我ê台語文運動記智：

 我ê台語文運動記智：

▲為著推銷學台語寫台語文，經過研究思考，發現「生活台語」ê重要性，生活台語chiah-sī台語ê生活，可惜kui-ê社會ê日常生活語言充滿華語，少年台語講bē輾轉，中年知識分子ê台語mā是講bē ka-nn̂g，一寡研究台語ê學者專家，大多數leh研究漢字漢文，甚至有人keng-thé漢羅lām寫台語文是put-tap-put-chhit。心內思考，研究mā有一寡心得--à，特別認bat熟練Pe̍h-ōe-jī了後，tō siàu想boeh做老師ê老師，教ē-hiáu一个老師較嬴教一班學生，目標掠定，tō kā教材教法chiâⁿ做思考重要項目之一，編寫教材，寫生活台語散文kap學習網路科技lóng需要去做。

有一工想著一个ideal，kā讀大學ê後生講：「敢有he ē-tàng編寫1頁1頁ê講義，ē-tàng影印做投影片ê軟體？意思tō是ē-tàng代替烏枋教冊。」想bē到咱是烏白想烏白問，後生soah去冊局買一本PowerPoint 4.0轉來hō͘我，koh灌軟體叫我家己學，因為伊m̄-bat用。M̄知經過幾十工研究練習，chiah編寫一套教台語羅馬字(pe̍h-oē-jī) ê PowerPoint教材，真正歡喜kah tiô--khí-lâi。

Chit本〈PowerPoint 4.0〉1994年初版，tī 1995年Windows 95 出世hit年買--è。

▲1996年10月2日~12月18日，彰化縣政府國民中小學教師台語研習由田中國小承辦，連紲12禮拜拜三下晡上課3節，參加老師80人，講師是蕭平治。

斯當時學校時行用投影燈kap透明片教學，hit套教台語羅馬字(pe̍h-oē-jī) ê PowerPoint教材，kā伊影印做透明片，tú好提來使用，1張換過1張ê投影片投影tī銀幕，大字清楚，效果實在足讚。斯當時絕大多數ê老師m̄-bat台語聲韻，mā m̄-bat接觸白話字，認為he是外國字，所以講師我先踏話頭講：台語聲韻kap華語仝款，有聲母、韻母、聲調，有人用十五音切音，有人用ㄅㄆㄇㄈ，有人用pe̍h-oē-jī，因為我認為pe̍h-oē-jī好用koh方便，所以用羅馬字教學，效果仝款。教學期間，陳明仁kap張聰敏mā有來參觀kā我鼓勵，陳明仁要求boeh kā學員鼓勵講話，我允准伊10分鐘，而且要求伊ē使得講鼓勵ê話，bē使得講ē引起反彈ê話。

Chit場台語羅馬字教學真有效果，改變真濟老師ê觀念，mā有鼓勵老師寫作，揀好ê作品投稿台文通訊。研習過程有Email去「台語網taigu@googlegroups.com」，轟動到美國、加拿大去，回應真濟o-ló鼓勵。

國民中小學教師台語研習，直接用pe̍h-oē-jī教學，m̄知有比chit場閣較早ê記錄--bò͘？Chit擺研習是我要求許校長申請辦理，後--來許校長bat 怨嘆hō͘我聽，真濟人講伊頭殼歹去，竟然主動申請chit款台語研習。Hit-chūn許校長是數學科研究員，我是輔導員。