阿里山眠月下線1974：

阿里山眠月下線1974：       20200415        Lahjih

1974前後幾冬，大兄tī阿里山眠月下線45、46林班hit-tah做集材鉤柴作業，大兄是ku-lí-thâu（工頭），chhōa一陣工人tī chia做機器工仔，kā伐木工人剉斷ê木材，用機器、人工集集做伙，thia̍p-chiūⁿ阿里山火車載出去嘉義。

眠月下線是眠月線落崎大約千外公尺遠ê運柴支線，懸低落差倚近1000米，非常崎，ùi眠月下線上山到石猴站chit段有peh山友挑戰ê好漢坡，50外冬前是青年大學生『溪阿縱走』上ngē-táu路站。眠月下線tī日本時代有鐵枝路，用pōng-pōng-á車載柴，日本人轉--去了後，撬（kiāu）掉鐵枝路改換卡車路，用トラック/truck載柴，大兄tī chia鉤柴時，已經無pōng-pōng-á車mā無卡車，是用汽油集材機（えんじん），母機chhāi-tiàm眠月線石猴站鐵枝路邊，làu鋼索落去下線鉤柴，剉柴林班範圍闊莽莽，需要分做幾若站集材，上尾chiah鉤柴到石猴站鐵枝路邊，等待運柴火車來載。

聽大兄後生輝虎講，林班伐木工人剉ê樹木，主要是柳杉kap khêng一寡松蘿原木樹頭。日人時代已經kā chia ê ひのき/檜木剉了了，留落來chiâⁿ米懸ê樹頭kap無夠格柴頭柴尾，lóng是高級木材，無提無彩，啥乜水土保持，無人重視。原木剉了日本人有種柳杉，chia-ê柳杉林已經大欉有經濟利益，長度有夠長--ê ē使得做電火柱仔，若是樹頭有夠大，剉較貼底--leh，he樹頭hiàn-hiàn真適合做棺木棺柴蓋，聽講外銷香港真搶市。

輝虎講，Hit-tang-chūn做機器工仔，逐日眠月頂線下線來來去去，若tī鐵枝路邊做穡，中晝時時常peh-chiūⁿ石猴肩胛歇睏，若是落去下線做工，有時ē去眠月神木行行看看--leh，原來hit欉神木mā是lok-chhóe-á（橐髓仔），kap阿里山第三分道神木站hit欉仝款，是紅檜（Chamaecyparis formosensis 松蘿、薄皮仔、水古杉、Benihi、ベニヒ），樹箍是空殼--ê。斯當時一寡登山客來到chia，kan-nā顧peh山，lóng m̄知影危險，chia有鉤柴家私kap木材起落，有ê koh thian-thian phiâⁿ-phiâⁿ喝bē聽，好佳哉山神有保庇，無出代誌。

輝虎揣幾張相片出來hō͘我看，一爿回想一爿紹介，hit-chūn ā無較讚ê翕相機，kan-nā用he雙眼普通相機翕，底片、洗相片貴蔘蔘，m̄敢翕siuⁿ濟，kan-nā chit幾張仔，猶算留一寡記智：

Chit張是石猴，日本人講達摩石，有夠sêng台灣獼猴，hit粒石頭有夠大粒，無彩tī 921大地動kā頭殼震落鐵枝路邊。

Chit張是眠月神木，實在太大欉--leh，無法度翕規欉，只好分做兩節翕，然後kā接做伙，有夠媠ê神木。樹頭有一支牌仔按呢紹介，「眠月神木安南狄娘，樹齡4100年，紅檜，直徑668.8cm，高58m，材積242.84M³。」

Chit張是伐木工人leh剉柴，一欉一欉直lak-sak ê柳杉林，是較早電火柱仔ê材料。

Ē記得猶有一張車囝載杉仔箍ê相片，杉仔siuⁿ過長，需要用兩隻細隻車囝載，裝車ài技術mā-ài工夫，載柴司機除了經驗koh-khah需要小心sè-jī，等我揣--著 chiah送你看。

眠月線經過1999年921大地動kap 2009年8月莫拉克風災（八八水災）大損蕩，boeh-koh恢復原貌實在困難，看chit幾張相片，引起無限思念。