八十老人講過去（1948散赤年代）： 20200220 Lahjih
Hiông-hiông siūⁿ-khí gín-á-sî, hoâi-liām kó͘-chá ê tāi-chì,
kap hiān-chhú-sî bô-kâng bī, ū sim-sek mā-ū ai-pi.
（雄雄想起囡仔時，懷念古早的代誌，佮現此時無仝味，有心適嘛有哀悲。）
Sî-sè piàn-chhian chiâⁿ lī-hāi, chi̍t-ê tiâu-tāi chi̍t sè-kài,
góa-ê it-seng ōaⁿ saⁿ-pái, Ji̍t-pún Tiong-hôa pún-thó͘ chai.
（時勢變遷誠厲害，一个朝代一世界，我的一生換三擺，日本中華本土栽。）
Ji̍t-pún hó bái bô keng-giām, Tiong-hôa kàu-io̍k chin sam-pat,
iá-seng su-khó khah si̍t-chāi, lán-ê bûn-hòa lán an-pâi.
（日本好䆀無經驗，中華教育真三八，野生思考較實在，咱的文化咱安排。）
Boeh-kóng sè-hàn ê kì-tì, hō͘ lín siáu-liân thang chai-ki,
chin-si̍t kì-tì chiàu-si̍t kóng, chiah-bē gō͘-kái lán chó͘-kong.
（欲講細漢的記智，予恁少年通人知，真實記智照實講，才袂誤解咱祖公。）
Se-goân 1945 nî, Ji̍t-pún chiàn-pāi lâng tńg--khì,
Tiong-kok kun-tūi lâi chiàm-ūi, hō͘ lán kan-khó͘ kòe-ji̍t-chí.
（西元一九四五年，日本戰敗人轉去，中國軍隊來佔位，予咱艱苦過日子；）
Thong-hòe phòng-tiàng chin-khióng-pò͘, chi̍t-ji̍t saⁿ-chhī ū-kàu hiông,
gîn-phiò po̍h kàu m̄-ta̍t-chîⁿ, chin-chiàⁿ tn̄g-tio̍h pháiⁿ-sî-ki.
（通貨膨脹真恐怖，一日三市有夠雄，銀票薄到毋值錢，真正搪著歹時機；）
Āu--lâi sì-bān ōaⁿ chi̍t-kho͘, it-seng lia̍p-chek bīn hoán-o͘,
hiau-hēng kiò thiⁿ thiⁿ bē-ìn, chhân-chng seng-oa̍h chin pháiⁿ-tō͘.
（後來四萬換一箍，一生粒積面反烏，僥倖叫天天袂應，田庄生活真歹度；）
Chi̍t-ji̍t chò-kàu giōng-boeh sí, gō͘-kang thàn bô chi̍t-táu bí,
ji̍t-ji̍t só͘-hùi ùi tó lâi, chhâ bí iû iâm toè-leh khí.
（一日做到強欲死，五工趁無一斗米，日日所費佗位來，柴米油鹽綴咧起。）
Saⁿ-tǹg han-chî-pn̄g, chham chió-chió pe̍h-bí, pn̄g-phòe kiâm-tok-tok, chiùⁿ-sún hām chhài-pó͘.
（三頓番薯飯，摻少少白米，飯配鹹篤篤，醬筍和菜脯；）
Chheⁿ-chhài chhân--lì chèng, cheng-seⁿ ka-tī chhī, hî bah hán-tit bé, in-ūi bô kim-chîⁿ.
（青菜田裡種，精牲家己飼，魚肉罕得買，因為無金錢；）
Chú-chia̍h hiâⁿ chháu-in, ian-tâng thàng chhù-téng, nā-ū khoàiⁿ hóe-hun, gín-á tán chia̍h-pn̄g.
（煮食燃草絪，煙筒迵厝頂，若有看火燻，囡仔等食飯；）
Chia̍h-pn̄g chē í-tiâu, gín-á phâng gōa-kháu, tn̄g-tio̍h nî-á-cheh, chiah-ū chia̍h chheⁿ-chhau.
（食飯坐椅條，囡仔捀外口，搪著年仔節，才有食腥臊。）
Tòa sī tek-kóng-chhù, joa̍h--lâng ū-iáⁿ liâng, piah-phāng chin lāng-hong, kôaⁿ--lâng sih-sih-chùn.
（蹛是竹管厝，熱人有影涼，壁縫真弄風，寒人熾熾捘；）
Tek-kóng chò chím-thâu, chháu-chhio̍h chhu bûn-chhn̂g, mê--sî báng chin-kāu, koh-bô báng-á-hun.
（竹管做枕頭，草蓆舒眠床，暝時蠓真厚，閣無蠓仔薰；）
Pâng-keng tek-bûn-chhn̂g, keh chi̍t iap-thiap hāng, lāi-bīn khǹg jiō-tháng, pàng-jiō chhàu-hiam-hiam.
（房間竹眠床，隔一揜貼巷，內面囥尿桶，放尿臭薟薟；）
Ang-bó͘ khùn pâng-keng, chóng-pho͘ gín-á-lâng, siuⁿ joa̍h that mî-phōe, siuⁿ kôaⁿ mo͘h chò-hóe.
（翁某睏房間，總舖囡仔人，傷熱踢棉被，傷寒抱做伙；）
Sin-chhēng ū nn̄g-su, chhēng kàu kū-kū-kū, lāi-khò͘ chò gōa-khò͘, kāng-khoán khì tha̍k-chu.
（身穿有兩軀，穿到舊舊舊，內褲做外褲，仝款去讀書；）
Tōa-lâng chúi-khò͘-koe̍h, chò-sit bián-kiaⁿ tâm, kôaⁿ-thiⁿ chiok chheⁿ-léng, mā-sī bô gāi--tio̍h.
（大人水褲橛，做穡免驚澹，寒天足生冷，嘛是無礙著；）
Chho͘-pò͘ hoe-á-saⁿ, cha-bó͘ siāng sî-kiâⁿ, hán-tit tiám-ian-chi, bô-êng thang chng-thāⁿ.
（粗布花仔衫，查某上時行，罕得點胭脂，無閒通妝娗；）
Eⁿ-á āiⁿ-kin āiⁿ, kū-saⁿ chò jiō-chū, gín-á khui-kha-khò͘, thô͘-kha sì-kè un.
（嬰仔偝巾偝，舊衫做尿苴，囡仔開跤褲，塗跤四界蝹。）
Kiâⁿ-lō͘ nn̄g-ki kha, bô ê chhēng ba̍k-kia̍h, chhut-mn̂g iōng pō͘-lián, thih-bé chió-lâng khiâ.
（行路兩支跤，無鞋穿木屐，出門用步輦，鐵馬少人騎；）
Sin-niû kō͘ kiō kng, pat-im chò thâu-chêng, gû-chhia boeh chhia-hòe, mā boeh chài lâng-kheh.
（新娘撾轎扛，八音做頭前，牛車欲載貨，嘛欲載人客；）
Taⁿ-tàⁿ chò-seng-lí, a̍h-sī kha-ta̍h-chhia, hn̄g-lō͘ khì tha̍k-chheh, chiah-tio̍h chē hóe-chhia.
（擔擔做生理，抑是跤踏車，遠路去讀冊，才著坐火車；）
Ba-suh hán-tit chē, m̄-bat chē hui-ki, seng-oa̍h tī chng-kha, sè-sū bat bô-chē.
（巴士罕得坐，毋捌坐飛機，生活佇庄跤，世事捌無濟。）
Hiàng-sî ōe-seng bái, gín-á thô͘-kha pê, siang-chhiú o͘-pe̍h chō, chhàu-thâu kiam nōa-lô.
（向時衛生䆀，囡仔塗跤爬，雙手烏白皂，臭頭兼爛癆；）
Pàng-jiō chhìn-chhái soān, pàng-sái iōng sái-pe, sái-ha̍k chhàu-ko͘ⁿ-ko͘ⁿ, sái-thâng ngia̍uh-ngia̍uh-sô.
（放尿凊彩漩，放屎用屎蓖，屎礐臭垢垢，屎蟲蟯蟯趖；）
Hô͘-sîn te̍k-pia̍t chē, ba̍t-sat kā lâng-kheh, thian-pông niáu-chhí siū, chàu-kha ka-choa̍h sô.
（胡蠅特別濟，木蝨咬人客，天篷鳥鼠岫，灶跤虼蚻遊；）
Tiâⁿ-bóe pùn-sò-tui, ah-sái ke-ko-li, lah-sap jī-chóa hio̍h, pàng-hóe au chò pûi.
（埕尾糞埽堆，鴨屎雞膏哩，垃圾字紙葉，放火漚做肥。）
Kàu-io̍k chiām phó͘-phiàn, bô kà lán-ê ōe, Hôa-gí bô phiau-chún, m̄-chai kóng siáⁿ-hòe.
（教育漸普遍，無教咱的話，華語無標準，毋知講啥貨；）
Kà he Tiong-kok sú, kah lán bô-koan-hē, m̄-bat ta̍h-kha-kàu, tē-lí chin ngē-táu.
（教彼中國史，佮咱無關係，毋捌踏跤到，地理真硬篤；）
Kàu-sek bô-kàu iōng, peng-á chiàm liáu-liáu, chí-hó gia̍h í-thâu, tha̍k-chheh tiàm gōa-kháu.
（教室無夠用，兵仔佔了了，只好攑椅頭，讀冊踮外口；）
Ta̍k-ji̍t chhiùⁿ kok-koa, lí chńg koh chán hâu, nā-sī kóng Tâi-gí, kòa káu-pâi hoa̍t-chîⁿ.
（逐日唱國歌，立正閣站好，若是講台語，掛狗牌罰錢。）
Chng-lāi ū khek-koán, nî-cheh ē pâi-tiûⁿ, tang-bóe chò tōa-hì, khòaⁿ-hì siāng hoaⁿ-hí.
（庄內有曲館，年節會排場，冬尾做大戲，看戲上歡喜；）
Saⁿ gō͘ lâng tàu-tīn, chhiùⁿ-koa koh lā-khek, chi̍t-ki khak-á-hiân, ē-tàng chhiùⁿ kui-mê.
（三五人鬥陣，唱歌閣拉曲，一支殼仔絃，會當唱規暝；）
Chhōa-chhin ū pat-im, lāu-jia̍t tōa-kó͘-tīn, chng-chiòng ka-tī cho͘, hō͘-chō͘ kiam gô͘-lo̍k.
（娶親有八音，鬧熱大鼓陣，庄眾家己組，互助閣娛樂；）
Ông-lo̍k lâi bē io̍h, gín-á siāng hoaⁿ-hí, mô͘-su̍t kah te̍k-ki, khòaⁿ kah chhiò-hi-hi.
（王祿來賣藥，囡仔上歡喜，魔術佮特技，看到笑嘻嘻。）
Gín-á-sńg chiok-chē, kan-lo̍k pàng-hong-chhe, kop-iô pû han-chî, kōaⁿ-chúi koàn tō͘-kâu.
（囡仔耍足濟，干樂放風吹，炕窯烰番薯，捾水灌杜猴；）
Tek-kóng kòng iá-kiû, chhân-hōaⁿ-lō͘ cháu-pio, chhiàng-kha-ke thiàu-kho͘, thiàu-soh hàiⁿ-tong-chhiu.
（竹管摃野球，田岸路走標，蹌跤雞跳箍，跳索幌韆鞦；）
Chu-á hām bâ-bui, chhiū-leng ka-tang-chí, chóa-pang hui-lêng-ki, ē-tàng sńg iû-hì.
（珠仔和峇微，樹奶茄苳子，紙枋飛龍機，會當耍遊戲；）
Chhek-tiâⁿ liam chhân-eⁿ, chhân--lì tiò chúi-ke, tōa-khe phah-pōng-siû, chhut-thâu ū-kàu-chē.
（粟埕拈田嬰，田裡釣水蛙，大溪拍滂泅，齣頭有夠濟。）
Boeh kóng chi̍t-sî kóng-bē-liáu, lán taⁿ chiām-sî kóng kàu-chia,
nā-boeh liáu-kái koh-khah chē, chhiáⁿ lí tio̍h-lâi tha̍k góa chheh.
（欲講一時講袂了，咱今暫時講到遮，若欲了解閣較濟，請你著來讀我冊。）
Sì pún Sio̍k-gí-kiâm-sng-tiⁿ, nn̄g pún hàn-lô tâi-gí-bûn,
Pêng-tī sin-sè kah chhin-lâng, A-pa ê lo̍k-kak-hun-chhoe.
（四本俗語鹹酸甜，兩本漢羅台語文，平治身世佮親人，阿爸的鹿角薰吹。）
Nā-bô chóa-pún bô-iàu-kín, bāng-lō͘ Sio̍k-gí-kiâm-sng-tiⁿ,
Lah-jih kah Siau Pêng-tī, ē-tàng chhōe-tio̍h i chok-phín.
（若無紙本無要緊，網路俗語鹹酸甜，Lah-jih佮蕭平治，會當揣著伊作品，）
Tâi-gí-lâng siá tâi-gí-bûn, ka-tī bó-gí ka-tī thn̂g, Goân-bîn Kheh Tâi sio-kēng-óa, Tâi-oân chá-ji̍t chhut-thâu-thiⁿ.
（台語人寫台語文，家己母語家己傳，原民客台相楗倚，台灣早日出頭天。）
蕭平治Lah-jih網頁：歡喜你來踏跤到
Lah-jih Siau(蕭平治)老人囡仔性閒閒罔話仙 http://chhantionglang.blogspot.com/
台灣俗語鹹酸甜 http://ip194097.ntcu.edu.tw/TG/chu/kiamsngtiN/kiamsngtiN.asp
鹹酸甜台文工作室 http://blog.xuite.net/kouhua/kiamsngtinn
Lahjih老師【台語讀寫有聲教學】 http://tiantionglang.blogspot.com/
Lahjih老師的網誌 http://blog.xuite.net/kouhua/lahjih
台灣諺語鹹酸甜 http://taigu.fhl.net/Gangi/old.html
蕭平治羅馬字真趣味 蕭平治羅馬字真趣味
蕭平治Facebook面冊 https://www.facebook.com/profile.php?id=100000189412306
沒有留言:
張貼留言