Hoâi-liām hang tiⁿ-kóe懷念烘甜粿:

Hoâi-liām hang tiⁿ-kóe懷念烘甜粿:                      20200221        Lahjih

" Tiⁿ-koe teh-nî, hoat-kóe hoat-chîⁿ, pau-á-kóe pau-kim, chhài-thâu-kóe kiat tiám-sim. " Che-sī kó͘-chá kòe-nî sî chin-ū ì-sù siá-si̍t ê liām-iâu.

Chhài-thâu-kóe sī chāi-lâi-bí hām chhài-thâu chhoah-chhiam chhoe ê chia̍h-mi̍h, chian hō͘ chhiah-chhiah ùn soàn-chheⁿ tāu-iû, si̍t-chāi hó-chia̍h koh chia̍h bē-ùi, m̄-nā chia̍h-tiám-sim, saⁿ-tǹg chian lâi chia̍h mā-sī chia̍h bē-siān.

Pau-á-kóe sī chut-bí-chhè nóa chhí-khak-á pau āⁿ kóe-lō͘, in-ūi pau chò sì-kak-hêng chhiūⁿ hâ-pau, hâ-pau khǹg-chîⁿ lâng-lâng kah-ì, mā kóng chhí-khak-á-kóe. Hèng chia̍h pau-á-kóe sī kah-ì i tīⁿ-tīⁿ khiū-khiū koh-ū kin-chio-hio̍h kap chhí-khak-á phang-bī. Ū-tang-sî-á chat bô-tú-hó, āⁿ bô-kàu, tō-ē kā bô pau-āⁿ ê pau-á-kóe chò kì-hō, góa lóng-ē tāi-seng kéng bô pau-āⁿ ê pau-á-kóe lâi chia̍h.

Hoat, sī hoat-tián koh hoat-châi, kā kóe-chhè chham hoat-hún, chhoe--khí-lâi ê kóe tō-ē chhiūⁿ hóe-soaⁿ po̍k-hoat án-ne hoat-hoat-hoat, hoat-châi chîⁿ-gûn móa tōa-thiaⁿ, tong-jiân hû-ha̍p ta̍k-ke kî-thāi. Hoat-kóe chú-iàu sī khǹg-tī Kong-má-thiaⁿ kí-toh téng kap chàu-thâu pài-pài, khǹg kàu chhe-gō͘-keh-khui, í-keng sió-khóa piàn-chit, m̄-nā bô pau-āⁿ mā bô chut-bí ê khiū-khiū, góa khah bô kah-ì.

Tiⁿ-koe teh-nî, teh-nî ê ì-sù tō sī " ài ū chhun-āu ", só͘-í kòe-nî khǹg-tī âng-kí-toh téng ê tiⁿ-kóe, hoat-kóe, chheng-bí-pn̄g, lóng tio̍h chhah pn̄g-chhun(hoe), kî-kiû chia̍h-ū-chhun.

Kóng-tio̍h tiⁿ-kóe, chhut-thâu chin-chē.

Chhoe tiⁿ-kóe tio̍h iōng îⁿ-chut-bí ê kóe-chiuⁿ, teh-ta si̍h-chúi liáu-āu, seng liô kúi-tè kóe-chhè lo̍h tiáⁿ sa̍h chò kóe-pô͘. Chún-pī chhiah-soa a̍h-sī o͘-thn̂g iûⁿ chò thn̂g-ko, lām lo̍h-khì kóe-chhè, kóe-pô͘ chò-hóe nóa-nóa chhiau-chhiau hō͘ chiâu-ûn, chiah hē lo̍h-khì láng-pho͘ chhoe. Lâng-sn̂g siāng ē-pêng chân hō-chò láng-pho͘, láng-pho͘ tio̍h ī-sian iōng pe̍h-pò͘ kóe-kin chū hō͘ hō͘-sè, chhiau hó ê kóe-chhè hē--lo̍h-khì chiah-bē sia̍p chhut láng-pho͘ gōa.

Tiⁿ-kóe chhoe-se̍k tio̍h kā i poaⁿ-sóa khì lēng-gōa chi̍t-ê lâng-sn̂g-chan-á, chit-ê lâng-sn̂g-chan-á tio̍h ī-sian iōng po-lê-chóa chhū hō͘ hó-sè, chhoe-se̍k ê tiⁿ-kóe hē-lo̍h lāi-bīn chiah-bē chuh-chhut gōa-kháu, chhú-lí hó-sè, tio̍h tán tiⁿ-kóe piàn léng piàn tēng, thèng-hāu kòe-nî chêng-chi̍t-ji̍t khui-phòa chò chi̍t-liau chi̍t-liau, kòe-nî pài-sîn pài kong-má iōng.

Phīⁿ-tio̍h tiⁿ-kóe bī, ē siâⁿ-lâng iau-sâi siūⁿ-boeh chhì chu-bī, só͘-í ē seng khat chi̍t óaⁿ-kong khí-lâi teh chhùi-kho͘, kō͘ tī kô, chi̍t-lâng kô chi̍t-oân chia̍h tiⁿ-tiⁿ, chún-pī thang kòe-nî. Ná-sī chia̍h-liáu bô-kàu-khùi, kóe-kin iáu-ū liâm chi̍t-kóa-á, ē-sái-tit kō͘ chhùi kā, goán kóng kā kóe-kin.

Sin-chiaⁿ-sî-á, chhōa chhin-chiâⁿ pêng-iú kiâⁿ-chhun tek-pia̍t nāu-jia̍t, chhiáⁿ lâng-kheh tio̍h chian tiⁿ-kóe, ū-lâng kō͘ iû chìⁿ, kang-hu--ê kō nn̄g kauh soàn-á-chheⁿ, góa chiok kah-ì ùn tāu-iû, kài-chán ê pòaⁿ-kiâm-tiⁿ chu-bī.Bô lâng-kheh, iau-sâi siūⁿ-boeh chia̍h tiⁿ-kóe, tō chhài-to gia̍h--leh, chhiat chi̍t-tè léng-léng tēng-tēng tiⁿ-kóe-pang, mā-sī chia̍h-kàu chhùi ē tín-tāng.

Siāng-kài hoâi-liām ê chu-bī, tō-sī hang tiⁿ-kóe, thàn chàu-khang iáu-ū hóe-iām, chhiat chi̍t-tè tiⁿ-kóe-pang, khòe tiàm hóe-ngeh, long ji̍p-khì chàu-khang hang, hang hō͘ tiⁿ-kóe nńg-khiū puh phok-á ná chhoán-khùi, tō ē-sái-tit the̍h-lâi chia̍h, tio̍h sè-jī, m̄-thang thǹg-tio̍h chhùi-chi̍h, hit-chióng chu-bī chhù-bī kàu-taⁿ iáu-koh ē-kì-tit.

Tiⁿ-kóe teh-nî, chi̍t-pho͘ tiⁿ-kóe chia̍h-kàu chhe-gō͘-keh-khui, jî-chhiáⁿ kàu chiaⁿ-goe̍h cha̍p-gō͘ siāng-goân iáu-ū thang pài-pài, in-ūi bô pau-āⁿ koh-ū chhiau-thn̂g ē-tàng hông-hú, sam-put-gō͘-sî liū-liū--leh, ē-tàng khǹg chin-kú, kì-tit ū chi̍t-nî chheng-bêng, a-só chian chi̍t-pôaⁿ tiⁿ-kóe chiūⁿ-toh, chin-chiàⁿ hi-hán ê kháu-hok.