Siang-kóng--è in兜ê寶貝 Lah-jih_20110915

Siang-kóng--è in兜ê寶貝 Lah-jih_20110915

Siang-kóng--è是清水--è ê後生，減Lah-jih 2-歲，toà Lah-jih in隔壁ê隔壁內底，阿爸是掃梳跤，時常掃ùi in-tau去chhoē清水--è phò-tāu，Lah-jih kap Siang-kóng--è mā時常tàu-tīn sńg。

是按怎ē kā號做Siang-kóng--è？有可能是伊gâu流鼻，tiāⁿ-tiāⁿ 雙港流，mā有可能kap hit-chūn美軍空襲台灣時，有一種飛龍機是雙管--è有關連。其實Siang-kóng--è 本名叫A-chiàng，kap Kiû-á兄in A-chiàng仝名，m̄-chiah逐个攏慣勢叫伊Siang-kóng--è，chiah-bē叫m̄-tio̍h人。hit-chūn是日本時代，tng leh推sak「皇民化」，囡仔號名加減攏有日本味，像Lah-jih to̍h是日本名ê變音，阿爸、阿兄無讀冊，bē-hiáu日本話，kap chit-má ê老一輩，講he北仔話攏ē台語腔仝款，改變人ê語言實在無簡單，m̄-koh去hō͘人改換語言ê族群，為著生存，有人歡歡喜喜toè人學toè人講，有心ê人卻是tio̍h-ài鬱卒kui世人。

Siang-kóng--è in-tau有2項寶，1-téng轎kap 1-kâi譀鏡(hàm-kiàⁿ)，hit-téng轎chit-má猶tī--leh。

轎，tī 五,六十年前是上等ê交通工具，先生(醫生)往診需要chhiàⁿ轎hō͘伊坐；先--e(地理師/算命師)boeh出門tio̍h坐轎；老歲仔人boeh去hō͘先生看，有錢chhiàⁿ轎kā伊扛，無錢to̍h用āiⁿ(偝)--ē；娶某tio̍h用新娘轎娶入門；送亡者chiūⁿ山頭，大孫一定tio̍h坐大孫轎。扛轎需要2个人，遠路需要1,2个人做よび/yobi/預備，所以扛轎有轎班，二伯人koân大，漢草好，是其中1个。清水--è hit-téng轎是chhíⁿ色--è(藏青色)，素素--à，m̄-koh若tn̄g-tio̍h娶新娘，to̍h-ē nê八仙彩妝súi-súi，頭前面koh有he八音chhoā路：「2个扛hō͘ 1个thiòng，2个扛hō͘ 1个thiòng…(51 65 61 5/51 65 62 1/…)」jăo鬧熱joă趣味--leh-neh！

Siang-kóng--è in-tau另外hit个寶貝「譀鏡」，有影hàm-koa̍h-koa̍h，鏡內ê人kap鏡外ê人無仝，鏡內ê面形攏變形，變kah 奇奇怪怪，變kah真驚人。見擺若去in-tau chhit-thô抑是ī珠仔tèng kan-lo̍k，Siang-kóng--è to̍h-ē ia̍t手叫去in ī--ā 房間看譀鏡，有時tiau-kang kek鬼仔面照，Siang-kóng--è soah咻咻叫m̄-káⁿ看，講he是魔鬼鏡，

「m̄是--lah！既然號做譀鏡當然mā hàm-koa̍h-koa̍h，he是科學關係。」

「啥物是科學關係？」

『莫宰羊？』

1擺看1擺趣味，「這是啥物怪物件？」the̍h--tio̍h 重重，像切做爿ê鐵子(鉛球)hiah大粒，內面au-au金金親像鏡，m̄-koh m̄是玻璃，外殼厚厚，真正怪寶貝，莫怪Siang-kóng--è 寶ni-ni，無隨便借人看。

對這个「譀鏡」ê好奇，一直到讀初中chiah得著答案，to̍h是「譀鏡」無m̄-tio̍h，m̄-koh m̄是老歲仔人leh看字hit種譀鏡，老歲仔人leh看字he是thang光--e，雙面phok-phok(凸凸)，叫做『凸透鏡』，Siang-kóng--è in hit-kâi 無通光，叫做『凹透鏡』，m̄-tio̍h！是『凹鏡』，chit-má想想--leh，Siang-kóng--è in hit-kâi 無通光ê『凹鏡』，有可能是醫生leh看目睭抑是嘴齒，集中光線ê家私mā無一定？