看相片回想人生_1969→1971_媽祖宮後稅厝二冬(四)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969→1971_媽祖宮後稅厝二冬(四)：
▲我做老爸--ā：
上班繼續上班，開西裝社繼續開西裝社，食頭路人講按呢hō͘做兼副業。飼雞場做副業ê張老師看我hiah-nī無閒，好心kā我建議：「做生理若bueh趁較濟錢，需要倩師傅kā你tàu趁，你ē使得利用下班抑是無課ê時陣，出去招生理，kan-na靠徛店生理bē ka-ia̍h--lah！」這是生理法，需要生理喙走東往西，少年人m̄驚thiám是無要緊，lo̍k-tô、耽誤學校學生課業，實在無hit-lō拍算，何況教冊是趣味，有趣味自然to̍h有責任，聽罔聽，猶是mài貪心。
是學校長有心bueh牽成抑是看我有才能，除了教冊做級任老師，koh hō͘我做研究課長，這ē-tàng加分將來tsiah有機會做主任做學校長。我ê人han-bān kā人推辭，學校派我做saⁿh我to̍h做saⁿh，只要無hit-lō「軟土深掘，食人夠夠」ê心機，大部份lóng-ē答應。
三潭國小是中型學校，10幾班，同事10-gua̋外个，ná像家庭兄弟姊妹，互相幫忙較濟，計較pué-huē較少，生理上mā加減會來捧場。hit-tsūn學校由查埔老師輪流顧暝，8-9工著輪著一擺，店內空課一下濟，輪著顧暝hit工，to̍h布料、家私頭仔款款--leh，tsah去學校裁剪，bat上濟一暗鉸9領褲，功夫tsiâⁿ老練。
講「耽誤學校學生課業，實在無hit-lō拍算」是真心話，除了按課表教冊以外，下面ê證件to̍h是明證。
▲1970年代，學校門口交通愈來愈複雜，為著學生啥乜時陣上學、放學較安全，to̍h kap莊茂山老師輪流tī學校門口做車輛來來去去ê記錄，提出「按怎改進學生上學放學路隊安全」ê教育專題研究，得著嘉獎1次kap 1張獎狀。

▲俗語講「頂司管下司，鋤頭管畚箕。」驚管m̄驚官，國校校長主任老師上驚督學來，斯當時督學官銜tsiâⁿ大，有人供體督學是『毒蛇』，斯當時孫校長真gâu巴結安搭督學，督學若來有食koh有掠，老師mā受惠，下面tsit張縣政府令，m̄是嘉獎m̄是獎狀，寫kah li-li-lo-lo，講是督學視導結果真o-ló，學校提出5个名單「嘉許」鼓勵，其實是一支柴雞腿，搵豆油bē食得，淡薄仔像醫生開hō͘患者ê安慰劑。

▲彰化縣政府令，兼任研究課長：

▲師專獎狀：自製教具展覽佳作
台中師範專科學校ê輔導縣市有台中縣、台中市、苗栗縣、南投縣、彰化縣五縣市，鼓勵老師自製教具參加展覽，我ê作品ē記得是多用途kap槓杆原理有關ê教具，得著佳作，獎狀1張。

▲3月29日是青年節，學校推薦我選拔為優秀青年，得著1張獎狀，ná像猶有獎品。

▲參加國小學習活動評鑑記念狀，仝款是一支柴雞腿，搵豆油bē食得。

▲1970年6--月，大漢查某囝出世，ùi人ê「翁婿」進級做人ê「老爸」，責任閣較大，擔頭閣較重，生活閣較無閒。

看相片回想人生_1969→1971_媽祖宮後稅厝二冬(三)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969→1971_媽祖宮後稅厝二冬(三)：
▲太空時代kap喇叭褲：
1969年7--月美國阿波羅11號登陸月球轟動全世界，太空人阿姆斯壯kap愛德林tsiâⁿ做歷史上早踏跤到月球ê人類，對面阿興相館有電視轉播，親目看太空人踏入月球過程，從此以後社會進入太空時代。隔幾工轉去崁頂講hō͘二伯聽，二伯講：「騙siáu--è」「騙恁tsia ê tsi̍t-tīn戇人！」
▲「國華西裝社」是專門做男裝，主要是西裝kap西裝褲，另外mā有兼leh做查某長褲，大約是開店2年後，女裝流行喇叭褲，有女性人客bueh訂做，pō͘-pīn m̄-bat做過tsit款形體，頭家師傅仝款無躊躇to̍h kā允--落來。
「Tsi̍t款褲身、大腿縛縛，褲跤尾hiàn-hiàn像喇叭喙ê查某流行時裝，你kám bat做？」
「M̄-bat！」
「敢ē-hiáu裁剪？」
「ná有啥乜問題，Buh-khuh(book)掀掀看看--leh，to̍h無問題！」
「聽你講，ná像kài簡單ê款？」
「kui軀ê查埔西裝to ē-hiáu做--à，一領喇叭褲m̄ 較簡單？學做衫著愛ē-hiáu裁剪，he裁剪重點tī 原型，原型有了解，隨人體格，tsia加hia減，在人變竅，放心--lah！」
「原型」概念一下bat，後--來我tsit个褲師to̍h愈來愈厲害，m̄-nā ē-hiáu量寸尺，一領褲ùi裁剪到熨好完成作品攏無問題，這過程包含車布邊、puâⁿ褲底、開褲袋仔、車拉鍊、pâng褲跤、用熨斗熨hō͘ 有鋩有角，hō͘人客穿--起來pih-tsah、好看、好穿、好khû koh合身，chiah。
喇叭褲愈來愈時行，喇叭喙愈來愈闊，查某人客愈來愈濟，少年--ē 老--ē攏有，頭家師傅一人無閒tshih-tshih，規氣單領西褲、喇叭褲hō͘我來包，1日1領，歇假1日3領，工課算是真齊勻，家己kā家己保證，絕對m̄-thang耽誤學校正業，誤人子弟。
「國華西裝社」ê查某喇叭褲好看合身好穿súi-tang-tang，名聲ná來ná濟人知，查某囝仔好體材，kan-na圖形畫號to̍h看ē--出來，若是おばさん來做，咱ē-hiáu用技術kā伊ê缺點盡量暗掉，隨在人客要求，to̍h是hō͘伊照鏡看kah滿意，腰to̍h是腰，尻川斗to̍h是尻川斗，該phòng--è phòng hō͘好線條，m̄-thang phòng ê所在盡量kā縮hō͘倚。
有一工褲師leh裁剪去hō͘人客看著，後擺suah指定著愛我chit个師仔工親手做，好佳哉，頭家師傅bē食醋，有人肯定伊教ê師傅，伊mā歡喜kah，開業2年後，掃塗跤hit个sai-á老師，公開pìⁿ-tsiâⁿ人客認定ê西裝褲、喇叭褲ê大師。
△インチ帶仔，くじら尺，台尺。

△角尺，インチ帶仔，くじら尺，台尺，彎尺。

裁縫師傅ê家私：
20140105_裁縫sai-hū kap i-ê ke-si：

2016年9月1日田中國民學校第9、10屆同窗會：

2016年9月1日田中國民學校第9、10屆同窗會：

75歲年紀ē-tàng相招國校讀冊囡仔伴，做伙出門tshit-thô，看光景，談論囡仔時陣一寡回想，無論讀冊、笑詼，相phah hō͘老師罰徛拍尻川，講kah笑hai-hai差一屑仔目油流--出來，lóng是súi-súi ê記智。跤頭雖罔無hiah-nī扭掠，m̄-koh無「上車tuh龜，落車放尿」ê無奈，lóng是歡歡喜喜、嬉嬉嘩嘩。

參觀所在：月眉(Goe̍h-bâi/Ge̍h-bâi)(新竹縣峨眉)se̍h湖，北埔老街se̍h街路，內灣看古早戲園、欣賞舊車頭ê心思，食Hakka(客家)口味，有人行到giōng-bueh牚腿thèⁿ-thúi。

田中出發有41位，男女同窗、翁某對攏有，台北同窗9位mā tshiâu時間來到北埔做伙會餐開講，攏總5桌，講到笑哈哈，食kah腹肚飽飽。上蓋hō͘我感動歡喜--è，細漢hō͘外媽育ê同學邱慶利，mā駛車ùi台東來會合，雖罔tsiah 5个相bat，因為已經離開62冬，伊ê出現，雖罔短短ê見面，卻是解悶阮思思念念ê眠夢。

看相片回想人生_1969→1971_媽祖宮後稅厝二冬(二)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969→1971_媽祖宮後稅厝二冬(二)：
▲男裝女師傅，名聲通人知：
田中媽祖宮後算是街仔尾，不利時行行業，想bē到ta̋ⁿ開市to̍h有人客踏跤到，訂西裝褲做洋服褲，mā有訂做規套西裝，牽--e 一人頭家兼師傅，因為是歇熱期間，我ē-hiáu tàu招呼人客，2禮拜後學校開學，我是8點前上班，5點後下班ê散教員烏枋杙á，顧店允空課講生理，買賣講價賬，量寸尺、裁剪、車、熨⋯步步lóng是牽--e孤一个，若tio̍h出門bueh車布邊、bueh買li-li-khok-khok幼粒用品，抑是bueh煮食、洗衫，to̍h 著等我下班入門，我是盡量減少外面pha-pha走，不比較早好命，雖罔bô-thang「食，食an 爹；趁，趁私奇」，總--是兄嫂是靠山，m̄知huāⁿ家，kan-na翁某兩人一家to̍h tsiah-nī無閒艱難，透早無閒到暗時10點11點關門了後，tsiah有thang洗蕩。
講--起來好笑koh心適，出門上班是老師，入門隨改換做頭家師傅ê細漢--è，開門、關門是我，掃塗跤、買鈕仔買車仔線是我，閣來教我thīⁿ鈕仔、pâng褲跤mā是我，愈做愈有心得，屜仔來mā有銀票銅銑來來去去，有phah拚to̍h有向望，人有影需要『向錢看』一點仔都無m̄著。
做無兩kó͘月，有一工轉來到店內，牽--e kā我講：「阮寶斗人hit个黃巡佐拄才來--過，講咱開店無申請營業，叫我明仔暗去in-tau--一迣！」
「敢有傳票？」「無傳票m̄免tshap--伊。」
斯當時hit个黃巡佐專門leh掠無營業登記ê趁食生理人，名聲不止仔響，因為無tshap--伊，隔轉kó͘月郵差送來1張公文，無營業登記需要罰錢，好佳哉一位同窗--e tī縣政府上班，隨時替我辦理登記，2禮拜內申訴期間家己寫一份申訴書，用ta̋ⁿ試營業又閣tn̄g-tio̍h負責人身體無爽快(附病院證明)kap營業證字號，to̍h按呢無代誌，從此以後hit个黃--先生mā m̄敢閣來揣麻煩。
營業進行中，學校教冊正常上班，m̄-bat遲到lo̍k-tô，學校huān學校，厝--裡huān厝--裡，m̄敢耽誤為人師教冊ê本份。講實在--ē，『吃飯睡覺/師範學校』訓練3冬ê功夫，課本sa--出來絕對無落氣bē失人ê禮，m̄-tsiah tī店內做『小弟』無空課ê時，著搬1隻椅仔kheh tiàm師傅ê身軀邊，ná談情說愛ná lió師傅按怎補紩鉸熨，人講「曲館邊ê豬母，會拍phik。」看久兼hìng問，「新烘爐新茶鈷」問--ē問bē-siān，應話--ē mā bē ià-siān，to̍h按呢hō͘我慢慢仔tsiâⁿ做師傅。
To̍h-tī頭家師傅身體無爽快調養hit段時間，好佳哉tn̄g-tio̍h歇寒，為著厝稅日日ân，無收入開支ē出問題，暫停營業ná是好辦法？當然店門照開，空課照允，師傅tó位揣？家己來，hit个掃塗跤ê『小弟』家己來。講--起來無人ē-siàn，窮實mā m̄敢公開，hit个師仔工ē-hiáu做洋服褲？事實是m̄-nā ē-hiáu車ē-hiáu做，koh ē-hiáu裁剪。
踏裁縫車仔早to̍h ē-hiáu，真正針線車ē直koh ē-hiáu倒踏針，是需要訓練，頷仔頸生瘤----拄著--à，趕緊認真練，m̄-bat to̍h kā師傅問，bē堪得tsia̍p問捷練，捷練to̍h成鋼，第一領西裝褲3工時間完成交貨，人客koh o-ló kah觸舌，第二領兩工完成，第三領tshun工半，m̄-nā人客滿意，連阮師傅mā認定放心放hō͘我做。師傅裁好ê褲料已經做了，無koh裁剪to̍h無thang車thīⁿ，tshân-tshân kā昨昏允好量好ê寸尺簿仔提--出來，布料mā排tiàm布床頂，準備畫圖裁剪，角尺、彎尺、ìn-tshih帶仔、台尺、くじら尺、粉土、鉸刀攏總tshuân好勢，看寸尺學師傅ê架勢，勻勻仔比，斟酌畫，畫了閣再畫，修改閣修改，最後拜托師傅來鑑定，一聲「ē使得！」無tiû-tî無tùn-teⁿ，鉸刀攑--起來to̍h kā鉸--落去，然後車布邊、開褲袋仔，車褲頭、lah-liān[拉鍊]⋯
閣來，thīⁿ、熨，完成成品，等待人客來驗收，1手交貨，1手交錢。
△除了擔任級任老師，1959年兼職研究課長。

△Tī對面明興翕像館翕一張結婚週年記念相。 

看相片回想人生_1969→1971_媽祖宮後稅厝二冬(一)：：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969→1971_媽祖宮後稅厝二冬(一)：
▲媽祖宮後「國華西裝社」：
「成家」是查埔人人生一大坎站，「立業」是紲落去又閣一大坎站。想著家己一kó͘月tsiah趁千thóng箍，莫怪斯當時食頭路ê女性無愛嫁hō͘散教員仔。師範出業做老師是真好名，娶老師娶食公家頭路是較少數，娶做裁縫--ē、電頭毛--e、刺膨紗--e算是真好ê對象，娶做穡--è、剃頭--ē m̄是有，重要是ē-hiáu tàu趁錢，m̄-tsiah it-tio̍h牽--e有tsit手趁錢功夫，人範koh生做高尚柔性，Taⁿ已經結婚都過了四kó͘月，雖罔兄弟猶原是一家人，總--是牽--e有tsit手做西裝ê功夫，應該著發揮加減趁錢鬥相添。
參詳決定家己開業做西服做生理做副業，大兄建議，世華西裝社徛店tī車頭hit爿，咱號名國華西裝社to̍h tiàm媽祖宮後稅店，距離較遠khah-bē相搶人客khah-bē誤會拍歹感情。契約1年1年拍，厝稅一kó͘月450箍，是我月給三分之一，店面無夠5坪，後壁一間小可ē-tàng轉踅房間，煮食灶跤、浴間、便所kap厝主合leh用，厝主好鬥陣，勉強歡喜過日。
買1座半舊落仔掛玻璃見本櫥，叫師傅簡單釘一隻布床，厝--裡攑幾隻椅仔椅頭仔kap細隻食飯桌，買幾桶油漆招朋友鬥油油漆漆--leh，佈置差不多，廣告社簡單看板「國華西裝社」mā掛四是，利用週末歇睏日翁某相tshuā去彰化布市選一寡時行男裝布料，隔轉日貨to̍h寄到位，簡單排排疊疊--leh都也有sîng一間裁縫店店面。
結婚開了一筆錢，雖罔聘金回hō͘大兄，這擺開西裝社又閣著大兄發落本錢，大兄提一張1萬箍支票hō͘我兌現金，彰化布行hak布料因為牽--e有熟免現金，hak東hak西2萬是有夠額，通書掀掀--leh，揣一日清氣日仔to̍h kā「開張大吉(khai-tiang tāi-kiat)」，丈人兜後頭mā tshuân來碗碟仔、菜櫥仔講是勁灶(kīng-tsàu)，suah hō͘我感覺bē-su已經兄弟分開食。
連炮仔pìn-piàng吼，田中街仔媽祖宮後新開一間「國華西裝社」，立業tit-bueh拍基礎，歡頭喜面接待捧場人客，內心卻是沈重有「一人一家代」ê壓力，阿兄敢會？家己臭心想，若無生理是bueh按怎支付厝稅開支？「頭 洗--落去，無剃敢ē-soah-tit？」將近「三十而立」ê歲數，猶閣煩惱東煩惱西無bueh笑死人--kong？

20160708_阿公阿媽夏令營(讀台語學lô-má-jī 第五節回田中)：

20160708_阿公阿媽夏令營(讀台語學lô-má-jī 第五節回田中)：
5工「阿公阿媽夏令營」本成欲插花仔安排1晡參加台語囡仔營 ，因為風颱延期suah失去機會。今仔日著欲結束，台語課提早早埔9點上課，準備坐11點半火車轉來去田中。
師：「a e i oo  u o」「ah eh ih ooh  uh oh」「ann enn inn oonn  」tsia lóng是韻母，親像ㄚ ㄝ ㄧ ㄛ ㄨ ㄜ，m̄-koh台語有鼻音佮短音，咱來復習--一下。(師生做伙唸)
師：tsit-mái老師bueh教恁聲母：pㄅ/ phㄆ/ mㄇ/ b/ tㄉ/ thㄊ/ nㄋ/ lㄌ/ kㄍ/ khㄎ/ ng/ g/ tsㄗ/ tshㄘ/ sㄙ/ j/ hㄏ(綴老師大聲唸3變)
師：kāㄅㄆㄇ提掉「p  ph  m  b  t  th  n  l  k  kh  ng  g  ts  tsh  s  j  h」(綴老師大聲唸3變，然後家己練習)
⋯⋯⋯⋯⋯⋯⋯⋯⋯⋯⋯⋯
然後學生輪流做小老師tshuā讀，老師邊--a指導。
⋯⋯⋯⋯⋯⋯⋯⋯⋯⋯⋯⋯
師：ng 佮g 華語無tsit款音，較歹讀，無要緊，勻勻仔來。tsit-mái老師欲寫一寡音節hō͘恁呼音。
螢幕顯示：ka 鉸刀，kha 豬腳，pho 茶箍泡，so 挲圓仔，mo͘ 頭毛，so͘ 肉酥，kho͘ 大箍，tse 這是啥乜，tshe 初一，bo 帽仔，niau 貓仔，su 老師。」
師：su 老師lāu-su，m̄是『老師ㄕ』，台語無捲舌音 就是『捲舌音ㄓ ㄔ ㄕ ㄖ』。
師：「阿公阿媽夏令營」上尾tsit節阿公欲kā恁試驗，看siâⁿ人ē-hiáu看羅馬字呼音，羅馬字呼音kap ㄅㄆㄇ呼音仝款，試看覓，好--bò͘？
生：好！
螢幕：pa phe ti khi ma niau kau to thai tsai tshui tsai-hue tinn thinn siau a-pa  a-ma 
開始練習⋯⋯⋯⋯⋯⋯⋯⋯⋯⋯⋯⋯
師：晴晴、小馬鈴(薯)大部份lóng 呼音正確。(噗仔聲)
師：小玉(仔)換你來呼音。
小玉：pa爸爸， phe， ti豬肉， khi， ma媽媽， niau貓仔， kau狗仔， to菜刀， thai颱風， tsai知影， tshui， tsai-hue知 花， tinn甜甜， thinn天頂， siau蕭嘉儀， a-pa阿爸， a-ma阿媽。
師：呼了有夠讚，有兩个詞m̄著，等一下tsiah講。換羅翊展豆豆。
豆豆：pa阿爸， phe寫批， ti豬腳， khi頭殼khi-khi， ma媽媽， niauniau鼠仔， kau交朋友， to鉸刀， thaihon風颱， tsa知影， tshui， tsai-hue再會， tinn雞卵糕甜甜， thinn天頂， siau蕭老師， a-pa阿爸， a-ma阿媽。
師：豆豆有夠厲害，『颱風』台語講風颱，小玉講tsai-hue知 花無m̄著，m̄-koh豆豆ē-hiáu kā連leh講「再會」。
師：「阿公阿媽夏令營」好耍bò͘？
生：好耍！
「再會！」
「再會！」
「再會！」
「再會！」
八月半中秋節咱tsiah-koh轉來田中央阿媽兜tshit-thô！
「再會！」

▲坐自強號台鐵真緊to̍h到田中央，tn̄g-tio̍h舊車頭空間有小朋友作品展覽，入去欣賞後tsiah轉去厝--裡。

20160708_阿公阿媽夏令營(讀台語學lô-má-jī 第三節第四節)：

20160708_阿公阿媽夏令營(讀台語學lô-má-jī 第三節第四節)：
查某孫家己設計「阿公阿媽夏令營」，逐日攏有安排學台語lô-má-jī課，上課時間是食暗飽hit段時間，雖罔學校有台語課程，阿公猶是ùi 初階教起，阿公m̄敢激老師ê面腔，因為是「夏令營」，孫--e mā真主動學習，ná聽ná唸ná唸ná笑，下面是進行ê課程：
教具：TV、appleTV、iPad、Lohaka輸入法、jiàu-pê-á 1支。
第三節：大約5分鐘復習舊教材。
師：咱kā「pe phe te the ke khe」加一个「ⁿ」符號「peⁿ pheⁿ teⁿ theⁿ keⁿ kheⁿ」，伊ê發聲to̍h變無仝，大聲綴老師唸，「peⁿ pheⁿ teⁿ theⁿ keⁿ kheⁿ」，這有鼻孔音，ná像感冒講話ê聲音，嘛ē使得按呢寫「penn phenn tenn thenn kenn khenn」，「ⁿ」佮「nn」lóng是鼻音符號。
師：綴老師大聲唸，「破病ê pēnn，澎phênn湖ê phênn，鄭tēnn老師ê tēnn，撐thenn膨椅ê thenn，三更kenn半暝ê kenn，坑khenn 溝仔ê khenn。」
師：換恁大聲家己唸，唸m̄著去無要緊，老師tsiah-koh唸一遍hō͘-lín聽。
師：1个1个輪流來頭前tshuā唸，做『小老師』。
⋯⋯⋯⋯⋯⋯⋯⋯
師：啥人讀了siāng-kài讚？
生：蕭嘉儀。(phah-pho̍k-á聲)
師：逐家讀了攏真tsán，攏真認真，老師kā恁phah-pho̍k-á，pho̍k pho̍k pho̍k pho̍k、 pho̍k pho̍k pho̍k pho̍k ⋯ kā你o-ló鼓勵。下課！

第四節：大約5分鐘復習舊教材。
師：「a e i oo u o」唸--一遍，tsiâⁿ-gâu！
師：「ai au io ua iau」用ㄅㄆㄇ呼音ê方法想看覓，按怎呼音？趕緊研究參詳。
師：逐家做伙唸，ná有m̄著tsiah kā恁講。開始。
生：aiㄞ，auㄠ，io腰，ua娃『洋娃娃』，iau腹肚iau。
師：哪會tsiah-nī gâu！
師：咱kā音節後壁加「ⁿ」抑是「nn」號做鼻音，咱tsit-mái kā音節後壁加「h」號做短音，看恁會曉唸--bò͘？老師先唸一擺hō͘恁聽。
「a ah e eh i ih u uh oo ooh ooh ai aih  au auh io ioh ua uah iau  iauh」。紲落去逐家互相練習，等--一下輪流做小老師。
⋯⋯⋯⋯⋯⋯⋯⋯⋯⋯
師：攑jiàu-pê-á來螢幕前，輪流做小老師，小馬鈴(薯)開始。
⋯⋯⋯⋯⋯⋯⋯⋯⋯⋯
師：足讚，逐家唸了足讚，ē記得音節後壁ê「ⁿ」抑是「nn」是鼻音符號，「h」是短音符號。知影--bò？
生：老師，阮攏知影。
師：下課！