20120205_竹雞仔悲歌 (kih-ko̍k-kŏai chia̍h beh sí)

20120205_竹雞仔悲歌 (kih-ko̍k-kŏai chia̍h beh sí) Lah-jih

kih-ko̍k-koăi kih-ko̍k-koăi 響kah kui 山坪

有聽見聲 無看著影

to̍h是 chiah 破格 chiah-ē 惹人kā你掠

掠--去 ê 結果 1盤 4隻 2盤8隻 piak 鳥仔巴

「Kih-ko̍k-koăi！Kih-ko̍k-koăi！食boeh死！食boeh死！」

「Kih-ko̍k-koăi！Kih-ko̍k-koăi！食boeh死！食boeh死！」

自從阿竹仔in兄妹仔去hō͘「人」掠去 piak 鳥仔巴了後，竹模--ē in翁某to̍h起痟--à，暝日「 kih-ko̍k-koăi，kih-ko̍k-koăi⋯」吼無停，「食boeh死，食boeh死⋯」罵bē-soah，一直詈 一直罵，無論啥物叔孫弟兄kā苦勸kā安慰，in攏kài-sêng無聽見，猶是bih-tiàm暗毿ê kē樹叢草菢內「 kih-ko̍k-koăi，kih-ko̍k-koăi⋯ 食boeh死，食boeh死⋯」一直吼一直哭，吼kah sau聲，哭kah giōng boeh 斷氣，hit種失去囝兒ê悲傷哀啼，hō͘ in竹雞仔族心碎嚨喉管tīⁿ，忽然間ê恬靜無聲，是竹模--ē in翁某已經thiám kah勼tī siū內 chhngh--leh chhngh--leh 。 

講--起來！實在是無捨世可憐代，自in搬來chit粒山頭徛起，to̍h注心boeh tiàm-chia tòa一世人，翁某認真phah拚ê結果，真無簡單chiah開墾1-phiàn有竹菢有草埔ê山坪，koh-iā生湠一tīn古錐ê囝兒，日日chhōa出chhōa入，揣食chhit-thô，日子過了不止仔快樂滿意。

Siáⁿ知hit日一tīn peh山朋友來到chit-phiàn山埔了後，in ê hit-tīn囡仔to̍h phah-m̄-kìⁿ--lò͘，代先in kioh是囡仔káu-koài gia̍t-siâu四界走四界滾，sńg kah m̄知影揣路倒轉--來，in to̍h走去隔壁山坑仔揣，仝款無看影跡，連一个囡仔影mā無，是路裡tn̄g-tio̍h Ka-ka-á kā in講：「免koh 揣--ā--lah，已經去hō͘兩个歹人掠--去--à，taⁿ m̄ hō͘ in piak成鳥仔巴吞食落腹--à。」

竹模--ē in翁某聽一下差一點仔to̍h暈--去，「 Ka-ka-á姊，你敢有親目看--著？」

「有--lah！無,我ná-ē敢烏白講？最近常看peh山朋友中間，有2个m̄-chiâⁿ囡仔，peh山無sêng peh山，散步無sêng散步，鬼鬼祟祟，1个手裡捾1領網仔，1个攑1支hop網，ná行ná kí，2蕊賊仔目不sám時都siòng對草埔內面，kài-sêng leh揣啥物物件ê款，在我經驗看--來，一定對咱野生動物無好空--e，lín-ê寶貝囝一定是去hō͘-in網去piak-pa--a，絕對無m̄著--ē--lah！」

竹模--ē 翁某聽 Ka-ka-á講了後，隨時mà-mà吼：「我ê寶貝後生我ê寶貝查某囝--lah，ná-ē chiah歹命，chiah tăⁿ轉大人--niâ，to̍h hō͘ he夭壽仔--è害--死--à，天公伯--à！你ná-ē chiah-ní無公平，阮敢有做啥物失德ê代誌--hio͘h，ná-ē得著chit款ê報應，我歹命--ā~我歹命⋯」竹模--ē in翁某ná唸ná哭，hō͘人愈聽心愈酸，徛tiàm樹頂Kuh-kuh無講話ê斑鴿兄哥，mā開嘴安慰竹模仔嫂：「Taⁿ mài-koh吼--à，囝koh生to̍h有，保重身體要緊，後擺著教恁囝，m̄-thang振動著to̍h chiah大聲 kih-ko̍k-koăi,kih-ko̍k-koăi 吼bē-soah，m̄-nā噪人耳，koh-ē惹來逐家ê麻煩。你敢知影，hit 2个m̄-chiâⁿ囡仔mā tī山頂牽1領chiah 大kâi ê天羅地網boeh kā咱掠，你敢知影⋯」斑鴿ná講ná比，青笛仔聽了感覺siuⁿ離譜，to̍h chhap嘴講：「斑鴿兄，ah你是leh kā人安慰抑是leh kā人教示？竹模仔嫂已經哭kah chiah-nī悲慘，你iáu-koh講he五四三--e，按呢敢著？」

「歹勢--lah，竹模仔嫂，是我一時siuⁿ氣惱，氣hit 2个夭壽仔chiah無天良，soah講了siuⁿ超過，請mài見怪，無歹意--lah。」

「Taⁿ竹模仔兄、竹模仔嫂，mài-koh傷心--a，死都死去--à，lín猶少年，閣生to̍h有，chit種ê淒慘代，只要有親像chit 2个夭壽囡仔tī--leh，不管時lóng-ē發生，以後逐家tio̍h較sè-jī--leh chiah-tio̍h。」

平靜日子過了chiâⁿ個月，「阿竹仔in pâ，我閣有--ā--neh！」竹模--ē in某tī 竹模 ê耳孔邊kā伊sai-nai。

「真--e？我又閣boeh做lāu-pē--ā，你趕緊去歇睏，m̄-thang siuⁿ勞動，討食ê khang-khòe我來做to̍h好。」 竹模--ē歡喜kah 「kih-ko̍k-koăi,kih-ko̍k-koăi」chiah大聲喝--出來，假若驚人m̄知伊boeh做老爸--leh。

「Taⁿ mā好--à，較細聲--leh--lah，你是boeh-koh惹麻煩--hio͘h？歡喜tī心內to̍h好，m̄-thang按呢lōng-iâng，以後to̍h hō͘你較無閒--lò͘！」

無外久，竹模--ē in翁某又閣chhōa 1-tīn 細隻竹雞仔出來chhit-thô，過去ê傷痕漸漸放bē記得，山坪每日仝款hiah-nī鬧熱，peh山散步ê朋友仝款hiah-nī濟，in mā仝款tòe人行出行入，一屑仔to-bē感覺驚惶，仝款歡喜ê時陣to̍h大聲「kih-ko̍k-koăi,kih-ko̍k-koăi」吼無停，引起peh山朋友指指chí-chí：「chiâⁿ-súi ê鳥仔，緊來看！」

「He 叫做竹雞仔--lah！」

「Ná像bē-hiáu飛ê款？」

「聽in leh吼 kih-ko̍k-koăi,kih-ko̍k-koăi，koh真心適！」

竹模--ē in一家伙仔soah愈來愈得意，愈hō͘人o-ló愈感覺hiau-pai，一下歡喜soah kui-ē做1群「kih-ko̍k-koăi,kih-ko̍k-koăi」吼--起來，響kah kui 山坪。

天氣有測bē準ê時陣，鳥仔有想bē到ê災厄，chit一工peh山ê朋友當中，koh出現2个chah家私--e，1个提hop仔，1个捾網仔，chim-mi行chim-mi笑，ná行ná講話，「盈暗穩sut--è，4隻1盤 8隻2盤，燒酒已經chhoân好勢⋯⋯」

Hit boeh暗仔，竹模--ē in翁某又閣四界leh揣囡仔，揣kah心狂火to̍h(𤏸)，揣kah目屎流目屎滴，揣kah無望起痟狂「Kih-ko̍k-koăi！食boeh死！」「Kih-ko̍k-koăi！食boeh死！」「Kih-ko̍k-koăi！食boeh死！」⋯⋯⋯⋯

20120205用pe̍h-ōe-jī寫，20121020chiah koh用漢羅文改寫_Lah-jih