視網膜手術----醫學台語 Lah-jih 2011/3/17
開刀後，醫生一再交代：「轉--去目罩m̄-thang pak--落來，洗面時目睭m̄-thang bak-tâm感染著細菌；目睭m̄-thang taⁿ-koân、m̄-thang theⁿ leh歇睏，上好用phak--ê；暗時beh睏一定ài睏ka-lián-phak，千萬m̄-thang睏thán-chhiò，án-ni目睭開刀後ê恢復ē較四是。」開刀後真正痛苦ê開始，m̄是痛，是phak--leh ê支點所在ē痠kah tòng-bē-tiâu，頭殼額、鬢邊、手肚、胸坎上食力，坐m̄敢坐直，徛m̄敢徛挺，歇睏m̄敢用theⁿ--ê，愛睏m̄敢去眠床睏，想著phak-tiàm眠床tiō-ē驚，beh péng身m̄敢péng，m̄ péng骨節已經痠kah giōng-beh so͘--khì，tòng-bē-tiâu tiō kui-khì落來客廳坐，phak-tiàm桌頂聽音樂；時間1分1分過，名曲1首koh 1首，phak ê姿勢換了koh-chài換，tiō是kan-nā ē-sái ku-ku-á坐，抑是頭額khap-tiàm雙手睏，1暝lò-lò長，ná-m̄趕緊天光？天若光，iū-koh beh按怎？醫生交代，tio̍h-ài 1禮拜後chiah看覓，aih…實在艱苦代，實在真悲哀！
少年時代，目睭有夠贊，無因為細漢讀冊點番á油燈變近視，每擺視力檢查攏是1.2、1.5，30幾歲時，看大舅á陳代書掛老歲á目鏡leh看資料，tō笑伊「chiūⁿ-siap tō bē-liap」，siáⁿ知6年後進入40中年，mā-tio̍h配he看報紙寫鋼筆字ê老人目鏡。
「過年較緊，過日較慢」，無影--le，日子1工1工過，年mā 1年過1年，老歲á目鏡年年換，度數1擺1擺重，ùi 100度配到350度，64歲退休後，hit支350度ê目鏡，soà愈看愈霧，koh配一支375度來掛，仝款無改善，che目睭一定有問題？「有問題著chhoē醫生」，去看眼科，醫生講：「有白內障。」
白內障bat聽人講--過，家己ê經驗是頭一回，醫生講：「He白內障tiō是目睭ê hàm鏡濁--去，kap he翕相機ê鏡頭霧--去仝一樣，ah tō霧霧beh ná看ē清楚！」Hò͘！原來是án-ni！「暫時忍耐--一下，細字--ê較mài看，電腦拍較少--leh，聽候白內障若sek，chiah來開刀解決。」知影原因，tiō chhoē大間病院做檢查，經過上網走chhoē，chhoē 1個符合症頭ê醫師掛門診。
2007年3月初10家己駛車去彰化看眼科，報到了後，護士先點ē hō͘目睭尪á展大ê目睭藥水〔散瞳檢查眼底〕，20分鐘後入去看診，醫生kài親切，ē曉講台語，看視力檢查報告了後tō問講目睭án-choáⁿ？先kā目睭霧霧看bē清楚ê狀況講hō͘醫生知，醫生chiah用儀器詳細檢查：「你講ê白內障是有一屑á，m̄-koh較嚴重--ê是視網膜有小可問題，我開單hō͘你去第8檢查室翕相。〔眼底攝影〕」半點鐘後koh輪著看診，大間醫館醫療kài進步，攏是網路連線，醫生切換螢幕，kí影像分析：「che是倒蕊目睭仁，視網膜ê部位tī chia，kái-sêng乒乓ê殼，薄薄--à，厚度平順無koh樣；koh看正蕊視網膜ê部位，放大來看，乒乓ê殼ná像無平厚，chia有淡薄á腫，腫ê所在血筋已經歪chhoa̍h……」看是看有清楚，m̄-koh che kap目睭濛濛霧霧ê原因有啥關係？卻是聽kah霧sà-sà。
「Án-ni beh按怎？食藥治療敢ē好？」
「上好是開刀治療，若無開刀，ē ná來ná嚴重，甚至青盲。」
「有hiah-nī嚴重--hioh？敢ē-tàng較慢chiah來手術？」
「建議愈緊愈好，m̄-thang拖。」經過詳細分析、解說、了解了後，tiō預約10工後開刀。
3月22下晡3點半手術室報到，驗明身份、交切結書、磅血壓、體重…了後，進入聽候室等待，大概是大日ê款，等了koh-chài等，候了koh-chài候，猶是等無消息，心情bē安定，心臟pho̍k-pho̍k跳，只好靜坐瞌目養神。m̄知經過外久，突然間室內鬧熱滾滾，醫生護士逐家無閒chhih-chhih，也有he扛軟轎--ê出現，原來是病院leh演習，需要1點鐘久，等到暗時，護士交帶辦理住院，先去病床歇睏。ná有人án-ni，未開刀tiō先toà院，好好人tiàm病房歇睏，後生koh-tī邊--a伺候，有影怪怪tō-tio̍h。
10點半跤兜，沈醫師來到眠床前，態度誠意正經：「阿伯！真歹勢，kā你chhiân chiah久，咱明á載chiah手術好--bò͘？明á早起10點，kā你排頭一個。iah抑是beh chit-má？」早起無閒到chit-má，應該真thiám，需要歇睏，而且chiah-nī thiám來開刀，mā無適合，tō答應醫生ê建議。「多謝阿伯！」少年醫生，chiah-nī bat代誌koh會曉講台語，實在ē o-ló--chit。
隔轉工早起10點護士chhoā到開刀房，koh一擺驗明身份，真緊tō chhoā去第二開刀室，peh-chiūⁿ手術台，護士開始蓋身軀，kan-nā chhun正蕊目睭留一個孔，麻醉師mā準備好各項控制儀器，沈醫師到位，phah開頭殼頂ê開刀燈光，目睭前是光明光iāⁿ-iāⁿ，先ùi目睭仁正爿tu̍h 一支麻射，koh對倒爿tu̍h 一支麻射，小可痛痛，隨時目睭tō麻了了，規身軀開始bē振bē動，心肝內卻是心頭在在，頭腦知知，全神貫注覺知tī醫生ê開刀進行中：
目睭前光iāⁿ-iāⁿ，目睭仁內底mā是光iāⁿ-iāⁿ，kái-sêng人tī太空中，突然間兩爿邊伸入來2支長長ê家私tī內面lā來lā去，ùi正爿一直ngiáu，ngiáu he薄薄ê膜，一屑á一屑á剝--落來，不三時有he噴水噴--一下，無siáⁿ痛ê感覺，kan-nā無張持ê tiuh--一下，需要teⁿh力去對抗，chhun--ê時間攏是注神leh看，想beh看醫生按怎leh kap目睭作戰；醫生mā蓋注神，大部份時間無聲無說，必要時ē kap助手對話，chhun--ê攏是tiām-chut-chut。m̄知經過外久，he太空soah pìⁿ-chiâⁿ彩色，有紅色、有藍色、有烏色，ná-chhiūⁿ he五色水彩潑落圓圓魚缸內，自由湠開變化萬千，五彩ê光影，一時siuⁿ過注神kioh是太空中ê星雲，soah茫茫m̄知身在何方。
M̄知koh經過外久，奇景結束，光影消失，「恭喜手術成功」，回魂轉來現實，目睭感覺痛痛，chit時護士開始開刀後ê處理，用紗布khàm目睭，蓋kah 密chiuh-chiuh，peh開倒蕊目睭看世界，淡薄á癡呆戇神，已經暫時變成獨眼龍，坐tiàm輪椅，護士sak到恢復室，交代注意事項，然後chiah轉病房歇睏。
Ē-tàng看著家己目睭仁內面、ē-tàng欣賞開刀過程，戇神tī太空旅行奇景，che是患者chiah享受ē著ê福氣。無開過刀，m̄知影開刀ê無奈、鬱卒、驚惶、痛苦，因為醫療ê進步、醫術ê高明、儀器ê精密kap人性化，痛ê苦楚已經減kah足少足少，你若有信心，著m̄免驚惶，tī頭殼清醒ê手術過程，享受chit種難得ê經驗。
昨暝一暝真歹睏，醫生交代著phak leh睏，phak久ē痠，睏thán-khi mā m̄是kài順序，péng過來péng過去，tiō是睏bē去。天光後到門診室檢查，pak開目罩，正蕊目睭ná-ē 無khoàiⁿ，kan-nā chhun一絲絲á光。醫生講「恢復真順序，目睭漸漸tiō有khoàiⁿ，大概ài一禮拜久，猶未全部恢復進前，一定照交代，需要phak leh睏。下晡會使得辦出院，10工後轉來複診。」
為著beh hō͘視力恢復正常，醫生ê話m̄敢無聽，坐m̄敢坐hiàⁿ-hiàⁿ，徛mā-tio̍h頭lê-lê，beh睏m̄-thang睏thán-chhiò，tiō ài睏ka-lián-phak，目罩一定ài掛，千萬m̄-thang感染，洗身軀特別細膩，目藥水照起工點，酸、澀、薟刺激性mài食，總講一句，護士交代ê注意事項ài照行。khiūⁿ食、照起工食藥點目藥是無問題，m̄-koh hit-ê睏thán-phak tiō真liân-hoê，連紲一禮拜身軀kan-nā保持幾個仝款姿勢，痠痛、無聊、鬱卒、等待心情，永遠無人替你分擔，「各人食飯各人飽，隨人造業隨人擔」ê佛理tī chia得著印證，應該m̄是歹代誌。
一禮拜復原期間，除了休養、修養兼參禪，上蓋歡喜、心適--ê，tiō是利用換藥點目藥水kā目罩剝落來ê時陣，ē-tàng看著目睭仁內面，有he圓形魚缸內面貯烏墨水ê現象，一日一日消蝕，3工後kài-sêng一窟烏色ê水池，頂面透明ē-tàng看著外口光影，下面是烏烏ê墨水，隔離外面世界，非常期待，期待水池烏水ē緊ta，因為烏色部份若無看見，tiō是恢復目睭有看見ê時。
一禮拜已經到，可惜湖水猶未ta，koh忍耐拖1工，第八工早起已經全部看ē著外口，m̄知按怎ná-ē留1點烏點bē消失，ē toè目睭振動飛來飛去。
4月初3開刀後第十一工，轉來病院複診：「恢復真好，敢有啥物問題？」
「視力kap開刀前差不多，發現看物形體有歪斜放大現象，ná-ē án-ni？另外目孔、目睭仁感覺重重，真無爽快。」
「目前恢復真好，若beh恢復正常，可能tio̍h-koh等--一暫à，正蕊眼壓有較koân，來隔壁間注一支射，tiō-ē降壓較爽快。kā你預約4月14 koh轉來複診。」theⁿ-tiàm病床，醫生攑1支射筒，射針長長幼幼，直接ùi目睭仁tu̍h--落，穩、在、輕、あっさり，真正hō͘患者感覺信心十足。
遵照醫生吩咐，點目藥水著繼續，酸、澀、薟著khiūⁿ，刺激性薰、酒、咖啡mài kha̍p，粗重空課、激烈運動m̄-thang；另外免掛目罩，會使得洗面洗身軀，會使得睏thán-chhiò，mā會使得睏ka-lián-phak，o͘h！解放ê輕鬆，爽快ni-ni。
4月14家己駛車轉來病院複診，報告醫生復原狀況，眼壓正常，視力有較進步，但是形體扭曲變形猶原存在，已經無解，問醫生「是m̄是phak ê姿勢無正確所致？」。
「He無關連--lah，ē-tàng恢復án-ni已經真萬幸，ka-chài你無糖尿病，若有tiō較費氣，恭喜--你！2禮拜後chiah koh轉來複診。」
「先--ê！kā你請教，開刀時，是看螢幕操作儀器，抑是手工操作？」
「用hàm鏡看目睭仁內面，用手操作儀器。」
「開刀後恢復期間，目睭仁內底哪有he烏影1日1日消蝕ê現象？」
「He烏影是氣體，氣體消失目睭tiō有看見。」
「多謝！為著beh了解，有較厚話好奇。」
「Bē--lah！以後著繼續追蹤，白內障問題，大概半年內猶免手術。」
「多謝！多謝沈醫師！」
〔後記〕：
少年時代目睭真利，視力檢查m̄是1.5 tiō是1.2，40歲後開始老花，看遠猶原だいじょうぶ(無問題)，看冊寫字開始需要老歲á目鏡，64歲退休後，目睭愈來愈霧，chiah發現視網膜出問題，開刀已經3年goă外，soah拖到「白內障手術」了後chiah寫chit篇文，有淡薄á錯亂。
人講「先生緣，主人福。」che著ài看患者ê運氣kap福氣，拄著好醫生mā-tio̍h患者信任配合，現代科技、醫術、儀器ê應用，mā是蓋重要。總講一句，既然選定醫生，著相信伊ê才調，免驚惶絕對配合，成功機率一定真koân。視網膜開刀後，繼續掛沈醫師ê門診追蹤，後--來沈醫師調去台北，看診無方便，chiah-koh走chhoē著陳醫師複診，舊年「白內障手術」仝款得著順事ê結果，實在感恩，多謝兩位醫師。
Chit-má兩蕊目睭視力無仝，情形是按呢：倒蕊看近、看報紙、拍電腦維持老花300度，看遠無問題；正蕊開刀chit蕊，問題tō大--lò͘，看近、看報紙、拍電腦仝款掛老花300度，比倒蕊較無清，字是歪斜--ê，雖罔看有，m̄-koh bē自然，一tah久á tō bē堪--得，看遠ē-tàng看真遠，比倒蕊較濛--一屑á，應該是解像力ê問題，總講一句，用翕相機做比論，兩蕊ê鏡頭差不多，只是後壁ê底片，正蕊已經變質。好佳哉，兩蕊同齊看，視神經ē自動調整，看遠、駛車攏無問題，若看近、看報紙、拍電腦tiō真緊疲勞，大概是視神經自動調整siuⁿ-thiám ê 緣故。
手術後，真濟朋友關心，時行用he台華thàu-lām方式問講「是m̄是『視網膜剝離』」，結果花一輾轉chiah知是「視網膜玻璃」，m̄是『視網膜剝離』，真正是豬母牽去牛墟。為著好奇、了解，上網chhoē資料，知影chit-pái目睭手術叫做「玻璃體切除術」，醫師用特殊hàm鏡hām強光進行手術，koh-ē tī目睭仁內底注入空氣，空氣較輕浮tī頂面撐tiâu視網膜，家己看著ê烏影tiō是空氣，因為視神經影像是顛倒péng--ê，m̄-chiah烏影tī下面ná像水池，實在真心適。
請參考第十章玻璃體病 http://www.nobelgroup.com.tw/lasikeye/eyeill/10.htm 第七節玻璃體手術
