八七水災一甲子回憶：

八七水災一甲子回憶： Lahjih 20190806
1 9 5 9 hit一冬，楠仔仙溪集材工，日--時ku-lí鉤柴箍，暝--時忝kah無眠夢。
八月初七tăⁿ落工，風雨無停chiâu振動，半暝吵到睏bē去，杉仔瓦聲無停時。
透早天光猶leh落，pi-pi-pia̍k-pia̍k ná用倒，只好工寮罔等待，有人跋筊耍chhit-thô。
連紲三暝閣三日，西北大雨落bē直，有聽坑水lòng-lòng叫，一直落到初九日。
嘉義傳來歹消息，嘉南平洋做大水，田園厝宅bē喘氣，財產損失chiâⁿ克虧。
阿里山線bē通車，為著讀冊著回家，綴人步輦行兩工，楠仔仙溪到竹崎。
跤痠牚腿艱苦代，鐵牛車mā 爽oaiⁿ-oaiⁿ，嘉義車頭坐火車，chiah知彰化真傷害。
轉到厝--裡chiah知代，阿爸倒tī 眠床哼，久年症頭重夯起，看病食藥公媽拜。
煩惱三姑一家口，往生五个厝宅流，悽慘八七做水災，天做代無人會知。
三姑hō͘水流，大囝拚命āiⁿ tī肩胛頭，siáⁿ知水掣流，逃生無功效，三姑自按呢無回頭。
表三兄tī山宅，看著大水拚勢走，走bē赴，peh-chiūⁿ樹仔頂，結果樹倒chham人hō͘水流。
悽慘代，bô-siá-sì，一家往生五名字，厝宅埋tī塗跤下，牛隻粟倉損失有夠濟。
阿爸人傷重，煩惱koh悲傷，過了半月日，咱人七月二十tō是伊ê忌日。
Hit年19歲，經過一甲子，已經頭毛喙鬚白，記智原在，心情bē悲哀。
生老病死，生住異滅，無常mā-sī正常，心自在，歡喜繼續未來。