環島旅行、教育參觀：

△環島旅行、教育參觀：

讀3年冊，中外史地lóng讀過，偏偏台灣在地歷史地理m̄知影，為乜緣故教科書內tō是真少真少紹介，為啥物？斯當時ná像無人懷疑無人提起，台灣省只不過是中華民國1省，35分之1份量而已。原來台灣歷史是禁忌，雖罔李地怪有教寡在地自然地理，總--是感覺無tap無sap，好佳哉學校有安排18工ê環島旅行、教育參觀，chiah ē-tàng補充台灣在地瞭解。

Chit-chōa旅行tī三年下學期進行，是阮siāng-kài歡喜ê大代誌，分做2批起程，1批chiūⁿ北，1批落南，1班級坐1台遊覽車，tòa、食tiàm各地頭ê師範學校，伙食費hō͘ in代辦，有ê學校佈置禮堂hō͘阮歇暗，有ê學校宿舍眠床niū阮睏，這是互相互動，in來中師阮mā仝款案內あんない，方便閣節省銀兩。環島18工旅行轉--來，個個金光chhiâng-chhiâng-kún，充滿信心，ē-tàng應付學生「任問不倒」。

18工環島1-liàn，算bē了ê第一擺，看--著ê、食--著ê、聽--著ê，真正是大開眼界，ùi甕底跳出甕外ê世界，chiah-nī闊chiah-nī心適，阿里山進前去過2擺，算是重遊，ē使得做導覽紹介，閣過台南、高雄、屏東，頭擺看著闊莽莽大海ê歡喜，大聲hoah-hiu驚著隨車遊覽小姐，暗中笑阮是內山sông；鵝鑾鼻、燈塔、海螺仔殼，南迴公路彎彎斡斡搖--leh 搖--leh帶動歌聲笑聲歸路無停睏；後山景色原來是chiah-nī-á súi閣靜，kap聽講過後山ê悲情差真濟；蘇花公路ê驚險，hō͘人跤尾起畏寒，探頭看出窗外，夭壽--ò͘，有看著海水無看著塗跤，規身軀真正起雞母皮；來到台北都市，tòa台北師範，暗時綴人出來se̍h街，kan-nā看著十花五色夜都市，霓紅燈（gê-âng-teng）gia̍p-gia̍p-sih，驚行m̄著路m̄敢行傷遠，chhun--ê soah一點仔記智都無⋯⋯。