拈田嬰：
la̍k-goe̍h-thiⁿ chhiah-ji̍t-thâu
六月天 赤日頭
Chhân-thâu tiū-á koah liáu-liáu
田頭稻仔 割了了
Tú hioh-joa̍h thàu tiong-tàu
拄歇熱 透中晝
Gām sí-gín-á joa̍h bô-kàu
儑死囡仔 熱無夠
Sio-chio mn̂g-tiâⁿ lia̍h chhân-eⁿ
相招門埕 掠田嬰
Chhân-eⁿ sì-kè poe hioh-khùn tī chhù-kak
田嬰四界飛 歇睏佇厝角
ba̍k-chiu chho̍p-chho̍p-nih
目睭chho̍p-chho̍p-nih
Koan-chêng koh kò͘-āu
觀前閣顧後
Tán i si̍t làu-kē goán sûi liam-kha kàu
等伊翼落低 阮隨躡跤到
Ū-lâng nn̄g-cháiⁿ liam góa kō͘ liù-sok-á liù
有人兩指拈 我撾遛束仔遛
Tiū-kó chò liù-sok-á kán-tan koh ōe-seng
稻稿做遛束仔 簡單閣衛生
Liù tio̍h chhân-eⁿ bóe chhân-eⁿ phu̍h-phu̍h-poe
遛著田嬰尾 田嬰撲撲飛
Sian poe poe bē-khì thiau-kang kā chhòng-tī
仙飛飛袂去 刁工共創治
Chhòng-tī kàu hoaⁿ-hí chiah kā pàng-i khì
創治到歡喜 才共放伊去
Chhân-eⁿ chhoh chi̍t-siaⁿ
田嬰chhoh一聲
" iáu-siū sí-gín-á lí kâ ē-kì-tit "
「夭壽死囡仔 你kā我ē記得」
Sûi poe--khì
隨飛去
沒有留言:
張貼留言