縛粽_unicode Lah-jih 2011/6/5

縛粽_unicode Lah-jih 2011/6/5

五日節tih-beh 到，阿媽已經tī 厝後leh 挽粽ha̍h 仔，準備beh 縛粽。

「阿媽！挽粽ha̍h 仔beh 縛粽hō͘ 我食--ho͘ⁿ ！」

「hiô --lah！明仔載五日節--à neh ，tio̍h 拜乖，ài 拜神明，嘛ài 拜公媽。」

「人我知影，老師講，五日節就是『端午節』，是leh 紀念『屈原』--ê ！」

「啥物『痴緣』阿媽m̄-bat ，阿媽kan-nā 知影五日節tio̍h 縛粽，縛hō͘ 阿孫--ê 食，阿孫--ê 上愛食肉粽。」

「阿媽，阿媽！我問你一句俗語--ō͘ ，「五日節粽無食，破裘仔m̄ 甘放。」是啥物意思？che 是老師kā 阮講--ê。」

「乖孫--ê，你beh kā 阿媽考試--hio͘h ？ah che 阿媽知影，tio̍h 是講五日節粽若食過，tio̍h m̄ 免閣穿厚衫仔--lah ，tio̍h--bò ？」

「阿媽！啥物是裘仔？」

「寒天穿ê 大衣--lah ，內裡有鋪綿仔，tio̍h 是過年前阿公買hō͘ --你hit 領。」

『謝謝！』「阿媽！阿媽，我閣問你一個問題，哪會逐擺阿媽攏ài 挽厝後壁chit bô͘ 麻竹ê 葉仔來包肉粽？」

「你m̄ 是講上合意阿媽縛ê 肉粽？」

「是--ā ，阿媽縛ê 肉粽特別好食，kap 外口買--ê 無仝，親像有一種無仝款ê 芳味。」

「hit 種芳味tio̍h 是麻竹葉仔ê 芳味--lah ，m̄-chiah 講做粽ha̍h 仔，用taⁿ -á 挽ê 竹葉仔縛肉粽上蓋芳。」

「也無--à ？」我kā 手裡ê 粽ha̍h 仔phīⁿ 看覓--leh 。

「等盈暗sa̍h 粽ê 時陣你tio̍h 知！」

原來he tio̍h 是阿媽縛肉粽ê 祕訣。

食暗飽，阿媽kap 媽媽tio̍h 開始縛肉粽，粽餡用一kâi 坩仔貯--leh ，有香菇炒半肥瘦ê 豬肉，嘛有tong 蝦，蝦pi-á ，炒kah 足芳--ê i̍另外糯米lām 生土豆仁chhiau-chhiau 做一ē ，khǹg-tiàm 鍋仔內，早起阿媽挽ê 粽ha̍h 仔洗好khǹg-tī 一kha 竹籃仔內，兩隻有靠背ê 椅仔ê 靠背頂，khòe 一支畚擔，畚擔中央套兩kōaⁿ 用鹹草做ê 粽kōaⁿ ，阿媽、媽媽，一人坐一旁，粽料囥中央，親像兩個人beh 比賽ê 款式。我想著liâm-mi̍h tio̍h 有肉粽thang 食，煞bē-giàn 出去chhit-thô ，tio̍h 搬一塊圓椅頭仔坐tiàm 邊--a 鬥鬧熱。

「媽媽！你kap 阿媽相拚，啥物人較緊？」

「當然嘛阿媽，阿媽是縛粽師傅，媽媽是師仔，leh kap 阿媽學，你tiām-tiām看，mā kā 阿媽ê 功夫學--起來！」

「阿媽！我嘛beh 縛粽。」

「好！坐倚來阿媽chit 旁，阿媽kā 你教：

乖孫--ê ，你看！阿媽提兩phòe 粽ha̍h 仔，按呢kā 拗起來，下旁尖尖遐ài 相疊，chiah bē hō͘ 糯米chuh --出來；閣來khat 二匙仔糯米kap 土豆--落去，m̄-thang 傷濟，煞落去beh 囥粽餡，嘛是用湯匙仔khat ，一粒粽囥一蕊香菇、一塊豬肉，khat 無著香菇、豬肉tio̍h ài 添，加--ê ài 提起來，餡傷少無好食，傷濟嘛無好食，拄好上要緊。」阿媽沿路講沿路縛，ta̍uh-ta̍uh-á kā 我教。

「O͘h！hiah 呢費氣--ò͘ 」

「O͘h！到 taⁿ 你chiah 知，你--ò͘ ！阿不姊--à ，kan-nā 會曉beh 食beh 食--niâ ！」媽媽笑笑仔講，hō͘ 我感覺歹勢歹勢。

「乖孫--ê ，bē --lah ，tio̍h-ài 有耐心，chiah 做有好頭路。餡囥好，tio̍h 閣下一寡米，然後包粽ha̍h 仔，注意看--ō͘ ，按呢拗過來，chiah 閣按呢拗--過去，thóng 出來ê 部份，chiah 閣捏捏按按--leh ，一粒粽已經包好，煞落去tio̍h-ài kā 縛tiàm 粽kōaⁿ ，縛hō͘ 拄好仔ân ，siuⁿ-ân 會chuh 出來，siuⁿ-lēng 會lak 去，che tio̍h 靠經驗，有影``講kah hō͘ 你bat ，嘴鬚tio̍h 好扑結。``猶有--ō͘ ！扑結tio̍h 扑活結，m̄-thang 扑死結，beh tháu 粽m̄-chiah 會好tháu 。」

「阿媽！mài 講hiah 呢濟--lah ，人聽kah bū-sà-sà ，後擺chiah kap 你學，人kan-nā 想beh 食粽--lah ！攏m̄ 卡緊咧--ō͘ 。」

「嘴箍leh chhoah --à ，m̄-chiah 按呢吵？先去sńg --一時à ，等--一下轉來tio̍h 有肉粽thang 食。」i̍i̍i̍

「O͘h ！足芳--ê ，芳kòng-kòng 、kòng-kòng 芳，阿媽！我beh 食肉粽。」tī 門口埕kap 人sńg 一時仔，tio̍h phīⁿ 著肉粽味，趕緊chông --轉來。

「乖孫--ê ，猶未熟--lah ，閣去chhit-thô ，liâm-mi̍h chiah 轉來食！」

「阿媽騙--人，我有phīⁿ 著肉粽味，芳kòng-kòng 、kòng-kòng 芳，害人leh 流嘴齒nōa --neh ，mài kā 人騙--lah ！」

「阿媽無kā 你騙，肉粽猶未熟--lah ！m̄ 信，去灶頭鼎頂phīⁿ 看覓，tâⁿ sa̍h 無外久，m̄-koh 肉粽芳味已經走--出來à ！真芳--hǹN ！」

「Ḿ！足芳--ê ，一定真好食！」……

「母--à ，會使chit 起鼎--未？」聽媽媽問阿媽，又閣hō͘ 我吞嘴瀾。

「掀khit 來看覓，應該熟--à ！」

「我來tháu 一粒試看覓！」i̍「阿母！你食看--leh ，看米心有透--無！」

「熟--à ，sa̍h 了chiâⁿ 拄好khiū ，」看阿媽食一嘴，害我吞一下嘴瀾，「來！乖孫--ê ，先hō͘ 你食看覓，liâm-mi̍h 起鼎較冷了後，chiah 閣hō͘ 你食一粒！」

「多謝阿媽！」阿媽縛ê 肉粽，實在好食，阿媽講了無m̄ 著，用生粽ha̍h-á 包ê 肉粽，無仝款tio̍h 是無仝款。

「阿媽！我beh 閣問你一個問題，五日節除了拜拜食肉粽以外，敢猶有啥物節目？」

「五月五，龍船鼓。」

「阿媽！你講啥？」

「五月五，龍船鼓。Tio̍h 是講有人leh pê 龍船，pê 龍船ê 時陣，tio̍h 有一個人leh 扑鼓，tin-tong 叫， chiâⁿ 鬧熱，我是tī 電視頂看著--ê 。」

「阿媽！嘛有人chhāi 雞卵、鴨卵比賽，我嘛是tī 電視頂看著--ê ，明仔載中晝咱嘛來chhāi 看覓--leh 好--無。」

「好！等恁阿爸轉來，chiah 去買寡雞卵轉來，嘛kā 恁阿爸講，阿媽明年beh 去鹿港看pê 龍船，tio̍h 會記得--ō͘ 。」

「好！阿媽！我beh 閣食一粒！」

「Beh 食家己去tháu ，chit 粒食了tio̍h m̄-thang 閣beh ，食傷濟，會歹腹肚。」

「好！」

肉粽實在好食！我上合意食阿媽縛ê 肉粽，糯米做--ê ，用生麻竹ha̍h-á 包--ê ，khiū-khiū 芳芳，包土豆仁、瘦肉、香菇、蝦仁……

縛粽！縛肉粽！麻竹ha̍h-á 縛ê 肉粽！阿媽縛ê 肉粽！好食！hō͘ 人想著嘴瀾水一直流！