19470820_阿媽 20120821_Lah-jih

19470820_阿媽 20120821_Lah-jih

阿媽姓陳名甜，1876年(光緒2年/明治9年)12月12日生~1947年(昭和22年)8月20日(農曆7月5日/丁亥年戊申月辛未日)痚呴喘往生，陽壽72歲，農民曆忌日是7月5日。 南投廳武東堡井仔頭庄(南投縣赤水)，陳古、陳謝氏字參女，陳瑞憲小妹。1892年(光緒18年/明治25年)6月20日[17歲]kap蕭慶鳳結婚。不識字。家庭管理。

根據頂面戶籍謄本資料，阿媽是清國人，1895年清日戰爭chiah換做日本人，Lah-jih是昭和16年出世，kap阿媽緣份chiah足足6年久niâ，薄薄記智中kan-nā有阿媽過身搬舖(poaⁿ-pho͘)hit幕kap伊ê皮肉jiâu-jiâu瘦瘦ê形影，chhun--e 攏是聽--來-è，阿媽若bueh tī--lē 已經136歲。

古早人早嫁娶，阿媽17歲to̍h嫁來崁頂庄做蕭--家新婦，阿祖 正養公、字文生 生2个後生，大囝慶麟生3个後生，二囝慶鳳結婚後一直無生，chiah kā伊大兄ê第三囝紹振過房傳嗣，所以慶鳳媽陳阿甜pún-chiâⁿ著叫嬸婆，因為阿爸thn̂g伊做囝，阮做伊ê孫當然tio̍h叫伊阿媽，慶麟媽陳氏選pún-chiâⁿ是阿媽soah pìⁿ-chiâⁿ伯婆(姆婆)，不過阮猶是叫阿公、阿媽，若boeh稱呼時，chiah講公--ē ê阿公、阿媽，私--e ê阿公、阿媽做分別。

阿公加阿媽11歲，結婚時阿公28歲、阿媽 17歲，結婚29冬阿公to̍h往生，hit年阿公57歲阿媽46歲，阿媽tī 72歲因為痚呴喘往生。

阿公過身hit年，阿爸20歲，大兄tăⁿ出世3個月，hit當時ê阿媽實在苦憐代，hó-ka-chài有giám-ngē ê新婦(ī--ā)tàu khîⁿ家，守寡26冬ê歲月，牽教阿爸、 ī--ā顧守4分厝跤田，養飼6个孫大漢成人(chiâⁿ-lâng)。斯當時阿公in二兄弟啥物時陣分開食，財產按怎處理已經無了解，若照傳統應該是兩份分，bat聽二伯講：「阮老爸講，3个攏是我ê囝，ná-tio̍h分啥物大房二房，3份分to̍h好。」阿伯是忠厚老實人，相信伊講ê話，to̍h是按呢，阿爸ê田地厝宅chiah無比大伯、二伯in較濟，m̄知阿媽有怨嘆--bò͘，若看阿爸kap阮兄弟從來m̄-bat khe-khó計較過chit-ê問題，相信阿媽一定仝款接收chit款決定，這是好樣，phah破傳統繼承例規，koh保持tâng-sāi-á和好。

聽講阿媽在生to̍h反對囡仔入學堂讀冊，伊講讀冊學貧惰，m̄-chiah 4个阿兄kan-nā四兄有讀6年日本冊，Lah-jih是阿媽過身隔轉年chiah讀一年仔，無受阿媽觀念影響，算是較好運。另外二姊細漢to̍h分--人，mā是受傳統重男輕女所致，時世做成(chò-chiâⁿ)，怨嘆阿媽mā m̄-tio̍h。

阿媽過身隔轉年，無意中tī眠床thian-pông頂夾枋發現一疊新chhak-chhak無拗痕銀票，大約50張，10箍ê舊台票，舊台票4萬換1箍已經無價值，to̍h hō͘ Lah-jih提來拗飛行機sńg chhit-thô。聽講大兄阿里山趁錢轉來，一定ē hō͘阿媽一半，chia ê錢可能是阿媽儉起來chhàng--è，朝代變遷soah hō͘錢財pìⁿ廢紙，損失無teh討。

阿媽過身搬舖hit幕，雖罔矇矇霧霧，m̄-koh永遠記牢內心bē落漆(lak-chhat)，俗語講：「生--e囥一邊，養--è 恩情khah大天。」阿媽ê辛苦堅強持家，孫--e永遠會記得，永遠ē siàu念你。阿媽！

後記：

慶麟媽陳氏選：1860年(咸豐10年/萬延1年)6月19日生～1930年(昭和5年)2月12日往生，陽壽70歲，縛腳。彰化廳武東堡內灣庄，陳坤山、張氏催長女，陳紅大姊，1876年(光緒2年/明治9年)11月17日佮蕭慶麟結婚入籍。是田中鎮香山圍仔內人。生4個後生、4個查某囝。

阿公慶麟kap阿媽陳氏選平濟歲，阿公 陽壽48歲，阿媽 陽壽70歲，阿媽守寡23冬，chhiâⁿ養8个囡仔，仝款辛苦艱難過日。

外公陳其諒kap阮tòa仝庄 榕仔跤，30歲往生，外媽周甜28歲已經生3个後生2个查某囝，後來閣再招翁生1个查某囝，因為後翁無受制被趕出，不得已kā 2个細漢查某囝分人做新婦仔，ī--ā陳坤to̍h是7歲分來蕭--家。外媽辛苦養飼4个囝大漢，仝款艱苦一世人，68歲過身。

無論山頂媽陳甜，圍仔內媽陳氏選，抑是榕仔跤媽周甜，攏是阿媽，恁ê孫永遠攏ē思念tī心肝內，永遠攏是阮ê阿媽。阿媽！