Buluowan七月時的透早，恬靜涼爽，除了gâu早的鳥仔聲佮散步聲，空氣是恬--ê，光影嘛是恬靜--ê，佇山路ná散步ná看花草樹木，嘛是一種享受，散步轉來tiō坐tiàm戇神椅等待食早起。
今仔日目標是sakadang[沙卡噹]佮花蓮，9點出發，順中部橫貫公路一直駛向東爿，Tiat--è刁工經由太魯閣大橋khau倒轉來，nǹg過磅空tiō到sakadang步道，磅空前是sakadang大橋，步道tiō佇橋跤，這是台電為著開發立霧溪水力發電計劃所開設的道路，過去叫做神秘谷步道，這馬已經改倒轉來Taruko的原名，sakadang溪邊有1段是石頭山壁，用炸藥共挖1條ㄈ形磅空，佇橋頂看人佇遐行振動，ná像鳥鼠仔鑽孔--leh，有影心適。
Ná行ná翕相錄影，囡仔跤無輸大人，kan-nā Tsîng-tsîng 需要人抱，tshun--ê hit 4个，兩人1 kânn，手牽手，ná行ná講話，毋知leh講啥物貨。看對面山壁，袂少的大理石，花紋變化萬千，比九曲洞--的，有khah媠無khah䆀，看溪底，溪水清kah會得看著石頭仔，毋但清，色水閣變化多端，透明的光影透lām水色、孔色、青lin色、紅幻色、金黃色…做一夥，別所在猶毋捌看過--koh，聽講是溪水中的微酸溶解大理岩中碳酸鈣成分所造成。大約行欲2公里，揣著一个會當落去溪底的所在，水無深，清kah石頭仔看現現，有人抾石頭，有人蹽水耍，代起先囡仔猶躊躇毋肯落水，慢慢仔siânn勻勻仔騙tiō耍kah歡喜but-but，無想欲起來。
回程時陣，路邊問1位Truku少年人，原來遮是怹的保留區，怹的族名叫Ta-lu-kuh 毋是Tha-lu-koh抑是Thài-lóo-kok，因為用漢字寫抑是用英語呼音，chiah-ē走音去。
離開sakadang直接駛花蓮市，遮tiō是後山，突然間1陣大雨沃kah路澹sip-sip，pān-phue會影響著路程，無偌久雨過天清，大蕊大蕊的白雲，像棉仔毬、像棉仔糖，膨giâ-giâ，ná狗仔毛(moo)、ná兔仔毛(mn̂g)，浮佇水藍色的天篷下，心情隨時活跳想欲飛。已經傷過晝，囡仔已經無耐性，趕緊揣1間「麥當勞」，食美國割包，這是少年、囡仔上合意，老歲仔嘛著綴leh享受，消磨2點鐘，腹肚飽眠嘛足，起行閣來去耍。
「麥當勞」tshiân傷久，所以跳過預定第一站--慶修院，直接進入花東縱谷去揣「壽豐鄉文史館」，參觀了後淡薄仔失望，看起來不過是一个社區的活動中心--niâ，無啥thang看，花蓮縣政府共伊列入景點，毋知有啥物特別的意義？
朋友捌佇東華大學教冊，聽講校園真媠，佇大門換證了後tiō會使得入去，閣無收錢。學校規劃袂䆀，建築物tsiânn媠，有1堀人工水池，加添校園媠款面貌，水池內若飼幾隻仔天鵝、鴛鴦水鴨，毋知欲加偌仔有氣氛--leh，上欠點--ê tiō是樹仔猶細叢，佮曠闊的校園實在無kah-phah。徛佇校園上趣味--ê tiō是看天頂的雲彩暗霞，「夕陽無限好，只是近黃昏。」有較悲觀，共改做「夕陽無限好，因為是黃昏。」抑是「暗霞tsin-tsiânn媠，因為是欲暗仔時。」較袂予老人感覺稀微。
盈暗的旅館佇市區內，俗閣清氣，閣有網路，可惜大間房間佇地下室，淡薄仔濕氣，安搭好勢tiō出門揣食，Tiat--è有計畫，知影佗位有好料理，揣出名的點心，一位食一寡，享受名產。食飽順紲買1粒雞卵糕佮1盒麻糬，tsah轉來旅館食點心。
洗浴了，佮囡仔做夥看電視，講著看電視，囡仔逐个恬tsut-tsut，看kah喙仔開開開，9點外，新婦A-Jû搬1隻椅頭仔，囥雞卵糕，插蠟燭，講欲共大查某囝的後生A-Tāu做生日，A-Tāu歡喜kah，關電火，唱生日歌，華語版、英語版、台語版攏唱一遍，A-Tāu袂曉下願，kan-ná講伊欲食雞卵糕，tiō共第一塊雞卵糕提予伊食。阿媽歡喜共伊攬牢牢，阿公無閒翕相錄影。感心的暗暝，兩頂總舖睏一家伙。
Sakadang步道：
Sakadang溪水清清 ，大理石壁像仙境，溪水色地真奧妙，黃紅青白影晶瑩。(ing)
Sakadang溪水清清 ，溪底石頭粒粒明，大理石紋變化多，台灣奇景自然成。(ing)
花蓮印象：
後山日先到，光艷污染無，藍天貼白雲，空氣袂濁濁。(o)
上媠魚肚白，日出照山宅，山林青翠翠，暗霞戴瓜笠。(eh)
[註]：暗霞出現佇山尾溜，親像戴瓜笠。2009/11/22蕭平治
沒有留言:
張貼留言