我ê台語文運動回憶：

 我ê台語文運動回憶：

▲參加「彰化縣台文通訊讀者聯誼會」了後，陳福當、游麗津、楊振裕、廖英雄、張聰敏、蕭平治chiâⁿ做主要柱仔跤，mā有一寡有志來捧場，台文運動者，海外有陳雷、鄭良光、林洪權，島內有陳明仁、陳豐惠來探訪，一時chiâⁿ做研究探討台語台語文ê場所，我mā m̄免koh孤單無人交流。代起先tī彰化市金馬路，後--來徙去民生路，上蓋感心tō是廖英雄兄，伊國校出業，學Pe̍h-ōe-jī有較食力，猶原認真出席，而且chah好料切水果盤來相請。

Chit段期間，我足拍拚學寫台語文、台語散文，有成篇投稿ê手寫稿4-5篇，因為是手寫稿，需要郵寄，寄出1篇koh 1篇，khiok-sī無hōe無poe，小可失望餒志，bē記得啥乜時日，陳雷、鄭良光sio-chhōa來探訪，經過張聰敏紹介，chiah知《台文通訊》創辦人是鄭良光先生，鄭良偉教授ê小弟，tòa-tī LA洛杉磯，原來鄭良偉ê「漢羅lām寫」觀念由鄭良光《台文通訊》來推廣。陳雷tòa-tī加拿大，是醫生是台語文作家，時常tī《台文通訊》發表散文小說。

歡喜phò-tāu交流意見，我kā良光兄怨嘆講：阿爸ê鹿角薰吹刊出了後，我足認真寫，已經koh投稿3篇，ná-ē lóng無消無息，敢講寫了無夠水準？原來良光兄無收著手寫稿，伊答應boeh幫我kā手寫稿拍字刊載。

總--是了解《台文通訊》發行人鄭良光先生是學校長兼摃鐘仔ê角色。

▲自從〈阿爸ê鹿角薰吹〉tī台文通訊發表了後，tō真認真想boeh創作漢羅lām寫台語文，斯當時田中國小校內發現兩隻客鳥，引起細漢時ê記智，tō開始思考boeh-án-chóaⁿ寫一篇散文，稿紙一張寫了koh一張，改了koh-chài改，一張換寫koh一張，經過兩三禮拜總--是完成一篇描寫客鳥做岫生湠ê散文，然後，家己唸了koh-chài唸，修改一擺koh一擺，驚做有欠點，tō拜托牽--e斟酌聽我讀，請伊進酌無妥當ê句讀kap描寫，最後chiah定稿。

定稿了後，暫時khǹg一爿，換題材koh-chài思考koh-chài寫。

Tī-teh寫《思母》過程，m̄知家己感動kah流目屎有幾擺，完稿仝款讀hō͘牽手聽，koh讀hō͘厝邊朋友聽，發現台語輕聲語尾詞ê重要性，he是感情表達ê聲情所在。Koh-lâi《相思 相思豆 相思栽 相思樹 病相思》，仝款開bē少時間去斟酌人、事、地、物ê舖排。

下面是手寫稿ê記錄：

第一篇手寫稿：1993/9《阿爸ê 鹿角薰吹》台文通訊第24期。後--來選輯tī台語文學有聲叢刊內。（2012/11/30授權國立台灣文學館「台灣本土母語文學常設展－線上網站」製作）

第二篇手寫稿：1994/4《客鳥》台文通訊29期。後--來選輯tī林央敏編《台語散文一紀年)》

第三篇手寫稿：1994/07《一張批，一通電話》台文通訊32期。

第四篇手寫稿：1995/08《思母》台文通訊41期。

第五篇手寫稿：1996/02《相思 相思豆 相思栽 相思樹 病相思》台文通訊45期。