看相片回想人生：三潭國小記事

  看相片回想人生：三潭國小記事

里民大會時事報告：宣導

地方自治規定每個月開里民大會，學校需要派老師出席報告時事，其實出席參加是有影，報告大部份是省略。我bat出席一擺觀摩里民大會，因為有頂司來賓參觀，真正報告10分鐘hit個月ê國內外重要新聞，kō͘台語報告，害我著代先寫文稿koh家己用台語大聲唸讀練習，驚動二伯來關心，kioh是我leh kap人相嚷。

 

看電影：

田庄所在，搪著年節chiah有鬧熱thang看，平常時看電影算是上時行，田中有田中戲院、新宮戲院兩間leh搬電影，台語華語攏有，hit-chūn較興看西洋片日本片，搪著拜六下晡、暗時，騎鐵馬看電影chiâⁿ做上讚娛樂，有時連看兩支片，若講有啥乜電影、影星記智，lóng是hit站仔留--落來ê，增加社會知識開闊世界眼界，mā是ùi-chia增長，庄跤人不比都市人，加減看東洋歐美電影，chiah-bē庄跤倯。除了歐美電影較有彩色以外，戲園有時mā-ē般脫衣舞，chiâⁿ做彼當陣上敗壞風俗koh上刺激 性ê流行，「食色性也」一點仔都無m̄著，咱較惜面底皮，mā是bat和朋友偷偷仔去外埔頭看，看兩三擺了後，感覺chhek-ò͘欠缺藝術，tō無閣趣味。

 

板橋教師研習會：

臺灣省國民學校教師研習會tī 1956年成立，會址tī板橋，是早期提供國小教師在職進修提高師資素質好所在，有國語、數學、社會、自然科學、唱遊音樂、美勞、體育、輔導活動、幼稚教育、學校行政等十組，mā有附設國民學校校長主任儲訓班。學校bat推薦我參加過四擺，轉--來擔任科學玩具科、工作科輔導員，想boeh晉升主任、學校長ê朋友lóng chiâⁿ欣羨。

 

出差參觀：觀摩教學

板橋教師研習會進修了後，tō是加入輔導團，開始推銷學著ê新觀念新教學知識。我是科學玩具科、工作科輔導員，無學著新觀念新知識，kan-nā憑囡仔時代耍過chhit-thô物指導老師做，tō hō͘老師學kah歡喜tang-tang，o-ló咱ná-ē chiah-nī gâu，敢講做老師--e kan-nā 會曉顧讀冊soah bē-hiáu 耍chhit-thô-mi̍h？

 

校務會議：聚餐食好料

學期開始kap結束攏有校務會議，散會了後hit中晝頓tō是會餐，學校事先揀一間麵店仔[餐廳]訂兩桌料理，講著食，逐家準時到麵店仔坐桌，等待好料一盤一盤出菜，興lim燒酒ê人，把握機會lim hō͘爽快，我是食kah喙笑目笑，因為厝內無chit款羹頓。Ē bat 一寡料理名稱，mā是tī chit種場面學--來ê。