《阿瑛！啊》序文

                                                                                                                  

《阿瑛！啊》這本小說是張聰敏先生作品，pún-chiâⁿ是手寫稿，後--來ná像有拍做電腦文書，斯當時聰敏兄ê電腦輸入m̄是kài順手。

1997年2月18日，聰敏兄往生了後，聰敏嫂盧惠寬kā文稿交hō͘我處理訂正校對，準備出冊，1997年10月18日我寫chiah chit篇序文。

1999年9月，彰化縣立文化中心出版《阿瑛！啊》，冊內kan-nā有縣長kap主任兩篇序文，我ê chit篇序文soah無囥入，感覺較bô-chhái。

●台文ê百年志業----為《阿瑛啊》chit 本小說做見證----蕭平治＜Siau,Lah-jih＞

伊為台文（台語文字化）一路行一路走，走到人生盡磅無回頭，留落百年志業ǹg 望推sak 台文ê 同志繼續行，行向未來有一工，台灣人會凍：「心存台灣情，嘴講台灣話，手寫台語文。」伊，著是張聰敏先生，彰化台文聯誼會ê 老大哥，《阿瑛啊》chit 本小說ê 作者。

1950年代尾流，伊高中時代，就趣味寫文章。斯當時島內ê 報紙雜誌時常出現伊ê 作品，照講是歡喜代一層，m̄ - kú 伊煞愈寫愈懊惱，懊惱bē 凍寫出伊心內對台灣ê 疼痛。台灣人ê 台灣情，應該愛用台灣話才有才調講分明；華文來寫，卡寫嘛寫 bē 清。無法度磕著心肝íⁿ -á ê 內têng ，只好靠hit 支文筆『無病呻吟』，每一擺寫煞，伊家己都m̄ 知leh 寫啥麼出頭。聽講hit 當時，有一位老師kā 伊講會凍寫台語，真可惜伊m̄ 知beh 按怎做起，鬱卒失望煞來封筆，一封二十年。

六、 七年前，台文ê 事業開始起飛，惹起張聰敏先生ê 新希望，伊開始kut-la̍t 四界走chhōe，南北二路，無惜時間金錢，beh chhōe 台文先覺先知。Bat kap 洪惟仁教授學過台語聲韻，扑了真好ê 地基。到kah 1994年，探聽鄭良偉教授轉來清華大學教台語，伊歡喜kah 睏bē 落眠，自按呢每禮拜走新竹kap 鄭教授學「台語文字」。咱攏知影，鄭教授tī-leh推sak 漢羅lām 寫chit 種方式，漢字會通就寫漢字，若bē 通就寫羅馬字，m̄ 免操心漢字hit 字是啥麼？羅馬字是外國人ê ，用khit 來感覺ge-ge，經過爭辯、參詳、深入了解，才感覺漢羅ê 文體實在好用，會凍100%來表達咱ê 父母話。心內話有teh tháu ，早前ê 鬱卒、懊惱自按呢bē 記得了了；自按呢全心來學漢羅lām 寫ê 「技術問題」：漢字beh 按怎選，羅馬字beh 按怎寫卡好勢。一路行--來，無回頭無後悔。

TĪ 五、六冬前，聰敏兄就teh 寫一齣平埔族ê 開拓、奮鬥、心酸歷史ê 長篇小說〈百年志業〉，描寫百外年前平埔族，受盡漢人侮辱、搶奪、欺凌、壓迫，煞不得已kap漢人通婚ê 無奈過程。伊嘛知，咱ê 血內有真濟平埔族ê 目屎；伊bat 為著故事ê 劇情來悽慘哭kah 目屎滴胸前。本成是華文作品，已經寫boeh 一半，chit-mái 伊已經學會曉寫台文，當然著愛將華文改做台灣話才會凍喝出心聲。講改就改，一改才知代，〈百年志業〉ê 文字、語句卡有水準來描述，伊chhân-chhân 將〈百年志業〉暫停工，換來寫chit 篇卡短、卡通俗ê 〈阿瑛啊〉小說。

伊講che是台文實驗小說，既然實驗，著愛斟酌台文用字、語意、語法…等等ê 問題，m̄ -nā 單單會曉聲韻、變調就有法度解決ê 代誌。伊跟隨鄭教授一直學、一直寫，為著beh hō͘ 進度閣卡緊咧，伊嘛用心計較潦落去學電腦，應用鄭教授開發出來ê TW301台文軟體拚勢實驗、描寫、修正，改了一擺閣一擺，無到滿意m̄ 願放。Che是上hō͘ 人感心ê 所在，嘛是伊家己甘願ê 付出。

《阿瑛啊》chit 本小說，內底真濟對話，攏是彰化、台中地區ê 純正台灣話。1940年代到kah 1990 ê 新世界，庄腳人ê 交談、生理人leh 喝貨；有土直、有粗魯；有查某人ê 酸lām 甜，嘛有老歲仔人哀哀cha̍p-cha̍p ê 可憐話；有輕聲細說，有喝大喝細，chhoh-kàn-kiāu ê 話免歹勢；外省話kap 台灣國語lām leh 戇戇se̍h 。Taⁿ lō͘ 害，聲韻ê 問題有得解，上歹排解是內底遐ê ta̍p-ta̍p tih-tih ，「有聲音無字影」ê 輕聲kap 隨前變調ê 表達，beh 按怎寫、beh 按怎應用符號，才會原音出現kah 好勢好勢？兩年前遮ê 是真罕得teh 探討ê 問題，煞hō͘ 伊頭殼mo͘h leh se̍h 。

 

見若聯誼聚會，討論遮ê 問題，伊tō 目睭金金金，耳孔靈靈靈。本來是「阿瑛仔」，阿瑛仔？感覺有淡薄仔怪奇，音韻無準，好親像m̄ 是，「阿瑛仔」kap「阿瑛--a」 ，應該是無kāng 音，嘛無kāng 意，路尾才改做「阿瑛--a 」（阿瑛啊）。親像chit 款ê 無仝ê 音尾，咱台灣Ho -Lo話真正濟，若無解決是beh 按怎寫會好勢？Chit 點是《阿瑛啊》內底上大ê 實驗問題。

看冊ê 鄉親逐家，請ùi 語言chit 方面切入來欣賞chit 本冊。實驗ê 代誌本來著有真濟問題，除了肯定聰敏兄ê 實際扑拼，嘛勞煩台文界ê 朋友，相及會齊，做夥來研究，按怎來寫台文卡好勢。

台文ê 工課是一件百年ê 工程，聰敏兄ê 〈百年志業〉小說未完成，但是伊《阿瑛啊》ê 台文實驗作品，著是咱「心存台灣情，嘴講台灣話，手寫台語文。」ê 「百年志業」工課。

紀念聰敏兄，阮beh 照伊ê 路來行，嘛請逐家來扑拼。

1997年10月18日 tī Chhân-tiong-ng chhù-lāi 。