後施工,省去掠角度真濟時間,koh ē-tàng真精密準確,tsit種「範仔(pān-á)」是師傅家己做--è。



2014年12月23日 星期二

古物仔_敆作篇[二]_鋸仔鋸鑢:蕭國隆收藏/蕭平治翕相

古物仔_敆作篇[二]_鋸仔鋸鑢:蕭國隆收藏/蕭平治翕相
▲鋸kap鋸仔:鋸是動作,鋸仔是家私,大箍木材需要phuà-pîng(破爿)鋸做一節一節,需要機器鋸、liâu(撩),做木--è是kā鋸斷裁好ê角材、柴枋,使用鋸仔鋸較合用ê寸尺進行鑿、剾、釘ê組合。鋸仔齒有鋸橫絲、直絲ê差別,鋸齒若tun(鈍)需要用鋸鑢khioh[磨],khioh鋸仔齒需要師傅,有ê敆作師傅家己mā ē-hiáu。
△傳統鋸仔:tsit種傳統鋸仔,鋸枋[鋸片]斜斜(tshiâ-tshiâ),需要掠一个角度鋸。厝內有一支tsit種鋸仔,鋸柴枝、鋸竹管攏真方便。


△手鋸仔:ē-tàng收合,安全方便。紅色螺絲是固定用--ē。
▲鋸鑢(kì-lē):to̍h是『銼刀』,手工khioh鋸仔齒用,mā用來磨金屬thóng-tshut-lâi[突出]部份。


古物仔_敆作篇[一]_阿隆師:蕭國隆收藏/蕭平治翕相

古物仔_敆作篇[一]_阿隆師:蕭國隆收藏/蕭平治翕相
▲kap-tsoh:kap-tsoh漢字寫做「敆作」,就是木工(ba̍k-kang),木匠(ba̍k-tshiūⁿ),學敆作需要拜師學3年4-kó͘月tsiah ē-tit tshut-sai(出師),做敆作tsit途--ē hō͘人稱呼伊敆作師傅、木匠師、做木--è。
崁頂庄是大庄頭,厝濟人濟可惜田園少,e̍h-tsoh(狹作)ê關係,需要有人出外趁食,抑是學一項工夫(技藝)thang趁錢相添,m̄-tsiah庄--裏學tsoh-ba̍k(做木)--è bē少,興永、順廷--ē、塗養--è、阿郎仔、阿友、部--ē kap國隆--ē⋯。
大部份是學做tshâ-thâu-ba̍k-kue̍h(柴頭木劂),桌椅、たんす/tansu/衣櫥、眠床kap裝潢⋯,kan-nā蕭國隆阿隆師學做修建寺廟ê「大木工」,阿隆師siāng-kài得意ê作品是板橋(Pang-kiô)林--家花園ê修復kap北港媽祖廟後殿ê重建,咱ùi伊ê人客間仔掛--è一塊相框題字,to̍h-ē了解伊ê功夫kap hō͘人ê器重,「阿隆師」ê名聲hing外庄。

蕭國隆阿隆師:今年(2014)80歲。




△72年元月11日上午11點,師傅正為「開軒一笑亭」角科做最後修整樑架斧鑿功夫,頗得閩南傳統手法。

※紲落去to̍h來紹介蕭國隆阿隆師用過ê家私頭仔。


2014年12月18日 星期四

古物仔_嫁娶篇_面桶架羊羔架豬公架雞籠仔:陳慶芳收藏/蕭平治翕相

古物仔_嫁娶篇_面桶架羊羔架豬公架雞籠仔:陳慶芳收藏/蕭平治翕相
面桶架:面桶架是囥面桶ê架仔。通常暗時bueh睏進前ê洗盪是洗跤、洗面、揉身軀,平常時仔是面桶水囥塗跤,坐tī低椅仔洗。若是早起時洗面,to̍h需要kā面桶khǹg-tiàm面桶架頂面洗喙、洗面,抑是洗手。
古早查某人受禮教規範,梳妝打扮需要tiàm房間內,洗面、洗喙、洗身軀仝款tiàm家己房間內,除非好額人家庭有iap-thiap ê浴間。
△木造面桶架,閣有刻花閣有鏡thang照面,免講mā知是好額人查某囝tsiah有ê嫁妝。
△木造面桶架,造型簡單,橫杆吊面布(面巾),有茶箍盤仔。
▲娶某人生一大事,做爸母--è為著後生婚事,抑是做兵ē-tit平安退伍,to̍h-ē下願祈求天公、三界公保庇,有下願to̍h一定ài還願(hîng/hâiⁿ-guān),有人ē揀好日仔謝天公,有人ē利用後生娶某前一工拜天公,he刣豬倒羊ê豬肉、羊肉ē-tàng煮腥臊請人客,一兼二顧省去真濟開銷。
俗語講:「嫁查某囝貺大餅,拜天公無相請。」是leh king-thé做人凍霜,tsit-mái娶新娘順紲拜天公,閣ē-tàng收紅包請人客,按呢人to̍h bē議論phí-siùⁿ(譬相)咱kho̍k-á-thâu(确仔頭)、pa̍t-á-sái(菝仔屎)。
▲豬公架kap羊羔架:
拜天公上大禮to̍h是刣豬倒羊,豬是大隻全豬ê豬公kap全羊ê羊羔,ùi下腹破開,腹內提掉,規隻bà-tiàm架頂,喙咬桔仔(kiat-á橘仔)kap王梨抑是紅龜粿,吉、旺、壽ê吉利意思。
△羊羔架:竹造(ut)。
△豬公架:竹造(ut)。
tshuā路雞仔(tshuā-lō͘ ke-á):
雞、家lóng是「ke」,tshiâⁿ-kiáⁿ(晟囝)期待結婚「成家」然後向望「立業」,所以「ke」ê重視tī入厝kap結婚喜宴攏有全雞ê菜色。
新娘娶入門第三工頭轉客[回娘家],kap囡仔四個月轉外家,外家to̍h-ē拴tshuā路雞仔(囝)hō͘查某囝、外孫捾轉去「起家」做家伙。tshuā路雞仔(囝)需要雞籠仔貯,新娘頭轉客需要一對,囡仔四個月轉外家拴一水12隻。
△雞籠仔:篾仔pīⁿ ê tshuā路雞雞籠仔,竹篾仔處理kah tsiâⁿ幼字。

2014年12月15日 星期一

古物仔_嫁娶篇_囝孫桶:陳慶芳收藏/蕭平治翕相

古物仔_嫁娶篇_囝孫桶:陳慶芳收藏/蕭平治翕相
▲囝孫桶(kiáⁿ-sun-tháng):
tsit-má叫做後擔/尾後擔,tī娶新娘陣頭上押尾(ah-bué/oh-bué),用紅布袋仔貯,有跤桶、腰桶、屎桶,另外有面桶仔、齒杯仔⋯。較早衛生設備較欠,屎礐仔tī厝外,mā無浴間,查埔人ē使得揣挹貼所在,揉揉洗洗lâm-lâm--leh,查某人to̍h tī家己房間內洗蕩,暗時放屎放尿mā-tī房間。
△下面一擔一頭5桶,一擔10桶,漆紅漆紅絳絳,tsiâⁿ有喜氣,雙雙對對、十全十美,萬年富貴,大好額人tsiah有ê派頭。
*跤桶(kha-tháng):查某人洗身軀、抑是kā囡仔洗身軀。
*腰桶(io-tháng):來洗(lâi-sé。指女性月經來潮)時洗淨,生囝時坐leh生。
*屎桶(sái-tháng):暝時方便放屎放尿,透早、黃昏時tsiah捀出倒掉。
*面桶(bīn-tháng):洗面,揉身軀。
tsia-ê囝孫桶lóng是箍桶--è用木材箍--e,當然著用鉛線桶箍箍--leh,tsit-ê箍真有意義,有箍牢--leh 兜牢--leh 固守家業ê意思。

△:lâm-thn̄g(淋碭)面桶kap面桶架。


△腰桶(io-tháng):這是生囝抑是洗盪(sé-tn̄g)下身ê腰桶。若是較細跤閣有khàm蓋,to̍h是屎桶仔。





2014年12月12日 星期五

古物仔_嫁娶篇_日課妝單證書相簿(二):陳慶芳收藏/蕭平治翕相

古物仔_嫁娶篇_日課妝單證書相簿(二):陳慶芳收藏/蕭平治翕相
▲親tsiâⁿ ê後生kap女朋友感情成熟,女方序大歡喜咱去講親情(kóng-tshin-tsiâⁿ。說親、說媒。)。親tsiâⁿ招我tàu-tīn拜訪,意思是叫我做便媒人(muâi-lâng/mûi-lâng/muê-lâng/hm̂-lâng)。自由時代,男女意愛,做便媒人雖罔m̄免「媒人喙hô͘-liù-liù」,必要ê傳統嫁娶風俗mā著了解,tsiah ē-tit kap兩方(liáng-hong)親家親姆溝通參詳,互相交換意見,hō͘ tsit層婚姻美滿完成。
雙方爸母kài あっさり/assari[乾脆],禮貌談說因緣kap姻緣,有緣tsiah-ē結親情,既然是親情,to̍h直話直說,大聘m̄免,小聘隨意,kan-ta要求禮餅夠額,其他禮俗隨人發落mài khi-khiau。拜訪順紲講親情提八字,完成任務。
紲落去to̍h是請日師看日,揀好時好日,硩定、嫁娶。
△琴瑟齊眉鸞鳳和鳴kap嫁娶吉課:
根據結婚查埔(乾造)查某(坤造)出世(乙丑)年(己卯)月(乙亥)日(癸未)時tsit八字,tsiah-koh參考雙方父母ê出世年月日時,píng通書揣出硩定(納采) 做新娘衫(裁衣)做蠓罩(合帳)安新娘房(安床)娶新娘/嫁查某囝(嫁娶)⋯ 一大堆ê金木水火土五行相生相剋ê規律作用,tī便格式紅紙寫出良時吉日thang好進行美滿姻緣。
  △中華民國38年結婚證書:
內面記載結婚人、證婚人、介紹人、主婚人姓名,koh-tio̍h請戶籍主任、副主任硩私印公印 做證明人,因為是囍事,所以盡量取雙雙對對。新郎新娘各一份。
 △中華民國45年結婚公證書:
這koh-khah簡省ê結婚儀式,直接去法院公證結婚。內容有:聲請人 年月日,法律行為之本旨,結婚人、法定代理人、證人、公證人硩私印,地方法院公證處硩公印。新郎新娘各一份。










△妝單:
嫁查某囝實在是一tsân大代誌大開銷,俗語講:「有--ē嫁餅,無--è賣囝。」好額人嫁查某囝,m̄-nā大餅通庄hīng,出嫁hit工是kioh-á排規列,嫁妝逐項有。嫁妝濟,驚失落,需要1件1件點清楚,mā是tsiâⁿ費氣。規氣妝單寫寫--leh,照單送貨照單收貨,khah-bē tîng-tâⁿ。
*昭和15年張好出嫁買物費用簿。
*昭和2年作嫁粧貼取貨。
*昭和7年訂盟簿(密)。




△結婚相簿:
早期多數烏白相片,倩相館翕相師傅來厝--裡翕,全家福hit張上要緊,若是家境好抑是食頭路人,ē家己用カメラ/kamera/照相機翕,閣來to̍h是囡仔出世了後ê寫真。

△訂婚證書kap結婚證書:
che是較慢tsiah有ê型式,1968年結婚ê證書to̍h是tsit款,內容有結婚人、證婚人、介紹人、主婚人姓名,m̄-koh無戶籍主任、副主任證明人,所以無法律功效。
正式有功效ê結婚證書,需要用戶政單位ê格式寫kap頓印仔。