七星潭是1个風景區毋是潭，是花蓮市民上合意的一個海灣，佇花蓮市郊外，面對闊莽莽的太平洋，對我來講是較罕得看著的景色，吸引逐家的目睭，予我看kah無nih目，海水青藍，天頂嘛青藍，海波浪1湧閣1湧，白白ná牛奶，小湧來時恬恬看，大湧湧--來趕緊倒退lu，傷慢tiō會予海水tshiâng kah澹糊糊，Lîng-lîng較無膽，看著海湧1湧閣1湧，hua̍h-hua̍h叫，煞共怹母--à mo͘h-tiâu-tiâu，毋肯--落去。
天氣共款佮昨昏pêⁿ好天，日頭半天懸，閣無樹蔭thang遮日，而且今仔日路程百外公里，tiō無閣iân-tshiân。順海墘公路駛，路狹車少，感覺tsiâⁿ輕鬆，來到太魯閣駛過大橋tiō沿台9線蘇花公路向北一直行，路面闊閣平，路草是起起落落、彎彎斡斡，駛傷緊會gông車，不過比1960年來--過的記持，超過幾若倍好--lò͘。「1960年台中師範出業前的18工參觀旅行，7个班級300外个學生分做2批，1批向北，1批落南，阮班落南，沿路參觀沿路tshit-thô，來到花蓮師範隔1暝，才佮向北hit批換車，向北hit批車較細台，司機較gâu駛，彼陣路細條閣無khōng點仔膠，嘛無開磅空，袂當相閃，需要管制，佇太魯閣所在出發，著等對方車隊齊過來，這爿的車隊才會使起行。清水斷崖彼一段上驚險，是uì崩崁挖一條ㄈ字形的半磅空，1台basuh拄拄仔好，kan-nā佇兩輪所在khōng兩tsuā紅毛土，1爿是山壁，1爿是崩崁，崩崁落去tiō是太平洋…」Tiat--è ná駛ná聽，後壁座3查某囝講：「爸！遐爾恐怖--ò͘！」「著--啊！彼陣逐家攏嘛毋敢看下爿，我共偷看一下，夭壽--ò͘，有看著車無看著路，下面崩崁崎閣深…Tiat--è！你看，頭前磅空正爿tiō是舊路…」
「爸！咱遮歇睏20分鐘，遮tiō是清水斷崖，看佮較早有共款--無？」
「有影真媠真壯觀，較早無看hiah真，已經無啥記持。」
「Tsit-mái路加真好駛，無像爸講--ê遐爾驚險，交通建設實在重要，因為開新路，咱才有法得tiàm遮欣賞斷崖山景。」
「講是無毋著，毋過he著破壞偌濟山林土地佮生態--neh。」
「毋是講欲閣開1條高速--ê？」
「這我無贊成。」大囝婿參加意見：「按呢已經真方便，閣開高速--ê，破壞閣較嚴重。」
「著--a，遮爾媠的所在，駛遐爾緊欲按怎欣賞？」二囝婿嘛插嘴講。
「人tiō是按呢，緊欲閣較緊，方便欲閣較方便，一直追求快速方便，敢會較快樂？實在懷疑。時間、速度佮空間的關連真奧妙，共款的距離，速度愈緊，時間愈短；共款的道理，共款時間，速度愈緊，tiō會走較遠。毋過kan-nā顧速度的緊、時間的短，彼个進行的過程，攏無把握欣賞感受--一下，敢袂傷拍損，司機顧駛車，車內的人ná像看電影，1幕1幕過，囥佇頭殼內的記持，到底tshun偌濟？心靈的感受tshun偌濟？」
「爸！你想傷濟--a-lah。」
「Ò͘！」講欲看光景，煞引起一場國是論壇。
來到南方澳，腹肚嘛枵--a，tiō佇路邊擔仔食魚箍，上鮮的魚箍湯，食飽小lau--一下，討海人實在拍拚，共天討趁的人生，實在毋是做田人子弟所會當了解--ê。離開南方澳，無偌久煞感覺像駛佇高速公路頂，「敢leh gông車？」自離開蘇花公路了後，tiō東西南北分袂清，Tiat--è講，這是「蔣渭水高速公路。」有影佇高速公路頂無毋著，毋過是生分的「蔣渭水高速公路。」毋捌家己駛車駛來到宜蘭，莫怪路草無熟，會東西南北分袂清。落高速公路佇田洋仔3彎4斡才揣著欲蹛的民宿，位置tiō佇冬山河親水公園邊，盈暗欲踅夜景用行--ê tiō會使，蹛--ê安搭好勢，先睏一下仔晝盈暗較有精神體力。
今仔日抵好是宜蘭縣蘭雨節的開幕日，親水公園tsiâⁿ鬧熱，免門票，齣頭濟、人嘛濟，暗頭仔少年--ê先tshuā囡仔去耍水，兩老--ê佇岸邊顧行李，耍到日頭落海，鬼仔出來放屎的時陣，才開始四界罔踅，人是that-that-tīⁿ，挨來挨去蓋趣味，有的表演跳舞、有的唱歌、表演技藝，看上清楚--ê tiō是弄盤仔花的表演，一个人欲弄14 kâi 的盤仔tiàm篙仔尾尖轉，實在無簡單，看kah逐个無nih目，可惜搬演的藝人多數是外國人，像弄盤仔花--ê tiō是uì中國來--ê。踅欲到2點鐘，跤酸腹肚枵，趕緊揣歇睏所在順紲買食--ê，ná食ná看光iāⁿ-iāⁿ的夜景，親水公園有兩項建築予我真欣賞，1項是水池仔內像粟堆也像瓜笠仔的紅毛土造型，1項是像鼓粟風鼓頂懸的四角形漏仔[漏斗]變形的造型，攏真有台灣農村的意象，毋知創作者是毋是有這个意含？
大會宣佈9點半欲放煙火，參觀的人群tshān-tshān-hiúⁿ徙位到入門喙這爿，選好位欲看放煙火…
pőng～一聲，煙火開始--lò͘，pőng～五花十色的煙火，光iāⁿ-iāⁿ，有的像火龍lām-sám鑽；有的pòng開像1蕊花，lak--落來像黃金雨，隨時消失，pőng～這爿消失彼爿閣起，siű～pòng 彼爿消失這爿閣起，一時仔都無延遲，起起落落、生生滅滅，看kah逐家喝聲連連，大人顧翕相、顧錄影，囡仔看kah笑微微，15分鐘一目nih tiō過--去，「煙火好看，無偌久」，人生短短，千萬毋通留戀佇tshiaⁿ-iāⁿ的過去，把握現在，創造未來較要緊。
煙火放煞，結束今仔日的行程，轉來去民宿歇暝要緊。
七星潭：
七星潭 毋是潭，人客揣無煞gāng-gāng，無潭欣賞mài失望，海邊耍水kài迷人。
海湧一湧閣一湧，牛奶色水白茫茫，人聲水聲齊振動，原來遮tiō是七星潭。
冬山：
冬山舊名冬瓜山，親水公園田庄味，宜蘭縣長有擔當，建設宜蘭台灣心。
青天白日高高照，縣長換人煞變調，蘭雨節吹中國風，童玩節目無看了。
2009/12/5蕭平治
沒有留言:
張貼留言