Mài講再會，只是ùi公務離開：20050801退休感言

Mài講再會，只是ùi公務離開：20050801退休感言

頂禮拜，有三個四年級ê學生囡仔來kā 我訪問，in 有ê 問問題，有ê 做筆記，大概是beh寫作業ê款。

「蕭老師，你哪會beh做老師？」

He 是無張持考著師範學校，soah自按呢來學校教冊，一直教到chit-mái。

「是按呢--ò͘！」

「蕭老師，你做老師感覺上歡喜--ê是啥物代誌？」

上歡喜--ê是教恁唱歌、教恁講台灣話，hō͘恁感覺歡喜閣會當kap阿媽講台語。

「hò͘！」

「蕭老師，你哪會beh退休？」

咱若坐車去chhit-thô ，坐到咱beh去ê所在，總是ài落車，若是想beh閣去別位，著換一班車才閣出發。

「蕭老師，你tih-beh 落車a是--bo͘h?」

是，老師liâm-mi̍h 著beh落車a！

囡仔要求無濟，按呢ê答案已經hō͘ 伊滿意，雖罔in無一定完全了解意思。

想當時千思萬想嘛m̄-bat 立志講beh做老師，攏是無張持考tiâu師範學校，因為免交學費閣有掛保證ê鐵飯碗頭路thang食，從按呢一toà四十三冬，教冊教到歡喜甘願，教到心滿意足，教到kàu-khùi--à chiah beh離開。

四十三年來，hō͘ 我上滿意ê代誌，就是十幾年前踏入台語文字化ê研究，chiah開始對家己身份有進一步ê認識，嘛瞭解家己父公留落來ê語言是loā-á-ni̍h-á寶貴，m̄-nā 音韻súi水準koân，閣是全世界三十六種有文字thang表達ê語言之一。雖然伊已經koh 樣，需要親像保育動物按呢用心kā救活，總是有leh做就有成績，台語文字化ê工程已經達到國際化，m̄-nā 有輸入法，閣會當網路通行無阻。

服務四十三冬ê烏枋杙仔生活，總是著做一個結束，此去m̄免受上班下班ê束縛，thèng-á享受自由自在ê日子。看宇宙萬物ê規則，永遠離bē開生、住、異、滅ê規律，有開始著有結束，人生充滿挑戰向望ê機會已經漸漸淡化，續接落去--ê應該是休閒穩定ê生活規畫，kap修持檢討人生ê好機會。

啥物是退休ê規畫？

你kā看，謝校長kap仁和兄今仔日猶原chiah-ni̍h 無閒chhih-chhih，無受退休心情影響，猶原扑拼無停。che就是退休ê第一步，千萬m̄-thang 退休tō萬事休。最近有聽人按呢講：退休就是「ㄗㄨㄛˋ ㄧˇ ㄉㄞˋ ㄅㄧˋ」，m̄ 管伊ê 解說是「坐以待斃」抑是「坐leh等待新台幣」，he攏是無衛生ê觀念，滾笑而已。咱需要--ê是修身養性兼養生ê過日。

美仁姊tō按呢講：老兵beh退伍，永遠懷念定根tī chia ê田中國小，思思念念攏是田中國小ê兄弟姊妹，有閑khah捷來厝裡泡茶，學校若有啥物好孔--ê著會記得鬥相報。

阿米姊聽人講：「人生海海，海海人生。」但是伊懷疑到底有外濟人會當參透？伊ǹg望退休了後，有閑tō朋友相招去peh 山，開講phò-tāu ha燒茶，kā心情放下，mài閣為名利leh費氣。

富美姊是基督教徒，講著話攏是存著滿腹ê感恩，伊beh感謝逐家鼓勵，伊beh永遠kā 你會記得，會記得恁chit份珍貴關愛ê感情。

清蓮姊ê歲頭m̄ 驚人知，伊講教學32冬，永遠無後悔，55退休，心滿意足，快樂無比，tī-chia beh 祝福逐家日日快樂，吉祥如意。

淑貞老師看上會開，閣一冬著滿55，伊m̄ 是bē等得，伊為著beh親身奉待90幾歲ê老娘親，甘願放棄55專案ê加級，莫怪伊beh kā逐家講：有緣做夥著惜緣，逐家身體攏康健，有閑寒舍泡燒茶，心情清爽倒少年。

退休後ê生活是啥物？人講「夕陽無限好，只是近黃昏。」Che可能有較寂寞無奈，其實我無愛按呢看待，我ê體悟是「暗霞真正súi，因為是beh 暗仔時。」若m̄ 是tn̄g 著黃昏時，beh欣賞夕陽美景敢有可能？有老師問我，「退休！你敢準備好勢？」各位老師，你看，阮準備好勢抑猶未？

各位貴賓、各位老師：

mài講再會，只是ùi公務離開，阮tiàm-chia kā逐家祝福，祝福逐家事事如意，健康快樂！

謝安弘 孫富美 蕭平治 張米 陳美仁 黃清蓮 洪仁河 許淑貞 敬禮 多謝逐家

2005-06-30 tī 田中國小