70足歲生日感言： Lah-jih 2011/08/08

70足歲生日感言： Lah-jih 2011/08/08

舊年「爸爸節」tú好禮拜日，一家伙仔相招去竹北後生hia 慶祝兼chhit-thô，boeh晝後仔，二查某囝偷偷仔講「Tiat--è已經訂好所在，boeh kā爸爸做生日，是一間日本料理店--ō͘！」

「Ò͘！原來今仔日是8月初8--ò͘！」

自從囡仔出社會ē-hiáu主動kā父母做生日了後，to̍h認定「8 8節」是in pâ ê正式生日，in講1941年8月8日to̍h是舊曆6月16，「8 8節」當然是爸爸ê生日。囡仔ê講法有道理，太陽曆ê算法khah符合四季變遷規則，若講出生 年月日ē影響人ê運命，太陽曆應該比太陰曆較準chiah-tio̍h，舊曆6月16生日煮豬腳麵線，to̍h pìⁿ-chiâⁿ老某仔ê專利。

1941 hit年舊曆6--月有兩个，太陽曆8月8日hit个6月16是閏月，chhiau-chhoē網路萬年曆，發現1941到2011，kan-nā出現1941/1960/1979/1987四擺閏6--月，莫怪一生m̄-bat重視過家己ê生日，敢講宿命注定好好？食豬腳麵線過生日，是結婚後ê記智，常常是豬腳麵線上(chiūⁿ)桌，chiah知是生日到--à，有一年上譀古--ê是豬腳麵線食1碗了後，猶leh問「今仔日是chiâ ê生日？」

戰亂時期出世tī散赤ê庄腳囡仔，4歲to̍h無老母，18歲koh失去老爸，ē-tàng平順快樂過童年，順利讀12年冊，chiâⁿ做崁頂庄 頭一个國校老師，除了父母恩賜ê善良kap聰明腦智，上蓋感心感謝--ē著是4位阿兄kap 4位阿嫂，阿兄協助老爸維持家庭經濟，阿嫂hoāⁿ家煮三頓洗衫補thīⁿ，hō͘這个細漢小弟細叔kap人有比phēng，健康平安大漢，若講有啥物遺憾，to̍h是無「Ī--ā」thang叫，無老母thang noà thang sai-nai依倚。

7歲進前chiâⁿ-si̍t「幼稚無知」，記智無濟，tī老母過身前1年大嫂to̍h已經娶入門，Ī--ā過身，大嫂soah pìⁿ-chiâⁿ養飼細叔ê天使，戇戇m̄知世事ê幼兒，伊ê認bat，「大嫂」to̍h是老母ê意思，boeh食boeh睏、boeh chhit-thô boeh放尿，一聲「大嫂」隨時伺候kah到，一日天光到黃昏，無論煮飯、擔水、洗衫，有大嫂ê所在，m̄-sī āiⁿ-tī尻脊骿，to̍h是toè-tī尻脊後，細叔歡喜，大嫂to̍h歡喜，細叔若吼，大嫂to̍h toè-leh目屎流，有大嫂ê疼惜，「無老母」ê遺憾soah消失到無影無蹤。一直到7歲以後，二兄結婚，二嫂娶入門，大嫂chiah chhoā taⁿ-á滿4 kó͘月ê頭tsiūⁿ-á囝跟toè翁婿去阿里山做工趁錢。

Ē記得二兄二嫂結婚hit一日，是入學讀冊ê第三工，因為歡喜娶阿嫂無去學校，老師分--e ê 1塊攄仔kap 3枝鉛筆，是仝班同學阿目提轉來--è。Hit暗新娘請食茶，模仔兄做紹介，to̍h kap阿道兄bih-tiàm眠床後看鬧熱，因為chit个好因緣，隔轉工新娘to̍h pìⁿ-chiâⁿ陪伴過國校、初中10冬久長生活ê二嫂。

國民學校6年，食、穿、讀冊、chhit-thô，無煩無惱，快快樂樂，攏是二嫂照顧tîⁿ-toè，無稽考、無怨嘆，關心ê起工kap親生囝kāng一樣。牛仔班出業koh去讀補習班kap彰化初中hit 4年，koh-khah hō͘二嫂無閒操煩，也boeh io細囝，也boeh發落細叔ê食穿洗蕩，讀冊是三更燈火五更雞，boeh赴6點khòng 5分 ê早班車，需要4點半起床煮飯，暗時7點猶著款hō͘ taⁿ-á入門ê細叔食飯，厝邊to-toan查某人教伊「chhiâⁿ細叔無人情」，ka-chài二嫂並無改變疼心，chiah-thang順利完成學業。

斯當時ē-tit讀省立彰化中學，真正m̄-sī簡單代誌，出業後，pún-chiâⁿ一意想boeh讀高工，親像庄內蕭昌國、蕭輔港án-ni「高文及第」做工程師，siáⁿ知考tiâu台中師範學校了後，老爸貪著讀冊免錢，出業頭路koh拴便便，從án-ni註定烏枋杙仔tèng 43冬。

上淒慘ê人生經驗，to̍h是踏入師範學校hit年，學校檢查身體發現有肺病，被迫休學，為著修養身體to̍h toè大兄去阿里山楠仔仙溪，hia有大嫂ê招呼照顧，三頓營養補充，山內充滿芬多精好空氣，身體慢慢勇壯起來，tī半冬 內山生活，經驗著peh山、集材工仔鉤柴、烘便當、hiâⁿふろ水、浸ふろ(浴桶)kap做流籠工仔滋味…。快樂日子真緊過，9--月復學liâm-mī到期，歡喜tī心內，siáⁿ知3暝3日無停無歇大雨，造成損斷台灣轟動國際ê八七水災，社頭許厝寮三姑一家口仔，hō͘ chhu̍h山土石流chhoā走5个人，阿爸mā 因為破病兼傷心tī 8月23日過身。

9月初一，chah 滿腹悲傷、稀微心情轉來學校，仝款環境無仝款同學，真緊to̍h適應，坦白休學因端，同學mā包容不幸ê過去，3年師範生活ē-tàng歡喜平安過日，是上大因素。3冬教師養成教育tī充滿新奇、享受、獨立、感恩、喜樂、忠貞、愛國、向望…摻一寡懵懵懂懂經過，庄腳散赤人踏入都市，pō͘-pîn kap chi̍t-tīn朋友toà作伙，同出同入，食飯、讀冊、歇睏、chhit-thô、睏眠，實在趣味心適，三頓食si̍t比厝--裡好重倍，睏是睏總舖，洗浴做伙洗，家己洗衫褲甚至補紩(thīⁿ)；未來是bueh教人子弟，華語(國語)第一，數理俱備，音樂美術要緊，彈琴一定ài-ē，其他寫字、書法、西畫、國畫、體育、跳舞lóng-tio̍h學，真正十八般武藝件件ài有二步七--à，上重要--è是「中華文化基本教材」四書kap三民主義若無過關，包領你bē-tàng出業，因為老師ê任務著是ài教出忠貞、愛國ê好國民。

3 chhiân 4 chhiân，滿21歲chiah初出洞門踏入社會，開始教冊趁錢，月給750箍加米貼、油、鹽配給kap厝稅錢補貼，8--月起薪10--月做一擺領3 kó͘月薪水，初出社會ê食頭路人，需要基本配備，身穿2軀600，手錶1 kâi 400，鐵馬1隻1300，皮鞋1雙150……，二千幾箍現金三下半手to̍h ta-tin，無夠--è暫時用賒--e，chhun--e chiah-koh ta̍uh-ta̍uh-á hak。師範學校出業是正科訓導，地方人士看重，學校隨時安排升學班惡補，真正是輪迴，7冬前是家己leh惡補拚升學，chit-má換來kā人惡補mā是拚升學，是leh做功德抑是tī-leh損斷囡仔栽？一時soah失主裁。家己是惡補致蔭，he是不得不，chit-má bueh教升學班，需要惡補，敢是不得不？敢ē致蔭學生？既然著潦落去教，教法、態度需要斟酌考慮。

無意中行入教冊這行，感覺chiâⁿ有興趣，逐日kap囡仔交陪，教in生活常識hām國語、數學、唱歌、畫圖、體育、寫字，真有成就感，出門、入門，大人、囡仔1聲1聲「老師」「老輸」不止仔「má-se má-se」tī心內。教升學班有補習錢thang收，橐袋仔錢財自然飽飽，1 kó͘月加bueh 6,7百箍，「無錢萬萬不能」總是得著印證，過去因為無錢，m̄-chiah che也無法度、he也無法度，只有欣羨心情khǹg心內。

人,有莽撞時期，過去乖乖是因為無錢，一下家己ē-hiáu趁錢，心思to̍h-ē作怪，除了認真教冊，下班了後to̍h kap同事、朋友交陪，看電影、食點心、買合意ê物…享受一寡鬱卒心內真久ê tháu放，hām he貴蔘蔘ê西裝、音響都kā hak--落去，斯當時西裝1軀是2 kó͘月薪水，ラヂヲ(收音機)tàu電唱機1組3 kó͘月薪水，kài-sêng好額人囝--lè，兄哥阿嫂從來m̄-bat khe-khó，mā無提醒tio̍h-ài儉錢。Chit-má想起來感覺真m̄-bat代誌，對兄嫂ê疼惜付出足歹勢。

服務3冬to̍h-ài做兵，hit年25歲，同年--ē ê朋友已經退伍，經過2 kó͘月大頭兵訓練，差一屑仔留tiàm兵營做訓練班長，kài好運直接落部隊分派去空軍病院做衛生兵，tī藥局調劑合藥仔，這是好所在，chiâⁿ百味ê成分藥等你來認bat，bē-hiáu--è有醫官、司藥官thang問thang請教，siàu想3年退伍ē-tàng開西藥房趁大錢，to̍h開始認真péng藥冊、研究醫官開ê處方籤，ta̍uh-ta̍uh-á有心得了後，to̍h利用歇假時陣，chah一寡藥包、藥丸轉去厝--裡備用，mā提肝精、ビタミン/bitamin/維他命類ê注射劑kā大嫂注血筋，一時pìⁿ-chiâⁿ密醫赤腳仙。藥性、藥理bat jú-chē jú驚惶，hiau-hēng錢失德了，che敢是趁錢ê步數？che敢是趁錢ê步數？從此m̄-káⁿ koh the̍h藥hông食，koh-khah m̄敢kā人注射，siàu-siūⁿ開西藥房趁大錢ê念頭ta̍uh-ta̍uh放水流。

3年少爺兵無寒暑假，ná像一目nih mā ná像長ló-ló，雖罔學tio̍h bē少醫學常識，猶是感覺浪費青春，3年中間mā tn̄g過幾个女性，總是緣份未到，連開花都無，當然無結果。M̄-chiah軍中一退伍，媒人to̍h隨時到，紹介對象無1打mā有8,9个，人講「姻緣500年前注好好」，hô͘-lùi-lùi ê媒人講bē好勢，偏偏hō͘ he m̄-bat做媒人ê同事秉夷兄趁著媒人禮，為著好姻緣，秉夷兄chiâⁿ-gâu編chiâⁿ-gâu騙，chit-pêng講「人看了真kah意」，hit-pêng講「人準備年底to̍h-bueh娶」，to̍h án-ni「媒人決定，兄嫂同意」kap牽--e完婚睏做伙，hit暝生米煮chiâⁿ飯，to̍h sai-nai kā猶真生份ê新娘講「咱chit-má開始戀愛」。1969年代ê婚姻，窮真有夠khong-khám笑詼，唯一ē-tàng解說to̍h是「乾柴烈火，1个bueh娶，1个bueh嫁」，khong-khám罔khong-khám，笑詼罔笑詼，42冬ê「誠懇做伙」to-iā生3个查某囝1个後生，罕得冤家koh。

人生路途總是有1个ē-tàng saⁿ-kap依倚體貼親近ê伴，日子過了加足實在，翁某互相參詳經營家庭，經過鹹酸苦chiáⁿ 「saⁿ-oá-pn̄g，1碗菜湯」ê拍拚，1个家to̍h漸漸成長漸漸旺盛。牽手是西裝司傅，結婚4 kó͘月搬去街市稅店開1間「國華西裝社」tàu趁錢，孤跤手真無閒，也bueh三頓也bueh生理，裁、剪、車、thīⁿ、熨兼招呼人客，厝稅、水、電開銷日日ân，ko͘-put-lî-chiong老師pìⁿ(變)司傅，潦落去kap伊舞，「娶雞toè雞飛，娶狗toè狗走」，無外久，裁、剪、車、thīⁿ、熨已經「一手包辦」，娶某生囝趁錢兼上班有9冬是稅厝徛，粒積買厝無向望，牛奶錢、讀冊錢…是重擔，aih！beh-siáⁿ步？

是好運，是貴人，抑是人緣好得人和，有人報知有販厝(預售屋)ē-tàng分期慢慢仔攤納，to̍h chhân-chhân訂1間，hit時儉12萬箍寄tī教導主任hia生錢仔囝，好佳哉一位朋友thok頭，趕緊kā錢討--轉來，差一點仔to̍h hông倒去，12萬bueh買75萬ê厝，三兄提興土ê某本15萬tàu-saⁿ-thiⁿ，無夠10萬to̍h用貸款，37歲總算有家己ê岫，10坪地起2樓，後來違章koh搭3樓。

30坪toà 6个人，樓腳西裝社兼煮食、洗衫、便所，用心chhiâⁿ養4个囝，重要是in ê基本需要m̄-thang缺乏，chhun--e ē-tàng chhun goā-chē to̍h算goā-chē，貸款10萬箍 5冬做3年還完，開始siàu想家己需要，買o͘-tó͘-bái、音響，小可享受，tī巷仔內徛家toà 12冬，囡仔已經初中kap高中，mā tī附近koh買1間舊厝殼，因為kā二妻舅擔保liáu 40萬，舊厝殼soah拖5,6冬chiah整修徙入去toà。

整修過ê舊厝殼ná新--e，開bē少錢，1989年頭 徙入來toà，仝款辦貸款，仝款借錢補添，不過心肝頭加真自在，仝款開西裝店tàu做衫，仝款課後補習(善補m̄-sī惡補)，無閑tshih-tshih，目的to̍h是bueh粒積財產，過較好生活，世俗人生，「食衣住行育樂」。

1991年是人生價值轉變ê契機，hit年5--月買第一台轎車，3工後駛去鹿港參加1禮拜ê鄉土文化研習(hit-chūn是民進黨ê周清玉做縣長)，買1本《彙音寶鑑》開始台語音韻研究，自按呢生活箍仔ùi騎o͘-tó͘-bái 20Km半徑擴大到200Km半徑，上北落南、往東往西，出在家己主意。

1993年接受鄭良偉教授「漢字lam̄羅馬字」台語文書寫觀念，開始接觸pe̍h-oē-jī，第一篇台語文《阿爸ê鹿角薰吹》to̍h tī hit暗完稿，10月tī《台文通訊第24期》發表，得著鼓舞，自án-ni南北二路奔波走蹤，參加聯誼會，出席座談會，營隊，研習會，有台語文研究機會，盡量踏腳到。

1995年學電腦，tī MS-DOS環境下應用TW301台文軟體試翻有字天書「七字仔」做漢羅文，加強台語漢字認bat kap白話字取代漢字功能，有電腦助贊，「嘴講台語，字拍台文」加真sù-sī liú-lia̍h，che tio̍h感謝賴彥君先生kap後生Tiat--è指導。紲落去Windows 95出現，學上網、寫e-mail，生活空間真正「無遠弗到」，透過「雲頂」交陪真濟台文朋友，有牧師，有學者，有少年--ē，有年紀差不多--e，精進台灣文化，無論語言、歷史，重新認bat。

1996年吳宗信教授紹介蘇芝萌教授ê《HOTSYS®（Hō-Ló Tâi-bûn Systems ）台灣版》，tī Microsoft Windows 拍字，koh-khah提高速度、利便，台語聲韻思考、羅馬字輸入方式，chiâⁿ做純正、toan-tiah、原汁ê台語文書、台語文學bē-tàng代替ê「正法」，hit-chūn mā有tàu造詞庫，增加輸入法功力。

1997年呂興昌教授牽教，大量創作「台灣俗語鹹酸甜」，提升寫作能力，隔轉年得著教育部獎勵，kā 50,000箍獎金the̍h來買第一台Notebouk，方便台語文寫作kap教學推sak。

1999年〈賴許柔文教基金會〉助贊出版第一本冊《台灣俗語鹹酸甜第一冊》，愈來愈有成績，愈來愈有信心，一直鼓舞家己koh-khah拍拚。

電腦技術開發神速，HOTSYS上尾版tī 1999年左右發表，配合Windows 98/ME kap Word 2000。2001年微軟推出Windows XP，HOTSYS®2000版無法度適用，to̍h無koh改版，台語文書寫者失去一套有力koh好用ê家私。紲落去林俊育長老陸續開發KKS輸入法、YKS輸入法、FHL台語客語輸入法，toè-tio̍h世界腳步行，充分展現台語文書已經行向電腦資訊網路世界。Chit中間除了寫作、教學以外，mā幫贊輸入法詞庫ê增加、研究討論事工。

簡單講，ùi 1991年5--月買車kap 1995學電腦了後，to̍h真kut-la̍t tī台語文寫作、推sak事工，到2005年8--月退休，為台語文、台語教學做過bē少khang-khoè：認真寫作、編寫教材、囡仔歌、講古、笑詼…、建置網站、blog、出冊；擔任彰化縣國教輔導團台語兼任輔導員三年、台語種子教師五年kap台語師資培育講師三年，教現任老師認bat羅馬字、台語漢字、台語輸入法，mā hông邀請去外縣市教學；2002年擔任「教育部國語推行委員會」委員，2003年擔任「調查國民中小學閩南語教科書或教材用字計畫」工作小組委員，參與政策性ê工作。10-thóng年中間，家己駛車，chah 1台筆記型電腦南北二路來來去去，生活kài無閒、kài充實。退休後，pún-chiâⁿ想講ē-tàng較清閒淡薄--à，siáⁿ知1學期了後to̍h受聘中山醫學大學台文系教「台語讀寫」kap擔任彰化縣台語顧問，繼續台語文教學推sak事工。

俗語講「七分鑼鼓三分唱」、「好前棚iā-tio̍h好後棚」，「kui叢好好----無錯」，一个成功查埔人ê後壁，一定有一个支持sio-thīn ê查某人，雖罔一生m̄-sī kài有成就，但是厝內有1个好牽手一直支持sio-thīn確實是真幸運，家庭經濟sio-thīn、朋友交陪sio-thīn、親情之間poê-toè sio-thīn、台文運動事工sio-thīn，因為牽手開化明理，chiah會當歡歡喜喜、輕輕鬆鬆自在人生，chiah會當無煩無惱為台灣文化做一寡有意義ê khang-khoè。

投入台語文運動chit 20冬，除了牽手支持幫贊，後生查某囝mā真乖巧自動tī in ê學業，hō͘ in pâ放心南北二路cháu-chông。1990年大查某囝讀大學開始，相紲7,8年中間，款4个囡仔大專教育生活支出，硩kah phīⁿ-phēⁿ喘，除了西裝社收入tàu-khêng，妻大舅及時雨ê幫忙實在chiâⁿ感恩，當時學校考核獎金lóng-tī 10月chiah領ē-tio̍h，學生註冊是9月初，10萬箍支出ê時間差，to̍h是kā妻大舅暫撥--è。雖罔經濟phái-pháng，為著台文事工，1995年to̍h kā學校要求擔任中年級級任，免koh kā學生補習，利用教冊以外時間，thang有時間思考寫作題材、內容，創作需要tiām靜激頭腦，有一暫仔真正疏忽牽手ê存在，食 戇神戇神、坐 戇神戇神、連睏都戇神戇神，因為頭殼內攏是leh佈局思考，一日1-chhiám ê鹹酸甜(俗語)，呂興昌教授等boeh上網。

1999/1/30~2/10去新社鄉參加10工內觀禪修，得著一寡奉獻付出ê啟示，1999年921大地動ê悲慘，印證人生無常、人生是苦ê本質，2000、01、02年連紲查某囝後生結婚，人生進入另外一款無仝ê坎站，是歡喜ê期待抑是操煩擔憂，充滿不定數，m̄-sī家己ē-tàng控制ê未來，總是好佳哉，平安是福，平凡中自然安定過日，到taⁿ已經有5个孫thang sai-nai叫阿公。

回想70冬ê人生，充滿「菜籽á命」ê不定數運命，雖罔處處出現貴人相助，hō͘坎坷路途化做平坦公路，如果？如果！如果若m̄是家己ê善良、phah拚、安份、認命，無一定？無一定！無一定ē變做啥款人生？40年代ê庄腳台灣人，ē-tit師範學校出業做老師，實在萬幸，不過成做1位讀冊人，冊讀傷少確實遺憾，細漢時，老父to̍h教示，閒冊、小說m̄-thang看，戇直聽話有孝soah kā老爸ê話當做金言玉語。hó-ka-chài心性善良，關心在地身邊ê ta̍p-ta̍p-tih-tih，hó-ka-chài有坐著「台語文書寫運動」ê班車，細漢做店仔撐(tiàm-á-thèⁿ)ê記智，soah pìⁿ-chiâⁿ在地語言書寫ê肥底，1992年到今m̄-bat停睏，得著內心思想敨放(tháu-pàng)，得著bē少phok-á聲，得著一寡世俗名譽(bêng-ī)。

雖罔一生讀冊無濟，總--是若有讀著好句讀(kù-tāu) lóng-ē kā-i khǹg入心內，戇戇想bueh實踐照行，親像「道可道，非常道；名可名，非常名。」to̍h影響著世俗虛名ê淡化，真理、道理、歪理ê辨別；「人若賺得了全世界，賠上自己的生命，有什麼益處呢？」改變趁錢ê需求，bē重錢財；參悟「苦集滅道四聖諦」，阿羅漢果「我生已盡，梵行已立，所作已作，自知不受後有。」kap緣起法「無明．行．識．名色．六入處．觸．受．愛．取．有．生．老病死憂悲惱苦。」ê佛法教義，加減改變對人生意義有無共款ê解說；「柔弱生之徒，老氏戒剛強」是一向bē kap人爭出頭ê安心丸。1997年書寫「台灣俗語鹹酸甜」會得重新思考傳統人生「tio̍h kap m̄-tio̍h」ê分別，破除迷信，重新解說人生價值；2009年開始編寫家譜，閱覽族親戶籍謄本記載，to̍h若像讀著1-phō 蕭--家歷史，對世俗因果關係koh-chài 一擺重新調整印證，應該是「斷chit-má ê因，chia̍h-bô以後ê果」，m̄-sī「看著chit-má ê果，chiah來chhiû過去ê因」chit種ná-tio̍h ná-m̄-tio̍h(似是而非)ê論說。

最近一直leh思考孔子公講--è：「吾十有五而志於學；三十而立；四十而不惑；五十而知天命；六十而耳順；七十而從心所欲，不踰矩。」名言，都也滿70歲--à，m̄-chai tang-sî chiah ē-tit「耳順」「從心所欲，不踰矩」？

古早人飼囝是為著養老，後來有人講，食老ài有老本、老伴、老朋友，chit-má卻時行「mài kâng管；錢留leh家己開；m̄-thang等」ê講法，講也有理，囡仔都也成家立業，生活都也會得過，關心to̍h好，kâng管chhòng-siáⁿ？家己退休金留leh家己支配，khiû-khiû儉儉phah-piàⁿ一世人，chit-má kā享受一下mā無要緊，金錢做會到--è、健康--e、有意義--ē，需要to̍h kā買，愛用to̍h kā hak，幫贊--人、奉獻社會mā免m̄甘，ná-tio̍h koh等？m̄-sī討債開，mā m̄-sī烏白來，koh等是有goā-chē日子thang等？

6年前退休了後，有較濟時間thang 自由自在，除了教冊寫作以外，想chhit-thô tio̍h來去chhit-thô，駛車mā好，坐車mā好，上北落南、行東往西攏kā行踏，後生查某囝兜攏ē使得來來去去，抑是來去拍球、peh山，相機cha̍h--leh，隨時ē-tàng翕相、錄影，無,tio̍h tiàm 厝--裡sńg電腦、sńg iPad，唱KTV、聽音樂，goă自在goă逍遙--leh。真正是「夕陽無限好，只是近黃昏」，ah！m̄-tio̍h！應該是「暗霞chin-chiàⁿ súi，因為tī bueh暗á時」。

2011年8月8日前2工，一家伙仔相招來到台南大查某囝兜慶祝「8 8節」兼「70足歲生日」，先去飯店食1頓好料--ē，chiah轉去厝內切雞卵糕，一家口仔9个大人5个囡仔，鬧熱滾滾，嘴仔笑bún-bún。Ĕ？今年ê豬腳麵線ná-ē無食tio̍h？敢講老某仔buē記得？iah 抑是老某仔已經「bē執著」行出無合時勢ê傳統束縛？