Pe̍h-hún nā giâ： Lahjih 詩歌20190723

Pe̍h-hún nā giâ：    Lahjih 詩歌20190723

Pe̍h-hún nā giâ 

soaⁿ

tō hoaⁿ-hí

chiáu-á hioh tī chhiū-nâ-lāi

chhiùⁿ koa-si

Pe̍h-hún nā poe

chúi

tō chiò-kiàⁿ

chúi-iáⁿ chhiō tī Jit-goa̍t-thâm

ōe san-súi

Pe̍h-hún nā koân

lâng

tō taⁿ-thâu

ba̍k-chiu siòng tī Sin-ko-soaⁿ

ū-kàu súi

Pe̍h-hún nā kē

soaⁿ

tō tì le̍h

hûn-ang tà tī Bí-lûn-soaⁿ

chiok bí-lē

離心力濺水：

離心力濺水（Lî-sim-le̍k chōaⁿ-chúi）：

Bo̍k-koe chi̍t-châng, chhú bo̍k-koe-koáiⁿ chi̍t tōa-chat；

tōa-kha bīn-tháng té-chúi tīⁿ-tīⁿ；

chi̍t-ki chhiú tēⁿ bo̍k-koe-koáiⁿ toa-kóng hit-pêng, chìm tī chúi-té hiòng-thiⁿ tāi-iok sì-cha̍p tō͘；

chiàⁿ-pêng tò-pêng iô tín-tāng, chúi tō-ē tùi kóng bóe chōaⁿ--chhut-lâi.

Goân-lí：

tōa-khì ap-le̍k phòe-ha̍p lî-sim-le̍k, sán-seng chōaⁿ-chúi hāu-kó.

tng bo̍k-koe-koáiⁿ iô tín-tāng, koáiⁿ lāi khong-khì pâi-chhut, chúi-bīn tāi-khì-ap-le̍k chū-jiân sak-chhut, sán-seng chúi-chōaⁿ hāu-kó.

木瓜桿，大管彼爿，向天，正爿，倒爿，搖振動，排出，大氣壓力，水濺。

田中媽祖 Tiân-tiong Má-chó͘： Lahjih 詩歌 20190716

田中媽祖 Tiân-tiong Má-chó͘： Lahjih 詩歌 20190716

田中媽祖蹛田中（Tiân-tiong Má-chó͘ tòa Tiân-tiong）
廟寺名稱乾德宮（Biō-sī miâ-chheng Khiân-tek-kiong）
慈悲為懷香煙旺（Chû-pi ûi-hoâi hiuⁿ-ian ōng）
虔誠弟子欲出眾（Khiân-sêng tē-chú boeh chhut-chiòng）
認真拍拚向前衝（Jīn-chin phah-piàⁿ hiòng-chiân chhiong）
認真拍拚有理想（Jīn-chin phah-piàⁿ ū lí-sióng）

無線網路千里眼（Bô-sòaⁿ bāng-lō͘ chhian-lí-gán）
隨身家私望遠鏡（Sûi-sin ke-si bōng-oán-kiàⁿ）
無線耳機順風耳（Bô-sòaⁿ hīⁿ-ki Sūn-hong-gán）
隨時連絡隨時聽（Sûi-sî liân-lo̍k sûi-sî thiaⁿ）
輔佐天后保平安（Hù-chò Thian-hō͘ pó pêng-an）
風調雨順袂驚惶（Hong tiâu ú sūn bē kiaⁿ-hiâⁿ）

窗外窗內：

窗外  窗內：手機仔寫情絲          Lahjih詩歌20190709

窗外好光景

窗內好心情

拍開窗仔門

年年四季攏是心清

窗外雨水滴

窗內情意滇

免關窗仔門

日日早暗攏是甘甜

窗外寒熾熾

窗內燒烘烘

緊關窗仔門

時時刻刻攏是佮意

Thang-gōa thang-lāi :

Thang-gōa hó kong-kéng（窗外好光景）

Thang-lāi hó sim-chêng（窗內好心情）

Phah-khui thang-á-mn̂g（拍開窗仔門）

Nî-nî sù-kùi lóng-sī sim-chheng（年年四季攏是心清）

Thang-gōa hō͘-chúi tih（窗外雨水滴）

Thang-lāi chêng-ì tīⁿ（窗內情意滇）

Bián koaiⁿ thang-á-mn̂g（免關窗仔門）

Ji̍t-ji̍t chá-àm lóng-sī kam-tiⁿ（日日早暗攏是甘甜）

Thang-gōa kôaⁿ-sih-sih（窗外寒熾熾）

Thang-lāi sio-hōm-hōm（窗內燒烘烘）

Kín koaiⁿ thang-á-mn̂g（緊關窗仔門）

Sî-sî khek-khek lóng-sī kah-ì（時時刻刻攏是佮意）

Siông-lô-soaⁿ sîn-bo̍k（松蘿山神木）：

Siông-lô-soaⁿ sîn-bo̍k（松蘿山神木）：              Lahjih      20190712

Goán sī Benihi

阮是ベニヒ

Ū-lâng chheng-ho͘ âng-kòe, siông-lô, po̍h-phê-á, chúi-kó͘-sam

有人稱呼紅檜、松蘿、薄皮仔、水古杉

Tǹg-kî tòa-tī siông-lô-soaⁿ

長期帶佇松蘿山

Cho̍k-chhin chhut-miâ kî-ló jia̍p-it châng

族親出名耆老廿一欉

Kah chi̍t-ūi Tâi-oân píⁿ-peh

佮一位台灣扁柏

Kāu-khak-á, siông-lô, hinoki, kòe-bo̍k  láu tōa-ko

厚殼仔、松蘿、ひのき、檜木​老大哥

Gō͘-pah hòe sǹg siàu-liân-hiaⁿ

五百歲算少年兄

Nn̄g-chheng peh-pah tang kāng-khoán ióng-kiāⁿ

二千八百冬共款勇健

Ū-sî kám-kak khah ko͘-toaⁿ

有時感覺較孤單

Hó-ka-chài ū lín lâi chò-phōaⁿ

好佳哉有恁來做伴

Chhim-soaⁿ-nâ-lāi ū chheng-khì khong-khì

深山林內有清氣空氣

Goán mā chiok-ài chheng-khì thô͘-kha

阮嘛足愛清氣塗跤

Chhiáⁿ lín m̄-thang kā-goán mo͘h kā-goán bong

請恁毋通共阮抱共阮摸

Chhian-bān m̄-thang tàn pùn-sò hō͘ goán

千萬毋通擲糞埽予阮

Chhiáⁿ lín him-sióng goán-ê oa̍h-la̍t

請恁欣賞阮的活力

O-ló goán-ê sèⁿ-miā

呵咾阮的性命

Lín kám chai

恁敢知

Chū-kó͘ kàu-taⁿ

自古到今

Goán tō sī Ilha Formosa Tâi-oân goân-chū-bîn

阮就是Ilha Formosa台灣原住民

Lín chó͘-má mā-sī chū kó͘-chá

恁祖媽嘛是自古早

Tō kah goán chò-hóe seng-oa̍h

就佮阮做伙生活

Sui-bóng ū hoān-tio̍h sat-kài

雖罔有犯著殺戒

Chóng--sī chai-iáⁿ m̄-tio̍h chai-iáⁿ hóe-kái

總--是知影毋著知影悔改

Án-ni lán-ê kè-siok oa̍h-miā tō ū ì-gī

按呢咱的繼續活命就有意義

註：

拉拉山神木，有21欉紅檜Chamaecyparis formosensis 松蘿、薄皮、水古杉、Benihi、ベニヒ，1欉台灣扁柏（學名：Chamaecyparis obtusa var. formosana、厚殼仔、台灣黃檜、松梧、Taiwan Hinoki，ひのき檜木是柏科扁柏屬大喬木。

2019年7月9日遊拉拉山(達觀山)自然保護區神木群步道，用手機仔全景翕相。因為跤疼tăⁿ恢復行遠路，m̄-káⁿ行siuⁿ-thiám，kan-nā行到第五號神木，猶有十外欉無翕。

Su-sóng： Lahjih_20190704

Su-sóng： Lahjih_20190704

Thàu-chá sai-pêng thiⁿ-téng
Siang-seⁿ hûn-ang sio-phōaⁿ
Chhân-hōaⁿ liâng-hong tiū-phang
Thè-hiu lāu-lâng tī chng-kha
舒爽：
透早 西爿 天頂
雙生 雲尪 相伴
田岸 涼風 稻芳
退休老人佇庄跤

Khó͘-hu-chhia-á（苦夫車仔）：

Khó͘-hu-chhia-á（苦夫車仔）：      Lahjih_20190703

Chit-ki chhâ-ko nn̄g-siâm tn̂g, chi̍t-lâng chi̍t-ki khiā si-hng, siang-kha chāi-chāi chhut-la̍t thuh, lēng-gōa chi̍t-ê kò͘ tòng-kùn, sì-lián tâi-chhia cháu chin-hn̄g, chhia, chi̍t-tâi, sì-lâng kng.

一支柴篙兩尋長，一人一支徛四方，雙跤在在出力托，另外一个顧擋棍，四輪台車走真遠，車，一台，四人扛。

Khó͘-hu-chhia-á kiâⁿ thih-ki, ná thuh ná theⁿ chiâⁿ léng-lī, sì-lâng kâng-sim ū be̍k-khè, tn̄g-tio̍h kòe-kiô tio̍h sè-jī, sì-ki ko-á tio̍h gia̍h-khí, heh ! chi̍t-siaⁿ, poe--kòe-khì.

苦夫車仔行鐵枝，那托那撐誠伶俐，四人仝心有默契，搪著過橋著細膩，四支篙仔著攑起，嘿！一聲，飛過去。

Ū-sî theⁿ-chhia ū-sî sak, tn̄g-tio̍h hóe-chhia boeh sio-tak, kóaⁿ-kín poaⁿ-sóa thih-lō͘ piⁿ, nn̄g-cho͘ thih-lián tāng-iⁿh-iⁿh, kha-bé soah-chāi la̍t tio̍h-tèⁿ, uh ! chi̍t-ē, kiò á-i.

有時撐車有時捒，搪著火車欲相觸，趕緊搬徙鐵路邊，兩組鐵輪重盈盈，跤馬煞在力著瞪，uh！一下，叫阿伊。

Khó͘-hu-chhia-á khó͘-hu sái, thih-lō͘ an-choân bē chhìn-chhái, chit-tah oân-sêng ōaⁿ hit-tah, kiám-cha siu-lí lóng-chóng ài, ū-kàu thiám-thâu m̄-káⁿ ai, hioh ! chi̍t-khùn, kè-siok laih.

苦夫車仔苦夫駛，鐵路安全袂凊彩，這搭完成換彼搭，檢查修理攏總愛，有夠忝頭毋敢哀，歇！一睏，繼續來。

1953年讀田中第一國民學校，員集路土地公廟前ê五分仔車平交道，是上學放學一定著行ê路站，時常看貨車載白甘蔗、客車載人客來來去去，mā bat坐載貨車囝去溪州，chiah koh步輦去看西螺大橋遠足。Siāng-kài稀罕siāng-kài心適，tō是看苦夫車快速leh奔走，看四個苦夫，手攑柴篙仔撐苦夫車仔ê特技。

古早五分仔車鐵枝路ê道班工叫做苦夫仔，是守護、修護鐵枝路安全ê工人，工課粗澀ngē-táu。四個人操作一台苦夫車（四輪台車），一个人顧擋棍。苦夫車是活動組合ê台車，兩組四輪火車輪，頂面khòe車台，無動力，完全靠人工sak，抑是kō͘柴篙仔thuh塗跤ná撐渡船，頂面囥家私材料，tó位鐵枝路需要修理，tō sak到tó位。

鐵枝路，有peh崎tō有落崎，peh崎需要用捒--ê，落崎tō輕輕鬆鬆，有時趕工課，四人同時撐車走ná飛，扞擋棍非常重要，一下無細膩tō-ē péng車。苦夫工雖罔kap ku-lí工仝款粗澀硬篤，總--是做苦夫仔m̄-nā著體力，閣著技術才能，為著守護、修護鐵枝路，維護行車安全，實在值得咱ê尊敬。