2019年9月26日 星期四

2019年9月25日 星期三

2019年9月21日 星期六

2019年9月17日 星期二

Chhài-se(菜蔬)chheⁿ-chhài(青菜)紹介:

Chhài-se(菜蔬)chheⁿ-chhài(青菜)紹介:





2019年9月6日 星期五

環島旅行、教育參觀:

△環島旅行、教育參觀:













讀3年冊,中外史地lóng讀過,偏偏台灣在地歷史地理m̄知影,為乜緣故教科書內tō是真少真少紹介,為啥物?斯當時ná像無人懷疑無人提起,台灣省只不過是中華民國1省,35分之1份量而已。原來台灣歷史是禁忌,雖罔李地怪有教寡在地自然地理,總--是感覺無tap無sap,好佳哉學校有安排18工ê環島旅行、教育參觀,chiah ē-tàng補充台灣在地瞭解。
Chit-chōa旅行tī三年下學期進行,是阮siāng-kài歡喜ê大代誌,分做2批起程,1批chiūⁿ北,1批落南,1班級坐1台遊覽車,tòa、食tiàm各地頭ê師範學校,伙食費hō͘ in代辦,有ê學校佈置禮堂hō͘阮歇暗,有ê學校宿舍眠床niū阮睏,這是互相互動,in來中師阮mā仝款案內あんない,方便閣節省銀兩。環島18工旅行轉--來,個個金光chhiâng-chhiâng-kún,充滿信心,ē-tàng應付學生「任問不倒」。
18工環島1-liàn,算bē了ê第一擺,看--著ê、食--著ê、聽--著ê,真正是大開眼界,ùi甕底跳出甕外ê世界,chiah-nī闊chiah-nī心適,阿里山進前去過2擺,算是重遊,ē使得做導覽紹介,閣過台南、高雄、屏東,頭擺看著闊莽莽大海ê歡喜,大聲hoah-hiu驚著隨車遊覽小姐,暗中笑阮是內山sông;鵝鑾鼻、燈塔、海螺仔殼,南迴公路彎彎斡斡搖--leh 搖--leh帶動歌聲笑聲歸路無停睏;後山景色原來是chiah-nī-á súi閣靜,kap聽講過後山ê悲情差真濟;蘇花公路ê驚險,hō͘人跤尾起畏寒,探頭看出窗外,夭壽--ò͘,有看著海水無看著塗跤,規身軀真正起雞母皮;來到台北都市,tòa台北師範,暗時綴人出來se̍h街,kan-nā看著十花五色夜都市,霓紅燈(gê-âng-teng)gia̍p-gia̍p-sih,驚行m̄著路m̄敢行傷遠,chhun--ê soah一點仔記智都無⋯⋯。

中師51紀念冊(七):

中師51紀念冊(七):
實習、觀摩、試教:















師者,所以傳道、授業、解惑也。所以老師是演講者,老師是王祿仔仙,老師是主持,老師mā m̄是表演者。老師徛烏枋前教冊,愛ē-hiáu「引起動機」引起學生讀冊趣味,需要限定時間內教學生學習「主學習」「附學習」「副學習」。
老師vs學生是老師、學生互動關係,是單行線ê說教,是有目標êkap學,是老師傳道、授業、解惑學生。
Boeh按怎三年來學著ê知識教͘學生瞭解,達著目標?進入教室徛tiàm講台,面對4-50,甚至5-60ê學生囡仔,無驚惶緊張,11既定課程教͘學生理解,除了經驗無啥物撇步,m̄-chiah實習、觀摩、試教-chiâ非常重要。
輔導老師葛道明是輔導阮實習、觀摩、試教ê老師:
1Chhōa阮去有特色學校參觀教學、設備。
2、指導家己製作教具掛圖,幫忙學校製作教具掛圖。
3、先佇家己班級輪流上台試教,互相評分改進。
4、語文,數理,史地室內教學,體育唱遊室外上課,lòng tio̍h經驗。
5、囡仔頭王chhìn-chhài--ê,囡仔緣若好,互動輕鬆,教學輕可,siu過嚴肅siu過好性地lóng m̄好,ē-tàng輕鬆教冊學生閣有規矩,chiahàiê功夫。
6、正式試教附小進行4禮拜,4个同學負責1班,著寫教案著寫報告,1人上台教冊,3人觀摩,級任老師輔導並評分,mā-tio̍h參加朝會、體操、隊伍行進,下課需要kap囡仔互動,放學後改簿仔改作業,無閒閣緊張。語文、算術、地理、歷史,音樂、畫圖、體育、勞作,算盤、毛筆、掃地、拭窗仔門包班制需要萬能ê老師。
7、閣來外校(阮班太平國校)試教2禮拜,進前教低年級,chit-mái換中年級抑是高年級,低年級學生古錐幼茈,高年級bat代誌有個性,老師ê角色需要轉換chiah ē-tit順序完成任務。
8、文武雙全,徛台頂是老師,下課後是朋友。