早睏早精神，透早的山景清涼空氣鮮(tshinn)，看真遠，廬山部落、廬山溫泉tō佇目睭前，山風予人淡薄仔畏寒，天頂雲真白，表示今仔日是好天。為著囡仔佮阮兩老--的，早頓雖罔簡單，猶是食真慢，囡仔ná食ná耍大白熊狗，這種狗大phiāng恬靜，雄雄看會予人驚，佮伊耍，卻是隨在人摸隨在人創治攏無要緊，無性無地，極加毋tshap--你做伊走，kài有修養。
山頂天氣變化oh料，明明拄才是好天，9點出發時陣，suah滿山雺霧，路痕澹濕，交代Tiat--è駛車著細膩，霧燈著拍開，毋通駛傷緊。踅過「青青草原」，山路愈tshìng愈kuân，雺嘛愈來愈重，本tsiânn美麗的山景攏藏佇雺霧內，可惜--à。山路彎來斡去踅kah予人gín戇gín戇強欲睏--去，突然間豪光現前，炎天赤日頭，看著光艷的日頭光照著白雲，原來是踅過一粒山頭，越過一个山嶺，已經來到武嶺。武嶺標高3275公尺，是中橫公路上懸所在，視野曠闊，停車翕相看光景的人袂少，可惜便所袂使用有khah無方便。囡仔真乖，予怹食一寡點心，tiō閣撲撲趒，有講有笑。
紲落來到合歡山〈合歡山國家森林遊樂區〉，便所一流--ê、風景一流--ê、空氣一流--ê，合歡尖山tiō佇「合歡山莊」後壁面，會當看著奇萊山北峰、合歡群山。大囝婿、查某囝毋捌來--過，特別趣味，一直共囡仔翕相；後生、新婦特別注心hit間新開張的松雪大樓，趕緊行去瞭一下(lió-tsi̍t--è)；我是ná看ná共牽手講古，講斯當時是按怎佮朋友來遮peh合歡主峰、石門山、東峰佮北峰，是按怎發生高山症？講kah喙角全波，牽手講：「十个老人九个當原初，果然規欉好好----無錯。」因為tshiân傷久，登百岳之一石門山的計畫自按呢取消，Tiat--ê感覺真可惜。
時間已經過晝，腹肚kū-kū叫leh大腸告小腸，tiō佇下一站大禹嶺食晝，大禹嶺是主線佮霧社支線的分叉路站，uì霧社駛車來到遮，suah一時東西南北分袂清，有gông山的感覺。食飽起程，路途遙遠，趕到天祥歇睏放尿，無時間thang tshit-thô，當經過路邊磅空口時，Tiat--è紹介講：「倒手爿磅空入去tiō是白楊步道，去過的人攏呵咾真媠，以後tsiah閣來。」
「5年前參加賴和台語文學營捌入去過一擺，有影儹，親像世外桃源。」
「Tiat--è，車駛較慢--咧，tsit段坑溝仔風景真媠！」
「爸！咱欲頭前磅空口停車。」無偌久tiō佇路邊停車場停車。
原來是按呢--òo，倒爿磅空，正爿是九曲洞舊路，是國際觀光客上合意的路段，因為時常會落石頭造成危險，這馬禁止行車，kan-nā開放遊客步輦欣賞，2公里的大理石峽谷來回著一點鐘久，大人囡仔攏趣味十足，雖然有關單位1人分1頂安全帽，也是會感覺驚驚，不時著斟酌囡仔的行動。水是大自然「工夫慢」的雕刻師傅，經過千年萬年的沖割si-ia-geh，才有今仔日天然美景，天然--ê上媠，大自然上帝的造作才是藝術，厝內的收集beh thài-thó會比得，總講一句，行向大自然tō-tio̍h--lah。
時間真正無早，趕到布洛灣山月村[Buluowan]已經將近6點。
Buluowan的暗暝：
Taruko[太魯閣族]族語Buluowan，是「坑谷tân雷聲的所在」回音的意思，早前是Taruko部落的所在地，是一個tshē-o-á地形，四箍輪轉攏是山，kan-nā tshun一條坑溝仔是氣流的出入喙，毋才佇遮若大聲喝咻，tō ē有山壁的應聲。
來到Buluowan，旅館交代7點～9點食暗，一行十幾名tshuā 5个囡仔，行李一大堆，先揣房間安搭要緊，房間是木造--ê，外觀kài媠，除了浴間、便所、衫仔櫥以外，tō是一間大總舖排8塊tha-tha-mih大的膨床，囡仔看著tiō隨時滾地龍--起來，小歇睏了後，趁食飯前猶半點鐘久時間，tiō店厝前大遍草埔廣場散步，囡仔耍kah tsiânn歡喜，蹤來蹤去、踅圓箍仔、jiok蝶仔飛、看花草、聽鳥仔聲，攏tsiânn好玄稀奇，笑聲連連，俗語講「1个囡仔較鬧熱過3个大人」，佇Buluowan是「5个囡仔帶動遊客ná厝邊隔壁」，遊客互相hap仙交換tshit-thô心得。
暗頓tsiânn phong-phài，菜色袂少，tshinn閣清氣，1盤1盤1坩1坩，隨在人合意，做你共挾做你共khat，1家伙仔圍2桌，少年--ê著伺候囡仔，老歲仔tiō家己揀合意的口味，tsit頓「風味餐」價數無俗，會當食巧(khá) 嘛會當食飽，1項共挾一屑--à，逐項攏共食，較合意--ê有現烘--ê的山豬肉，佮山芹菜、香圓瓜仔鬚、過貓蔬仔這款口味的料理。我特別捾2罐黍仔酒[小米酒]，少年--ê 1人3小杯tiō無閣thîn，tshun-ê攏是我這个老--的總貿，tsit-mái的少年人實在會呵咾--tsit，無像我tse老--的，食好料--ê無酒無算phong-phài。飯後1杯咖啡已經是慣勢，pún-tsiânn想欲閣紲--1杯，牽手擋牢咧才無閣添。
9點開始有暗會，店內的員工總動員，有人唱歌、有人彈琴、有人跳舞，演員無濟卻是搬kah tsiânn認真熱情，無冷場，觀眾嘛看kah tsiânn注神，予怹袂少的噗仔聲。其中布洛灣山月村村長(旅館頭家)真gâu講古，講飛鼠的笑話、講拍獵的禁忌，講Taruko人的戇直，伊講砛簷跤囥hit幾隻椅頭仔叫做戇神椅[發呆椅]，怹Taruko人傷閒的時陣，攏會坐店椅仔頂戇神戇神規半工，啥物攏無愛想，啥物攏無愛做，kan-nā戇神戇神看天頂的雲，看遠遠的山，聽風leh哼歌，聽鳥仔leh講話，其實這 tiō是「放空」的人生享受，tiō是原住民lio̍k-thiòng的性格。
暗會煞，準備洗浴oonn-oonn睏，一家伙á 4口灶，睏tiàm大總舖，雖罔有較狹，但是一家大細會當kheh-kheh做一夥的和樂氣氛，才是建置幸福家庭的因子，泡茶開講，講今仔日的歡喜，講明仔載的行程，了後隨人某囝隨人ànn，予阿媽io--過的孫，閣相爭搶欲kap阿媽睏做夥，阿媽歡喜kah笑hai-hai，自按呢1暝好夢到天光。
合歡山：
合歡山頂閤家歡，視野曠闊看群山，奇萊險惡佇眼前，松雪樓頂可安眠。(an)
大禹嶺：
大禹嶺雙叉路，向西東勢角，往東Truku，阮uì霧社來，gông山花kô-kô。
來到大禹嶺，食飯較有影，此去路頭遠，餓肚會恍哧。(hiánn)
九曲洞舊路：
九曲洞內巧天工，立霧溪水流向東，大理石紋天然鑿，出名致蔭台灣人。(ang)
九曲洞內會落石，啥物時陣ioh袂著，安全第一著戴帽，遇著危險tiō可惜。(ioh) 2009/11/19蕭平治
沒有留言:
張貼留言