2014年9月8日 星期一

三兄弟股一條瓊麻索 Lah-jih_2007.07.15

三兄弟股一條瓊麻索

瓊麻就是龍舌蘭,俗稱樹絲,因為伊樹葉ê纖維,韌koh m̄驚水浸,提來股索á,堅固耐用,是討海人ê重要工具,南部出產kài chē。

用瓊麻股索á是m̄-bat看過,用黃麻絞索á,m̄但bat khoàiⁿ,囡á時代mā bat kap大人絞過,不過絞--è是兩股ê索á,絞三股--è就無迄款功夫。

過去生活tī庄腳ê作穡人,擔擔ê畚箕、米lôa ài縛索á,載貨、縛柴ài用索á liàu,牽牛、駕kha車、駛田、捆豬、拖車…步步lóng tio̍h用索á,索a2ti7田庄所在是生活必須品。細條索á用雙手撚,抑是tiàm腳頭u搓就會使chit,大條索若無用家私頭á來股,是無可能ê代誌,過去作田人若有閒工,就三五個招--leh,互相tàu相仝,扑幾條á索a2khng3-lehthang用。

股索a2ai3用絞索á機,he是一套用木材做ê工具,前車是四角型ê框架,kah黏tī椅條頂,有三kâi孔,穿三支ㄣ字形ê鉸á,前面會凍結索á,後面用一塊竹phòe鑽三kâi孔,拄好lop-tī三支絞á,thiòng-á三支同齊股tín動;後車kan-nā一支柴柱,半人koân ê所在mā戳一孔,仝款穿一支ㄣ字形ê絞á;另外有一粒羊á頭形ê tēng柴,刻三條溝,beh hō͘三股ê黃麻khòa tī溝內,chiah會凍平平順順、pêⁿ-pêⁿ正正股成一條索á。

股索á tio̍h-ài三個人,一個hōaⁿ前車,顧hit三支絞á ê運轉,絞正絞,一個固定後車,用倒手挽hit支柴柱hō͘固定,kohtioh8用正手股絞á,而且ài倒絞,hōaⁿ羊á頭chiah是師傅,索á絞會súi lóng tio̍h靠iê功夫kap指揮。

Chit-mái開始beh絞索á--lò͘:前車先絞一支絞á,師傅提黃麻皮套tiàm絞á頭,然後一皮一皮紡,紡一條五丈長ê無股ê索á,chiah koh紡一條兩丈半--è,五丈--ē拗做兩koe̍h,套tī後車,尾節套tī前車,chit-má前車三支絞á縛三條索,後車一支絞á mā縛三條索,師傅掠羊á頭ùi前車hit旁套好勢,然後一聲開始,前後車股無停,師傅hōaⁿ羊á頭順索á股一直倒退lu,後車一直股一直hō͘索á khiú晉前,手挽腳kēng,驚做索á傷lēng,索á若傷lēng,絞khit來ê索á一定phàⁿ-phàⁿ,bē堅固耐用。

後車哪會行晉前呢?因為索á愈絞愈ân soah愈絞愈短,本來是兩丈半,絞好可能chhun兩丈兩尺,kiu三尺算真正常。一條絞好即koh絞一條,beh大beh細,由在師傅斟酌soah黃麻,黃麻若soah chē,索á自然大條,黃麻若soah少,索á當然細條,若是絞兩股ê索á就卡簡單,可惜bē勇mā卡pháiⁿ看頭,he是師á工學絞,絞chhit-thô--ē。

「三兄弟股一條瓊麻索」,若有和協會齊,he是真簡單,團結就是力量,看田庄人絞索á就是上好ê證明,早當時阮田庄兄弟leh絞索á,無一定是親兄弟,卻是合作團結ê力量是無teh比,因為庄內ê厝邊隔壁lóng若親兄弟,過去ê庄腳人,m̄免去強調啥物『敦親睦鄰,守望相助』,庄頭ê安全就顧kah好勢好勢,時代leh變,社會一直變遷,古早味,古早ê人情味,使人懷念。

「三兄弟絞一條黃麻索」ê『團結力量』,會凍hō͘無論是國民黨、民進黨抑是新黨ê兄弟做參考,「團結」ê團體,chiah是有向望--ē。
【註解】:1.瓊麻:khêng-môa。2.纖維:chhiam-ûi。3.韌:jūn。4.股:kó͘。絞。5.索á:[繩子]。6.kài chē:真chē。7.擔擔:taⁿ-tàⁿ。8.米lôa:米籮。9.liāu:[纏繞tio̍h綁物]。10.kha車:駕牛ê器具。11.步步:逐項。12.撚:lián。13.腳頭u:[膝蓋]。14.搓:so。15.家私頭á:工具。16.khǹg-leh thang用:[放tio̍h備用]。17.kah黏tī椅條頂:[架在長板凳上]。18.三kâi孔:三個洞。19.竹phòe:[竹片]。20.lop-tī:套進在…]。21.thiòng-á:thèng-hó(聽好),可以。22.戳:chha̍k,鑿。23.tēng柴:[硬木頭]。24.khòa tī:[擱置在…]。25.hōaⁿ前車:操作機器叫hōaⁿ。26.絞正絞:[右旋轉]。27.挽:bán,[用力挽住]。28.正手:[右手]。29.倒絞:[反轉]。30.無股ê索á:親像大條紗á。31.拗做兩koe̍h:[折成兩節]。32.倒退lu:[倒退走]。33.khiú:giú、[拉]。34.手挽腳kēng:[手腳並用、穩住木柱]。35.傷lēng:[太鬆了]。36.phàⁿ-phàⁿ:[鬆鬆的,不夠堅固]。37.ân:[緊]。38.kiu:[縮]。39.soah黃麻:[一片一片加黃麻下去]。40.bē勇:[不堅固耐用]。41.和協會齊:[同心協力]。

沒有留言:

張貼留言