田中國民學校 第十屆畢業學生 2012年同窗會 邀請函
諸位同窗兄姊：收批歡喜，平安 吉祥！
諸位大姊佮大兄，有好消息報恁聽，年底廿九同窗會，逐家趕緊來報名；
十點十分文仁廳，準時到位毋免請，歡頭喜面好心情，翁某牽手鬥陣行。
時間實在真緊過，舊年九月才做伙，開講細漢咧讀冊，目nih已經七十歲；
頂擺鬧熱人真濟，這擺欲閣來聚會，講寡心適貼心話，養生健身和笑詼。
想起咱的細漢時，天真活潑真趣味，懵懂懂懂真幼稚，無煩無惱好日子；
現時兄姊我佮你，南北二路四界去，罕得幾時來相見，懇請毋通放袂記。
拚命奮鬥著停止，事業放予囝孫伊，囝孫自有囝孫福，閣加煩惱創啥物；
人生七十拄開始，七十年紀滿滿是，心情輕鬆閣運動，保証一定食百二。
貪字著看予清楚，貪財貪食攏毋好，改薰改酒改檳榔，戒貪戒色戒火氣；
生活著愛有意義，生老病死不得已，佛祖嘛才八十歲，了脫生死是真理。
人講人生是海海，到尾攏是偆氣絲，交陪何必傷計較，歡喜就好敢毋是；
莫論好額佮散赤，莫論成功佮失志，心內若有分別心，心情鬱卒袂歡喜。
人老性地著愛修，酒色財氣毋通求，老相老伴老朋友，歡歡喜喜長歲壽；
朋友互相相探望，同窗關懷心輕鬆，有緣細漢到大人，同窗情誼感情重。
舊年你若有參加，今年當然愛出席，舊年無閒無出席，這擺定著綴予著；
互相相招來報名，田中國校好名聲，咱是畢業第十屆，歡迎心情足期待。
★時間：2012年12月29日禮拜六 上午10點10分
★地點：田中鎮文仁海鮮餐廳
沒有留言:
張貼留言