金婚記念日牽手進行式： Lah-jihlj_20190213

金婚記念日牽手進行式：    Lah-jihlj_20190213

「有錢無錢，娶某過年。」50冬前真正tī chit款情形下完成終身大事。結婚hit工是1969年2月13日(咱人過年前3工，農曆12月27日)，斯當時tăⁿ退伍2 kó͘外月，並無粒積存錢，攏是大兄借錢發落聘金，閣辦50桌鬧熱宴席。真正滿50週年金婚記念日是今年2019年2月13日，並m̄是咱人過年前3工。

無初戀無熱戀kan-na熟似見面2-3擺tō決定牽手行向未來ê傳統婚姻，主要原因是一个想boeh娶一个想boeh嫁，因緣到位才結了姻緣，ē記得洞房hit暝有kā牽手講：「咱chit-mái開始來戀愛！」tō佇結婚戀愛中，開始互相了解互相扶持，共同phah拚家己ê未來經營家己ê人生。

散教員，經濟需要牽手tàu相共，kah目是意愛ê開始，it-tio̍h ē-tàng tàu趁錢是現實ê條件，牽--e一手西裝師傅功夫真正是經濟上大幫贊，我mā無失伊ê禮，真緊tō ùi師仔工學到ē-hiáu裁剪車紩ê褲師，婦唱夫隨經營西裝社。有我教師月給kap店面收入，chiah有才調養飼栽培4个囡仔大漢、教育、嫁娶。

前25冬為經濟phah拚，牽--e經營西裝社兼家庭主婦，我是學校教冊下班kā牽--e tàu跤手，一个家庭ùi無到有，會得kap人比phēng徛起，三頓會得過，囡仔會得歡歡喜喜讀冊過日，攏是佇khiû-khiû儉儉利不及費，先賒先借計畫中經過，第一要緊tō是m̄-thang hō͘四個囡仔有缺乏ê壓力。

稅厝徛有九冬，搬徙三擺，厝稅月月ân，mā有搪著chau-that橫逆ê人情冷暖，總--是tī牽--e ê穩在智慧中幫贊渡過難關。tō tī稅厝徛九冬後蓄一間11坪闊兩樓徛家，m̄-nā囡仔自在讀冊，大人mā感覺自在有目標。

後25冬行入台語文運動，phah拚學習台語文書寫推sak事工，因為有牽手賢慧骨力做後撐，chiah-thang穩穩在在做出一寡成績貢獻一寡能力，雖罔m̄是夫唱婦隨，牽--e放心hō͘我四界行踏支持台文運動，百分之百ê助力，牽--e功勞佔一半。

想起50冬前是烏白片人生，記智深刻，永遠無退色，牽手行到此當今進入彩色世界，歡喜兩人生活綴有著時代，mā歡喜繼續行向未來。

「有錢無錢，娶某過年。」50冬前真正tī chit款情形下完成終身大事。結婚hit工是1969年2月13日(咱人過年前3工，農曆12月27日)，斯當時tăⁿ退伍2 kó͘外月，並無粒積存錢，攏是大兄借錢發落聘金，閣辦50桌鬧熱宴席。真正滿50週年金婚記念日是今年2019年2月13日，並m̄是咱人過年前3工。

無初戀無熱戀kan-na熟似見面2-3擺tō決定牽手行向未來ê傳統婚姻，主要原因是一个想boeh娶一个想boeh嫁，因緣到位才結了姻緣，ē記得洞房hit暝有kā牽手講：「咱chit-mái開始來戀愛！」tō佇結婚戀愛中，開始互相了解互相扶持，共同phah拚家己ê未來經營家己ê人生。

散教員，經濟需要牽手tàu相共，kah目是意愛ê開始，it-tio̍h ē-tàng tàu趁錢是現實ê條件，牽--e一手西裝師傅功夫真正是經濟上大幫贊，我mā無失伊ê禮，真緊tō ùi師仔工學到ē-hiáu裁剪車紩ê褲師，婦唱夫隨經營西裝社。有我教師月給kap店面收入，chiah有才調養飼栽培4个囡仔大漢、教育、嫁娶。

前25冬為經濟phah拚，牽--e經營西裝社兼家庭主婦，我是學校教冊下班kā牽--e tàu跤手，一个家庭ùi無到有，會得kap人比phēng徛起，三頓會得過，囡仔會得歡歡喜喜讀冊過日，攏是佇khiû-khiû儉儉利不及費，先賒先借計畫中經過，第一要緊tō是m̄-thang hō͘四個囡仔有缺乏ê壓力。

稅厝徛有九冬，搬徙三擺，厝稅月月ân，mā有搪著chau-that橫逆ê人情冷暖，總--是tī牽--e ê穩在智慧中幫贊渡過難關。tō tī稅厝徛九冬後蓄一間11坪闊兩樓徛家，m̄-nā囡仔自在讀冊，大人mā感覺自在有目標。

後25冬行入台語文運動，phah拚學習台語文書寫推sak事工，因為有牽手賢慧骨力做後撐，chiah-thang穩穩在在做出一寡成績貢獻一寡能力，雖罔m̄是夫唱婦隨，牽--e放心hō͘我四界行踏支持台文運動，百分之百ê助力，牽--e功勞佔一半。

想起50冬前是烏白片人生，記智深刻，永遠無退色，牽手行到此當今進入彩色世界，歡喜兩人生活綴有著時代，mā歡喜繼續行向未來。