台文通訊kap彰化台文通訊讀者聯誼會： Lahjih（蕭平治）

 刊tī台文通訊bóng報第324期2021年3月

台文通訊kap彰化台文通訊讀者聯誼會： Lahjih（蕭平治）

〈台文通訊〉kap〈彰化台文通訊讀者聯誼會〉因緣有夠深。

1991年5--月，彰化縣政府tiàm文開國小辦5工半鄉土文化研習，安排2節台語音韻十五音，隔轉年koh tī鹿港國小辦理5工半研習，有漢學先教反切十五音音韻。蕭平治tī林錦賢冊擔仔買一本《彙音寶鑑》開始家己自修。

1993年2--月到6--月，彰化縣教育局推派陳福當、游麗津、王淑芬、洪維彬4位國小老師去清華大學kah鄭良偉教授學習「台語讀寫」，仝時有台語文研究者張聰敏先生鬥陣上課。

1993年8--月歇熱期間，彰化縣政府教育局tī社教館辦理一禮拜5工半台語研習，尾2工邀請鄭良偉教授講台語文「漢羅lām寫」觀念。蕭平治tō按呢寫出第一篇台文作品《阿爸ê鹿角薰吹》。

1993年9--月陳福當老師成立「彰化縣台文通訊讀者聯誼會」，借用翁金珠立法委員彰化服務處，tī每個月第 3 禮拜五暗時7點定期聚會。

1993年10--月陳福當老師kā《阿爸ê鹿角薰吹》手寫稿投稿台文通訊。

1993年10--月台文通訊第24 期刊出《阿爸ê鹿角薰吹》，得著肯定，開始台文寫作興趣

《台文通訊》創刊tī 1991年7--月，「彰化縣台文通訊讀者聯誼會」慢2冬開始tòe伊ê跤步行，阮ná學習ná推銷。聯誼會逐個月聚會，tō是讀《台文通訊》，逐家互相làu-khùi求進步，代起先陳福當、張聰敏、游麗津、楊振裕、廖英雄kap蕭平治chiâⁿ做主要出席成員，參加愈來愈濟，逐擺維持10幾个人數。後--來除了讀、討論以外，開始有人提出家己作品發表，而且探討聲韻Pe̍h-ōe-jī，攏以《台文通訊》做參考標準。陳福當老師真有責任，1年12擺聚會，除了風颱天siàng大雨，罕得歇睏，一直主持到伊退休chiah換林義和發落。

逐個月第三禮拜五暗時7點，借用翁金珠立法委員彰化服務處定期聚會，研讀1991年7--月踮Los Angeles創刊ê《台文通訊》雜誌，練習台語文閱讀，學習Pe̍h-ōe-jī，稽考台文漢字，攏是陳福當老師chhoā頭帶動，用心經營，雖罔人數無濟，總--是連紲10 gŏa外冬歲月，m̄-bat斷站，我mā chiâⁿ做忠實會員，ùi田中（Chhân-tiong-ng）駛車準時報到，出席率達12分之11。手寫稿《阿爸ê 鹿角薰吹》tō是陳福當老師幫我投稿--ê，發表tī《台文通訊》第24 期，陳福當老師算是我趣味寫作ê貴人。

1993年周清玉縣長主政期間，佇10月～12月底，舉辦「彰化縣中小學教師台語研習」，分南北二區仝時進行，利用禮拜三下晡研習，參加老師每區大約100名，講師有陳福當，游麗津，王淑芬，楊振裕，蕭平治，攏是陳福當老師計畫發落進行。

後--來周清玉縣長連任無成，鄉土教學換人發落，是陳福當老師激烈爭取主導權，堅持用鄭良偉教授《精速台語羅馬字與規律》做研習教材，自按呢，Pe̍h-ōe-jī（白話字）chiâⁿ做彰化縣台語研習重要課題，陳福當，游麗津，王淑芬，楊振裕，蕭平治是斯當時重要推動老師，chit時才發覺陳福當老師有運動者個性魄力，因為有伊堅持勇敢爭取，阮chiah有資源進行台語文研習事工，陳福當老師是阮一tó͘勇ê前鋒。

2001年8月19日台灣羅馬字協會tī淡水成立，陳福當、楊振裕、蕭平治攏是創會會員並擔任第一屆理事，開始參與台語文運動。逐家出錢出力推動Pe̍h-ōe-jī推動漢羅lām寫台語文，每年暑假定期辦理世界台語文化營，阮ê跤跡ùi彰化縣擴大到全台灣。

2002~2005年翁金珠縣長主政期間，是大發揮ê四冬。佇「彰化縣母語諮詢委員會」中，阮建議採用漢羅lām寫方式辦理縣內老師台文研習方針，得著認同。因為陳福當老師向教育局極力爭取資源，四年來，辦理八擺36點鐘台語讀寫研習，每一擺，全縣分八區仝時進行研習，有講師有助理，mā有辦進階研習，培養講師人才。每擺研習攏訂規矩，需要符合出席率，需要考試通過，才ē-tàng提著研習分數、研習證書，有時閣會出練習宿題，hō͘少數老師感覺無爽快有壓力。

Hit當陣，楊振裕校長，陳福當kap蕭平治老師攏加入台語輔導團，楊校長人緣好，溝通能力讚，華文台文功力閣強，有伊出面協調，各學校攏自動配合研習事工，蕭平治負責文書處理，出題，提供參考教材kap一寡個人作品hō͘學員參考，陳福當老師設計課程kah教育局連繫，當然猶有濟濟老師鬥相共。

2001楊振裕擔任育新國小校長hit 4冬，認真辦理台文讀冊會，培養真濟台語師資，推動全縣台語研習研究台語音韻kap教會羅馬字，2004年創辦第一屆台語文學創作比賽，並編印紙本〈台語文學創作比賽優勝專輯第一屆〉，一年一集，連紲出十幾集。

回想1991年開始傳統音韻研究，想boeh做漢學先á，到1993年轉換「漢羅lām寫」寫「生活台語」，歡喜跟綴《台文通訊》跤步行28冬ê路，做28冬ê工，《台文通訊bóng報》是導引明針，進修糧食，《台文通訊》創辦人良光兄o-ló我「Phah死無退」，確實是實情。行過30年歷史，我有28冬見證，歡喜正確ê路繼續行，有意義ê工繼續做。