台語文運動者台語文推sak勇跤陳福當老師：Lah-jih_20190217

台語文運動者台語文推sak勇跤陳福當老師：Lah-jih_20190217

濁水溪水kòng-kòng流，台文路愈行愈大條。

福當老師：

你ê聲影留tī阮記智，你ê付出奉獻hō͘台灣母語，你先歇睏，轉去kah祖先講咱ê話，阮boeh繼續行，向望咱ê囝孫ē-hiáu講咱ê台語。

2019年2月11日暝昏，佇Facebook面冊看著彰化楊婷婷老師ê貼文：「咱敬愛的陳福當老師蒙主寵召，無病痛去做仙矣！」

一時gông-ngia̍h回應：「雄雄一聲脆雷，27冬戰友已經遠遊天國，m̄甘mā著送你離開。福當兄，我ê妻舅，你著寬寬仔行，歡喜轉去天爸身邊。」

紲落去規粒頭殼攏是阮鬥陣推sak台語文南北二路來來去去ê身影，27冬ê交陪，攏是為著復振台語、推sak台語文，一直到退休猶原無停睏，想bē到陳福當老師提早轉去天父身軀邊。

1991年5--月，學校派我參加一个鄉土文化研習，頭擺接觸十五音，會場買一本《彙音寶鑑》開始自修台語音韻，隔轉年1992有一位洪老師招幾个老師做伙學習《彙音寶鑑》切音，自按呢kah陳福當老師熟似（後--來才知影是阮牽--e ê叔伯小弟）。

1993年2月～6月，彰化縣政府派陳福當，游麗津，王淑芬，洪維彬四位老師，去清華大學語言所旁聽鄭良偉教授ê「台語專業課程研習」，對台語聲韻，Pe̍h-ōe-jī，漢羅lām寫ê台文書面語，攏有誠深入ê認識。

1993年熱--人，教育局tī社教館辦「台語讀寫」研習，鄭良偉教授教阮「漢羅lām寫」台文觀念，即時hō͘我有才調寫出第一篇台文《阿爸ê鹿角薰吹》。

1993年陳福當老師tī彰化成立〈台文通訊讀者聯誼會〉，逐個月第三禮拜五暗時7點，借用翁金珠立法委員彰化服務處定期聚會，研讀1991年7--月踮Los Angeles創刊ê《台文通訊》雜誌，練習台語文閱讀，學習Pe̍h-ōe-jī，稽考台文漢字，攏是陳福當老師chhoā頭帶動，用心經營，雖罔人數無濟，總--是連紲10 gŏa外冬歲月，m̄-bat斷站，我mā chiâⁿ做忠實會員，ùi田中（Chhân-tiong-ng）駛車準時報到，出席率達12分之11。手寫稿《阿爸ê 鹿角薰吹》tō是陳福當老師幫我投稿--è，發表tī《台文通訊》第24 期，陳福當老師算是我趣味寫作ê貴人。

1993年周清玉縣長主政期間，佇10月～12月底，舉辦「彰化縣中小學教師台語研習」，分南北二區同齊進行，利用禮拜三ê下晡研習，參加老師每區大約100名，講師有陳福當，游麗津，王淑芬，楊振裕，蕭平治，攏是陳福當老師計畫發落進行。

後--來周清玉縣長連任無成，鄉土教學換人主導，是陳福當老師激烈爭取主導權堅持用鄭良偉教授ê《精速台語羅馬字與規律》做研習教材，自按呢，Pe̍h-ōe-jī（白話字）chiâⁿ做彰化縣台語研習重要課題，陳福當，游麗津，王淑芬，楊振裕，蕭平治是斯當時重要推動老師，chit時才發覺陳福當老師有運動者個性魄力，因為有伊堅持勇敢爭取，阮chiah有資源進行台語文研習事工，陳福當老師是阮一tó͘勇ê前鋒。

2001年8月19日台灣羅馬字協會tī淡水成立，陳福當、楊振裕、蕭平治攏是創會會員並擔任第一屆理事，開始參與台語文運動。逐家出錢出力推動Pe̍h-ōe-jī推動漢羅lām寫台語文，每年暑假定期辦理世界台語文化營，阮ê跤跡ùi彰化縣擴大到全台灣。

2002~2005年翁金珠縣長主政期間，是大發揮ê四冬。佇「彰化縣母語諮詢委員會」中，阮建議採用漢羅lām寫方式辦理縣內老師台文研習方針，得著認同。因為陳福當老師向教育局極力爭取資源，四年來，辦理八擺36點鐘台語讀寫研習，全縣分八區同時研習進行，有講師有助理，mā有辦進階研習，培養講師人才。每擺研習攏訂規矩，需要符合出席率，需要考試通過，才ē-tàng提著研習分數、研習證書，有時閣會出練習宿題，hō͘少數老師感覺無爽快有壓力。

Hit當陣，楊振裕校長，陳福當老師kap蕭平治攏加入輔導團做台語輔導員，楊校長人緣好，溝通能力讚，華文台文功力閣強，有伊出面協調，各學校攏自動配合研習事工，蕭平治負責文書處理，出題，提供參考教材kap一寡個人作品hō͘學員參考，陳福當老師設計課程kah教育局連繫，當然猶有濟濟老師鬥相共。

上蓋欽服陳福當老師ê所在，tō是伊對事無對人ê堅持，著--è伊tō堅持到底，親像研習中學員講話擾亂氣氛，伊會提出警告，考試，有人偷看，伊會行倚老師身邊暗示，若是無效，伊會歹面對待「做老師會做弊是boeh按怎教學生？」惹起反彈伊mā無leh驚。總--是tī伊嚴格教學中，有真濟老師得著真大進步，攏o-ló感謝老師ê嚴教。

烏面--ē福當老師leh做，chiah hō͘阮擔任講師順利進行，講著陳福當老師，逐家攏mā比大垺翁o-ló kah觸舌。

一條水褲koe̍h-á，揹一跤烏色冊揹仔，罕得哈哈笑mā罕得gī-gī笑，m̄-koh阮攏知伊ê內心充滿溫暖溫柔有智慧ê愛心，kap伊交陪愈久愈有感受。退休後ê伊，除了繼續關心母語出席社團，伊mā開始peh山運動，siáⁿ知幾年前致著帕金森氏症，soah hō͘伊出入行踏無方便，想bē到最近住院期間，因為肺部感染soah蒙主寵召。

楊婷婷老師講：佇福當老師捐冊予台語文創意園區ê時，伊看--起來真清心，會當知影伊有共伊ê心願完成，tng當師娘共8、9箱冊，對厝裡四樓搬落來一樓時，老師ê喙尾微微仔笑，這是伊上大ê心願，一車滇滇滇ê冊，是伊一生ê財產，阮看，福當老師彼時ê心內，一定知影伊是為著台語ê前途做最後一擺ê舖排奉獻。

濁水溪水kòng-kòng流，台文路愈行愈大條。

福當老師，聲影留tī阮記智，付出奉獻hō͘台灣母語，你先歇睏，轉去kah祖先講咱ê話，阮boeh繼續行，向望咱ê囝孫ē-hiáu講咱ê台語。