kitchen灶跤04：

kitchen灶跤04：

番仔油燈tō是『媒油燈』。古早人暝時點火用塗豆油，號做油燈，現此時廟寺猶有leh點，因為塗豆油ē-tàng點火，你若聽人講「火油」，m̄-thang懷疑，tō是塗豆油--lah。後--來外國傳來石油提煉ê『媒油』，tō號名番仔油，因為有臭味，mā叫做臭油。

有玻璃閘仔ê番仔油燈較高級，大部份庄跤人點臭油攑，驚風 吹，用燈閘仔cha̍h。坐透早6點khòng 5分火車讀冊hit 3冬，阿爸tō用番仔油燈蝕油來chat時間叫我精神。boeh睏進前去別人兜看時鐘，然後kā番仔油添滇，m̄知阿爸一暝著精神幾擺，chiah-ē叫我起來準備。感恩ê番仔油燈。

電塗火（Acetylene lamp）是用無純ê鈣化物電石，hām水作用產生『乙炔氣』來點火，火光真iām，控制滴水ê速度ē-tàng調節火舌大細。

簡單式電塗火，黏錫[烙鐵]司傅用鉛鉼黏一个ná茶米管仔ê管仔，內管較短，內面貯電塗；外管較長做蓋用，頂面黏一个點火喙仔。

外管khàm內管bā-sǹg-sǹg，然後囥入去另外一个貯水ê銅管仔內面，利用Capillary action[毛細現象]作用，水ē微微仔sia̍p入管仔內kap電塗作用產生『乙炔氣』來點火。